Te Faaroo ia Iesu Mesia
Ua riro to‘u nei purumu roa no te riro mai ei taote ei haamataraa noa. I muri mai te reira o te mau matahiti ïa i te raveraa i te ohipa i roto i te fare ma‘i, te ma‘imiraa, te haapiipiiraa i roto i te mau tuhaa taa ê e te mau hi‘opo‘araa. I muri mai i te reira, te mau matahiti ïa e rave rahi no te haapiiraa, te taviniraa e te mau titauraa no te hoê tuhaa apî no te tapûraa i te mafatu, na teie mau ohipa taatoa i arata‘i ia‘u i te faaturaraa hohonu i te faanahoraa e te ohipa i te tino taata. Ua papû i‘au e ua hamanihia te reira e te Atua.
Te tino taata faahiahia
A feruri na i te haamataraa o te tino taata. E haamata te reira na roto i te apitiraa o na tuhaa tirotiro faatupu e piti – te hoê no te metua vahine mai e te piti no te metua tane mai. Tei roto i na tuhaa e piti te taatoaraa o te haamaramaramaraa no ni‘a i te mau tupuna a te taata apî, tei faahereherehia i roto i te hoê vahi eita e noaa i te itehia e te mata no te apiapi o te vahi vairaa. E apiti na piti ahuru ma toru toromotoma no te metua tata‘itahi i roto i te hoê tino apî. Tei roto i teie nei mau toromotoma e tauasini mau tino iti o te faaite i te mau tapa‘o tino no te taata aita â i fanauhia. Fatata e 22 mahana i muri i te apitiraa o teie na tuhaa tirotiro, e haamata te hoê mafatu na‘ina‘i i te otui. I muri a‘e e 26 mahana, e haamata te toto i te tahe haere. E faananea e e vahi te mau tino iti. E riro mai te tahi ei mau mata o te hi‘o; te tahi e riro mai ïa e tari‘a o te faaroo aore râ e mau manimani rima o te ite i te mau mea maere no ni‘a ia tatou.
Ua riro te melo tata‘itahi o te tino ei hamaniraa maere mau. E hi‘o faatano ia’na iho to te mata. E faati‘a te mau uaua e te i‘o i na mata e piti ia faatupu i te hoê noa iho hoho‘a e toru tuhaa. E faataui te tari‘a i te mau ta‘iraa ei mau reo o te faaroohia i roto i te roro.
Te vai nei i roto i te mafatu e maha na tapo‘i e parari noa o te faatere i te tereraa o te toto. E matara e e piri ratou hau atu i te 100.000 taime i te mahana – 36 milioni i te matahiti. Mai te mea eita ratou e haafifihia e te ma‘i, e nehenehe ia ratou ia faaoroma‘i i teie nei titauraa e fatata e a muri noa’tu. Aita roa e materia hamanihia e te taata e nehenehe e fefe tamau noa e mai te reira te huru ma te fati ore. I te mau mahana atoa, te paumu nei te mafatu taata paari i te toto no te faaî i te hoê tura e faito 2.000 tarani pape. I ni‘a i te mafatu o te hoê ïa puna no te uira o te horo‘a i te puai na roto i te mau reni taa ê, ma te faatupu e tauasini mau uaua ia ohipa amui.
A feruri na i te mau faanahoraa no te patururaa. Te vai nei to te mau melo toopiti e patururaa vitiviti e vai nei i roto i te tahi atu melo. E farii te mau melo otahi, mai te roro, te mafatu e te ate e piti na reni faataheraa toto. Na teie faanahoraa e paruru i te melo mai te mea e tape‘ahia te taheraa toto na roto i te hoê o na reni e piti.
A feruri na i te aravihi o te tino no te parururaa ia’na iho. No te paruru ia’na i te ino, e ite te tino i te mauiui. Ei pato‘iraa i te ma‘i haapê, e hamani te tino i te mau raau aro. Eita ratou e tauturu noa i te aro i te hoê fifi i te reira iho taime, e tamau râ ratou i te faatupu i te parururaa no te hoê noa’tu ma‘i haapê e tupu mai â i mua.
A feruri na e nahea te tino i te tata‘i ia’na iho. E tata‘ihia te mau ivi fati e e puai faahou mai ratou. E ora te mau mutu o te iri. E nehenehe te hoê puta i roto i te uaua toto e tapiri ia’na iho. E faaapî te tino i to’na iho mau tuhaa iti tei pohe.
Te faaafaro nei te tino i to’na iho mau tuhaa faufaa rahi roa. E faatano-tamau-noa-hia te mau faito o te mau maa tumu e te faufaa rahi. E noa’tu eaha te mau tauiraa rahi i te huru o te ve‘ave‘a o te reva, e hi‘opo‘a-maite-hia te faito ve‘ave‘a o te tino i roto i te mau oti‘a pirihao.
Ua haapii mai au na roto i te mau matahiti ohiparaa e ora te ma‘i ia haapa‘o-ana‘e-hia te taatoaraa o te mau ture e au i taua haamaitairaa ra.1 Na te ture e faatere i te faanahoraa e te ohipa o te tino. Te faaite nei te hoê irava o te mau papa‘iraa mo‘a : « E ture hoi tei horo‘ahia na te mau basileia atoa; e te vai ra te hoê mau oti‘a i te mau ture atoa e te mau huru haapa‘oraa hoi ».2
Te ite nei te mau aivanaa i roto i te mau ohipa e rave rahi i te hoê â mau faaiteraa no te ture e te atuaturaa, i roto anei i te tereraa miti, te mau tereraa o te ava‘e, aore râ te ti‘ara o te mau feti‘a i roto i te ra‘i. Na taua ture e taua faanahoraa ra e faatupu i te niu o te mau mea tei hamanihia. E nehenehe taua mau ture ra e itehia e e haapapûhia. E nehenehe to ratou hopea e faitohia. Te faaite papû nei teie faanahoraa e te vai nei te hoê Poiete Hau roa i te Rahi.3
I te tahi atu pae, eita e nehenehe e faito i te parau no te faaroo. Ua heheuhia mai râ i roto i te mau papa‘iraa mo‘a te tu‘atiraa i rotopu i te faaroo i te Atua e te ture e te faanahoraa o te ao :
« E ture hoi ta [te Atua] i horo‘a no te mau mea atoa, na roto i te reira ratou e tere ai i roto i to ratou iho mau taime e to ratou hoi mau tau;
« E ua haamauhia hoi to ratou mau haerea, oia te mau haerea o te mau ra‘i e te fenua nei, tei roto i te reira te fenua nei e te mau feti‘a rahi atoa ra…
« Inaha, e mau basileia ana‘e teie, e te taata o tei hi‘o i te hoê e aore râ i tei iti a‘e i teie mau mea ua ite ïa i te Atua i te tereraa i roto i to’na ra hanahana e te mana ».4
Te hanahana o te poieteraa
Te faaite mai nei te mau papa‘iraa mo‘a e ua hamanihia te ra‘i, te fenua e te mau mea atoa i ni‘a i te fenua nei e te Atua.5 Te tauturu atoa nei te mau papa‘iraa mo‘a ia tatou ia faarahi atu â to tatou ite no ni‘a i te tahoêraa o te Atua e Ta’na Tamaiti, o Iesu Mesia i roto i te poieteraa. Te faaite nei te mau parau matamua i roto i te Bibilia, « hamani ihora te Atua i te ra‘i e te fenua i te matamua ra »,6 e, « hamani ihora hoi te Atua i te taata ma to’na ihora huru, … i hamani oia ia raua, o te tane e te vahine ».7 Te haapii mai nei te Buka a Aberahama e « ua haere atura te mau Atua i raro no te hamani i te taata i to ratou iho huru, i te hoho‘a o te mau Atua i hamani ai ratou ia’na, i hamani ratou ia raua, te tane e te vahine ».8
Te faaite nei te papa‘iraa mo‘a i te mau mana‘o o te Metua i te Ao ra no Ta’na Tamaiti Here e no te taata tata‘itahi : « I aroha mai te Atua i to te ao, e ua tae roa i te horo‘a mai i ta’na Tamaiti fanau tahi, ia ore ia pohe te faaroo ia’na ra, ia roaa râ te ora mure ore ».9
Ua haamata te buka a Ioane ma teie nei faaiteraa:
« I vai na te Logo i te matamua ra, i te Atua ra hoi te Logo, e o te Atua hoi te Logo.
« I te Atua ra hoi oia i te matamua ra.
« Na’na i hamani te mau mea atoa nei, aore roa e, e ere oia i te hoê mea i hamanihia ».10
Te faaite mai nei teie nei papa‘iraa mo‘a e te Logo11 a te Atua o Iesu Mesia ïa – to te Atua iho faatere i roto i te faatereraa o teie nei ao e te poiete o te taatoaraa o te ora.
Ua haapapûhia teie nei iteraa ia Mose e to tatou Metua i te Ao ra, tei parau:
« E na roto i te parau o to‘u ra mana i hamani ai au ia ratou [te fenua e te mau taata atoa i ni‘a], oia hoi, na roto ïa i ta‘u ra Tamaiti Fanau Tahi o tei î i te aroha e te parau mau.
« E na‘u i hamani i te mau ao aore e hope ia tai‘ohia; e ua hamani au ia ratou no ta‘u ra opuaraa; e na roto i te Tamaiti, oia hoi i ta‘u Fanau Tahi i hamani ai au ia ratou ».12
E rave rahi ê atu mau papa‘iraa mo‘a o tei haapapû e, o Iesu Mesia te Taata Hamani, i raro a‘e i te faatereraa a te Metua.13 Te hoê o te mau papa‘iraa mo‘a o te haapapû roa i to tatou mana‘o o To’na iho ïa iteraa papû : « Inaha, o vau nei o Iesu Mesia ïa, o te Tamaiti na te Atua. O vau tei hamani i te ra‘i e te fenua e to roto ra. Tei ô te Metua vau i te matamua ra ».14
Te tereraa e te tupuraa o te faaroo ia Iesu Mesia
Ua titauhia i te taata o te farii i taua mana‘o ra te faaroo oraora. Ua riro te faaroo e niu no to’na iho iteraa papû. E haamata te mau parau tumu matamua na roto i te faaroo i te Fatu ia Iesu Mesia.15 Ua parau o Paulo e « te faaroo, o te ti‘aturi ïa i te mau mea e tia‘ihia nei, e te ite i te mau mea aore e hi‘ohia »16 Ua ti‘aoro oia « e ia parahi te Mesia i roto i to outou aau i te faaroo; e ia aahia outou e ia tumuhia i te hinaaro, ia ite outou… e ia ite outou i te aroha o te Mesia ».17 Ua faaue o Paulo ia tatou ia « riro tatou i te faaroo hoê e te ite hoê i te Tamaiti a te Atua ».18
Te haapii nei tatou mai roto mai i te Buka a Moromona e « ua faaorahia tatou i te Mesia ra na roto i to tatou faaroo… E te paraparau nei tatou i te Mesia, e te oaoa nei tatou i te Mesia, e te a‘o nei tatou i te parau a te Mesia, e te tohu nei hoi tatou i te Mesia, e te papa‘i nei hoi tatou i ta tatou mau tohu, ia ite ta tatou mau tamarii i te tumu e hi‘ohia’tu e ratou no te matararaa i ta ratou mau hara ».19
Ua heheu-atoa-hia mai te mau haamaitairaa e noaa mai na roto i te faaroo Ia’na. Te tai‘o nei tatou i reira : « Ia haere ti‘a’tu outou i mua i te ti‘a-maite-raa i te Mesia, ma te tia‘i papû roa, e te here i te Atua e te taata atoa. E tena na, ia haere ti‘a outou i mua ma te oaoa i te ite i te parau a te Mesia, ma te tapea hoi e tae noa’tu i te hopea ra, inaha, te na ô maira te Metua, e ora mure ore to outou i reira ra ».20 O tera ïa « te horo‘a hau a‘e te reira i te mau horo‘a atoa a te Atua ».21
E arata‘i te faaroo itoito i te Fatu i te faafariuraa hope e i te hoê fafauraa hope roa i Ta’na ra ohipa mo‘a. E riro mai tatou ei mau tamarii no te fafauraa; e riro mai tatou Ta’na mau tamarii. Te haapapû mai nei te papa‘iraa mo‘a i te reira: « E teie nei, no te faufaa ta outou i fafau maira, e parauhia’i outou i te tamarii a te Mesia, oia hoi ta’na mau tamarii tamaroa, e ta’na mau tamahine; Inaha hoi, i na uanei i faafanau-varua-hia’i outou e ana; no te mea te na ô maira outou, ua faahuru-ê-hia to outou aau na roto i te faaroo i to’na ra i‘oa; no reira i faafanauhia’i outou e ana, e i riro ai hoi outou ei tamarii tamaroa e ei tamahine na’na ra ».22
E afa‘i mai te faaroo itoito i te Fatu i te faafariuraa, te hoê tauiraa puai o te aau.23 te hoê tauiraa no te feruriraa, mai te mau rave‘a o te ao i te mau rave‘a a te Atua. E tura‘i te reira i te taata ia tatarahapa ma te aau atoa ».24 Ua parau atoa mai o Alama, « e a‘o atu ia ratou i te tatarahapa, e te faaroo i te Fatu ra ia Iesu Mesia; e haapii atu ia ratou ia faahaehaa ratou ia ratou iho, ia haehaa, e ia mamahu te aau; e haapii atu hoi ia ratou ia pato‘i atu ratou i te mau faahema atoa a te diabolo, na roto i te faaroo i te Fatu ra ia Iesu Mesia ».25
Ua vai mai te Buka a Moromona no te hoê tuhaa, oia hoi no te faaite papû atu hoi i te Ati Iuda e te Etene atoa hoi e o Iesu te Mesia, te Atua mure ore.26 E noaa i te feia o te tai‘o i te Buka a Moromona e o te ani ma te faaroo mai te mea e parau mau anei te buka te hoê iteraa papû no te parau mau o te buka. E « ite atoa hoi ratou… e o Iesu Mesia te Faaora o te ao nei e o Iosepha Semita hoi to’na heheu parau e peropheta i teie nei mau mahana hopea nei ».27
Te faaroo ia Iesu Mesia : E mea faufaa rahi no te ora e te faateiteiraa
Eita te faaroo ia Iesu Mesia e afa‘i noa mai i te mau haamaitairaa i roto i teie nei oraraa, e mea faufaa rahi atoa râ no to tatou ora mure ore e to tatou faateiteiraa. Te parau nei te papa‘iraa mo‘a, « ia tatarahapa te mau taata’toa e ia faaroo i te i‘oa o Iesu Mesia e tia’i, e ia haamori i te Metua mai to’na ra i‘oa, e ia mau hoi i te faaroo i to’na ra i‘oa e tae noa’tu i te hopea ra, ia ore râ e ore hoi ratou e faaorahia i roto i te basileia o te Atua ».28 Ua tuu atoa te Fatu i ni‘a i te mau metua te hopoi‘a ia haapii i ta ratou ra mau tamarii « i te parau no te faaroo i te Mesia te Tamaiti a te Atua ora »29.
Te faaite nei au e o Iesu te Mesia, te Tamaiti a te Atua Ora. O Oia to tatou poiete, to tatou Faaora e Taraehara,30 to tatou Arai i te Metua ra,31 to tatou Taata Faaora,32 e Iehova no te Faufaa Tahito.33 O Oia o Immanuela tei parauhia,34 te Mesia faatahinuhia,35 e to tatou Hi‘oraa Rahi.36 E ho‘i faahou mai Oia i te hoê mahana no te faatere arii ei Arii no te mau Arii e ei Fatu no te mau Fatu.37 E i te hopea, e ti‘a ïa tatou tata‘itahi i mua Ia’na i te mahana haavaraa.38 Te pure nei au no tatou tata‘itahi e ia fariihia to tatou faaroo tata‘itahi Ia’na.