Marū a’e i te mau mea marū ato’a, nā Miguel Angel González Romero

20–26 nō Tēnuare

1 Nephi 11–15

« Te parau ti’a ’e te mana o te Atua, ’o tā rātou ïa mauha’a »

Tai’o i te 1 Nephi 11–15 ma te feruri i te mau tamari’i tā ’outou e ha’api’i nei, ’e ’a pāpa’i i te mau huru mana’o ato’a tā ’outou e fāri’i.

Pāpa’i i te mau mana’o e tae mai

Fa’a’ite i te mana’o

Fa’a’ite i te hō’ē hōho’a nō te ’ōrama a Lehi nō te tumu rā’au o te ora, ’e e ani i te mau tamari’i ’ia fa’a’ite mai e aha tā rātou e ha’amana’o ra i te ha’api’ira’a mai nō ni’a i teie ’ōrama i te hepetoma i ma’iri a’enei. E ani ia rātou, ’ua ha’api’i ānei rātou i te hō’ē mea ’āpī mai tāua taime mai ra.

Ha’api’i i te ha’api’ira’a tumu : Mau tamari’i ’āpī

1 Nephi 11:16–33

’Ua tono mai te Metua i te Ao ra ia Iesu Mesia i te fenua nei nō te mea ’ua here ’oia iā’u.

’Ua ’ite Nephi i te orara’a ’e i te ’ohipa mo’a a Iesu Mesia i roto i te hō’ē ’ōrama. ’A feruri e aha tā te mau tamari’i i roto i tā ’outou piha ha’api’ira’a e nehenehe e ha’api’i mai nō ni’a i te Fa’aora i roto i te 1 Nephi 11.

Mau ’ohipa e nehenehe e rave

• Hōro’a i te tamari’i tāta’itahi i te hō’ē hōho’a ’o tē fa’ahōho’a ra i te hō’ē o te mau ’ohipa nō roto mai i te orara’a o te Fa’aora i tohuhia i roto i te 1 Nephi 11:20, 24, 27, 31, ’e 33 (hi’o Buka hōho’a nō te ’evanelia, mau nūmera. 30, 35, 39, 42, 57). ’A tai’o ai ’outou i teie mau ’īrava, e ani i te mau tamari’i ’ia ’āfa’i i tā rātou hōho’a i ni’a ’ia fa’aro’o ana’e rātou i te ’īrava e tano i ni’a i te reira.

• E parau i te mau tamari’i nō ni’a i te tahi mau mea tā Nephi i ha’api’i mai ’o tā Iesu Mesia e rave i roto i tōna orara’a. (hi’o 1 Nephi 11:16–33), ’e ’a fa’a’ite ia rātou i te hōho’a o te tahi o teie mau ’ohipa (hi’o, ’ei hi’ora’a, Buka hōho’a nō te ’evanelia, mau nūmera. 41, 46, 47, 49, 56, 57, 58, 59). Fa’a’ite atu e aha tā te Fa’aora i rave nō ’outou. Fa’a’ite i te mau hōho’a nō te tauturu i te mau tamari’i ’ia feruri i te mau rāve’a e nehenehe ai tātou e fa’a’ite atu i te here o te Atua (hi’o Buka hōho’a nō te ’evanelia, mau nūmera 109, 110, 115).

1 Nephi 13:26–29, 35–36, 40

Tē ha’api’i nei te Buka Moromona i te mau parau mau faufa’a rahi.

Nō te aha ’outou e māuruuru ai i te Buka a Moromona ? ’A feruri e nāhea ’outou ’ia fa’a’ite atu i tō ’outou ’itera’a pāpū nō ni’a i te Buka a Moromona i te mau tamari’i.

Mau ’ohipa e nehenehe e rave

• Pāpa’i i te hō’ē hōho’a i ni’a i te tāpura ’ere’ere, ’e e ani i te mau tamari’i ’ia taui ’e ’aore rā, ’ia ’īriti i te mau tuha’a o te hōho’a nō te fa’ahuru ’ē i tōna huru. Tauturu ia rātou ’ia hāro’aro’a ē, mai teie hōho’a, ’ua tauihia ’e ’ua ’īriti-’ē-hia te tahi mau mea i roto i te Bibilia i te roara’a o te tau. Tai’o i te mau tuha’a o te 1 Nephi 13:40 ’o tē ha’api’i ra e mea nāhea tō te Buka a Moromona (tā Nephi e parau nei, « teie mau pāpa’a parau hōpe’a ») tauturura’a ia tātou ’ia hāro’aro’a i te « mau mea pāpū ra ’e te faufa’a » tei mo’e i roto i te Bibilia.

• ’A huna nā roto i te piha i te mau hōho’a nō ni’a i te mau parau mau o te ’evanelia tei ha’amāramaramahia i roto i te Buka a Moromona, mai te bāpetizora’a, te ’ōro’a mo’a ’e te ti’afa’ahoura’a. E ani i te mau tamari’i ’ia ’imi i teie mau hōho’a. E fa’ata’a ē, ’ua fa’aho’i fa’ahou mai te Buka a Moromona i te mau parau mau o te ’evanelia tei mo’e.

1 Nephi 15:23–25

E hōro’a mai te parau a te Atua i te mana iā’u.

Nāhea e ti’a ai ia ’outou ’ia fa’a’ohipa i te mea auri nō te ha’api’i i te mau tamari’i nō ni’a i te pūai, te pārurura’a ’e te mana o te parau a te Atua ?

Mau ’ohipa e nehenehe e rave

• Fa’a’ite i te hō’ē hōho’a nō te moemoeā o Lehi, mai te hō’ē i roto i te fa’anahora’a nō te hepetoma i ma’iri i roto Mai, pe’e mai—nō te ta’ata hō’ē ’e te ’utuāfare. E ani i te mau tamari’i ’ia ’imi i te mea ’auri i roto i te hōho’a, ’e ’a tauturu ia rātou ’ia hāro’aro’a e nāhea te tāpe’ara’a i te parau a te Atua e pāruru ia tātou (hi’o 1 Nephi 15:23–24). Hōro’a i te mau tamari’i i te tahi mea e tū’ati i te hō’ē mea ’auri nō te tāpe’a, mai te hō’ē tuiō ’e ’aore rā, hō’ē rā’au, ’a tai’o ai ’outou i te ’īrava 24. I hea tātou e ’ite ai i te parau a te Atua ? E aha tā tātou e nehenehe e rave nō te fa’ariro i te parau a te Atua ’ei tuha’a nō tō tātou orara’a i te mau mahana ato’a ?

• Tauturu i te mau tamari’i ’ia fa’a’ū ’e ’ia fa’a’ī i te ’api ’ohipara’a o teie hepetoma. Nāhea tātou ’ia « mau māite » i te parau a te Atua ? (1 Nephi 15:24).

Ha’api’i i te ha’api’ira’a tumu : Mau tamari’i pa’ari

1 Nephi 11:16–33

’Ua tono mai te Metua i te Ao ra ia Iesu Mesia i ni’a i te fenua nei nō te mea ’ua here ’oia iā’u.

’Ua fāri’i Nephi i te hō’ē ’ōrama i reira tōna ’itera’a i te fa’anahora’a a te Metua i te Ao ra nō tātou, ’e ’o Iesu Mesia te tuha’a tumu o taua ’ōrama ra.

Mau ’ohipa e nehenehe e rave

• Ani i te mau tamari’i ’ia fa’atano i te mau ’īrava i roto i te 1 Nephi 11:16–33 i ni’a i te mau hōho’a e fa’a’ite ra i tā te ’īrava e fa’ata’a ra (mai te 1 Nephi 11:20, 24, 27, 29, 31, 33 ; hi’o Buka hōho’a nō te ’evanelia, mau nūmera. 30, 35, 38, 39, 42, 57). E aha tā te mau tamari’i e ha’api’i mai neinō ni’a i te Mesia i roto i terā mau ’īrava ’e te mau hōho’a ?

• E ani i te mau tamari’i nō te aha Iesu Mesia i riro ai ’ei mea faufa’a nō rātou. Hīmene i te hō’ē hīmene nō ni’a i te Fa’aora, mai te « Il envoya son Fils aimé » (Chants pour les enfants, 20–21), ’e e ani i te mau tamari’i e aha tā teie hīmene e ha’api’i nei nō ni’a ia Iesu. Ani i te mau tamari’i ’ia fa’ata’a i te taime i roto i te hepetoma nō te feruri nō ni’a ia Iesu Mesia ’e ’ia fa’a’ite mai i tō rātou mau ’itera’a i te hepetoma i muri nei i roto i te piha ha’api’ira’a.

Tei roto i te Buka a Moromona te ’evanelia a Iesu Mesia.

1 Nephi 13:26–29, 35–36, 40

Tē ha’api’i nei te Buka a Moromona i te mau parau mau faufa’a rahi.

E aha tā te mau tamari’i i ’ite nō ni’a i te tāivara’a ? Nāhea e ti’a ai ia ’outou ’ia tauturu ia rātou ’ia hāro’aro’a i te faufa’a o te Buka a Moromona i roto i te fa’aho’ira’ahia mai i te mau parau mau o te ’evanelia tei mo’e i te roara’a o te Tāivara’a ?

Mau ’ohipa e nehenehe e rave

• Tai’o ’āmui i te 1 Nephi 13:26–29, ’e e ani i te mau tamari’i ’ia ’imi i te ’ohipa e tupu ’ia ’ore ana’e te ta’ata e fāri’i i te mau parau mau « pāpū ’e te faufa’a rahi » o te ’evanelia. E mea nāhea tō te Fatu fa’aho’ira’a mai i te mau parau mau tei mo’e ? (hi’o i te mau ’īrava 35–36, 40). Ani i te mau tamari’i ’ia fa’a’ite mai i tō rātou ’itera’a pāpū nō ni’a i te mau parau mau tā rātou i ha’api’i mai nā roto mai i te Buka a Moromona, ’e ’aore rā, ’a fa’a’ite atu i tō ’outou iho.

• Fa’a’ite i te video « Te Buka a Moromona—hō’ē Buka nō ’ō mai i te Atua ra » (ChurchofJesusChrist.org) nō te fa’ahōho’a nāhea te Bibilia ’e te Buka a Moromona e ha’a ’āmui ra nō te ha’api’i i te parau mau. Nō te aha e mea maita’i a’e ’ia hau atu i te hō’ē noa ’ite ? Pāpa’i i te hō’ē toma i ni’a i te tāpura ’ere’ere ’e ’a tāpa’o i te reira te Bibilia, ’e e ani i te tamari’i tāta’itahi ’ia pāpa’i i te hō’ē rēni ’āfaro ta’a ’ē e haere atu nā ni’a i te toma nō te fa’ahōho’a ē, e nehenehe te mau ha’api’ira’a i roto i te Bibilia e tātarahia e rave rahi huru tātarara’a mai te mea ē, ’o te Bibilia ana’e tē vai ra. ’A tūmā i te mau rēni, ’e ’a pāpa’i i te piti o te toma ’e ’a tāpa’o i te reira te Buka a Moromona. E ani i te hō’ē tamari’i ’ia pāpa’i i te hō’ē rēni ’āfaro e haere nā ni’a i nā toma e piti nō te fa’a’ite ē, hō’ē ana’e rāve’a nō te tātara i te ’evanelia mai te mea ē, e fa’a’ohipa-’āmui-hia te Bibilia ’e te Buka a Moromona.

• Tauturu i te mau tamari’i ’ia tāmau ’ā’au i te hīro’a fa’aro’o va’u.

1 Nephi 15:23–25

E hōro’a mai te parau a te Atua i te mana iā’u nō te pāto’i i te fa’ahemara’a.

Nāhea e ti’a ai ia ’outou ’ia tauturu i te mau tamari’i tā ’outou e ha’api’i ra ’ia ha’apūai i tō rātou ’itera’a pāpū nō ni’a i te mau pāpa’ira’a mo’a ? ’A feruri i teie uira’a ’a tai’o ai ’outou i te 1 Nephi 15:23–25, ’e ’a fa’a’ohipa i te mau ’ohipara’a i raro nei nō te fa’ananea i tō ’outou iho mau mana’o.

Mau ’ohipa e nehenehe e rave

• Ani i te mau tamari’i ’ia ha’apoto mai i te ’ōrama nō te tumu rā’au o te ora (hi’o 1 Nephi 8; 11). E aha te mea i tāpe’a i te ta’ata ’ia tae atu i te tumu rā’au ? E aha te mea i tauturu ia rātou ’ia tae i reira ? Ani i te mau tamari’i ’ia tai’o i te 1 Nephi 15:23–25. Nāhea te mea ’auri i te tauturura’a i te ta’ata ’ia rātere nā roto i te māhu pōiri ? Nāhea te tai’ora’a i te parau nā te Atua i te tauturu ia tātou ’ia pāto’i i te fa’ahemara’a ’e i te pōiri o teie tau ?

• Fa’ahope i te ’api ’ohipara’a ’e te mau tamari’i. ’A rave ai rātou i te reira, e ani ia rātou ’ia paraparau mai nō ni’a i te tahi o te mau fa’ahemara’a tā te mau tamari’i e fa’aruru nei. Nāhea e ti’a ai ia rātou ’ia ha’amana’o i te tāpe’a i te mea ’auri i te mau mahana ato’a ? Hīmene i te « The Iron Rod » (Hymns, no. 274) ’ei tuha’a nō teie ’ohipara’a.

Faʼaitoito i te haʼapiʼiraʼa mai i te fare.

’A fa’aitoito i te mau tamari’i ’ia fa’a’ite i tō rātou ’utuāfare i te « mea ’auri » tā rātou i hāmani i roto i te ’api ’ohipara’a ’e ’ia fa’a’ite nāhea e ti’a ai ia rātou ’ia tāpe’a i ni’a i te mea ’auri nā roto i te tai’ora’a i te mau pāpa’ira’a mo’a.

Ha’amaita’ira’a i tā tātou ha’api’ira’a

Fa’a’ohipa i te mau hōho’a pēni ’ia tāu’a mai te mau pīahi ’Ia ha’api’i ana’e ’outou i te mau tamari’i i te hō’ē ’ā’amu o te pāpa’ira’a mo’a, ’a ’imi i te mau rāve’a nō te tāuturu ia rātou ’ia hi’o i te reira. E nehenehe tā ’outou e fa’a’ohipa i te mau hōho’a, te mau video, te mau pēpe hūrio, te mau fa’a’ahura’a ’e tē vai atu ra.