’Eiaha tō’u hina’aro, tō ’oe rā e ti’a ai, nā Harry Anderson

10–16 nō Fepuare

2 Nephi 6–10

« ’Auē te rahi o te rāve’a o tō tātou Atua ! »

’A tai’o ai ’outou i te 2 Nephi 6–10, e ’imi i te arata’ira’a nō ’ō mai i te Vārua ra nō ni’a e aha tā ’outou e ha’api’i. E nehenehe teie arata’ira’a ’e te Mai, pe’e mai—nō te ta’ata hō’ē ’e te ’utuāfare e fa’auru mai i te tahi atu mau mana’o.

Pāpa’i i te mau mana’o e tae mai

Tītau i te mana’o

Fa’aitoito i te mau tamari’i ’ia fa’a’ite mai, te tahi i muri mai i te tahi, i te hō’ē mea tā rātou i ’apo mai nō ni’a ia Iesu Mesia ’e tāna tāra’ehara ’a tuatāpapa ai rātou iho i te 2 Nephi 6–10 ’e ’aore rā, ’e tō rātou ’utuāfare.

Ha’api’i i te ha’api’ira’a tumu : Mau tamari’i ’āpī

2 Nephi 9:7–13, 20–23

E fa’aora Iesu Mesia iā’u i te hara ’e i te pohe.

Nāhea ’outou e nehenehe ai e fa’a’ohipa i te 2 Nephi 9:7–13 ’e 20–23 nō te tauturu i te mau tamari’i ’ia hāro’aro’a ē, e fa’aora Iesu Mesia i te mau ta’ata ato’a i te pohe ’e e fa’ati’a ho’i ia tātou ’ia tātarahapa i te hara ?

Mau ’ohipa e nehenehe e rave

• Fa’ati’a i te mau tamari’i i te hō’ē ’ā’amu nō te hō’ē ta’ata tei topa i roto i te hō’ē ’āpo’o hōhonu e’ita e nehenehe iāna ’ia ta’uma mai i rāpae. ’Ua haere mai ra te hō’ē ta’ata nā reira ’e ’ua huti mai ra iāna i rāpae i te ’āpo’o. E nehenehe ’outou e pāpa’i i te hō’ē hōho’a o teie ’ā’amu i ni’a i te tāpura ’ere’ere ’e ’aore rā, e fa’aha’uti i te mau tamari’i. E fa’ata’a ē, e au teie ’āpo’o mai te pohe ’e terā ta’ata tei tauturu i te ta’ata i roto i te ’āpo’o mai ia Iesu Mesia ïa, tei fa’aora i te mau ta’ata ato’a i te pohe nā roto i te hōro’ara’a ia tātou i te hōro’a nō te ti’afa’ahoura’a. E parau i te mau tamari’i ē, ’ua topa fa’ahou teie ta’ata i roto i te tahi ’ē atu ’āpo’o. I te reira taime, ’ua hōro’a te ta’ata fa’aora i taua ta’ata ra i te hō’ē ’ē’a nō te fa’a’ohipa i te ta’umara’a mai i rāpae i te ’āpo’o. E fa’ata’a ē, teie ’āpo’o e au ïa i te hara, ’e te ’ē’a ’o te tāra’ehara ïa a Iesu Mesia, ’o tē fa’ati’a ia tātou ’ia tātarahapa ’e ’ia fa’a’orehia tā tātou mau hara. Tai’o i te 2 Nephi 9:22–23, ’e e fa’a’ite i tō ’outou ’itera’a pāpū nō ni’a ia Iesu Mesia ’e tāna tāra’ehara.

• Hīmene ’āmui i te hō’ē hīmene nō ni’a i te here o Iesu Mesia, mai te hīmene « Je ressens son amour » (Chants pour les enfants, 42–43). Ani i te mau tamari’i ’ia pāpa’i hōho’a i te mau mea e tauturu ia rātou ’ia ’ite i te here o te Fa’aora nō rātou.

2 Nephi 9:49

« ’Ua ’oa’oa ho’i tō’u ’ā’au i te parau-ti’a ra ».

Nāhea ’outou i te fa’aitoito i te mau tamari’i tā ’outou e ha’api’i ra ’ia « ’oa’oa i te parau-ti’a », ’e ’aore rā, ’ia ha’apa’o ma te ’oa’oa i te parau a te Fatu ?

Mau ’ohipa e nehenehe e rave

• Tai’o i te 2 Nephi 9:49 i te mau tamari’i, ’e e tauturu ia rātou ’ia ’imi ’e ’ia māramarama e aha tā Iakoba e parau ē, e mea au ’e e mea au ’ore nāna. Fa’a’ite i te mau arata’ira’a mana’o i reira te hō’ē tamari’i e rave ai i te hō’ē mā’itira’a maita’i ’e ’aore rā, i te hō’ē mā’itira’a ’ino, ’e e ani i te mau tamari’i ’ia ti’a i ni’a mai te mea e fa’atupu te mā’itira’a i te ’oa’oa, ’e ’ia pārahi i raro mai te mea e hōro’a mai te mā’itira’a i te ’oto. Nō te aha te mā’itira’a i te parau-ti’a e hōro’a mai ai i te ’oa’oa ia tātou ? E aha te taime tō ’outou ’itera’a i te ’oa’oa nō te mea ’ua rave ’outou i te mā’itira’a ti’a ?

• Hīmene ’āmui i te hō’ē hīmene nō ni’a i te ’oa’oa e tae mai nā roto i te ha’apa’ora’a, mai te « Nous aidons tous avec joie » (Chants pour les enfants, 108), ’e e ani i te mau tamari’i ’ia fa’aro’o e aha te mea e fa’a’oa’oa ia tātou. Vaiiho i te mau tamari’i, te tahi i muri mai i te tahi, ’ia fa’ahua ē e hō’ē metua ’oia e ani ra i te tahi atu mau tamari’i ’ia rave i te hō’ē mea. E ani i te mau tamari’i ’ia ha’apa’o ma te ’oa’oa.

Ha’api’i i te ha’api’ira’a tumu : Mau tamari’i pa’ari

2 Nephi 6; 7:1–2

E fa’atupu te Fatu i tāna mau parau fafau i te mau taime ato’a.

Te hāro’aro’ara’a ē, e tāpe’a te Fatu i tāna mau parau fafau, e tauturu i te mau tamari’i ’ia patu i tō rātou fa’aro’o iāna ’e tō rātou ti’aturi i te ha’apa’ora’a i tāna mau fa’auera’a.

Mau ’ohipa e nehenehe e rave

• E ani i te mau tamari’i ’ia paraparau mai nō ni’a i te tahi mau parau fafau tā rātou i rave, mai te hō’ē fafaura’a tā rātou i rave i mua i te hō’ē hoa ’e ’aore rā, te mau fafaura’a tā rātou i rave i te bāpetizora’a. Nō te aha e mea fifi i te tahi taime ’ia tāpe’a i tā tātou mau parau fafau ? Nō te aha e mea faufa’a ’ia tāpe’a i tā tātou mau parau fafau ? Tai’o i teie pereota : « E fa’atupu te Fatu te Atua i tāna mau fafaura’a tāna i rave i mua i tāna mau tamari’i » (2 Nephi 6:12). Fa’a’ite i te hō’ē hi’ora’a e nāhea te Atua i te tāpe’a i tāna mau parau fafau, noa atu ē, ’aita te mau ha’amaita’ira’a e tae ’oi’oi mai.

• Fa’a’ite i te hō’ē hōho’a nō Iesu i pīha’i iho i te hō’ē hōho’a o te hō’ē tamari’i. Tai’o i te 2 Nephi 7:1, ’e e fa’ata’a ē, ’ia fa’aea ana’e te mau ta’ata o te Atua i te ha’apa’o i tāna ’evanelia, mai te huru ra ïa ē, ’ua « fa’ata’a ’ē » rātou iāna. E fa’aātea i te hōho’a o te tamari’i i te hōho’a o Iesu nō te fa’a’ite ē, ’ia ’ore ana’e tātou e ha’apa’o i tā tātou mau fafaura’a, mai te fafaura’a o te bāpetizora’a, tē fa’aātea ra ïa tātou iho i tō tātou Metua i te Ao ra ’e i te Fa’aora. (Nō te hi’o fa’ahou i te mau fafaura’a o te bāpetizora’a, hi’o PH&PF 20:37 Nāhea te tāra’ehara a te Fa’aora i te fa’ati’a ia tātou ’ia ha’afātata atu iāna ? ’A ’āparau ai ’outou i ni’a i teie, e ani i te mau tamari’i ’ia fa’anu’u i nā hōho’a ’ia ha’afātata fa’ahou atu.

2 Nephi 9:10–23

E fa’aora Iesu Mesia iā’u i te hara ’e te pohe.

Nāhea ’outou i te fa’a’ohipa i te 2 Nephi 9:10–23 nō te tauturu i te mau tamari’i ’ia ’apo mai ē, ’o Iesu Mesia tō rātou Fa’aora ?

Mau ’ohipa e nehenehe e rave

• Ani i te mau tamari’i ’ia tauturu ia ’outou ’ia pāpa’i hōho’a i te hō’ē ’ē’a i ni’a i te tāpura ’ere’ere, ’e e ani ia rātou ’ia tu’u i te tahi mau ārai’ē’a ’e ’aore rā, te tahi mau pāruru purumu i ni’a i te ’ē’a. Tai’o ’āmui i te 2 Nephi 9:10, ’e e ani i te mau tamari’i ’ia tāpa’o i te mau ārai’ē’a i ni’a i te ’ē’a, i te mau ta’o nō roto mai i teie ’īrava ’o tē fa’ata’a ra i te mau ārai’ē’a ’o tē nehenehe e ārai ia tātou ’ia ho’i i te Atua ra. I muri iho e ’āparau e mea nāhea tō Iesu Mesia upo’oti’ara’a i ni’a i teie mau ārai’ē’a nō tātou (hi’o 2 Nephi 9:21–23), ’e ’a nā reira ai ’outou, e ani i te mau tamari’i ’ia tūmā i te mau ārai’ē’a.

• Fa’a’ite i te hō’ē hōho’a nō Adamu ’e ’o Eva, mai Te fa’aru’era’a i te ’ō i Edene (ChurchofJesusChrist.org). E fa’ata’a ē, i te ’amura’a Adamu ’e ’o Eva i te hotu tā te Atua i parau ia rāua ’eiaha e ’amu i roto i te ’ō i Edene, ’ua hōpoi mai rāua i te hara ’e te pohe i roto i te ao nei. Fa’a’ite i te hō’ē hōho’a o Iesu Mesia. Nō te tauturu i te tamari’i ’ia māramarama e mea nāhea tō Iesu upo’oti’ara’a i ni’a i te hara ’e te pohe, e fa’ati’a ia rātou i te ’ā’amu nō te ta’ata tei topa i roto i te hō’ē ’āpo’o, e ’itehia i roto i te mana’o ha’api’ira’a mātāmua i raro a’e i te upo’o parau « tamari’i ’āpī a’e » i roto i teie arata’ira’a. I muri iho e ani i te mau tamari’i ’ia pāpa’i hōho’a i teie ’ā’amu ’e ’aore rā, ’ia ha’uti mai i te reira. Tai’o i te 2 Nephi 9:21–23, ’e e fa’a’ite i tō ’outou ’itera’a pāpū nō ni’a ia Iesu Mesia ’e tāna tāra’ehara.

• E tauturu i te tamari’i tāta’itahi ’ia ’imi i te hō’ē hīmene nō ni’a i te tāra’ehara a te Fa’aora i roto ānei i te buka Te mau Hīmene ’e ’aore rā, i te buka Chants pour les enfants (e nehenehe te mau fa’ahorora’a i roto i teie nā buka e tauturu). E ani i te mau tamari’i ’ia ’imi ’e ’ia fa’a’ite mai i te mau pereota nō roto mai i te hīmene ’o tē fa’ata’a ra e aha tā Iesu i rave nō tātou. E ani i te mau tamari’i ’ia fa’a’ite mai i tō rātou mana’o e tō rātou mau ’āehuehu nō ni’a i te tāra’ehara a te Fa’aora, ’e ’aore rā, e fa’a’ite mai i tō ’outou ’itera’a pāpū.

2 Nephi 9:20, 28–29, 42–43

E ha’amaita’ihia vau ’ia pe’e ana’e au i te a’o a te Atua.

Tauturu i te mau tamari’i ’ia patu i te hō’ē niu pa’ari nō te ti’aturi i te Atua, nā roto i te reira, e tupu rahi ai tō rātou ’ite ’e tō rātou ’aravihi, e tāmau noa rātou i te turu’i i ni’a iāna ’e e pe’e i tāna mau parau a’o.

Mau ’ohipa e nehenehe e rave

• E ani i te mau tamari’i ’ia parau mai ia ’outou i te hō’ē mea tā rātou i ’ite maita’i, mai te hō’ē buka ’e ’aore rā, te hō’ē fa’a’ana’anataera’a au-roa-hia. Ani i te hō’ē tamari’i ’ia tai’o i te 2 Nephi 9:20, ’e ’ia fa’a’ite pāpū ē, « ’ua ’ite te Atua i te mau mea ato’a ». Nō te aha e mea faufa’a nō tātou ’ia ’ite ē, ’ua ’ite te Atua i te mau mea ato’a ?

• E ani i te mau tamari’i ’ia feruri ē, ’ua fa’aro’o rātou i te hō’ē hoa i te paraura’a ē, e mea ma’ama’a te mau fa’auera’a ’e ’aore rā, te mau ha’api’ira’a a te ’Ēkālesia. E aha tā rātou e parau i tō rātou hoa ? Nō te aha e mea faufa’a ’ia ti’aturi i te parau a’o a te Atua noa atu ē, ’aita tātou e māramarama hope roa ra i te reira ? E fa’aitoito i te mau tamari’i ’ia hi’o i roto i te 2 Nephi 9:20, 28–29, ’e 42–43 nō te tauturu i te feruri-māite-ra’a ’e te ’āparaura’a i teie mau uira’a.

Fa’aitoito i te ha’api’ira’a mai i te fare

Tauturu i te mau tamari’i ’ia feruri i te hō’ē rāve’a e nehenehe ai rātou e ha’api’i i tō rātou ’utuāfare i te mea tā rātou i ha’api’i mai nō ni’a ia Iesu Mesia ’e tāna tāra’ehara. ’Ei hi’ora’a, e nehenehe rātou e fa’a’ohipa i te ’api ’ohipara’a o teie hepetoma nō te fa’ata’a ē, e mea nāhea tō te Fa’aora tauturura’a ia tātou ’ia upo’oti’a i ni’a i te hara ’e te pohe.

Ha’amaita’iraʼa i tā tātou ha’api’ira’a

Fa’a’ohipa i te mau ’api ’ohipara’a. ’A ha’a ai te mau tamari’i i ni’a i te mau ’api ’ohipara’a, e fa’a’ohipa i te reira taime nō te tauturu ia rātou ’ia hi’o e mea nāhea te ’ohipara’a i te tū’ati atu i ni’a i te mau parau tumu nō roto mai i te ha’api’ira’a, ’e e mea nāhea te mau parau tumu e tano ai i tō rātou orara’a.