« O VAI RÂ VAU NEI I TA OUTOU NA PARAURAA? »

Ua ui te Faaroa i Ta’na mau pĭpĭ i teie nei uiraa, e ua pahono atu Petero, « o te Mesia oe, te Tamaiti a te Atua ora ra » (A hi‘o Mataio 16:15–16). Teie te mau pahonoraa a te mau taure‘are‘a e te feia apî paari no te ao taatoa nei i teie nei uiraa:

Ua rahi te mau mea ta Iesu Mesia i rave no‘u. Ua horo‘a mai oia ia‘u to‘u utuafare e te evanelia. Ua tauturu oia ia‘u i roto i ta‘u mau haapiiraa. Ua farii au e rave rahi mau pute haapiiraa, e te ti‘aturi nei au e mau haamaitairaa ana‘e te reira no ô mai Ia’na ra. Ahiri aita Oia i haere mai no te faaite ia tatou nahea i te ora, eita ïa e nehenehe ia tatou ia ho‘i faahou i to tatou Metua i te Ao ra.

Bryan N., 13, Honduras

Ua ite au e na roto i te mauiui, te pohe, e te Taraehara a te Faaora, e nehenehe ai ia tatou i faati‘a-faahou-hia e e nehenehe ia tatou ia faaorahia i te pae varua e i te pae tino. No te faaroo e te tatarahapa, ua haapii au e e nehenehe ta tatou mau hara e faaorehia.

Joan O., 19, Philippino

E mea maoro a‘enei i ora na te hoê taata i ni‘a i tei nei fenua, te hoê taata tei haaputapû e rave rahi mau milioni oraraa na roto i ta’na mau ohipa e ta’na mau parau – e o vau atoa nei. O Iesu Mesia Oia. Te tamau noa ra Ta’na tusia taraehara i te haamaitai i to‘u nei oraraa i te mau mahana atoa. Auê ïa te maere ia ite e na roto i To’na mau puta, e nehenehe ai to tatou iho mau puta e faaorahia. No to‘u itera e o Iesu te Mesia, te faaineine nei au i te tavini i te hoê misioni rave tamau e ia poro i Ta’na ra evanelia i te mau nunaa atoa o te ao nei tei ore â i ite i To’na ra aroha hopea ore. O Oia te Faaora e te Taraehara o to‘u nei varua.

Kristian M., 24, Croatie

Ua rave Iesu Mesia no tatou te mea e ore roa e nehenehe i te tahi taata ia rave. No‘u nei, ua riro te fariiraa i te Autahu‘araa a Aarona ei taime faahiahia no te mea ua ite au e o tera te mea ta te Fatu i hinaaro ia‘u ia rave. Te pee ra vau i To’na hi‘oraa. Ua ite au e e tamau noa Oia i te arata‘i ia‘u e i te haapii ia‘u i te e‘a.

Limhi G., 17, Mehico

I muri a‘e i te poheraa o to‘u metua vahine, ua haamata te oraraa i te fifi. Ua fariu au i te pae hopea i to‘u episekopo no te tahi tautururaa. Te mea ta’na i parau mai ia‘u e ere ïa te mea ta‘u i tia‘i, ua taui râ te reira i to‘u nei oraraa. Ua ani oia ia‘u ia ti‘aturi i te Metua i te Ao ra na roto i te pure, te tai‘oraa i te mau papa‘iraa mo‘a, e te ti‘aturiraa e tei reira te Faaora no‘u – na roto i te ti‘aturi-rahi-raa Ia’na e ite ai au i te mamaraa o ta‘u mau hopoia. E piti matahiti e te afa i muri mai, ua ite au e te vai nei te hoê hau tamau no tatou paatoa no te ti‘araa o to tatou Faaora e no te mea Ta’na i rave no tatou.

Whitney W., 19, Arizona, USA

Ua ite au e te ora nei o Iesu Mesia. Te here nei Oia ia‘u, e ua horo‘a mai Oia i To’na ora no‘u. O Oia to‘u nei hoa. Na roto i Ta’na mau haapiiraa, ua haapii au nahea ia riro mai Ia’na ra te huru. E taata parau-ti‘a Oia, te hamani maitai, te maitai, e te aroha. Ua mauiui Oia i Getesemane no te mau taata atoa. Ua ite au e o Oia te Mesia Ora, to‘u Faaora, to‘u Mato e to‘u Fatu.

Claudia R., 25, Mehico

Na roto i to‘u paariraa i roto i te Ekalesia e te haereraa i te Paraimere, ua haapii au no ni‘a ia Iesu Mesia mai te taime e tamahine-rii-rii au. E ua puai noa to‘u iteraa papû mai taua taime ra. I teie nei, tei roto vau i te hoê misioni, e mea au na‘u te taime no te faaite i te evanelia e no te faaite papû no ni‘a ia Iesu Mesia i te mau mahana atoa.

Ia feruri ana‘e vau i te Faaora e i te mau mea atoa Ta’na i rave no‘u, e hinaaro vau i te piri atu â Ia’na. Te faahoho‘a nei au i te mau mea atoa ta‘u i haapii ei tamarii-rii. E mea au roa na‘u ia nehenehe i te tauturu i te tahi atu mau taata ia ite i te here o to tatou Faaora ia Iesu Mesia. E ere teie nei iteraa papû i te tahi noa mea ta‘u e parau – no roto mai râ te reira i to‘u nei aau.

Susana V., 21, Tonga