2008
Te mau Parau Mau Papû e te Faufaa Rahi
Mati 2007

Te mau Parau Mau Papû e te Faufaa Rahi

Ua haamaitaihia tatou no te mau papa‘iraa mo‘a i te mau mahana hopea nei e te Bibilia atoa no te haapii e no te faaite papû ia tatou no ni‘a ia Iesu Mesia. I raro nei e 25 ïa parau mau no ni‘a i te Faaora e te mau papa‘iraa mo‘a e au i te mau haapiiraa a te mau peropheta no te mau mahana hopea nei (Aita i roto i teie nei tabula te taatoaraa o te mau haapiiraa no ni‘a i teie nei mau parau tumu. No te tahi atu â haamaramaramaraa no ni‘a i teie nei mau tumu parau, a hi‘o « Te Mesia Ora : Te iteraa Papû a te mau Aposetolo », i te api 42 no teie nei ve‘a).

Haapiiraa

No roto mai i te Bibilia

No roto mai i te mau Papa‘iraa Mo‘a e te mau Peropheta no te mau Mahana Hopea nei

1Te Metua, te Tamaiti, e te Varua Maitai e toru ïa na taata taa ê te tahi i te tahi.

« Tootoru hoi e faaite i ni‘a i te ra‘i, o te Metua, o te Logo, e o te Varua Maitai : e o taua tootoru ra hoi hoê â ïa » (1 Ioane 5:7; a hi‘o atoa Mataio 3:16-17; Te Ohipa 7:55).

« I parau noa na vau e te Atua o te hoê ïa taata taa ê, o Iesu Mesia e hoê ïa taata taa ê atu i te Atua te Metua, e te Varua Maitai te hoê ïa taata taa ê e e Varua oia : e teie na tootoru e na taata tootoru taa ê ïa e na Atua e toru » (Iosepha Semita, Te mau Haapiiraa a te mau Peresideni o te Ekalesia : Iosepha Semita [2007], 41–42).

2E tino i‘o e te ivi to te Metua e te Tamaiti; e taata varua te Varua Maitai.

« A fâfâ mai na ia ite; aita o te varua e i‘o e te ivi mai to‘u nei, ta outou e hi‘o mai nei » (Luka 24:39; a hi‘o atoa Genese 5:1; Ioane 14:9; Philipi 3:21).

« E tino i‘o e te ivi to te Metua mai te au iho i to te taata nei te huru; e te Tamaiti atoa hoi; area râ o te Varua Maitai râ, aore ïa to’na e tino i‘o e te ivi, tera râ e tino varua oia. Ahiri aita ra, e ore roa ïa e tia i te Varua Maitai ia parahi i roto ia tatou nei » (PH&PF 130:22; a hi‘o atoa 3 Nephi 11:13-15).

3Ua hoê roa na melo e toru no te Atuaraa i roto i te opuaraa.

« E tau Metua Mo‘a ra e, e tiai oe ia ratou i ta oe i ho mai no‘u i to i‘oa na, ia hoê a‘e ratou mai ia tâua atoa nei â » (Ioane 17:11).

« E mau taata taa ê ratou, e mea hoê râ ratou i roto i te opuaraa e te ohipa. Ua hoê ratou i te faatupuraa i te opuaraa rahi hanahana no te faaora e te faateiteiraa o te mau tamarii a te Atua » (Gordon B. Hinckley, « E ti‘aturi au ia Ratou Tootoru », Liahona, Tiurai 2006, 8; a hi‘o atoa 3 Nephi 11:27).

4Te ohipa e te hanahana a te Atua o te faatupuraa ïa i te tahuti ore e te ora mure ore o te taata nei.

« Ua faaite-hua-hia mai râ i teie nei i te faraa mai o to tatou ora o Iesu Mesia, o tei faaore i te pohe nei,e ua faaite papû mai i te ora mure ore i te evanelia nei ra » (2 Timoteo 1:10; a hi‘o atoa Ioane 3:16-17; 1 Korinetia 15:22; Hebera 9:11-12, 28).

« Inaha, o teie hoi ta‘u ohipa e to‘u hanahana hoi – ia faatupu i te tahuti ore e te ora mure ore o te taata nei » (Mose 1:39; a hi‘o atoa PH&PF 29:43).

5I te Metua ra hoi o Iesu Mesia i te matamua ra e o Oia te Matahiapo.

« I vai na te Logo i te matamua ra, i te Atua ra hoi te Logo, e o te Atua hoi te Logo.

« I te Atua ra hoi oia i te matamua ra » (Ioane 1:1-2; a hi‘o atoa Roma 8:29; Hebera 1:5-6).

« Tei te Metua vau i te haamataraa, e o te Matahiapo vau » (PH&PF 93:21; a hi‘o atoa 3 Nephi 9:15; Mose 2:26).

6I roto i te ao na mua i teie nei oraraa, ua ma‘iti te Metua i te Ao ra ia Iesu Mesia ia riro ei Faaora.

« Ua haapa‘o-atea-hia [te Mesia] hou te tumu o teie nei ao, i teie nei râ mau anotau hopea i faaitehia mai ai no outou » (1 Petero 1:20; a hi‘o atoa Apokalupo 13:8).

« Ua parau maira Ta‘u Tamaiti Here, Ta‘u i here e i ma‘iti mai te matamua mai ïa, na ô mai ra – E te Metua, ia haapa‘ohia to oe hinaaro, e no oe te hanahana e a muri noa’tu » (Mose 4:2; a hi‘o atoa Etera 3:14).

7I raro a‘e i te arata‘iraa a To’na ra Metua, ua hamani o Iesu i te fenua nei.

« Na’na i hamani te mau mea atoa nei, aore roa e, e ere oia i te hoê mea i hamanihia » (Ioane 1:3; a hi‘o atoa Isaia 40:28; Kolosa 1:16).

« Inaha, o vau nei o Iesu Mesia ïa, o te Tamaiti na te Atua. O vau tei hamani i te ra‘i e te fenua e to roto ra » (3 Nephi 9:15; a hi‘o atoa Mosia 3:8; Mose 1:33).

8Iesu Mesia o Iehova ïa no te Faufaa Tahito.

« Ua parau atura Iesu ia ratou, Amene, amene, e parau atu vau ia outou, Aita Aberahama i fanau, te vai nei au » (Ioane 8:58; a hi‘o atoa Genese 22:14; 1 Korinetia 10:1-4).

« Te amo nei tatou i roto i to tatou mau aau te hoê iteraa papû e te aueue ore no te misioni hanahana a te Fatu ra ia Iesu Mesia. O Oia ïa o Iehova rahi no te Faufaa Tahito, te Taata Tei Hamani i te mau mea atoa i raro a‘e i te arata‘iraa a To’na ra Metua » (Gordon B. Hinckley, « E Tau no te Mauruuru », Liahona, Titema 1997, 4; a hi‘o atoa Aberahama 2:8).

9O Iesu te Fanau Tahi a te Metua i te tino nei.

« I riro mai nei te Logo ei taata e ua ti‘ahapa mai i ô tatou nei (e ua ite matou i to’na hanahana, mai te hanahana e au i te Tamaiti fanau tahi a te Metua ra,) ua î i te maitai e te parau mau » (Ioane 1:14; a hi‘o atoa Ioane 3:16).

« Ua ite au nei e, e tae mai Iesu Mesia ra, oia hoi te Tamaiti ra, te Tamaiti Fanau Tahi a te Metua ra, tei î i te maitai, e te aroha e te parau mau. E inaha, o oia te tae mai, ia hopoi ê atu i ta to te ao nei mau hara, oia hoi, te mau hara a te taata atoa te tamau maite i te faaroo i to’na ra i‘oa » (Alama 5:48; a hi‘o atoa Alama 9:26; PH&PF 93:11).

10O Iesu te hoho‘a maitai no te taata nei.

« Ua horo‘a’tu na hoi au i te haapa‘oraa no outou, o ta‘u i rave iho ia outou nei, ia na reira atoa hoi outou » (Ioane 13:15; a hi‘o atoa 1 Petero 2:21).

« Te hoê o te mau tumu faufaa no to tatou nei oraraa o to tatou ïa faaauraa i te hoho‘a e te huru o te taata tei parahi i te tino nei ma te viivii ore – maitai roa, mâ, e te hara ore ! Ua haere mai te Mesia eiaha noa no te aufauraa i te mau hara o to te ao nei, no te horo‘a râ i te hi‘oraa i mua i te taata atoa e no te haamau i te ture no te maitairaa o te Atua, o te ture a te Atua, e te haapa‘oraa i ta te Metua » Joseph F. Smith, Te mau Haapiiraa a te mau Peresideni o te Ekalesia : Joseph F. Smith [1998], 151; a hi‘o atoa 2 Nephi 31:16; 3 Nephi 18:16).

11I to te Fatu haamataraa i Ta’na ohipa tahuti nei, ua haamau Oia i Ta’na Ekalesia.

« E ua haapa‘o oia i te tahi pae ei aposetolo; e te tahi pae ei peropheta; e te tahi pae ei haapii evanelia, e te tahi pae ei tiai e ei orometua;

« Ei faaau i te feia mo‘a i te ohipa ra e orometua, ia tupu i te maitai te tino o te Mesia ra » (Ephesia 4:11-12; a hi‘o atoa Mataio 16:18; Luka 6:13).

« Te ti‘aturi nei matou i te tuuraa o te mau toro‘a i roto i te Ekalesia nei, mai tei tuuhia mai i roto i te ekalesia i mutaa ihora, te mau aposetolo, te mau peropheta, te mau tiai, te mau haapii, te mau haapii evanelia, e te tahi atu â mau toro‘a » (Te mau Hiro‘a Faaroo 1:6; a hi‘o atoa 3 Nephi 12:1).

12Ua horo‘a te Faaora i to’na Ora no te faaoreraa i te mau hara a te taata atoa.

« O to‘u ïa toto, e toto no te faufaa apî, i haamaniihia no te taata e rave rahi ia matara te hara » (Mataio 26:28; a hi‘o atoa Isaia 53:5-6; 1 Ioane 2:1-2).

« No te mea inaha, ua faaoroma‘i au, o te Atua, i teie nei mau mea no te taata’toa, ia ore ratou ia roohia i te mamae mai te mea e e tatarahapa ratou…

« Na te reira mamae rahi i faatupu i roto ia‘u, oia o te Atua, o tei hau a‘e i te mau mea atoa ra, i te rurutaina no te mauiui, e ua tahe maira te toto na te mau poa’toa, e ua mauiui i te tino e te varua atoa hoi – E ua hinaaro hoi ia ore au ia inu i te au‘a maramara e oriorio atu –

« Area râ, ei hanahana to te Metua, e ua inu vau e ua faaoti hoi i ta‘u mau faaineineraa i te tamarii a te taata nei » (PH&PF 19:16, 18-19; a hi‘o atoa 1 Nephi 11:32-33).

13Ua nehenehe ia Iesu ana‘e i te aufau i te utu‘a no ta tatou mau hara.

« Aore roa hoi e ora ia vetahi ê : aita’tu hoi e i‘oa i faaitehia mai i te taata i raro a‘e i teie nei ra‘i e ora‘i tatou nei » (Te Ohipa 4:12).

« Ua nehenehe Ia’na i te rave faaoti i Ta’na misioni no te mea e Tamaiti hoi Oia na te Atua e ua mau Oia i te mana a te Atua…

« Aita e taata tahuti tei mau i te mana aore râ te aravihi no te faaora i te mau taata atoa mai to ratou huru mo‘e e te hi‘a, aita atoa e nehenehe i te hoê taata ia horo‘a i to’na iho ora e ia faatupu i te ti‘a-faahou-raa no te tahi atu mau taata atoa.

« O Iesu Mesia ana‘e tei nehenehe e tei hinaaro i te rave faaoti i taua ravea faaora ra no te aroha » (Ezra Taft Benson, « Jesus Christ – Our Savior and Redeemer », Tambuli, Titema 1990, 5; a hi‘o atoa Alama 34:8–10).

14Ua ofati o Iesu i te mau tapea no te pohe.

« Ua tia faahou mau ra te Mesia i te poheraa ra, e ua riro ei matamua no te feia i mairi te taoto ra » (1 Korinetia 15:20; a hi‘o atoa Ioane 14:19; 1 Korinetia 15:54).

« E teie nei, te vai nei te hoê pohe i parauhia te pohe tino : e na roto i te poheraa o te Mesia e matara‘i te tapea o taua pohe tino ra, ia faatia-ana‘e-hia mai te taata i teie pohe tino nei » (Alama 11:42; a hi‘o atoa Mosia 16:7-8; Alama 22:14).

15O Iesu te Faaora e te Taraehara o te ao nei.

« Ua hi‘o a‘enei matou, e te faaite hua nei matou, e ua tono mai te Metua i te Tamaiti ei Ora no to te ao » (1 Ioane 4:14; a hi‘o atoa Luka 2:11).

« E tae mai oia i te ao nei ia ora te taata atoa ia’na, ia haapa‘o ratou i to’na ra reo; inaha hoi, ua faaoroma‘i oia i te mauiui o te taata atoa, oia ïa, te mauiui o te mau taata atoa, te mau tane atoa, e te mau vahine atoa, e te mau tamarii atoa hoi » (2 Nephi 9:21; a hi‘o ato PH&PF 66:1; Mose 1:6).

16O Iesu te Mesia no te Faufaa Apî.

« Ua parau maira taua vahine ra ia’na, Ua ite au e, te haere mai na te Mesia (o te Faatahinuhia) e ia tae mai oia ra, na’na ïa e faaite mai ia matou i te mau parau atoa ra.

« Ua parau atura Iesu ia’na, O vau ïa e parau atu ia oe na » (Ioane 4:25-26; a hi‘o atoa Luka 4:16-21).

« E ia tae i te matahiti e ono hanere i muri a‘e i te matahiti i faarue ai to‘u metua i Ierusalema ra, e faatupu ai te Fatu te Atua i te hoê peropheta i rotopu i te ati Iuda ra, oia hoi, te hoê Mesia, te Faaora o to te ao nei » (1 Nephi 10:4; see also 2 Nephi 2:26; Mose 7:53).

17Ua tavini te Fatu i rotopu i Ta’na « mamoe ê atu â » i Amerika tahito ra.

« E mamoe ê atu â ta‘u, e ere i to teie nei aua, e arata‘i atoa mai au ia ratou e tia’i, e faaroo mai hoi ratou i to‘u reo, ia hoê a‘e nănă, e hoê hoi tiai » (Ioane 10:16).

« E oia mau ta‘u e parau atu ia outou, no outou ta‘u parau ra, a na ô atu ai au e, E mamoe ê atu â ta‘u, e ere i to teie nei aua, e arata‘i atoa mai au ia ratou e tia’i, e faaroo mai hoi ratou i to‘u re‘o, ia hoê a‘e nănă, e hoê hoi tiai » (3 Nephi 15:21; a hi‘o atoa 3 Nephi 19:2-3; 26:13, 15).

18O Iesu to tatou Arai e Auvaha i te Metua.

« Hoê hoi Atua, e hoê hoi arai i ropu i te Atua e te taata, o te taata ra o Iesu Mesia » (1 Timoteo 2:5; a hi‘o atoa Ioane 2:1).

« A haamaea na i to outou mau aau i ni‘a e ia oaoa, no te mea tei rotopu vau ia outou na, e o vau nei to outou arai i te Metua » (PH&PF 29:5; a hi‘o atoa 2 Nephi 2:27-28; PH&PF 45:3-5).

19O te Fatu te Maramarama e te Ora o te ao nei.

« Ua parau faahou atura Iesu i te taata, ua na ô atura, O vau te maramarama o teie nei ao, o te pee mai ia‘u ra, e ore ïa e haere noa i te pouri, e maramarama ora ïa to’na » (Ioane 8:12; a hi‘o atoa Salamo 27:1; Ioane 1:9).

« No te mea oia mau ta‘u e parau atu nei ia outou na o Alepha e o Omega vau, te haamataraa e te faahopea, te maramarama e te ora hoi no te ao nei – e maramarama o te anaana mai i roto i te pouri e aita te pouri e ite mai na i te reira » (PH&PF 45:7; hi‘o atoa Mosia 16:9; PH&PF 12:9).

20E nehenehe ta Iesu e faaora i To’na mau taata i to ratou mau paruparuraa ra.

« E oia iho hoi i pohe i te mea i roohia i te ati, e tia hoi ia’na ia turu mai i te feia i roto i te ati ra » (Hebera 2:18; a hi‘o atoa Isaia 53:5).

« E e faaoroma‘i oia i to’na poheraa, i tatara‘i oia i te mau tapea o te pohe i ruuruuhia’i to’na ra mau taata; e e rave oia i to ratou paruparu i ni‘a ia’na iho ia faaîhia to’na ra aau i te aroha i au i te tino, ia ite oia na roto i te tino i te ravea e faaora‘i to’na mau taata i to ratou paruparuraa ra » (Alama 7:12; a hi‘o atoa PH&PF 62:1).

21E nehenehe ta te Faaora e taui i te natura taata.

« Tei roto ana‘e te taata i te Mesia ra, ua riro ïa ei taata apî; ua ore te mau mea tahito ra; inaha, ua riro te mau mea atoa ei mea apî » (2 Korinetia 5:17; a hi‘o atoa 1 John 5:4).

« Eiaha oe e maere i te mea ia fanau faahou te taata atoa e tia’i, oia hoi te mau vahine, e te mau tane, e to te mau fenua atoa, e to te mau reo atoa, e to te mau nunaa atoa, e to te mau opu atoa; oia ïa, ia fanau i te Atua ra, ia faarirohia to ratou huru tahuti e te mairi ra, ei huru parau-tia, i te faaoraraahia e te Atua, ia riro ei tamaiti e ei tamahine na’na ra.

« E ia na reira, e riro ratou ei taata faaapîhia; e ia ore ratou ia na reira, e ore roa ratou e parahi i te basileia o te Atua ra » Mosia 27:25-26; a hi‘o atoa Mosia 5:2, 7; Alama 5:14).

22Ua faati‘a faahou mai te Fatu i Ta’na Ekalesia matamua i te mau mahana hopea nei.

« E ia tono mai oia ia Iesu Mesia, o tei haapa‘ohia i mutaa ihora no outou:

« Ei tei ra‘i â hoi oia parahi ai, e tae noa’tu i te tau e tia’i te mau mea atoa nei, ta te Atua i parau mai i te vaha o te mau peropheta mo‘a no’na mai te matamua mai â o teie nei ao ra » (Te Ohipa 3:20-21; a hi‘o atoa Mataio 17:11).

« E o ratou atoa hoi o tei horo‘a-hia teie mau faaueraa, ia noaa mai ia ratou te mana no te haamauraa i te niu no teie nei ekalesia, e ia faatupu mai i te reira no roto mai i te vahi moemoe e te vahi poiri hoi, te ekalesia parau tia ana‘e e te mea ora i ni‘a i te ao paatoa nei, ua mauruuru roa vau, o te Fatu, i te reira » (PH&PF 1:30; a hi‘o atoa PH&PF 20).

23Te faatere nei Iesu i Ta’na Ekalesia na roto i Ta’na mau peropheta i ma‘itihia.

« I patuhia [outou] i ni‘a iho i te niu a te mau aposetolo e te mau peropheta ra, e o Iesu Mesia iho te tihi rahi » (Ephesia 2:20).

« Te upoo o te Ekalesia o te Fatu ïa o Iesu Mesia. Na’na teie Ekalesia. Te upoo râ i ni‘a i te fenua nei o to tatou ïa peropheta » (Gordon B. Hinckley, « The Church Is on Course », Ensign, Novema 1992, 53; a hi‘o atoa PH&PF 21:1-5).

24E ho‘i mai Iesu i te fenua nei i te hoê mahana.

« O Iesu nei â, tei ravehia a‘enei i ni‘a i te ra‘i, e ho‘i mai ïa mai te reira atoa ra, mai ta outou i ite atu ia’na i te revaraa’tu i ni‘a i te ra‘i ra » (Te Ohipa 1:11; a hi‘o atoa 1 Tesalonia 4:16; Apokalupo 1:7).

« No te mea e faaite atu vau ia‘u iho mai te ra‘i mai ra na roto i te mana e te hanahana rahi, mai te mau nuu atoa hoi no reira, e e parahi ma te parau-tia i rotopu i te taata nei i ni‘a i te ao nei e ia hoe a‘e tauatini matahiti, e e ore te feia parau-tia ore e tia mai » (PH&PF 29:11; a hi‘o atoa PH&PF 34:6; Mose 7:62-64).

25E haava ïa te Fatu i to te ao ma te parau-tia.

« Ua haapa‘ohia e ana te mahana e haava mai ai oia i to te ao atoa nei ma te parau-tia » (Te Ohipa 17:31; a hi‘o atoa Salamo 9:8; Isaia 11:3-4).

« E o te tatarahapa e te bapetizohia i to‘u ra i‘oa, e faaîhia ïa ratou; e ia tamau â ratou e tae noa’tu i te hopea, inaha, o te ore ïa ratou e faahapahia e au i mua i te Metua ia tae i te mahana e tia’i au e haava i to teie nei ao » (3 Nephi 27:16; a hi‘o atoa PH&PF 19:1-3).