Te Mesia Ora

Te Iteraa Papû o te Mau Aposetolo a Te Ekalesia a Iesu Mesia i te Feia Mo‘a i te Mau Mahana Hopea nei

Ua tarimahia te parau ra, « Te Mesia Ora : Te Iteraa Papû o te Mau Aposetolo » i te 1 no tenuare 2000 e te Peresideniraa Matamua e te Pŭpŭ no te Tino Ahuru Ma Piti Aposetolo. Ua nene‘ihia te reira i roto i te Liahona no te ava‘e Eperera 2000.

A faahanahana ai tatou i te fanauraa o Iesu Mesia a piti miliniuma i teie nei, te pûpû atu nei matou i to matou iteraa papû no ni‘a i te huru mau o To’na oraraa faito ore e te mâ e te mana mure ore o Ta’na tusia taraehara rahi. Aita atu e mana tei haaputapû hohonu i ni‘a i te mau taata atoa o tei ora a‘e na e o te ora â i ni‘a i te fenua.

O Oia taua Iehova Teitei roa ra o te Faufaa Tahito, te Mesia o te Faufaa Apî. I raro a‘e i te arata‘iraa a To’na Metua i te Ao ra, o Oia tei hamani i te fenua. « Na’na i hamani te mau mea atoa nei, aore roa e, e ere oia i te hoê mea i hamanihia » (Ioane 1:3). Noa’tu e aita Ta’na e hara, ua bapetizohia râ Oia no te faatupuraa i te parau tia atoa. Ua haere noa Oia ma te « hamani maitai » (Te Ohipa 10:38), noa’tu râ, ua faahapahia Oia no te reira. Ta’na evanelia o te hoê ïa poroi no te hau e te hamani maitai. Ua titau Oia i te taatoaraa ia pee i To’na huru. Ua haere Oia na ni‘a i te mau e‘a o Palesetina, ua faaora Oia i te feia ma‘i, ua ite te matapô, ua faati‘a i tei pohe. Ua haapii Oia i te parau mau no te ora mure ore, i te huru mau o to tatou oraraa na mua a‘e i teie oraraa, i te tumu o to tatou oraraa i ni‘a i te fenua nei e i te faufaa no te mau tamaroa e te mau tamahine a te Atua no te oraraa amuri a‘e.

Ua haamau Oia i te oro‘a ei haamana‘oraa i Ta’na tusia taraehara rahi. Ua tapeahia Oia e ua faautuahia i ni‘a i te mau pariraa haavare no te haamauruuru i te hoê pŭpŭ taata iino e ua faautuahia ia pohe i ni‘a i te satauro i Kalavari. Ua horo‘a Oia i To’na ora no te faaore i te mau hara a te taata nei. O Oia te horo‘araa rahi roa a‘e no te feia atoa o te haere mai e ora i ni‘a i te fenua nei.

Te haapapû maitai nei matou e To’na ora, o te tumu hoi o te aamu o te taata nei, aita ïa i haamata i Betelehema e aita atoa i hope i Kalavari. O Oia te Fanau Tahi a te Metua i te Ao ra, te Tamaiti Hoê roa i roto i te tino, te Faaora o to te ao nei.

Ua ti‘a mai Oia mai roto mai i te menema ia « riro ei matamua no te feia i mairi i te taoto ra » (1 Korinetia 15:20). Ei Fatu tei Ti‘a faahou mai, ua haere Oia i rotopu ia ratou o Ta’na i here i roto i te oraraa nei. Ua haere atoa Oia i rotopu i Ta’na mau « mamoe ê atu » (Ioane 10:16) i te fenua Amerika tahito ra. I roto i teie anotau apî nei, ua fâ mai Oia e To’na Metua i te tamaiti ra ia Iosepha Semita, te haamataraa ïa o tei tohu maorohia, « Ia tae i te tuuraa parau i te hope‘araa mau o te mau tau ra » ( Ephesia 1:10).

Ua papa‘i te Peropheta Iosepha no ni‘a i te Mesia Ora : « Mai te ura auahi ra To’na na mata; te rouru o to’na upoo ra e mea teatea roa ïa mai te hiona mâ roa ra; ua anaana maira to’na mata e ua hau a‘e i te anaana o te mahana; e o to’na reo ra mai te taheraa ïa o te pape rahi, oia te reo o Iehova, i te na oraa mai e:

« O vau nei te matamehai e te hopea ra; o vau nei hoi oia o te ora nei, o vau nei oia o tei taparahihia; o vau nei hoi to outou arai i te Metua ra » (PH&PF 110:3-4).

Ua parau â te Peropheta No’na ra: « E i teie nei, i muri mai i te mau parau faaite e rave rahi o tei horo’ahia no’na ra, o teie hoi te parau faaiteraa hopea roa ra, o ta maua e faaite atu nei no’na ra; Oia hoi te ora nei oia !

« No te mea ua ite mata’tura maua ia’na, i te pae atau hoi no te Atua; e ua faaroo maua i te reo i te faaiteraa mai e o oia ana‘e te Fanau Tahi ra no te Metua –

« Na’na, e na roto ia’na, e no’na hoi, te mau ao i hamanihia nei e i hamanihia na hoi, e te mau taata hoi no reira e mau tamaiti e e mau tamahine fanau hoi ratou no te Atua ra » (PH&PF 76:22-24).

Te faaite nei matou na roto i te mau parau u‘ana oia hoi, ua faahoihia mai To’na autahu‘araa e Ta’na Ekalesia i na i te fenua nei – « patuhia i ni‘a iho i… te mau aposetolo e te mau peropheta, e o Iesu Mesia iho te tihi rahi » (Ephesia 2:20).

Te faaite papû nei matou e e hoi mai Oia i te hoê mahana i ni‘a i te fenua nei. « E faaitehia mai te hanahana o Iehova, e ite paatoa te taata » (Isaia 40:5). E faatere Oia ei Arii no te Mau Arii e e parahi mai ei Fatu no te Mau Fatu, e e pi‘o hoi te mau turi o te mau taata atoa i raro e e fa‘i hoi te mau vaha atoa i roto i te haamoriraa i mua Ia’na. E tia tatou tataitahi ia haavahia e A’na mai te au i ta tatou mau ohipa e te mau hinaaro o to tatou mau aau.

Te faaite papû nei matou, ei Mau Aposetolo Na’na i Faatoro‘a-mau-hia e – o Iesu te Mesia Ora, te Tamaiti tahuti ore a te Atua. O Oia te Arii rahi o Emanuela o te tia i teie mahana i te pae atau o To’na ra Metua. O Oia te maramarama, te ora, e te ti‘aturiraa o to te ao nei. To’na haere‘a, o te e‘a ïa o te arata‘i i te oaoa i roto i teie oraraa e i te ora mure ore i roto i te ao e haere mai nei. Ia haamauruuruhia te Atua no te horo‘a faito ore o Ta’na Tamaiti hanahana.