Ua ite Au e te Ora nei To‘u nei Faaora
Ei piahi no te matahiti matamua i te Fare Haapiiraa Tua Rua no Brigham Young–Idaho (o Ricks College i taua taime ra), ua mihi au i to‘u utuafare. I muri a‘e râ i te tahi nau ava‘e haapiiraa, ua faanahonaho vau i to‘u oraraa piahi e ua oaoa vau i to‘u nei oraraa. A ta‘i mai ai te niuniu paraparau, tei roto ïa vau i to‘u piha, e tai‘o ra.
« E Christy, e parau apî maitai ore ta‘u na oe » ua parau mai to‘u metua vahine ma te reo oto. « Ua faarue mai to oe metua tane i teie nei pô i muri a‘e i te hoê ma‘i mafatu puai ».
Ua î roa vau i te oto a tamata ai au i te taa maitai i te mea ta‘u i faaroo iho nei. Ua ite au i to‘u metua tane tau mahana noa na mua’tu, aita râ vau i mana‘o noa‘e e no te taime hopea ïa. Ua riro te poheraa o Papa ei hitimahutaraa rahi no te taatoaraa o te utuafare; e ua riro atoa e hitimahutaraa rahi no ta‘u iho paroita. E 53 noa to Papa matahiti, e te tavini ra oia ei episekopo no matou.
Ua î te mau mahana i muri mai e te mau farereiraa e te mau niuniu a te utuafare, te mau hoa, te mau melo no te paroita, e te mau taata tupu. Ua faaite mai te mau taata e rave rahi i to ratou here no matou e no to matou metua tane. I te oro‘a hunaraa o Papa, ua faaite mai te mau melo no te utuafare i te mau haamana‘oraa no to matou oraraa i pihai iho ia’na, e ua faaite hua matou no te opuaraa no te oraraa e te oraraa i muri a‘e i te poheraa.
I riro na o Papa ei tane faaipoipo haapa‘o maitai, e hoê Feia Mo‘a itoito i te mau Mahana Hopea nei, te hoê taata itoito i te faanahoraa a te mau Scout, e te hoê metua tane faahiahia. E rave rahi te mau taata tei haamaitaihia na roto i te oraraa ta’na i ora. I muri a‘e i te hunaraa ua haamo‘a to‘u nei tuaana i te menema, e ua tia matou ei utuafare e ua heva matou i roto i te taatoaraa o te himene « E Tamarii Au na te Atua » (Te mau Himene, no. 185).
Ua ho‘i atu vau i te fare haapiiraa te mahana i muri a‘e i te hunaraa. Aita vau i anaanatae rahi no te ho‘i atu ua ite râ vau e tia ia‘u ia tamau noa i te oraraa e ia rave i ta‘u mau hopoia. E mea ohie te tahi mau mahana i te tahi atu mau mahana. E mea roa te taime to‘u mana‘onao-noa-raa i to‘u metua tane, e ua ti‘aturi au i ni‘a i to‘u ite no te opuaraa no te faaoraraa e to‘u faaroo ia Iesu Mesia no te tauturu ia‘u ia faaruru i to‘u mau tamataraa e ta‘u mau uiraa.
Fatata e piti hebedoma i muri a‘e i te poheraa o to‘u metua tane, ua afa‘i au i ta‘u buka aamu i te hoê fare pureraa i te fare haapiiraa no te papa‘i i to‘u mau mana‘o e te mau ohipa i tupu i te poheraa o Papa. A papa‘i ai au, ua ite puai au i te Varua e ua noaa ia‘u te hoê haapapuraa puai e ua here to‘u Metua i te Ao ra ia‘u, e e opuaraa taa ê Ta’na no‘u, e eita vau e vaiihohia o vau ana‘e. A oti ai au i te papa‘i, ua ta‘i mai te oe mai roto mai i te mau afata paraparau i ni‘a i te pû a te mau piahi i pihai iho ma te fata‘i i te himene « Ua ite Au e te Ora nei To‘u Fatu » (Te mau Himene, no 69). Ua tae mai te mau parau no taua himene ra i te reira ihoa taime i to‘u nei feruriraa:
Ua ite au te ora nei to‘u nei Fatu here mau.
Te ora nei te Fatu mau, te ora nei tei pohe na.
Te ora nei te Mesia, te ora nei tei parau-tia.
Te ora nei Oia te Arai…
Te ora nei te Fatu mau
Te ora nei te arai mau
Te ora nei to‘u Fatu
Ei taraehara mau no‘u
Ua ite mau vau e te ora nei to‘u Faaora, e ua ite au e te here nei Oia ia‘u. No te mea hoi e ua tia mai Oia ma te pohe mai, ua ite ïa vau e e ora faahou â to‘u metua tane e te feia atoa tei herehia e matou e tei haere na mua’tu ia matou. Auê ïa tamahanahanaraa ia ite i teie nei mau parau mau.