Iesu e tāpe’a ra i te tamari’i

E ’orometua ha’api’i ’outou nō te mau tamari’i

’Ua pi’ihia ’outou e te Atua nō te ha’api’i i tāna mau tamari’i mai tā te Fa’aora i ha’api’i. ’Ua fa’ata’ahia ’outou i teie pi’ira’a nā roto i te mana o tāna autahu’ara’a mo’a. Noa atu ē, e ’ere ’outou i te hō’ē ’orometua ha’api’i ’aravihi, ’ia ora parau-ti’a rā ’outou, ’ia pure i te mau mahana ato’a, ’e ’ia tuatāpapa i te mau pāpa’ira’a mo’a, e hōro’a mai te Metua i te Ao ra i te fa’aurura’a ’e te mana o te Vārua Maita’i nō te tauturu ia ’outou ’ia manuia (hi’o 2 Nephi 33:1).

Te feiā tei tu’uhia mai i roto i tā ’outou ti’a’aura’a, e mau tamari’i ïa nā te Metua i te Ao ra, ’e ’ua ’ite ’oia e aha te mea tā rātou e hina’aro, e nāhea e tae’a atu ia rātou. Nā roto i te Vārua Maita’i, e arata’i te Atua ia ’outou i roto i tā ’outou fa’aineinera’a ’e i te taime ’a ha’api’i ai ’outou. E heheu mai ’oia ia ’outou i te mea e ti’a ia ’outou ’ia parau ’e ’ia rave (hi’o 2 Nephi 32:5). .

I roto i te mau huru tuha’a ato’a o tō rātou orara’a, e tāmau noa teie mau tamari’i tao’a rahi i te horomi’i i te ha’amāramaramara’a, i te fa’atupu ’e i te fa’anehenehe i tō rātou mau mana’o, ’e i te ravera’a ’e i te fa’a’itera’a i te mau ’itera’a. ’Ua ti’a mau roa teie i roto i te parau nō te ’evanelia, nō te mea, ’ua ineine te mau tamari’i ’e e hina’aro ’ū’ana tō rātou ’ia ’apo mai i te mau parau mau ’ōhie. E mea pūai ’e te vi’ivi’i ’ore tō rātou fa’aro’o i roto i te mau mea pae vārua, ’e e hi’o rātou i te mau taime ato’a ’ei taime ’apora’a mai. E fa’a’ohipa rātou ma tō rātou iho hina’aro i te mau mea tā rātou i ’apo mai, noa atu ē, ’aita i hope roa tō rātou hāro’aro’ara’a. Teie te huru nō tō tātou pā’āto’a fāri’ira’a i te ’evanelia. Mai tā te Fa’aora i ha’api’i mai, o te ’ore e fāri’i i te bāsileia o te Atua mai te tamaiti iti ra, e ’ore roa atu ïa e ō i roto » (Luka 18:17).

Te pi’ira’a ’ia ha’api’i i te mau tamari’i, e ti’aturira’a mo’a ïa, ’e i te tahi mau taime, ’eiaha e māere ē, e tae mai te mana’o ē, e’ita e mara’a ia ’outou. E ha’amana’o rā, nā tō ’outou Metua i te Ao ra i pi’i ia ’outou, ’e e ’ore roa ’oia e fa’aru’e ia ’outou. Nā te Fatu teie ’ohipa, ’e mai te mea ē, e tāvini ’outou « ma tō ’outou ’ā’au ato’a, te pūai ato’a, te mana’o ato’a, ’e te itoito ho’i » (PH&PF 4:2), e fa’a’a’ano ’oia i tō ’outou mau ’aravihi, te mau hōro’a, ’e te mau tāreni, ’e e ha’amaita’i tā ’outou tāvinira’a i te orara’a o te mau tamari’i tā ’outou e ha’api’i ra.