17–23 nō Fepuare

2 Nephi 11–25

« Tē ’oa’oa nei tātou i te Mesia »

E ha’amata tā ’outou fa’aineinera’a nō te ha’api’i ’a tai’o ai ’outou i te 2 Nephi 11–25. E nehenehe te Mai, pe’e mai—nō te ta’ata hō’ē ’e te ’utuāfare e tauturu ia ’outou ’ia hāro’aro’a i teie mau pene, ’e e nehenehe teie fa’anahora’a e hōro’a mai ia ’outou i te mau mana’o nō te ha’api’ira’a.

Pāpa’i i te mau mana’o e tae mai

Fa’a’ite i te mana’o

’A hi’ohi’o poto noa ’e te mau tamari’i i te mau mea tā rātou i ha’api’i mai nō ni’a i te Fa’aora ’e tāna tāra’ehara i te hepetoma i ma’iri. Mai te mea ’ua fa’a’ite rātou i tō rātou ’utuāfare i te mau mea tā rātou i ha’api’i mai, e fa’aitoito ia rātou ’ia paraparau mai nō ni’a i te reira.

Ha’api’i i te ha’api’ira’a tumu : Mau tamari’i ’āpī

2 Nephi 12:2–3

Te hiero ’o te fare ïa o te Fatu.

E nehenehe te parau tohu a Isaia nō ni’a i « te mou’a o te fare o te Fatu » e riro ’ei rāve’a nō te ha’api’i i te mau tamari’i nō ni’a i te hiero ’e e tauturu ia rātou ’ia tīa’i i te taime e haere ai i reira i te hō’ē mahana.

Mau ’ohipa e nehenehe e rave

• E fa’aue i te hō’ē tamari’i ’ia tāpe’a i te hō’ē hōho’a nō te hiero (tē vai ra hō’ē i roto i te fa’anahora’a nō teie hepetoma i roto Mai, pe’e mai—nō te ta’ata hō’ē ’e te ’utuāfare) ’e e ani i te mau tamari’i ’ia fa’a’ite mai i te mea tā rātou i ’ite nō ni’a i te hiero. Tai’o i te 2 Nephi 12:3, ’e ’a fa’ata’a ē, i roto i teie ’īrava ’ua tohu te hō’ē peropheta tei pi’ihia ’o Isaia ē, e vai te mau hiero i te mau mahana hōpe’a nei. Tai’o fa’ahou i te ’īrava, ’e ’a ha’apāpū ē, ’ia haere tātou i te hiero, « e ha’api’i mai te Fatu ia tātou i tāna mau ha’apa’ora’a » ’e e tauturu ia tātou « ’ia haere nā te ’ē’a tāna e fa’a’ite mai ».

• Hāmani i te hō’ē ’ē’a i ni’a i te tahua, ’e i te hōpe’a o te ’ē’a, e tu’u i te hō’ē hōho’a o te hiero ’e te hō’ē tāpo’i i ni’a iho. Fa’aue i te mau tamari’i ’ia haere nā ni’a iho i te ’ē’a, ’e ’a nā reira ai rātou, ’a tauturu ia rātou ’ia fa’ahiti fa’ahou i te pereota ra « haere nā te ’ē’a tāna e fa’a’ite mai ». ’Ia tae te mau tamari’i i te hope’a o te ’ē’a, e fa’aue ia rātou ’ia ’īriti i te tāpo’i o te hōho’a. E aha te aura’a nō tē parau ra, haere nā te ’ē’a tā te Atua e fa’a’ite mai ?

• Hīmene ’e te mau tamari’i i te hō’ē hīmene nō ni’a i te hiero, mai te « Oh, J’aime voir le temple » (Chants pour les enfants, 99). Tauturu ia rātou ’ia ’imi i te mau ta’o ’e te mau pereota i roto i te hīmene ’o tē ha’api’i ra e aha te hiero ’e e aha tā tātou e rave i reira.

2 Nephi 19:6 ; 25:26

« Tē ’oa’oa nei tātou i te Mesia. »

E ’itera’a pāpū tō Nephi ’e tō Isaia nō ni’a i te Fa’aora, ’e ’ua fa’atupu tō rāua ’itera’a pāpū i te ’oa’oa i roto ia rāua. Tauturu i te mau tamari’i ’ia ’ite ē, « tē ’oa’oa nei ’oe i te Mesia ».

Mau ’ohipa e nehenehe e rave

• Ani i te hō’ē tamari’i ’ia tāpe’a i te hōho’a o te fānaura’a o Iesu Mesia (mai te Buka hōho’a nō te ’evanelia, no. 30), ’e e tauturu i te mau tamari’i ’ia ’imi i te ’aiū Iesu i roto i te hōho’a. Tai’o i te 2 Nephi 19:6 ’e ’aore rā, e fa’a’ite i te video « ’ua fānauhia te hō’ē Fa’aora—Video nō te Noela » (ChurchofJesusChrist.org), ’e e ani i te mau tamari’i ’ia fa’atoro i ni’a ia Iesu ’ia fa’aro’o ana’e rātou i te mau ta’o tamari’i ’e tamaiti. E fa’ata’a ē, te peropheta Isaia, nāna i pāpa’i i te mau parau i roto i te 2 Nephi 19:6, ’ua ’ite ’oia i te parau nō te fānaura’a o Iesu e rave rahi hānere matahiti hou ’a tupu ai te reira.

• Fa’ati’a i te hō’ē ’ā’amu nō ni’a ia Iesu Mesia i te hōro’ara’a i te ’oa’oa ia vetahi ’ē, ’e ’aore rā, e fa’a’ite i te hō’ē video mai « Tē fa’aora nei Iesu i te hō’ē ta’ata i fānau-matapō-hia » ’e ’aore rā, « Vaiiho i te mau tamari’i ri’i ’ia haere mai iā’u nei » (ChurchofJesusChrist.org). Fa’a’ite i te mau taime ’oa’oa i roto i te ’ā’amu ’e ’aore rā, te video. Tai’o i te 2 Nephi 25:26 ’e ’a parau ē, nō te aha ’outou « i ’oa’oa ai i te Mesia ». Ani i te mau tamari’i ’ia parau mai e mea nāhea Iesu i te hōro’a mai i te ’oa’oa ia rātou.

2 Nephi 21:6–9; 22

E riro te mileniuma ’ei taime nō te hau ’e te ’oa’oa.

I muri a’e i tōna tae-piti-ra’a mai, e pārahi Iesu Mesia i rotopū i tōna mau ta’ata i roto i te hō’ē tau nō te hau ’o tei pi’ihia te mileniuma.

Mau ’ohipa e nehenehe e rave

• Fa’a’ite i te mau tamari’i i te mau hōho’a o te mau animala i fa’ahitihia i roto i te 2 Nephi 21:6–7, ’e e ani i te mau tamari’i ’ia fa’a’ite i te i’oa o te mau animala. E fa’ata’a ē, e mau animala ’enemi teie te tahi ’e te tahi, terā rā, ’ua ha’api’i mai Isaia ē, i muri a’e i te ho’i-fa’ahou-ra’a mai o Iesu Mesia, e tupu te hō’ē tau nō te hau, tei pi’ihia te mileniuma, e’ita te mau animala e ’aro te tahi i te tahi. Nāhea tātou i te peʼe i te hiʼoraʼa o teie mau animala i roto i tō tātou huru i niʼa ia vetahi ’ē ? Ani i te mau tamari’i ’ia pāpa’i i te mau hōho’a o teie mau animala e ora ’āmui ra ma te hau.

• Tai’o i te 2 Nephi 22:5, ’e e ani i te mau tamari’i ’ia tauturu ia ’outou ’ia ’imi i te hō’ē hīmene ’o tē fa’ata’a mai « i te mau mea maita’i roa » tā te Fatu i rave. Teie te tahi mau hi’ora’a, « Mon Père céleste m’aime » (Chants pour les enfants, 16–17) ’e ’aore rā, « Tō’u Fa’aora ! tō’u Atua ! » (Te mau Hīmene , no. 42). Hīmene ’āmui i te hīmene. E fa’ata’a ē, i roto i te mileniuma, e ’ite te ta’ata ato’a « i te mau mea maita’i roa » tā te Fatu i rave.

Ha’api’i i te ha’api’ira’a tumu : Mau tamari’i pa’ari

2 Nephi 12:2–3

Te hiero ’o te fare ïa o te Fatu.

Nāhea ’outou i te fa’a’ohipa i teie mau ’īrava nō te tauturu i te mau tamari’i ’ia tīa’i i te mahana e nehenehe ai ia rātou e haere i te hiero ?

Mau ’ohipa e nehenehe e rave

• Fa’a’ite i te hōho’a o te hō’ē hiero (tē vai ra hō’ē i roto i te te fa’anahora’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare). Ani i te hō’ē tamari’i ’ia tai’o i te 2 Nephi 12:2–3, ’e e ani i te tahi atu mau tamari’i ’ia fa’aro’o i te mau tumu i parau ai Isaia ē, tītauhia te hiero nō tātou. E nehenehe ’outou e fa’ata’a ē, ’ua parau Isaia i te hiero « te mou’a o te fare o te Fatu ». Nō te aha te mou’a e riro ai ’ei tāpa’o maita’i nō te hiero ?

• Ani i te mau tamariʼi e pāpa’i i te hōhoʼa nō rātou iho tē haere ra i te hiero. Mai te mea e nehenehe, e ani i te hō’ē o te feiā ’āpī tamāroa ’aore rā tamāhine i roto i te pāroita ’ia parau i te mau tamari’i, e aha te huru ’ia rave i te bāpetizora’a nō te feiā pohe i roto i te hiero. E nehenehe tā teie taure’are’a ’e ’aore rā, te tahi atu ta’ata i roto i te pāroita e ha’api’i i te mau tamari’i e nāhea ’ia ’imi i te mau i’oa nō tō rātou mau tupuna tītauhia te mau ’ōro’a o te hiero.

2 Nephi 15:20

Tē tāmata nei Sātane i te ha’afifi iā’u nō ni’a i te maita’i ’e te ’ino.

Tē ora nei tātou i roto i te hō’ē ao, mai tā Isaia i tohu, i reira te ta’ata e parau ai i te ’ino e maita’i ’e te maita’i e ’ino. Nāhea e ti’a ai ia ’outou ’ia tauturu i te mau tamari’i ’ia ’ite i te reira huru ha’avare ?

Mau ’ohipa e nehenehe e rave

• Fa’a’ite i te mau tamari’i i te hō’ē mea maramara ’e ’aore rā ’ava’ava, mai te hō’ē cornichon ’e ’aore rā tāporo, i roto i te hō’ē pū’ohu monamona. Tai’o ’āmui i te 2 Nephi 15:20, ’e ’a fa’ata’a ē tē tāmata nei Sātane i te fa’ariro i te mau mea ’ino ’ei mau mea maita’i. Tauturu i te mau tamariʼi ʼia feruri i te mau rāveʼa ’a rave ai Sātane i te reira. Nāhea e ti’a ai ia tātou ’ia ’ite i te reira mau ha’avare ?

• Fa’a’ite i nā minuti ’e te ’āfa mātāmua o te video « E fa’ati’amāhia ’outou » (ChurchofJesusChrist.org). Nō te aha te ta’ata rava’ai e fa’ahuru ’ē ai i tāna matau ? Nō te aha Sātane e fa’ahuru ’ē ai i te hara ?

2 Nephi 17:14; 19:6; 25:23–26

« Tē ’oa’oa nei tātou i te Mesia ».

E ti’a i te mau tamari’i ’ia ’ite ē, e mea ’oa’oa te ’evanelia a Iesu Mesia. Nāhea ’outou i te tauturu ia rātou « ’ia ’oa’oa i te Mesia » ?

Mau ’ohipa e nehenehe e rave

• Tauturu i te mau tamari’i ’ia ’imi i te i’oa o Iesu Mesia i roto i te 2 Nephi 17:14 ’e 19:6. E ti’a paha ia ’outou ’ia fa’ata’a ē, ’o « Emanuela » te hō’ē o teie mau i’oa, ’e tōna aura’a maori rā, « te Atua i rotopū ia tātou ». E aha tā teie mau i’oa tāta’itahi e ha’api’i mai nei ia tātou nō ni’a iāna ?

• ’A tu’u i te hō’ē hōho’a o te Fa’aora i ni’a i te tāpura ’ere’ere, ’e e tai’o ’āmui i te 2 Nephi 25:26. Nō te aha Nephi i paraparau rahi ai ’e i pāpa’i rahi ai nō ni’a ia Iesu Mesia ? Fa’aue i te tamari’i tāta’itahi ’ia pāpa’i i ni’a i te tāpura ’ere’ere, i pīha’i iho i te hōho’a o Iesu, hō’ē mea nō ni’a i te Fa’aora ’o tē hōro’a mai i te ’oa’oa.

• Ani i te mau tamari’i ’ia feruri i te hō’ē ta’ata tā rātou e hina’aro e « ha’api’i atu… i te fa’aro’o i te Mesia » (2 Nephi 25:23). Nāhea e nehenehe ai ia tātou ’ia fa’a’ite ia vetahi ’ē i te ’oa’oa tā te Fa’aora e hōro’a mai i roto i tō tātou orara’a ? E fa’aue i te mau tamari’i ’ia pāpa’i ’e ’aore rā, ’ia ha’uti i te tahi mau mea tā rātou e nehenehe e rave nō te tauturu i te ta’ata tā rātou i mana’o e ti’aturi ia Iesu Mesia.

Fa’aitoito i te ha’api’ira’a mai i te fare

Ani i te mau tamari’i ’ia feruri i te hō’ē mea tā rātou e nehenehe e rave nō te fa’a’ite i tō rātou ’utuāfare ē, « tē ’oa’oa nei rātou i te Mesia ».

Ha’amaita’ira’a i tā tātou ha’api’ira’a

E vaiiho i te mau tamari’i ’ia feruri mai tā rātou e hina’aro. « ’A ha’api’i ai ’outou i te mau tamari’i, e fa’ati’a ia rātou ’ia patu, ’ia pāpa’i i te hōho’a, ’ia fa’a’ū, ’ia pāpa’i, ’e ’ia hāmani. ’Ua hau atu teie mau mea i te fa’a’oa’oa-noa-ra’a ia rātou—e mea faufa’a rahi te reira ’ia ha’api’i mai rātou » (Ha’api’ira’a mai tā te Fa’aora, 25).