TE FAAROO O TE HOÊ TAMARII
Ua faaoti au i te haere avae i te amuiraa tĭtĭ, ma te haere e 30 aore râ e 40 minuti e ta‘u nei tamaiti, e vau matahiti i taua taime ra. I muri a‘e e piti ahuru minuti to‘u iteraa e aita vau i ite faahou eaha ra te e‘a e ti‘a ia maua i te haere. Ua faati‘a mai ta‘u nei tamaiti, Elson, e taata paraparau roa i te mau taime atoa, i te hoê aamu aore râ e piti no te mau mea tei tupu i te fare haapiiraa aore râ i te fare. Ua ani au ia’na ia faaea hau noa no te hoê taime, ma te faaite atu ia’na e ua ti‘a ia‘u ia feruri no te mea ua mata‘u vau e ua mo‘e maua.
I reira ïa ta‘u tamaiti i te faaiteraa mai i to’na ra faaroo. Ua parau mai oia e ia pure maua. E na roto i te maramarama e te ite o te hoê taata paari (e te iti rii ra te faaoroma‘i no te mea te faatata maira te taime haamataraa no te pureraa), ua pahono atu vau e mai te mea e hinaaro oia i te horo‘a i te pure, ia na reira ïa oia – e mea au a‘e râ na‘u ia feruri. Ua parau ihora vau ia‘u iho, « te vai nei te tahi mau mea aita e titauhia ia tatou i te ti‘aturi i te Fatu; te hoê o te reira, te iteraa ïa i te e‘a e tae atu i te fare pureraa ».
Mai te au ra e ua tai‘o oia i to‘u nei mau mana‘o, ua horo‘a mai o Elson ia‘u i te hoê haapiira no ni‘a i te haehaa, i te na ôraa mai, « no te aha oe e onoono ai i te rave i te mau mea na roto i te rave‘a paari ? » I muri iho ua faaea mamû noa oia, e ua ite au e ua pure oia i roto i to’na feruriraa e to’na aau. Tau minuti i muri iho ua tae atu maua i te fare pureraa, e ua ite au e ua farii oia i te pahonoraa i ta’na ra pure.
Ei feia mo‘a i te mau mahana hopea nei, ua haamaitaihia tatou i te riroraa ei melo no te Ekalesia a Iesu Mesia. Ua rahi atu â to‘u iteraa papû no te parau mau o te evanelia tei faaho‘ihia mai i te taime a ite ai au e ua ite ta‘u tamaiti, e tamarii rii noa â, nahea ia faaohipa i te mau parau tumu no te faaroo e te pure, e te riroraa ei hi‘oraa no‘u nahea ia ora i te mau haapiiraa a Iesu Mesia.