Te Rima Faaora o te Faaora
I te hoê tau ve‘ave‘a a paari ai au i Arkansa, ua titau mai to‘u mau taata tupu ia‘u ia amui atu ia ratou no te tahi nau mahana puhaparaa, tai‘araa e te auraa i te hoê tapearaa pape huru rahi i pihai iho i te oire no Sardis, Mississipi. Ua faaea matou e rave rahi mau mahana i te oaoaraa i te mau huru faaoaoaraa atoa i roto i te natura.
I to matou mahana hopea, te au ra matou i te auraa hopea hou a ho‘i atu ai i te fare. A taora ai to‘u mau hoa e o vau nei i te hoê popo, ua haere tia’tu te popo na ni‘a i to‘u nei upoo e ua marua i te tahi na metera i mua ia‘u. Ua haamata ihora te mata‘i i te puhi atea’tu te popo ia‘u na ni‘a i te pape. Ua haamata ihora vau i te haere e tii, ua tamau noa ra te mata‘i i te puhi i te popo i te vahi e ore roa e noaa ia‘u i te haru mai. Aita i maoro roa ua tae atu vau i te mau tapa‘o e haati nei i te vahi papa‘u no te hopuraa. Ua pee atu te popo i tera’tu pae o te mau tapa‘o e haere tia’tu i te tapearaa pape.
A fatata atu ai au i te mau tapa‘o, aita vau i mana‘o noa‘e i te au atu i tera’tu pae o te mau tapa‘o. Aita te popo i atea roa’tu i mua ia‘u, e ua papu ia‘u e nehenehe ta‘u e haru mai i te popo. Ua faaoti iho nei au i te hoê haapiipiiraa no te faaoraraa i te ora e te oomo ra vau ma te teoteo i te tapa‘o o te haapiiraa i ni‘a i to‘u nei piripou hopu. Ua vai maitai vau i roto i te pape e ua papu ia‘u e ua nava‘i to‘u puai no te rave mai i te popo.
Ua tamau noa râ te mata‘i i te tura‘i atea’tu te popo ia‘u nei. I te tahi mau taime ua fatata roa’tu vau e ua nehenehe ia‘u ia tapea atu e to‘u mau manimani rima, tera râ te atea noa atura â ra. I te pae hopea, ua haapee-ê-roa’tu te mata‘i i te popo e ore roa e noaahia ia‘u.
Aita vau i ite i te atearaa o to‘u aura e tae noa’tu i te taime ua faaea vau no te faafaaea. E au ra e mea poiri e e mea to‘eto‘e roa’tu te pape i reira i te vahi papu no te hopuraa. I to‘u fariuraa i muri i te hiti pape, ua ite a‘era vau e fatata vau i te ropuraa o te tapeara pape. Ua faaoti a‘era vau i te faarue i te popo e i te au atu i te hiti pape. Ua rohirohia roa vau, aita râ vau i haape‘ape‘a. E mea apî au e ua ite au e e maitai te mau mea atoa.
Ia tamata râ vau i te ho‘i atu i te hiti pape, ua faaruru atu vau i te mata‘i tei tauturu hoi i te popo. E au ra e noa’tu te puai o ta‘u auraa, aita roa vau e haere noa‘e i mua. Ua haamata to‘u nei nau rima e nau avae i te ahu e te mauiui. Ua faaea ihora vau i te au mai te uri e i te haapainu, ma te tamata i te farii fahou i to‘u nei puai.
I reira ua faaroo ihora vau i te hoê maniania – te maniania o te hoê poti matini. Ua oaoa e ua topa te hau i te iteraa’tu i te hoê taata i roto i te hoê poti na’ina’i i te tapiriraa mai i pihai iho ia‘u e te horo‘araa mai ia‘u te hoê tere poti i te hiti pape. Ua paruparu roa to‘u nau rima e avae. Aita roa‘e i nehenehe ia‘u ia pauma atu i roto i te poti, no reira ua tuu vau i te hoê rima i ni‘a e ua faatarere atu i ni‘a a tavere mărû noa’tu ai te taata ĕê ia‘u i te vahi hopuraa. Ua haru mai au i te hoê o te mau tapa‘o, vaiiho atura te taata ĕê, tarape ihora no te haamauruuru, e au ihora i te hiti o te tapearaa pape.
E ahuru ma pae matahiti i muri mai, tei roto faahou â vau i te fifi. No te hoê tau maoro i au na vau i roto i te hoê oraraa hara. Ua vaiiho mai te imiraa i te e‘a o te ao nei e te imiraa i te mau mea faufaa iti aore ra faufaa ore ia‘u i roto i te fifi no te mau faaotiraa ta‘u i rave. Ua mau‘a to‘u puai, e te paruparu ra to‘u ti‘aturiraa. Ua vai atea-ê-noa te mau mea ta‘u i tapapa na, e au ra ua faatata te pouri i te horomii ia‘u.
I roto i to‘u hepohepo rahi ua tiaoro atu vau i te Metua i te Ao ra. Mai te taata i roto i te poti, ua haere mai te Fatu no te faaora ia‘u i te taime i hinaaro rahi ai au Ia’na. Na roto i te hoê peropheta a te Atua no te mau mahana hopea nei, ua arata‘i Oia ia‘u i te Buka a Moromona. Ua arata‘i Oia ia‘u na ni‘a i te e‘a no te tarahaparaa e ua tamâ Oia ia‘u i ta‘u mau hara i roto i te pape no te bapetizoraa. I muri iho ua tuu Oia ia‘u i te vahi teitei i reira to‘u tamataraa i te faaea noa mai taua taime mai â.