Ta‘u nei Tamaraa Pata Mana‘o-ore-hia
I riro na te oro‘a Pata ei mahana faafaaearaa taa ê i to‘u paariraa. I muri a‘e i te pureraa e haapii ïa to‘u na metua i te utuafare i te hoê haapiiraa no ni‘a i te Taraehara e te Ti‘a-faahou-raa; i te pô e faatupu ïa matou i te hoê tamaaraa rahi. E mea pinepine te mau hoa i te amui mai no te tamaaraa, e tamaaraa oaoa e te au maitai hoi. No teie nei mau peu tumu, i riro ai te Pata ei mahana faafaaearaa taa ê auhia e au nei –te hoê taime mo‘a no te utuafare no te faahanahanaraa i te Ti‘a-faahou-raa o te Faaora.
I te hoê matahiti a haere ai au i te haapiiraa i Ronedona, ua vai noa o vau ana‘e i te Pata. Aita ta‘u nei paroita i ruru e tae noa’tu i te avatea, no reira e au ra e mea roa roa te taime i mua ia‘u. Ua mana‘ona‘o vau i to‘u utuafare, e rave rahi mau kilometera i te atea, o te faahanahana ra i taua mahana ra e aita vau i reira, e ua mo‘emo‘e e ua oto to‘u aau.
Na mua roa ua hinaaro vau i te oto, i muri mai râ ua haamata vau i te feruri eaha ra ta‘u e nehenehe e rave no te haafaufaa i taua mahana ra. Ua fariu to‘u mana‘o i te mau taata ta‘u e farerei nei i te mau mahana atoa i roto i te mau vahi tereraa pereoo i raro i te fenua tei î i te taata. Mai te au i roto i te mau oire rahi, e mea pinepine i te mau vahi tereraa pereoo i raro i te fenua i te farii i te mau taata e te mau vahine aore e nohoraa e taparu nei i te moni. E mea pinepine to‘u aau i te putapû i to ratou mau hinaaro, e ua ite au e ere o vau ana‘e i Ronetona e faaea ra o vau ana‘e i te mahana Pata. Ua riro ihora te tautururaa i te feia ĕê e ravea maitai no te faaite i to‘u mauruuru no te mau Pata faahiahia ta‘u i oaoa i to‘u tamariiriiraa.
Ua faaineine vau e rave rahi mau pute maa ma te faaîhia i te mau faraoa, te maa hotu, te faraoa paapaa, e te mau inu. I muri iho ua haere tia’tu vau i te vahi tereraa pereoo i raro i te fenua, i te imiraa i te mau taata ta‘u i ape i te tahi mau taime. Ua mauruuru roa te rahiraa no te maa. Ua parau atu vau ia ratou tata‘itahi, « Ia oaoa outou i teie nei Pata ! »
A toe noa mai ai te hoê noa maa, ua haere atu vau i te hoê taata e hi‘oraa hepohepo mau to’na. E mea repo ino roa to’na ahu, e nehenehe ia outou ia ite i roto i to’na hoho‘a mata e ua mauiui na oia, e te vai ra i roto i to’na na mata te oto rahi. A horo’i au i te maa, ua hi‘o maira oia ia‘u ma te hitimahuta.
« Eaha teie ? » ua ui mai oia.
« E maa te reira, e te hoa », ua pahono atu ra vau.
« Mauruuru ia oe, mauruuru roa ia oe », ua parau mai ra oia. Ua taui ihora ta’na parau ei parau no te oaoa e te mauruuru. Ua haru oioi ihora oia i te pute, ma te tapea maite i te reira mai te mea ra e tao‘a faufaa rahi te reira.
« Aita e peapea » ua parau a‘era vau, no te putapû o to‘u aau i te hi‘oraa i to’na hoho‘a mata. « Ia maitai oe i teie Pata, e te hoa ».
« Ia maitai [atoa] oe i teie Pata ! », pahono a‘era oia.
A ho‘i ai au i te fare, ua tae maira te mau parau a te Arii Beniamina i roto i to‘u nei feruriraa : « E inaha hoi, e ere anei tatou paatoa e mau taata tao‘a ore ra ? » (Mosia 4:19). Ua ite au e ia ore te Faaora, e tiavaru-paatoa-hia tatou i rapae, e hepohepo tatou e vaiihohia tatou o tatou ana‘e. Ua toro mai râ te Faaroa i to’na rima ia tatou e ua horo‘a mai ia tatou te tahi mea e hinaaro-rahi-hia nei e tatou : te ti‘aturiraa e e nehenehe ia tatou ia riro ei taata mâ, e e ora faahou tatou, e e ho‘i tatou Ia’na ra i te hoê mahana.
Ma te faaruruhia i te hara e te pohe, te tia atoa nei au i mua i te Faaora mai te hoê taata tao‘a ore. Te toro mai nei Oia i To’na rima Ia‘u nei, ma te horo‘a mai i te aroha. I te hoê mahana ia tia vau i mua Ia’na, e ite ïa to‘u hoho‘a mata i te mauruuru hohonu, ta‘u i ite, i te tahi noa tuhaa, i ni‘a i te hoho‘a mata o teie nei taata haehaa.
A ho‘i ai au i te fare, ua haamata vau i te ta‘i. Ua pee atu to‘u mana‘o mo‘emo‘e, ua monohia mai e te oaoa e te iteraa hohonu a‘e no te mau parau a te Arii Beniamina e no te aroha o te Faaora. Ua haamauruuru vau, i roto ia‘u, i te Fatu no teie horo‘araa mana‘o-ore-hia a teie nei taata no‘u. Ua horo‘a’tu vau ia’na te hoê noa maa; ua faaho‘i mai oia te hoê tamaaraa Pata na‘u.