Te faaroo o Emilio
Ua faaite mai te hoê diakono ia‘u – to’na episekopo – te auraa no te « faaroo ia faaorahia te ma‘i ».
Te tahi nau ava‘e i ma‘iri a‘enei, ua ma‘ihia, o Emilio, te hoê o te mau diakono i roto i ta matou nei paroita. Aita i noaa i te mau taote ia faataa eaha to’na ma‘i. Ua ri‘ari‘a roa oia e to’na metua vahine no te mea te paruparu e te ino oioi noa’tura oia. Ua afa‘i to’na metua vahine ia’na i te fare ma‘i e rave rahi mau taime aita râ i manuia i te farii i te mau pahonoraa.
Ua afa‘i te metua vahine o Emilio ia’na i te fare pureraa no te hoê haamaitairaa autahu‘araa. Ua farii te hoê melo no te pŭpŭ peresibutero e o vau nei, to’na episekopo, i te haamaitairaa ia haamaitai ia’na, e no te taime matamua, ua taoto maitai oia i te pô.
I te tahi râ na mahana i muri mai ua faaroo vau e ua ma‘i-faahou-hia o Emilio e ua ho‘i i te fare ma‘i. Ua haere oioi noa vau e te tahi atu taea‘e i te fare ma‘i, e ua nehenehe ia maua i te tomo atu i roto i to’na ra piha no te farerei atu ia’na. Ua mana‘o vau e ua paruparu te mana‘o o Emilio no te maitai ore o to’na huru, ua faaitoito-taa-ê-hia ra vau na te mea tei tupu i muri mai.
Ua paraparau matou no Iesu Mesia, e ua haamaramarama vau e e mana to te Faaora i te upootia i ni‘a i te mau mea atoa, mai te au i To’na ra hinaaro. Ua putapû roa to matou aau na roto i te pahonoraa a Emilio : ‘E te Episekopo, e tamataraa â noa teie. E faaroo to‘u e e hope teie ma‘i no te mea e faaroo to‘u ia Iesu Mesia ». Ua tuu atu maua i to maua rima i ni‘a iho i to’na ra upoo e ua horo‘a faahou atu ia’na i te hoê haamaitairaa.
I muri a‘e i taua arui ra ua ora maite mai o Emilio e ma te maerehia. Ua nehenehe ia’na ia ho‘i atu i ta’na mau ohipa i te mau mahana atoa e i te fare pureraa ma te fifi ore.
Ua faaohipa o Emilio i te faaroo i titauhia ia rave te Faaora i te hoê â semeio Ta’na i rave a parahi ai Oia i ni‘a i te fenua nei. Ua riro o Emilio no‘u nei ei hi‘oraa no te mau taata ta te Fatu i parau mai, « ua horo‘ahia i te tahi te faaroo ia faaorahia te ma‘i » (PH&PF 46:19).
E mea faahiahia ia mau ana‘e tatou i te haamaitairaa no te faaohipa i te autahu‘araa i roto i to tatou mau oraraa e ia ite e te vai nei to tatou hoê Metua i te Ao ra, o te here nei ia tatou, e na roto i to tatou faaroo i Ta’na ra Tamaiti, e nehenehe ïa ia tatou ia ite i te mau semeio i teie nei mau mahana hopea nei.