tē pāpa’i ra Isaïa i ni’a i te ’api parau

17–23 nō Fepuare

2 Nephi 11–25

« Tē ’oa’oa nei tātou i te Mesia »

’Ua ha’api’i Nephi ē te mau parau a Isaia ē, e mea « pāpū i te ta’ata ato’a i ’ī i te vārua tohu » (2 Nephi 25:4). ’Ia tai’o ’outou, ’a ’imi i te vārua tohu nā roto i te fa’aineinera’a ia ’outou i te pae vārua, ma te fa’aro’o i te Vārua ’e ma te pāpa’i i tō ’outou mau mana’o.

Pāpa’i i te mau mana’o e tae mai

E ’ere te nana’ora’a i ni’a i te mau ’api ’auri i te ’ohipa ’ōhie, ’e ’aita ho’i i rahi roa te mau ’api iti a Nephi. Nō reira, nō te aha Nephi i rave ai i teie tauto’ora’a ’ohipa rahi i te pāpa’ira’a i te hō’ē tuha’a rahi o te mau pāpa’ira’a a Isaia i ni’a i te tāna pāpa’a parau ? ’Ua nā reira ’oia « ’ia pōpou te ’ā’au [o te ta’ata e] ’ite i teie nei mau parau, ’e ’ia ’oa’oa rātou » (2 Nephi 11:8). E nehenehe e parau ē, te anira’a ’ia tai’o i te mau parau a Isaia, e anira’a ’ia ’oa’oa. E ti’a ia ’outou ’ia au mai ia Nephi ra, i te mau parau tohu a Isaia nō ni’a i te putuputura’a o ’Īserā’ela, te taera’a mai o te Mesia a te ’āti Iuda ’e te hau o te tau mileniuma tei fafauhia i tō te parau ti’a. E ti’a ia ’outou ’ia ’oa’oa ē, noa atu te« ’ati ’e te pōiri », e « māramarama rahi tei ’itea » ia ’outou (2 Nephi 18:22 ; 19:2). E ti’a ia ’outou ’ia ’oa’oa ē, e ti’a ia ’outou ’ia « huti… i te pape… nō te tumu o te pape ora ra » (2 Nephi 22:3). E nehenehe e parau ē, e ti’a ia ’outou ’ia « ’oa’oa i te Mesia » (2 Nephi 25:26).

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

2 Nephi 11–25

Nāhea vau i te māramarama rahi a’e i te mau ha’api’ira’a a Isaia ?

Tē parau nei Nephi ē, nō vetahi, « ’aita te parau a Isaia i pāpū » (2 Nephi 25:4). E parau mau iho ā paha nō rātou ’aita i mātau mai ia Nephi i te peu tahito o te ’āti Iuda ’e te fenua i reira (hi’o 2 Nephi 25:6). ’Ua hōro’a ato’a Nephi i te tahi parau nō te tauturu ia tātou ’ia ’ite i te aura’a o te mau parau a Isaia :

« Fa’aau… i tāna ra mau parau » ia ’outou (2 Nephi 11:2).E rave rahi ha’api’ira’a a Isaia ’ua rau te aura’a ’e te fa’a’ohipara’a. ’Ei hi’ora’a, e nehenehe i tāna mau parau nō ni’a i te purarara’a ’e te putuputura’a o te ’Īserā’ela e tūra’i ia ’oe ’ia feruri i te tītaura’a nō ’oe ’ia « putuputu » fa’ahou i te Fa’aora ra.

’Imi ’ia « ’ī i te vārua tohu » (2 Nephi 25:4).Te rāve’a maita’i roa nō te māramarama i te mau parau tohu a Isaia, ’o te ’imira’a ïa i te fa’aurura’a nō ’ō mai i te Vārua ra. Pure nō te arata’ira’a pae vārua. E’ita paha ’oe e māramarama pau roa i terā taime, e ti’a rā i te Vārua ’ia tauturu ia ’oe ’ia ha’api’i i te mea e tītauhia ia ’oe ’ia ’ite nō tō ’oe orara’a tāmahana.

Penei a’e e tauturu ato’a ’ia hi’o i te mau tauturu tuatāpapara’a i roto i te mau pāpa’ira’a mo’a, mai te mau fa’ahorora’a, te mau upo’o parau pene, te Arata’i nō te mau pāpa’ira’a mo’a, ’e tē vai atu ra.

2 Nephi 11:2–8 ; 25:19–29

« Te ’ē’a ti’a ra, ’o te fa’aro’o ïa i te Mesia ».

’Ua ’ōmua ’e ’ua ’ōpani Nephi i tāna fa’ahitira’a i te mau parau a Isaia nā roto i te fa’a’itera’a i tōna ’itera’a pāpū nō Iesu Mesia (hi’o 2 Nephi 11:2–8 ; 25:19–29). E aha tā ’oe e tāpe’a ra i roto i tōna ’itera’a pāpū ? ’Ia tuatāpapa ’oe i teie hepetoma, ’a feruri i te hia’ai o Nephi ’ia « ha’api’i atu [i tāna] mau tamari’i… i te fa’aro’o i te Mesia ra, ’e ’ia ha’amaita’i ho’i i te Atua » (2 Nephi 25:23), ’e ’a pāpa’i i te mau tuha’a e ha’api’i ia ’oe i te fa’aro’o ia Iesu Mesia ’e i te pe’e iāna.

E tauturu mai paha ’ia ha’amana’o ’oe ē, e rave rahi ha’api’ira’a a Isaia nō ni’a i te Fa’aora e ravehia nā roto i te tahi mau fa’ahōho’ara’a. ’Ei hi’ora’a, e ’ite ’oe i te Fa’aora i roto i te mau fa’ahōho’ara’a mai te fatu o te ’ō vine (hi’o 2 Nephi 15:1–7), te hō’ē ’ōfa’i (hi’o 2 Nephi 18:14), ’e te hō’ē māramarama (hi’o 2 Nephi 19:2). E aha te tahi atu ā mau fa’ahōho’ara’a tā ’oe e ’ite ra i roto i teie mau pene ? E aha tā teie mau fa’ahōho’ara’a i ha’api’i ia ’oe nō ni’a iāna ?

2 Nephi 12–13

E fa’aha’eha’ahia tei te’ote’o ’e tei hina’aro i tō te ao nei.

’Ua ’ite ātea ’o Nephi ē, e riro te te’ote’o i te fa’atupu i te hi’ara’a o tōna mau ta’ata (hi’o 1 Nephi 12:19). Nō reira, e ’ere i te ’ohipa māere ’ua fa’a’ite Nephi i tōna mau ta’ata i te mau fa’aarara’a pinepine a Isaia i mua i te te’ote’o. I roto i te mau pene 12 ’e 13, ’a ’imi i te mau ta’o tā Isaia i fa’a’ohipa nō te fa’ahiti i te parau nō te te’ote’o, mai te mata teitei ’e te mata ’ōfefa. E nehenehe tā ’oe e tāmata i te fa’a’ohipa i te reira mau fa’aarara’a nā roto i tā ’oe iho mau parau, mai te huru ra tē pāpa’i ra ’oe i te hō’ē poro’i ia ’oe iho nō te fa’aara ia ’oe nō ni’a i te te’ote’o.

Hi’o ato’a « Pene 18 : E ara i te te’ote’o » (Te Mau Ha’api’ira’a a te Mau Peresideni o te ’Ēkālesia : Ezra Taft Benson [2014], 255–66).

2 Nephi 12:2–5 ; 21:9–12 ; 22 ; 24:1–3

I te Mileniuma, e ’oa’oa te mau ta’ata o te Atua i te hau.

E nehenehe paha te hi’ora’a ia ’oe iho mai ia Nephi ’e tōna mau ta’ata e tauturu ia ’oe. ’A feruri na ē, tē horo ’ē ra ’oe mai Ierusalema atu, hou te reira e ha’amouhia (hi’o 2 Nephi 25:10), ’e ’ua riro ’oe ’ei tuha’a nō te purarara’a o ’Īserā’ela. E aha te mana’o e tae mai i te tai’ora’a i te mau ha’api’ira’a a Isaia nō ni’a i te putuputura’a o ’Īserā’ela ananahi, nā reira ato’a te hau i te Mileniuma. Tātou te feiā Mo’a i te Mau Mahana Hope’a Nei, ’ua pi’ihia tātou ’ia tauturu i te putuputu i te mau ta’ata o te Atua i te mau mahana hope’a nei ’ei fa’aineinera’a i te fa’atere-ari’i-ra’a a te Mesia i te tau mileniuma ra. ’Ia tai’o ’oe i teie mau ’īrava, ’a feruri i te huru ’oe e fa’atupu ai i te mau parau tohu i fa’ahitihia. E aha tei fa’auruhia ia ’oe ’ia rave nō te tauturu i te putuputura’a i te mau ta’ata o te Atua ?

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

2 Nephi 12:1–3

Mai te mea ’ua haere ’outou i te hiero—« te mou’a ra o te fare o te Fatu »—e nehenehe tā ’outou e fa’a’ite nāhea te mau fafaura’a o te hiero e tauturu ai ia ’outou ’ia « haere… nā te ’ē’a [a te Fatu] ». Mai te mea ’aita ā ’outou i haere i te hiero, e fa’auru te tai’o-’āmui-ra’a i teie mau ’īrava i te hō’ē ’āparaura’a nō ni’a i te huru e fa’aineine nō te mau ha’amaita’ira’a o te hiero.

2 Nephi 15:18–23

E ti’a ānei i tō ’outou ’utuāfare ’ia feruri i te tahi mau hi’ora’a nō te mau mana’o parau ti’a ’ore o teie nei tau tā teie mau ’īrava e fa’ata’a nei ? Nāhea e ti’a ai ia tātou ’ia ’ore ’ia ha’avarehia e te mau mana’o hape nō ni’a i te maita’i ’e te ’ino ?

2 Nephi 21

Mai te mea e tītauhia te tahi tauturu nō te māramarama i teie pene (’o tē tū’ati ho’i i te Isaia 11), e nehenehe tā ’outou e ’apo mai i te tahi ha’api’ira’a i roto i Te Parau Ha’api’ira’a ’e te mau Parau Fafau 113:1–6, i reira te peropheta Iosepha Semita e pāhono ai i te tahi mau uira’a nō ni’a i te Isaia 11. E aha tā tātou i ha’api’i mai nō ni’a ia Iesu Mesia nā roto mai i teie mau ʼīrava ?

2 Nephi 21:9

E aha te tahi mau ’ohipa ta’a ’ē e ti’a ia tātou ’ia rave nō te tauturu i te fa’a’ī i te ao nei i « te ’ite i te Fatu » ?

2 Nephi 25:23–26

Nāhea e ti’a ai ia ’outou ’ia tauturu i tō ’outou ’utuāfare ’ia « ’oa’oa i te Mesia » ? Penei a’e e nehenehe tā ’outou e ani ia rātou ’ia pāpa’i i ni’a i te tahi hu’ahu’a pāpie i te mau mea nō ni’a i te Fa’aora e hōro’a nei ia rātou i te ’oa’oa. ’Ei reira, i roto i te mau purera’a pō ’utuāfare i muri mai, ’aore rā te tuatāpapara’a pāpa’ira’a mo’a a te ’utuāfare, e tai’o ai hō’ē pāpie. E nehenehe te mau melo o te ’utuāfare e tu’u fa’ahou atu i te tahi pāpie i te roara’a o te matahiti.

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i te tuatāpapara’a pāpa’ira’a mo’a a te ta’ata iho

’Imi i te mau hōho’a. I roto i te mau pāpa’ira’a mo’a e ti’a ia tātou ’ia ’ite mai i te tahi mau hōho’a e fa’a’ite ra nāhea te Fatu e ’ohipa nei. ’Ei hi’ora’a, i roto i te 2 Nephi 11–25, e ’ite mai paha ’outou i te tahi mau hōho’a e fa’a’ite ra nāhea te Fatu e fa’aara ’e e fa’a’ore i te hara.

Hiero nō Panama City (Panama)

Hiero no Pamana City (Panama). « E fa’ati’ahia te mou’a ra o te fare o te Fatu i ni’a i te tupua’i mou’a… e ta’iruru ato’a mai tō te mau fenua ato’a ra i reira » (2 Nephi 12:2).