« 27 nō Tēnuare–2 nō Fepuare. 1 Nephi 16–22 : ‘E ha’amaita’i au i tō ’outou ’ē’a i mua ia ’outou’ », Mai, pe’e mai—nō te Paraimere : Buka a Moromona 2020 (2020)
« 27 nō Tēnuare–2 nō Fepuare. 1 Nephi 16–22 », Mai, pe’e mai—nō te Paraimere : 2020
Lehi ’e te Liahona, nā Joseph Brickey
27 nō Tēnuare–2 nō Fepuare.
1 Nephi 16–22
« E ha’amaita’i au i tō ’outou ’ē’a i mua ia ’outou »
Tē ha’api’i mai nei te mau ’ā’amu fa’auru i roto i te 1 Nephi 16–22 i te mau parau mau ’o tē nehenehe e ha’amaita’i i te mau tamari’i i roto i tā ’outou piha ha’api’ira’a. Tai’o i teie mau pene ’e ’a pāpa’i i te mau mana’o tā ’outou e fāri’i.
Pāpa’i i te mau mana’o e tae mai
Fa’a’ite i te mana’o
Pāpa’i i teie mau parau i ni’a i te tāpura ’ere’ere, ’e ’aore rā, ’a fa’a’ite i te mau hōho’a nō te reira te Liahona, te fana, ’e te pahī. Ani e toru tamari’i ’ia rave tāta’itahi hō’ē o te mau parau ’e ’aore rā, te mau hōho’a ’e a fa’a’ite i te tuha’a o te ’ā’amu o Nephi, ’o tā taua tauha’a ra e fa’ahōho’a ra. Tāuturu mai te mea ē, e tītauhia.
Ha’api’i i te ha’api’ira’a tumu : Mau tamari’i ’āpī
1 Nephi 16:10, 28–29; 18:8–13, 20–22
E nehenehe te Fatu e arata’i ’e e fa’atere iā’u.
Ha’api’i i te mau tamari’i ē, noa atu e fārerei rātou i te mau tītaura’a fifi, e nehenehe te Fatu e arata’i ia rātou (hi’o 1 Nephi 16:29).
Mau ’ohipa e nehenehe e rave
-
Fa’a’ite i te hō’ē ’avei’a, te hō’ē hōho’a fenua, ’e ’aore rā, te tahi atu mea ’o tē tauturu nei ia tātou ’ia ’ite i tō tātou ’ē’a, ’e ’a fa’ata’a e nāhea ’ia fa’a’ohipa i teie mau tauiha’a. Fa’aau i teie mau tauiha’a i te Liahona ’a fa’ahiti poto ai ’outou i te ’ā’amu i roto i te 1 Nephi 16:10, 28–29 ’e te 18:9–13, 20–22. E ha’apāpū ē, ’ia ’ore ana’e te ’utuāfare o Lehi e ha’apa’o, ’aita te Liahona e tere (hi’o ato’a 1 Nephi 18:9–12, 20–22). E aha te mea e tauturu ia tātou i teie mahana ’ia ’ite i tō tātou ’ē’a nō te ho’i i te Metua i te Ao ra ?
-
Hōpoi mai i te hō’ē ’āfata tei roto te mau tāpa’o e rave rahi ’o tē fa’ata’a i te hō’ē vāhi i roto ’e ’aore rā, nā rāpae i te fare pure. Fa’a’ohipa i te ’āfata ’e te mau tāpa’o fa’ahōho’a te Liahona, ’e ’a vaiiho i te mau tamari’i, te tahi i muri i te tahi, ’ia mā’iti i te mau tāpa’o ’e ’ia ’imi e aha taua vāhi ra. I muri iho, e haere ’āmui atu i taua vāhi ra. Fa’ata’a ē, ’ia fa’a’ite ana’e tātou i te fa’aro’o ’e ’ia pe’e ho’i i te arata’ira’a tā te Fatu e hōro’a mai ia tātou, e tauturu ’oia ia tātou ’ia ho’i iāna ra (hi’o Alama 37:38–42). Nāhea te Metua i te Ao ra i te arata’i ia tātou i roto i tō tātou tere nō te ho’i atu iāna ra ?
E nehenehe au e riro ’ei hi’ora’a maita’i nō tō’u ’utuāfare.
E nehenehe te mau ha’ara’a a Nephi ’e tōna ’utuāfare i roto i te mau taime fifi e tauturu i te mau tamari’i ’ia ’ite ē, noa atu e mea ’āpī roa rātou, e nehenehe rātou e riro ’ei mau hi’ora’a maita’i nō tō rātou ’utuāfare.
Mau ’ohipa e nehenehe e rave
-
Fa’aue i te tamari’i tāta’itahi ’ia pāpa’i i te hōho’a o te hō’ē mea i roto i te ’ā’amu nō te fana fati a Nephi (hi’o 1 Nephi 16:14–32), mai ia Nephi, hō’ē fana, ’e ’aore rā, te Liahona. I muri iho, e fa’a’ohipa i te mau hōho’a nō te fa’ati’a i te ’ā’amu i te piha ha’api’ira’a, ’e ’a vaiiho i te mau tamari’i, te tahi i muri i te tahi, ’ia nā reira ato’a. Nāhea tātou e nehenehe e riro mai ia Nephi ’a fārerei ai tō tātou ’utuāfare i te mau taime fifi ?
-
Ani i te mau tamari’i tāta’itahi ’ia tāpū ha’amenemene i te hō’ē ’āpī parau, ’e ’ia pāpa’ihōho’a mata ’oto i te hō’ē pae ’e mata ’oa’oa i te tahi pae. ’A fa’ati’a ai ’outou i te ’ā’amu o te fana fati a Nephi, e ani ia rātou ’ia fa’a’ohipa i te mau hōho’a mata nō te fa’a’ite, e aha te mana’o o te ’utuāfare o Nephi i roto i te mau tuha’a rau o te ’ā’amu. Nāhea Nephi i te tauturura’a i te fa’a’oa’oara’a i tōna ’utuāfare ? E aha tē ti’a ia tātou ’ia rave nō te fa’a’oa’oa i tō tātou ’utuāfare ?
E nehenehe te Metua i te Ao ra e tauturu mai iā’u ’ia rave i te mau mea pa’ari.
Mai ia Nephi, tē ha’api’i nei te mau tamari’i tā ’outou e ha’api’i ra ’ia rave i te mau mea fifi. E nehenehe te ’ohipa i tupu nō Nephi e tauturu ia rātou ’ia ’ite ē, e tauturu mai te Metua i te Ao ra ia rātou mai te mea e ani rātou.
Mau ’ohipa e nehenehe e rave
-
Fa’ati’a i te mau tamari’i i te ’ā’amu o Nephi tei fa’auehia ’ia hāmani i te hō’ē pahī, ma te fa’a’ohipa i te 1 Nephi 17:7–19 ’e 18:1–4. E nehenehe ato’a tā ’outou e fa’a’ohipa i te « Pene 7 : Hāmanira’a i te pahī » (’Ā’amu nō te Buka a Moromona, 21–22) ’e ’aore rā, te video nō ni’a i te reira i roto i te ’āpapara’a video o te Buka a Moromona i ni’a ia ChurchofJesusChrist.org. E nehenehe te ’api ’ohipara’a nō teie hepetoma e ha’apāpū fa’ahou i te parau tumu ē, ’ua tauturu te Metua i te Ao ra ia Nephi, ’e e tauturu ’oia ia tātou.
-
Hīmene ’āmui i te ’īrava piti o « Le courage de Nephi » (Chants pour les enfants, 20–21). E aha te mea i tauturu ia Nephi ’ia roa’a te itoito ’a tāhitohito ai tōna nā taea’e iāna nō te tāmatara’a i te hāmani i te pahī ?
Ha’api’i i te ha’api’ira’a tumu : Mau tamari’i pa’ari
1 Nephi 16:10, 28–29; 17:13–15; 18:8–13, 20–22
’Ia ha’apa’o ana’e au i te mau fa’auera’a, e arata’i te Fatu iā’u.
Fa’a’ohipa i te ’ā’amu o te ’utuāfare o Lehi tei arata’ihia e te Liahona nō te fa’a’ite i te mau tamari’i, nāhea te Atua i te arata’i ia rātou ’a fa’aitoito ai rātou i te ha’apa’o i tōna hina’aro.
Mau ’ohipa e nehenehe e rave
-
Mā’iti hō’ē ’e ’aore rā hau atu o teie mau tuha’a parau nō te tai’o ’e te mau tamari’i : 1 Nephi 16:10, 28–29; 17:13–15; ’e 18:8–13, 20–22. Ani ia rātou ’ia ’imi e aha te tītauhia ia tātou ’ia rave nō te fāri’i i te arata’ira’a ’e te fa’aterera’a nō ’ō mai i te Atua ra ’e ’a ’āparau i te mea tā rātou i ha’api’i mai.
-
’Ia hope te hi’o-fa’ahou-ra’a i te mau ’ā’amu i roto i te 1 Nephi 16–18, e uiui e rave rahi tamari’i mai te huru ē, ’ua rātere rātou nā muri iho i te ’utuāfare o Lehi. E nehenehe tā ’outou e ui i te mau uira’a mai teie te huru : Nō te aha ’oe i māuruuru ai i te Liahona ? E aha tei tītauhia ia ’oe ’ia rave, ’ia ti’a i te Liahona ’ia tere ? (hi’o 1 Nephi 16:28–29). Ani i te piha ha’api’ira’a ’ia ’āparau i te mau mea tā te Fatu i hōro’a mai nō te arata’i ia tātou i tō tātou nei ’anotau.
-
E ui i te mau tamari’i ’ia feruri, nāhea e ti’a ai ia rātou ’ia fa’a’ohipa i te ’ā’amu o te Liahona nō te tauturu i te hō’ē hoa tei tītauhia ’ia rave i te hō’ē fa’aotira’a faufa’a. Parau ē, ta’a ’ē noa atu te 1 Nephi 16:10, 26–31 ’e te 18:9–22, e nehenehe ato’a tā rātou e hi’o i roto i te Alama 37:38–44. Fa’a’ite i te hō’ē ’ohipa i tupu i reira tō te Metua i te Ao ra tauturura’a ia ’outou i roto i te hō’ē taime fifi, ’e ’aore rā, e ani i te mau tamari’i ’ia fa’a’ite mai. E aha te tītauhia ia tātou ’ia rave nō te fāri’i i tāna tauturu ?
E nehenehe tō’u huru e tā’u mau mā’itira’a e fa’atupu i te hō’ē huru maita’i i ni’a i tō’u ’utuāfare.
’Ua riro te fa’aro’o o Nephi ’ei ha’amaita’ira’a rahi i te mau taime ’a fārerei ai tōna ’utuāfare i te mau tāmatara’a. Nāhea e ti’a ai ia ’outou ’ia tauturu i te mau tamari’i ’ia ha’api’i mai, nā roto mai i tōna hi’ora’a maita’i ?
Mau ’ohipa e nehenehe e rave
-
Ani i te mau tamari’i ’ia pāpa’i i te mau hōho’a e fa’a’ite ra i te ’ā’amu o te fana fati a Nephi (hi’o 1 Nephi 16:14–39). Hi’o fa’ahou i te ’ā’amu ’e ’o rātou mai te mea e tītauhia. ’A fa’a’ite ai rātou i tā rātou mau hōho’a pāpa’i, e tauturu ia rātou ’ia ’ite i te mau rāve’a i reira te ha’apa’o maita’i o Nephi i te ha’amaita’ira’a i tōna ’utuāfare. Ani i te mau tamari’i ’ia feruri i te mau tītaura’a tā rātou ’e ’aore rā, tā tō rātou ’utuāfare e fa’aruru nei. E aha te nehenehe ia tatou ia rave nō te pe’e i te hi’ora’a o Nephi ?
-
Tai’o ’āmui i te mau ’īrava nō roto mai i te 1 Nephi 16:21–32. E ’āparau i te tahi mau ’ōpuara’a a te mau ’utuāfare o te mau tamari’i, mai te fa’atupu-tāmau-ra’a i te pō ’utuāfare ’e ’aore rā, te purera’a ’utuāfare. Nāhea e nehenehe ai i te mau tamari’i ’ia tauturu i tō rātou ’utuāfare ’ia rave fa’aoti i teie mau ’ōpuara’a ? Ani ia rātou ’ia fa’anaho nō te rave hō’ē mea nō te tauturu i tō rātou ’utuāfare ’ia fa’aoti i tā rātou mau ’ōpuara’a i teie hepetoma.
E nehenehe tā’u e fa’aau i te mau pāpa’ira’a mo’a i tō’u orara’a
Tuturu i te mau tamari’i ’ia ’ite ē, te mau ’ā’amu i roto i te mau pāpa’ira’a mo’a, e ’ere i te ’ā’amu noa—tei roto ato’a rā te mau parau tumu o te nehenehe e ha’amaita’i i tō rātou orara’a.
Mau ’ohipa e nehenehe e rave
-
Ani i te hō’ē tamari’i ’ia tai’o pūai i te 1 Nephi 19:22–24 ’e e ani i te mau tamari’i e aha te aura’a nō te parau « e fa’aau i te mau pāpa’ira’a mo’a ato’a » i ni’a ia tātou iho. Tauturu ia rātou ’ia ’ite ē, e mea nāhea tō Nephi fa’aaura’a i te hō’ē ’ā’amu nō te pāpa’ira’a mo’a i te ’ohipa i tupu i ni’a iāna ’a haere ai ’oia e ti’i i te mau ’api veo (hi’o 1 Nephi 4:1–4; hi’o ato’a Exodo 14). Nāhea te ha’amana’ora’a i teie ’ā’amu i tauturu ia Nephi ’e tōna nau taea’e ?
-
Hi’o fa’ahou i te tahi o te mau ’ā’amu tā te mau tamari’i i ha’api’i mai nō ni’a ia Lehi ’e tōna ’utuāfare i roto i te 1 Nephi, ’e e ani ia rātou ’ia fa’a’ite mai e aha tā rātou i ’apo mai nā roto mai i teie mau ’ā’amu. Tauturu ia rātou ’ia feruri i te tahi mau huru i roto i tō rātou orara’a e nehenehe e tū’ati i teie mau ’ā’amu. ’Ei hi’ora’a, te anira’a te Fatu ia Nephi ’ia hāmani i te hō’ē pahī, e nehenehe te reira e fa’aha’amana’o ia rātou i te mau taime ’a hina’aro ai rātou e rave i te hō’ē mea fifi ’e ’a ’imi ai i te tauturu a te Fatu.
Fa’aitoito i te ha’api’ira’a mai i te fare
Ani i te mau tamari’i ’ia mā’iti i te hō’ē ’ā’amu i roto i te 1 Nephi 16–22 ’e ’ia fa’a’ite i tō rātou ’utuāfare nāhea e ti’a ai ia rātou ’ia « fa’aau » i te reira ’ā’amu i tō rātou orara’a.
Ha’amaita’ira’a i tā tātou ha’api’ira’a
Fa’a’ohipa i te mau ’ā’amu. E tauturu te mau ’ā’amu i te mau tamari’i ’ia hāro’aro’a i te mau parau tumu nō te ’evanelia nō te mea tē fa’ata’a ra te reira nāhea vetahi ’ē i te ora i te reira mau parau tumu.