Adamu ’e Eva, nā Douglas Fryer

3–9 nō Fepuare

2 Nephi 1–5

« Pārahi ihora mātou ma te ’oa’oa »

E ti’a i te mau pāpa’ira’a mo’a ’ia ’īriti i te ’ūputa nō tō te ta’ata iho heheura’a. ’Ia tai’o ’outou i te 2 Nephi 1–5, e ’ite mai paha ’outou ē, e ’ohipa ta’a ’ē tā te Fatu e hina’aro ra e ha’api’i ia ’outou.

Pāpa’i i te mau mana’o e tae mai

’Āhani ’ua ’ite ’outou ē ’ua tae ’outou i te hope’a o tō ’outou orara’a, e aha te mau poro’i hope’a tā ’outou e hina’aro e hōro’a i tei herehia e ’outou ? I te ’itera’a te peropheta Lehi ē, tē fātata ra ’oia i te hope’a o tōna orara’a, ’ua putuputu ’oia i tāna mau tamari’i nō te taime hope’a ’e ’ua tohu ’oia ’e ’ua fa’a’ite ’oia i te mau parau mau o te ’evanelia tāna i poihere i te mau ta’ata tāna i poihere. ’Ua ha’api’i ’oia nō ni’a i te ti’amāra’a, te ha’apa’o, te hi’ara’a o ’Adamu ’e o ’Eva, te fa’aorara’a nā roto ia Iesu Mesia ’e te ’oa’oa. ’Aita te tā’āto’ara’a o tāna mau tamari’i i fāri’i i tōna ’itera’a pāpū hope’a, ’o rātou rā tei fāri’i—mai terā nau mirioni ta’ata i tai’o i te reira i teie mahana—’ua ’itehia mai ïa i roto i tōna ’itera’a pāpū te mau parau tumu nō te « pārahi ma te ’oa’oa » (2 Nephi 5:27).

Mau mana’o nō te tuatāpapara’a pāpa’ira’a mo’a a te ta’ata hō’ē

2 Nephi 2

E ti’amāra’a tō’u ’ia mā’iti i te ora mure ’ore.

’Ua nā ’ō Elder D. Todd Christofferson : « ’Ua ’ōpua te Atua ē, ’ia rohi tāna mau tamari’i ’ia au i te ti’amāra’a mōrare tāna i hōro’a mai ia rātou e ti’a ai… ’O tāna fa’anahora’a ’e tōna hina’aro ’ia rave tātou i te ti’ara’a rahi nō te rave i te fa’aotira’a i roto i tō tātou iho orara’a » (« Ti’amā ē a muri noa atu, nō tē ha’a nō rātou iho », Ensign ’aore rā Liahona, Nov. 2014,16). I roto i tāna mau ha’api’ira’a nō ni’a i te ti’amāra’a mōrare, ’ua fa’ata’a Lehi i te tahi mau tītaura’a tumu e ha’amatara ’e e fa’ati’a ho’i ia tātou ’ia tae i tō tātou fāito pūai hanahana, mai teie nei i muri nei :

1. Te ’ite nō te maita’i ’e te ’ino (2 Nephi 2:5)

2. Hō’ē ture tei hōro’ahia i te ta’ata nei (2 Nephi 2:5)

3. Nā pae e piti, ’o te tītau i te mau mā’itira’a (2 Nephi 2:11)

4. Te mana ’ia rave (2 Nephi 2:16)

’Ia tai’o ’oe i te 2 Nephi 2, e aha tā ’oe e ha’api’i mai nō ni’a i teie mau tītaura’a nō te ti’amāra’a mōrare ’e te tū’atira’a te tahi i te tahi ? E aha te ’ohipa e tupu i ni’a i tō tātou ti’amāra’a ’ia mā’iti mai te peu ’aita hō’ē ’aore e rave rahi atu ā o teie mau tītaura’a ? E aha atu ā tā ’oe e ha’api’i mai nō ni’a i te ti’amāra’a ’ia mā’iti i roto i te mau parau a Lehi ?

2 Nephi 2:22–29

Te hi’ara’a ’e te tāra’ehara a Iesu Mesia, e tuha’a tumu ïa nō te fa’anahora’a a te Metua i te Ao ra.

E rave rahi ta’ata e hi’o nei i te hi’ara’a o ’Adamu ’e o ’Eva ’ei ’ohipa ’oto rahi. ’Āre’a rā, tē heheu nei te mau ha’api’ira’a a Lehi nō te hi’ara’a nō te aha e tuha’a faufa’a rahi te reira nō te fa’anahora’a a te Metua nō tō tātou haerera’a mure ’ore i mua. ’Ia tai’o ’oe i teie mau ’īrava, ’a hi’o nō te aha ’ua tītauhia ’ia tupu te hi’ara’a nō tō tātou—te mau tamari’i a te Metua i te Ao ra—haerera’a i mua. Nāhea te tusia tāra’ehara a te Fa’aora e fa’aora ai ia tātou i te hi’ara’a ?

Hi’o ato’a Mose 5:9–12 ; 6:51–62 ;

2 Nephi 3:6–24

’Ua fa’atōro’a-a’ena-hia Iosepha Semita nō te fa’aho’i fa’ahou mai i te ’evanelia.

Tē vai nei i roto i te tuha’a hope’a o te 2 Nephi 3 te hō’ē parau tohu tei hōro’ahia ia Iosepha i Aiphiti nō ni’a i te hō’ē hi’o e riro i te topahia i tōna iho i’oa (hi’o mau ’īrava 14–15)—Iosepha Semita. Tē parau rahi ato’a nei te reira nō ni’a i te misiōni a Iosepha Semita. E aha tā te mau ’īrava 6–24 e parau nei e rave atu Iosepha Semita, taua « hi’o maita’i » ra, nō te ha’amaita’i i te mau ta’ata o te Atua ? E mea nāhea te ’ohipa tā Iosepha Semita i rave i riro ai ’ei ’ohipa « faufa’a rahi » nō ’oe ?

Hō’ē tuha’a faufa’a rahi nō te misiōni a Iosepha Semita, ’o te fa’ataera’a mai ïa i te mau pāpa’ira’a o te hua’ai o Iosepha, e vai nei i roto i te Buka a Moromona. E aha tā ’oe i ha’api’i mai i roto i teie pene nō ni’a i te faufa’a rahi o te Buka a Moromona ?

Hi’o ato’a ’Īritira’a a Iosepha Semita, Genese 50:24–38 (i roto i te parau hi’u o te Bibilia reo peretāne).

Peropheta a te Fatu, nā David Lindsley

2 Nephi 4:15–35

E ti’a iā’u ’ia fāriu i ni’a i te Atua i roto i tō’u paruparu.

Nō fa’aru’e noa mai ra te metua tāne o Nephi. I teienei, tei ni’a iāna te hōpoi’a nō te fa’aterera’a i tōna ’utuāfare. ’Ua tae mai te mana’o nō te mau fa’ahemara’a e ’ati nei iāna ’e ’ua paruparu tōna mana’o nō tāna mau hara. Noa atu ā e mea ta’a ’ē tō ’oe orara’a i tō Nephi, e nehenehe paha e tupu ato’a tō ’oe mana’o mai tōna, mai tei pāpa’ihia i roto i te 2 Nephi 4:15–35. E aha te mea i tauturu ia Nephi i roto i tōna mau ’ati ? I roto i te pāhonora’a a Nephi i tōna mau tāmatara’a, e aha te tauturu e noa’a mai nō tō ’oe mau fifi ?

2 Nephi 5

E ’itehia te ’oa’oa i roto i te orara’a i te ’evanelia.

E aha tā ’oe tātarara’a nō te ’oa’oa ? ’Ua pāpa’i ’o Nephi ē, « pārahi ihora [tōna mau ta’ata] ma te ’oa’oa » (2 Nephi 5:27). E nehenehe tā ’oe e ’imi i te mau mā’itira’a tā Nephi ’e tā tōna mau ta’ata i rave, ’o tei arata’i ia rātou i te ’oa’oa—te huru tō rātou tūru’ira’a te tahi i te tahi ’e i tō rātou ’utuāfare, te mau mea faufa’a i roto i te huira’atira, ’e tē vai atu ra. E aha tā ’oe i ha’api’i mai ’o tē nehenehe e tauturu ia ’oe ’ia patu i te orara’a ’oa’oa, mai tā te mau ta’ata o Nephi i rave ?

2 Nephi 5:20–21

E aha te « ’ino » tei tae mai i ni’a i te mau ’āti Lamana ?

I te tau o Nephi, te ’ino i ni’a i te mau ’āti Lamana, ’oia ho’i, « ’ua ti’avaru-’ē-hia [rātou] mai mua atu i te aro o te Fatu… nō tā [rātou] mau hara » (2 Nephi 5:20–21). Te aura’a ra, ’ua ’ōtohe mai te Vārua o te Fatu mai roto mai i tō rātou orara’a. I te fāri’ira’a te mau ’āti Lamana i te ’evanelia a Iesu Mesia i muri iho, « ’aore atu ra te katara a te Atua i piri mai i ni’a ia rātou » (Alama 23:18).

Tē parau ato’a nei te Buka a Moromona ē, ’ua tae mai i ni’a i te mau ’āti Lamana te tāpa’o nō te ’iri ’ere’ere i te fa’aāteara’a mai te mau ’āti Nephi ia rātou. ’Aita te nātura ’e te hōho’a o te reira tāpa’o i māramarama-hope-hia. I te ha’amatara’a, e fa’ata’a ’ē te reira tāpa’o i te mau ’āti Lamana i te mau ’āti Nephi. I muri mai, nō te haerera’a to’opiti te mau ’āti Nephi ’e te mau ’āti Lamana nā roto i te ’ino ’e te mau taime parau-ti’a, ’aita atu ra te tāpa’o i riro ’ei tāpa’o fa’a’ite nō te ti’ara’a o te mau ’āti Lamana i mua i te Atua.

Tē ha’apāpū nei te mau peropheta i tō tātou nei ’anotau ē, e ’ere te ’iri ’ere’ere i te tāpa’o nō te au ’ore o te Atua ’aore rā te hō’ē ’anatemara’a. Tē fāri’i nei te ’Ēkālesia i te ha’api’ira’a a Nephi ē, ’aita te Fatu « e fa’a’ore i te hō’ē tei hina’aro iāna ra, te ta’ata ’ere’ere ’e te ’uo’uo, te tītī ’e te ti’amā, te tāne ’e te vahine » (2 Nephi 26:33). ’Ua fa’a’ite te peresideni Russell M. Nelson : « ’Ua tūra’i te Fatu i tāna ha’api’ira’a tumu nō te rāve’a ’aifāito nō tāna mau tamari’i… E mōrohi ’ē te ta’a-’ē-ra’a o te ta’ere, o te ’āpeni, o te nūna’a ta’ata ’e o te ti’ara’a tīvira, ’e e mo’e roa atu maoti te tomora’a mai tei ha’apa’o maita’i i ni’a i te ’ē’a nō te fafaura’a, ’e i te haerera’a mai i tō tātou Tāra’ehara here » (« Te mau parau a te peresideni Nelson i roto i te fa’ahanahanara’a ’ati a’e i te ao nei i te autahu’ara’a » [1 nō Tiunu 2018], newsroom.ChurchofJesusChrist.org).

Hi’o ato’a « Till We All Come in the Unity of the Faith » (video, ChurchofJesusChrist.org).

Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare

’Ia tai’o ’outou i te mau pāpa’ira’a mo’a ’e tō ’oe ’utuāfare, e riro te Vārua i te tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

2 Nephi 1:13–25

E aha tā teie mau ’īrava e ha’api’i nei ia tātou nō ni’a i te mau hia’ai rahi roa a’e o te hō’ē metua parau-ti’a nō tāna mau tamari’i ?

2 Nephi 3:6

Tai’o ’āmui nō ni’a i te « Hi’o » i roto i te buka fa’atoro o te Bibilia. E mea nāhea ’o Iosepha Semita i te riro ’ei hi’o ? E aha tātou e māuruuru ai i te ’ohipa i ravehia e Iosepha Semita ? (hi’o 2 Nephi 3:6–24).

2 Nephi 4:20–25

’Ia tai’o ’āmui ’outou i te 2 Nephi 4:20–25, ’a tāpe’a i muri iho i te ’īrava tāta’itahi, ’e ’a ani i te mau melo o te ’utuāfare ’ia fa’a’ite mai i te taime i tupu ato’a ai teie ’ohipa nō rātou ’aore rā te taime i mana’o ato’a ai rātou mai ia Nephi. E aha tā te Atua i rave nō tō tātou ’utuāfare ?

2 Nephi 5

E aha te tahi mau hi’ora’a tā tō ’outou ’utuāfare i rave nō te ora « ma te ’oa’oa » ? ’Ia tai’o tō ’outou ’utuāfare i te 2 Nephi 5, e nehenehe tā ’outou e paraparau i te mau mea tā te mau ’āti Nephi i ha’apa’o na : te ’utuāfare (’īrava 6), te mau fa’auera’a (’īrava 10), te mau pāpa’ira’a mo’a (’īrava 12), te ha’api’ira’a (’īrava 15), te mau hiero (’īrava 16), te ’ohipa (’īrava 17), ’e te mau pi’ira’a i roto i te ’Ēkālesia (’īrava 26). Hō’ē rāve’a nō te rave i te reira, ’o te ’imira’a ïa i te tahi mau tao’a e fa’ahōho’a i teie mau mea ’e ’ia paraparau nāhea tātou e fa’a’ite ai ’e e ha’afaufa’a ai i teie mau mea, mai te mau ’āti Nephi te huru.

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere

Ha’amaita’ira’a i tā tātou ha’api’ira’a

Hi’o-haere-ra’a. ’Ia ha’apa’o maita’i ’outou i te mea e tupu ra i roto i te orara’a o tā ’outou mau tamari’i, e ’ite ’outou i te mau taime maita’i nō te ha’api’i. E ti’a ato’a i te mau mana’o ’aore rā te mau uira’a a tā ’outou mau tamari’i e riro ’ei taime ha’api’ira’a. (Hiʼo Ha’api’ira’a mai tā te Fa’aora, 16).

Te taera’a Lehi ’e tōna mau ta’ata i te ao ’āpī, nā Clark Kelley Price