TE TAUTURURAA IA VETAHI E IA HAERE ATU IA’NA
« E te Tuahine Hopkins, teie na 10 Hihi mahana ta oe e haapii i teie nei matahiti », ua faaara mai ra te tauturu i roto i te Peresideniraa a te Paraimere. E melo faafariu-apî-hia vau, e ua tia ia‘u ia parau e ua ri‘ari‘a roa vau i teie nei piiraa. Nahea e nehenehe ai ia‘u ia haapii i te mea aita â vau i papu maitai atura ? Nahea vau i te faatere i teie rahiraa tamarii tei î i te puai ? Ua haapapû mai râ te episekopo e te peresideni no te Paraimere e e haamaitaihia vau no te fariiraa i teie nei piiraa ri‘ari‘a mau.
Ua ite au e e tia roa ia‘u ia tuu atu ia‘u iho i roto i te haapiiraa i te evanelia ia nehenehe ia‘u ia haapii atu i te reira, no reira i te mau hebedoma atoa e tai‘o ïa vau i te buka haapiiraa – te hoê haapûraa rahi no te maramarama o te evanelia – e ua pure au e ua feruri hohonu vau nahea ra te mau parau tumu e tano ai i to‘u nei oraraa e te oraraa o te mau tamarii. A tai‘o e a haapii ai au, ua noaa ia‘u te hoê iteraa papû no to tatou fanauraa hanahana ei tamarii na te Atua. Ua ite au i te faufaa e te taa-ê-raa o te varua tata‘itahi. Aita te mau haapiiraa ohie a te Paraimere i faaûru noa i te hoho‘a mata o Ta’na mau tamarii faufaa rahi, ua faatupu atoa ra te reira mau haapiiraa i te huero no te iteraa papû o ta‘u i farii i te taime a tomo atu ai au i roto i te pape no te bapetizoraa.
Ua faatupu mai taua matahiti faufaa rahi ra i pihai iho i te mau hihi mahana, i te hoê mauruuru rahi roa i roto ia‘u, no te hoê piiraa o tei taui i to‘u nei oraraa. Ua faataui te mau haapiiraa a Iesu Mesia ia‘u e i te mau tamarii atoa.