« 20–26 nō Tēnuare. 1 Nephi 11–15 : ‘Te parau ti’a ’e te mana o te Atua, ’o tā rātou ïa mauiha’a’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 20–26 nō Tēnuare. 1 Nephi 11-15 », Mai, pe’e mai—nō te ta’ata hō’ē ’e te ’utuāfare : 2020
Monamona rahi a’e i te mau monamona ato’a, nā Miguel Angel González Romero
20–26 nō Tēnuare
1 Nephi 11–15
« Te parau ti’a ’e te mana o te Atua, ’o tā rātou ïa mauiha’a »
E ti’a ānei ia ’outou ’ia hi’o ia ’outou iho i roto i te 1 Nephi 11–15 ? E aha te mau tuhaa ’īrava faufaa rahi a’e nō ’outou ’e tō ’outou ’utuāfare ?
Pāpa’i i te mau mana’o e tae mai
E ’ohipa rahi roa ana’e tā te Atua nō tāna peropheta, pinepine ’oia i te hōro’a i terā peropheta i te hō’ē ’ōrama rahi roa ’o tē tauturu iāna ’ia māramarama i te mau fā a te Atua nō tāna mau tamari’i. ’Ua ’ite Mose i te ’ōrama nō « teie nei ao, ’e te feiā ho’i e pārahi i roto ra, ’e ’oia ato’a i te mau ra’i ra » (Mose 1:36). ’Ua ’ite te ’āpōsetolo Ioane i te tua’ā’ai o te ao ’e te tae-piti-ra’a mai o te Fa’aora (hi’o i te buka Apokalupo). ’Ua ’ite Iosepha Semita i te Metua ’e i te Tamaiti (hi’o Iosepha Semita—’Ā’amu 1:17–18). ’Ua fārii Lehi i te hō’ē ’ōrama tei faahōho’a i te tere tei tītauhia ia tātou ’ia rave nō te haere i te Fa’aora ’e i tōna here.
Mai tei pāpa’ihia i roto i te 1 Nephi 11–14, ’ua ’ite Nephi i te tāviniraa a te Fa’aora, i te ananahi o te hua’ai o Lehi i te fenua i parauhia ’e te hope’araa o te ’ohipa a te Atua i te mau mahana hope’a. ’Ua tauturu te reira ’ōrama i te faaineineraa ia Nephi nō te ’ohipa i mua iāna, ’e e nehenehe ato’a ho’i i te reira ’ia faa’ineine ia ’outou—inaha e ’ohipa tā te Atua nō ’outou ’ia rave i roto i tōna bāsileia. Tei roto ’outou i te « feiā mo’a o te ’ēkālesia a te ’Ārenio » tā Nephi i ’ite, « tei purara i te mau fenua o te ao ato’a nei; ’o te parau ti’a ’e te mana o te Atua i te hanahana rahi ra, ’o tā rātou ïa mauha’a » (1 Nephi 14:14).
Mau mana’o nō tā ’oe iho tuatāpapara’a pāpa’ira’a mo’a
’Ua tono te Atua ia Iesu ’ei fa’a’iteraa nō tōna here.
’Ei tauturura’a ia Nephi ’ia māramarama i te aura’a o te tumu rā’au tā tōna metua tāne i ’ite, ’ua fa’a’ite te hō’ē melahi iāna i « te Tamaiti a te Metua hau mure ’ore » (1 Nephi 11:21). Nā te reira i fa’aferuri ia Nephi ē, tē fa’ahōho’a nei te tumu rā’au i te here o te Atua. ’Aita rā i oti te ’ōrama. ’Ia tai’o ’e ’ia feruri ’oe i te 1 Nephi 11, e aha tā ’oe e ’ite ra ’o tē tauturu nei ia ’oe ’ia māramarama nō te aha ’o Iesu Mesia te fa’a’itera’a hope nō te here o te Atua ?
Nō te ha’api’i nō ni’a i te tahi atu mau fa’ahōho’ara’a i roto i te ta’oto a Lehi, e hi’o i te 1 Nephi 11:35–36; 12:16–18; ’e te 15:21–30.
Hi’o ato’a Ioane 3:16.
’Ua fa’aineine te Fatu i te ’ē’a nō te Fa’aho’i-fa’ahou-ra’a mai.
E’ita ’o Nephi e ora nō te ’ite mata i te rahira’a o tāna i ’ite i roto i tāna ’ōrama. Nō te aha e mea faufa’a nō Nephi ’ia ’ite i teie mau mea ? Nō te aha e mea faufa’a nō ’oe ’ia ’ite i te reira mau mea ? Penei a’e e nehenehe tā ’oe e ui i teie uira’a i te taime tāta’itahi ’ia tai’o ’oe nō ni’a i te hō’ē mea tā Nephi i ’ite i roto i tāna ’ōrama.
Teie te tahi o te ’ohipa tā Nephi i ’ite : te ananahi o tōna mau ta’ata (hi’o pene 12), te ’aihu’arā’aura’ahia Amerika ’e te ’ōrurehaura’a te Ta’ata Marite (hi’o pene 13:12–19), te Tāivara’a rahi (hi’o pene 13:20–29), ’e te Fa’aho’i-fa’ahou-ra’a mai te ’evanelia (hi’o pene 13:32–42).
E aha « te ’ekālesia rahi ’e te faufau » tā Nēphi i ’ite ?
Tē fa’ata’a nei Elder Dallin H. Oaks ē, « te ’ekālesia rahi ’e te faufau » tā Nephi i parau, ’o « te mau ferurira’a hōhonu ato’a ïa ’aore rā te mau fa’anahora’a e pāto’i nei i te ti’aturira’a i te Atua. ’E te ‘tītīra’a’ tā teie ‘’ekālesia’ e ’imi nei i te arata’i atu i te feiā mo’a, e ’ere ā ïa i te ’ōpanipanira’a pae tino, e tītīra’a rā o te mau mana’o hape » (« Stand as Witnesses of God », Ensign, Māti 2015, 32).
’O vai te ta’ata tā Nephi i ’ite ’e tā te Vārua i « te fa’aurura’a » ’ia « haere… nā ni’a i te moana rahi ra » ?
’Ua ’ite Nephi i te Vārua Maita’i i te fa’aurura’a ia Christophe Colomb ’ia fano atu i te mau fenua Amerika. I te 14 nō Māti 1493, ’ua pāpa’i Colomb tāne nō ni’a i te reira tere : « ’Eiaha teie mau fa’ahope’ara’a rahi ’e te fa’ahiahia ’ia parau-noa-a’e-hia ē nō’u … ; inaha ho’i tā te ferurira’a ta’ata noa iho e ’ore e māramarama, e hō mai te Vārua o te Atua i te tauto’ora’a a te ta’ata nei, inaha e peu nā te Atua ’ia fa’aro’o i te mau pure a tāna mau tāvini tei here i tāna mau fa’aue noa atu ā ’ia hi’ohia, e ’ohipa e’ita paha e haere i te rave » (The Annals of America [Encyclopedia Britannica, Inc., 1976], 1:5).
Tē fa’aho’i fa’ahou mai nei te mau pāpa’ira’a mo’a i te mau mahana hope’a nei i te « mau mea pāpū ’e te faufa’a ».
’Ua ’ite Nephi i roto i te ’ōrama ē, e riro te Bibilia—tei parauhia te « pāpa’a parau a te ’ati Iuda »—i te « ’īriti-’ē-hia atu te mau mea pāpū ’e te faufa’a ho’i e rave rahi nō roto i te [reira] » (1 Nephi 13:23, 28). Terā rā, ’ua ’ite ato’a ’oia ē e riro te Atua i te fa’aho’i fa’ahou mai i teie mau mea nā roto i « te tahi atu ā nā buka »—te Buka a Moromona ’e te tahi atu mau pāpa’ira’a mo’a i te mau mahana hope’a nei (hi’o 1 Nephi 13:39–40). E aha te tahi o te mau parau mau faufa’a tā te Buka a Moromona e tauturu nei ia tātou ’ia māramarama maita’i a’e ? E aha te vāhi ta’a ’ē i roto i tō ’oe orara’a maoti teie mau mea pāpū ’e te faufa’a i fa’aho’ihia mai ?
Tē fa’aho’i fa’ahou mai nei te Buka a Moromona i te mau parau mau o te ’evanelia i mo’e i roto i te tāivara’a.
Hi’o ato’a « Plain and Precious Truths », Ensign, Māti 2008, 68–73; Russell M. Nelson, « Te Buka a Moromona : E aha te huru tō ’outou orara’a ’āhani ’aita te reira ? » Ensign ’aore rā Liahona, Novema 2017, 60–63.
E pāhono mai te Fatu iā’u mai te peu e ani atu vau ma te fa’aro’o ’e te ’ā’au marū.
’Ua tupu a’enei te taime e au ē, ’aita te heheura’a e tae mai nei—’aita te Atua e paraparau ra ia ’oe ? E aha te parau a’o tā Nephi i hōro’a i tōna nā taea’e i te tupura’a te reira nō rāua ? Nāhea tā ’oe e nehenehe e fa’a’ohipa i te parau a’o a Nephi i roto i tō ’oe orara’a, ’e nāhea tā ’oe e nehenehe e fa’a’ohipa i te reira nō te tauturu ia vetahi ’ē ?
Hi’o ato’a Iakoba 4:8 ; Alama 5:46 ; 26:21–22.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
1 Nephi 11–14
’Ia tai’o te ’utuāfare i teie mau pene, e tāpe’a i te tahi taime nō te ui i te mau uira’a mai teie : E aha tā Nephi i ’ite i roto i tāna ’ōrama tei fa’a’oa’ao iāna ? E aha tei fa’a’oto iāna ? Nō te aha ?
1 Nephi 13:20–42
Nō te tauturu i te mau melo o te ’utuāfare ’ia māramarama i te faufa’a nō te mau parau mau « pāpū ’e te faufa’a » i roto i te Buka a Moromona, ’a fa’aau i te hō’ē poro’i pāpū maita’i i te hō’ē poro’i parai. Nō te aha te Metua i te Ao ra e hinaʼaro ai i tāna parau mau ’ia ha’api’i-pāpū-hia ? E nehenehe te mau melo o te ’utuāfare ’ia hōro’a i tō rātou ’itera’a pāpū nō te tahi o te mau parau mau « pāpū ’e te faufa’a » tā rātou i ’apo mai nā roto mai i te Buka a Moromona.
1 Nephi 14:12–15
Nō te aha e mauiha’a nā tātou « te parau ti’a ’e te mana o te Atua » ’ia ora pāpū tātou i tā tātou mau fafaura’a i mua i te Atua ?
1 Nephi 15:8-11
E aha te tahi mau ’ohipa i tupu tā te ’utuāfare e nehenehe e fa’a’ite nō ni’a i te « anira’a i te Fatu » ? E aha tā tātou e ’apo mai nā roto maii te hi’ora’a o Nephi ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’ira’a i te tuatāpapara’a pāpa’ira’a mo’a a te ta’ata iho
Fa’a’ohipa i te mau tauturu tuatāpapara’a. Tē hōro’a nei te mau fa’ahorora’a, te arata’i nō te mau pāpa’ira’a mo’a ’e te tahi atu mau tauturu tuatāpapara’a i te tahi atu mea e ’apo mai nā roto mai i te mau pāpa’ira’a mo’a. ’Ei hi’ora’a, e aha tā te mau fa’ahorora’a raro e tauturu nei ia ’outou ’ia māramarama nō ni’a i te 1 Nephi 14:20–21 ?
Te ’ōrama a Nephi nō Maria, nā James Johnson