te ’utuāfare i te tāma’ara’a nō te pō

Te pāhonora’a i te mau hina’aro o te mau tamari’i huma

E hōpoi’a nā te feiā fa’atere nō te Paraimere ’ia ha’api’i i te ’evanelia a Iesu Mesia i te mau tamari’i ato’a, tae roa atu i te mau tamari’i huma. I roto i te Paraimere, tītauhia ’ia fāri’i poupou i te mau tamari’i ato’a, ’ia here, ’ia fa’a’amu, ’e ’ia fa’aō mai. I roto i te reira huru ravera’a, e mea ’ōhie a’e nā te mau tamari’i pā’āto’a ’ia hāro’aro’a i te here o tō tātou Metua i te ao ra ’e o Iesu Mesia, ’e ’ia fāri’i ’e ’ia ’ite i te fa’aurura’a a te Vārua Maita’i. E nehenehe te mau mana’o i muri nei e tauturu ia ’outou ’ia pāhono i te mau hina’aro o te mau tamari’i huma.

• E ’apo mai i te mau hina’aro ta’a ’ē o te tamari’i. Te rāve’a maita’i a’e nō te rave i te reira ’o te paraparaura’a ïa i te mau metua o te tamari’i ’e ’aore ra i te feiā utuutu. E ’imi nāhea te tamari’i ’ia ’apo maita’i a’e mai, ’e e aha te mau rāve’a maita’i a’e. E nehenehe ato’a ’outou e paraparau ’e te tahi atu mau feiā fa’atere ’e te mau ’orometua ha’api’i o te Paraimere tē vai ra tō rātou ’itera’a ’e te mau hi’ora’a nō te fa’a’ite mai.

• E fa’atupu i te hō’ē vārua maita’i i reira ho’i te tamari’i tāta’itahi e ’ite ai i te hau ’e te here. E ha’api’i mai i te i’oa o te mau tamari’i ato’a i roto i tā ’outou piha ha’api’ira’a, ’e e tauturu ia rātou ’ia ’ite ē, ’ua fāri’ihia rātou, ’ua herehia ’e ’ua fa’aōhia mai. E mea pinepine te mau tamari’i huma i te fa’a’inohia, nō reira, e ’imi i te mau rāve’a nō te ha’apōpou ia rātou nō te mau peu maita’i.

• E rave i te mau fa’atanora’a ’ia nehenehe te tā’āto’ara’a ’ia ’āmui mai. E nehenehe e tāuiui ri’i i te mau ’ohipara’a ’ia nehenehe i te mau tamari’i ato’a ’ia ’apo mai, tae noa atu i te mau tamari’i huru fifi i te pae tino ’e te fifi i te ’apora’a mai. ’Ei hi’ora’a, mai te mea ē, i roto i te ’ohipara’a e tītauhia ’ia fa’a’ite i te hō’ē hōho’a, e nehenehe ’outou e hīmene i te hō’ē hīmene e tū’ati i ni’a i te reira ’ohipa, nō te fa’aō mai i te mau tamari’i e fifi tō rātou i te pae nō te hi’ora’a.

• E ha’amau i te mau peu ’e te fa’anahora’a tāmau nō te piha ha’api’ira’a. Hō’ē rāve’a nō te ravera’a i te reira ’oia ho’i, e hāmani i te hō’ē hōho’a pia ’ua fa’a’itehia i ni’a iho, te tārena nō te terera’a o te piha ha’api’ira’a. I roto i tā ’outou tārena, tē vai ra te mau pure, te taime ha’api’ira’a, ’e te taime ’ohipara’a. E nehenehe te reira e fa’aiti i te mau mana’o pāpū ’ore o te nehenehe e fa’arahi i te mana’o pe’ape’a i roto i te tahi mau tamari’i.

• E fa’a’ohipa i te tāpa’o ’ite-mata-hia. E fāna’o te mau tamari’i huma ’e ’aore rā, te mau tamari’i fifi, i te mau tāpa’o ’ite-mata-hia, mai te mau hōho’a e fa’a’ite ra i te mau peu tano, mai te ’āfa’ira’a i te rima i ni’a hou ’a pāhono ai i te hō’ē uira’a.

• ’Ia hāro’aro’a nō te aha te mau huru fifi i tupu ai. E ’apo mai nō ni’a i te huma ’e ’aore rā, te tahi atu mau huru ’o te nehenehe e tūra’i i te hō’ē tamari’i ’ia rave ma te au ’ore. E ha’apa’o maita’i i te ’ohipa e tupu ra ’ia tupu ana’e mai te mau huru fifi. E feruri ma te pure nāhea ’ia taui i te huru i taua taime ra nō te pāturu maita’i a’e i te reira tamari’i.