Lehi ’e te Liahona, nā Joseph Brickey

27 nō Tēnuare–2 nō Fepuare

1 Nephi 16–22

« E ha’amaita’i au i tō ’outou ’ē’a i mua ia ’outou »

’Ia tuatāpapa ’outou i te 1 Nephi 16–22, ’a ’imi i te mau tuha’a e fa’atupu i te tahi mana’o ta’a ’ē. Nō vetahi, e mea au nā rātou ’ia fa’a’ū i te mau ’īrava i roto i tā rātou mau pāpa’ira’a mo’a; nō vetahi, e tāpa’opa’o rātou i te hiti o te ’api. E feruri nāhea ’outou e tāpa’o i te mau mana’o e tae mai.

Pāpa’i i te mau mana’o e tae mai

Tē tāmau noa ra te ’utuāfare o Lehi i tōna tere i te fenua i parauhia ’e ’ua parau te Fatu ia rātou : « E ha’amaita’i au i tō ’outou ’ē’a i mua ia ’outou, mai te mea e ha’apa’o ’outou i tā’u mau fa’auera’a » (1 Nephi 17:13). E mea pāpū roa, e ’ere te aura’a o te reira parau ē, e ’ōhie noa te tere—’ua māniania noa ā te mau melo o te ’utuāfare, ’ua fati te mau fana, ’e ’ua moto haere te ta’ata ’e ’ua pohe ’e ’ua tītau-fa’ahou-hia ia rātou ’ia hāmani i te hō’ē pahī ’e nā rātou iho e hāmani i tā rātou mau mātēria. Terā rā, ’ia fa’aruru te ’utuāfare i te ’ati ’aore rā te tahi mau ’ohipa teimaha roa ’ino, ’ua ’ite Nephi ē, ’aita te Fatu i ātea roa. I ’ite ’oia ē, e « tauturu mai [te Atua] ia rātou, e fa’aitoito ia rātou ’e e fa’atupu ho’i ’oia i te rāve’a e ti’a ai ia rātou ’ia rave i te mea tāna i fa’aue mai ia rātou » (1 Nephi 17:3). Mai te peu ’ua ui tō ’outou mana’o ē, nō te aha tē tupu nei te mau ’ohipa ’ino i te mau ta’ata maita’i mai ia Nephi ’e tōna ’utuāfare, e ’ite mai ’outou i te tahi hi’ora’a i roto i teie nau pene. Hau roa atu paha, e ’ite ’outou e aha tā te mau ta’ata maita’i e rave ’ia tupu te mau ’ohipa ’ī’ino.

Mau mana’o nō tā ’oe iho tuatāpapara’a pāpa’ira’a mo’a

1 Nephi 16–18

’Ia ha’apa’o vau i te mau fa’auera’a, e tauturu mai te Atua iā’u ’ia fa’aruru i te mau fifi.

Tē fa’a’ite nei te mau pene 16–18 nō 1 Nephi i te mau fifi rau tā te ’utuāfare o Nephi i fa’aruru, mai te ’imira’a i te rāve’a i te fatira’a te fana (hi’o 1 Nephi 16:17–32), mai te pohera’a Isemaela (hi’o 1 Nephi 16:34–39), mai te hāmanira’a i te hō’ē pahī (hi’o 1 Nephi 17:7–16; 18:1–4), ’e mai te ’āfaro-’ore-ra’a te mana’o i roto i te ’utuāfare (hi’o 1 Nephi 18:9–22). E aha te ta’a-’ē-ra’a i roto i te pāhonora’a a Nephi ’e a te tahi atu mau melo o te ’utuāfare ? E aha te mau fa’ahope’ara’a o te reira mau pāhonora’a ?

Penei a’e e mea au ’ia pāpa’i i te mea tā ’oe e ’ite mai i roto i te hō’ē tāpura ma teie nau upo’o parau : « Te fifi », « Pāhonora’a a Nephi », « Tā vetahi ’ē pāhonora’a » ’e te « Fa’ahope’ara’a ». I tō ’oe mana’o, nō te aha i noa’a ai ia Nephi ’ia vai ha’apa’o maita’i noa ’eiaha mai te tahi atu mau pu’era’a ? Feruri nāhea te hi’ora’a o Nephi ’e o tōna ’utuāfare e nehenehe e tauturu ia ’oe ’e tō ’oe mau fifi.

Hi’o ato’a i te mau video i roto i te Book of Mormon Videos collection i ni’a ia ChurchofJesusChrist.org ’aore rā te Vaira’a buka ’evanelia.

1 Nephi 16:10–16, 23–31; 18:11–22

Tē arata’i nei te Fatu iā’u i roto i te mau rāve’a iti ’e te ’ōhie.

I te arata’ira’a te Atua i te ’utuāfare o Lehi i roto i te medebara, ’aita ’oia i hōro’a ia rātou i te hu’ahu’ara’a nō te fa’anahora’a o te tere i te fenua i parauhia. ’Ua hōro’a rā ’oia ia Lehi i te Liahona nō te arata’i i tōna ’utuāfare i terā mahana ’e terā mahana ē tāpae noa atu rātou. E aha tā te Metua i te Ao ra i hōro’a ia ’oe ’ei arata’i ’e ’ei ’avei’a ? ’Ia mana’o ’oe, e aha te aura’a te parau ē « nā roto i te mau rāve’a iti e fa’atupu ai te Fatu i te mau mea rarahi » ? (1 Nephi 16:29).

’Ia tai’o ’oe i te 1 Nephi 16:10–16, 23–31 ’e te 18:11–22, ’a feruri i te fa’ati’ara’a i te hō’ē tāpura nō te mau parau tumu e fa’ahōho’a nei i te huru te Atua e arata’i nei i tāna mau tamari’i (’ei hi’ora’a, tē ha’api’i ra te 1 Nephi 16:10 ē, i te tahi mau taime, e rāve’a tīa’i-’ore-hia nā te Atua nō te arata’ira’a ia tātou). E aha te mau ’ohipa i tupu i ni’a ia ’oe e au i teie mau parau tumu ?

Hi’o ato’a Alama 37:7, 38–47; Te Parau Ha’api’ira’a ’e te mau Parau Fafau 64:33–34.

Mai te mea ’ua ineine ’outou e’ita ’outou e mata’u, nā Clark Kelley Price

1 Nephi 19:23–24; 20–22

E ti’a iā’u ’ia « fa’aau i te mau pāpa’ira’a mo’a » iā’u nei.

’Ua pāpa’i ’o Isaia i te mau tamari’i pā’āto’a a ’Īserā’ela, ’e ’ua hi’o Nephi ē, ’o tōna ato’a iho ïa ’utuāfare—’o ’oe ato’a ho’i (hi’o 1 Nephi 19:23–24). Nō ni’a i te fa’ahitira’a Nephi i te parau a Isaia, ’ua nā ’ō te peresideni Henry B. Eyring : « E tai’o vau i te mau parau a Isaia… ma te mana’o ē ’ua rave mai Nephi i teie mau tuha’a ’o tā’u e nehenehe e tu’u ’āfaro i tō’u ’ā’au mai te huru tē paraparau mai nei te Fatu iā’u, ma te ha’ape’ape’a ’ore i te huru fa’ahōho’ara’a » (« The Book of Mormon Will Change Your Life », Ensign, Fep. 2004, 10).

Ma te pe’e i te mau parau a te peresideni Eyring, ’a feruri i te mau uira’a i muri nei ’a tai’o ai ’oe i te mau pene 20–22 :

1 Nephi 20:1–9.E aha te mau parau i roto i teie nau ’īrava e fa’ahiti nei i te parau nō te mau tamari’i a ’Īserā’ela ? Nāhea te reira e fa’ahi’o nei ia Lamana ’e Lemuela ? E aha te mau parau fa’aarara’a ’e te mau fa’a’ohipara’a tā ’oe e ’ite nei nō ’oe iho ?

1 Nephi 20:17–22.E mea nāhea te Fatu i te arata’ira’a i tamari’i a ’Īserā’ela ? E mea nāhea ’oia i te arata’ira’a i te ’utuāfare o Lehi ? E mea nāhea ’oia e arata’i nei ia ’oe ?

E aha atu ā tā ’oe e ’ite nei i roto i te 1 Nephi 20–22 ’o tē fa’atupu nei i te mana’o ē, tē paraparau ra te Fatu ia ’oe ? E aha tā te mau parau a Nephi i roto i te pene 22 e ha’amāramarama nei ia ’oe nō ni’a i te mau parau tohu a Isaia ?

1 Nephi 21

’O vai te ’utuāfare o ’Īserā’ela ’e ’o vai te mau ’Etene ?

Te ’utuāfare o ’Īserā’ela, ’o te hua’ai ïa o te peropheta Iakoba i roto i te Faufa’a Tahito, ’o ’oia tei topahia te i’oa ’o ’Īserā’ela nā te Fatu (hi’o Genese 32:28; 35:10; ). ’Ua tu’u te Fatu i te tahi mau fafaura’a ia ’Īserā’ela ra, ’e ’ua hi’ohia tōna hua’ai ’ei nūna’a fafau nā te Atua. Terā rā, e rave rahi u’i i muri iho, e rave rahi o rātou tei fāriu ’ē atu i te Fatu ē i te pae hope’a ra ’ua purara roa nā ni’a i te fenua.

Te ta’o ’Etene i roto i teie mau ’īrava, ’o te mau ta’ata ïa ’aita ā i ’ite i te ’evanelia ( ). ’Ua ha’api’i Isaia ē, i te mau mahana hope’a ra, e noa’a i te ’Etene te ’evanelia ’e e riro mai rātou ’ei mauiha’a nō te ha’api’i atu ’e nō te ha’aputuputu i te ’utuāfare o ’Īserā’ela (hi’o 1 Nephi 21:22; 22:8–12; hi’o ato’a Isaia 60; 66:18–20).

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

1 Nephi 17:1–6, 17–22

Penei a’e e nehenehe tā tō ’outou ’utuāfare e fa’aau i te fa’ati’ara’a a Nephi i tō rātou tere i roto i te medebara (hi’o 1 Nephi 17:1–6) i tā tōna nau taea’e fa’ati’ara’a (hi’o 1 Nephi 17:17–22). ’Ia mana’o ’outou, nō te aha e mea ta’a ’ē tā rātou hi’ora’a i tō rātou tere ? E aha tē nehenehe e ’apo mai nā roto mai ia Nephi nō ni’a i te vai-ha’apa’o-maita’i-ra’a i roto i tā tātou hi’ora’a i te mau mea ?

1 Nephi 17:17–22; 18:9–16

E aha te mau fa’ahope’ara’a nō te pohehae, te mārōra’a ’e te amuamura’a i roto i te ’utuāfare ? Nāhea e upo’oti’a i ni’a i teie mau fifi ?

1 Nephi 19:22–24

’Ua fa’aau Nephi i te mau pāpa’ira’a mo’a i tōna ’utuāfare « ’ia riro te reira ’ei maita’i ’e ’ei ha’api’ira’a nō [rātou] » (1 Nephi 19:23). E rave rahi ’ā’amu i roto i te 1 Nephi 16–18 tā tō ’outou ’utuāfare e nehenehe e fa’aau ia ’outou. Penei a’e e nehenehe e ha’uti ta’ata ora i teie mau ’ā’amu ’e e paraparau i te fa’a’ohipara’a te ’utuāfare i te reira.

1 Nephi 21:14–16

Nāhea te poro’i i roto i teie mau ’īrava e nehenehe ai e tauturu i te hō’ē ta’ata e mana’o ra ē ’ua mo’ehia ’oia ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i te tuatāpapara’a a te ta’ata iho

Ani i te Fatu i te tauturu. ’Ua hōro’ahia mai te mau pāpa’ira’a mo’a nā roto i te heheura’a ’e tītauhia te heheura’a nō te māramarama mau i te reira. ’Ua parau te Fatu ē : « ’Ia ani mai iā’u ma te fa’aro’o… e fa’a’ite-mau-hia ïa taua mea ra ia [’outou] » (1 Nephi 15:11).

’Ua fa’a’ino roa mai rāua iā’u, nā Walter Rane