E faaorahia nei au ?
Ua ani mai to‘u hoa o Rachel ia‘u mai te mea e haere au i te fare pureraa na muri ia’na. E mea itoito roa oia i roto i ta’na iho ekalesia e ua hinaaro vau ia ite eaha te vahi huru ê i rotopu i ta’na ekalesia e ta‘u nei. Ua ani au i te parau faatia i to‘u na metua no te haere atu na muri ia’na. Ua parau mai raua e no te mea hoi eita ta’na hora pureraa e tito i ta matou mau hora pureraa, e nehenehe ïa ta‘u e haere.
E rave rahi te mau mea i roto i te pureraa a ta’na ekalesia tei matau-ore-hia e au : e mea huru ê te mau himene e te mau pure, te huru paraparau a te taata a‘o. A faahaerehia mai ai te hoê mereti moni, aita vau i papû eaha te rave.
I te pae hopea, ua ani te taata a‘o i te mau taata atoa, i roto i te pŭpŭ tei ore i farii ia Iesu Mesia i mua i te taata, ei Faaora no ratou, ia haere mai i mua. Ua omuhumuhu mai o Rachel, ma te faaitoito ia‘u ia haere. Ua feââ vau. I roto i ta matou nei paroita aita roa‘e te episekopo e ani i te hoê taata ia haere mai i mua e ia farii i te Mesia i mua i te taata. Aita vau i ite eaha te rave. Peneia‘e aita vau i rave i te tahi mea faufaa rahi no to‘u iho ora. Ua faarue atu vau i te pureraa ma te mana‘o taa ore.
A feruri ai au i muri mai i teie nei ohipa tei tupu, ua ite au e ua farii mau vau ia Iesu Mesia ei Faaora no‘u i mua i te taata. Ua bapetizohia vau na te hoê taata tei mau i te mana autahu‘araa a Iesu Mesia. Ua riro to‘u nei bapetizoraa e hoê fafauraa e Te Metua i te Ao ra e e rave au i ni‘a ia‘u iho te i‘oa o Iesu Mesia e ia riro ei pĭpĭ No’na. Ua fafau vau e e haapa‘o vau i Ta’na ra mau faaueraa e e tamata vau ia riro mai Ia’na ra te huru. I to‘u nei bapetizoraa o te mau taata ïa tei mau i te autahu‘araa tei rave i te oro‘a bapetizoraa ei mau ite, e to‘u atoa utuafare e te mau melo no te paroita.
Mai te taime o to‘u nei bapetizoraa e te haamauraa, ua farii au i te haamaitairaa i te mau Sabati atoa ia rave i te oro‘a e ia faaite faahou i to‘u Metua i te Ao ra e e tamau noa vau i te rave i ni‘a iho ia‘u te i‘oa o te Mesia.
I te tahi mau taime e ani paha te mau Keresetiano no te tahi atu mau ekalesia i te hoê â uiraa ta te taata a‘o a to‘u nei hoa i ani, o te faahitihia paha na roto i te tahi atu parau. E ani paha ratou mai te mea ua faaorahia tatou. Ua tauturu o Elder Dallin H. Oaks, te hoê melo no te Pŭpŭ no te Tino Ahuru ma Piti Aposetolo, ia tatou ia taa maitai e ia pahono i teie nei uiraa : « Te horo‘a nei te nunaa Keresetiano i te mau auraa taa ê i te tahi mau ta‘o tumu no te evanelia mai teie ta‘o faaorahia aore râ faaoraraa. Mai te mea e pahono tatou ia au i te auraa o te mana‘o e vai ra i roto i to tatou taata uiui e mai te mea ua ‘faaorahia’ tatou, e tia ia pahono atu tatou ‘e’ ».1
Te haapaari noa ra vau i to‘u iteraa papû no ni‘a ia Iesu Mesia a haere ai au i te fare pureraa a to‘u nei hoa. Mai te reira mai taime, ua ite au e ia rahi ana‘e ta‘u tuatapaparaa i te evanelia na roto i te mau papa‘iraa mo‘a e te mau parau a te mau peropheta ora, e rahi atu â ïa to‘u ineine e to‘u ti‘aturiraa ia tia ei ite no te Atua i te mau taime atoa (a hi‘o Mosia 18:9).