Adamu ’e ’o Eva, nā Douglas Fryer

3–9 nō Fepuare

2 Nephi 1–5

« Pārahi ihora mātou ma te ’oa’oa »

’Ua ha’api’i Lehi i tāna mau tamari’i tāta’itahi mai te au i te hina’aro ’e tehuru orara’a o te ta’ata tāta’itahi. Pe’e i tōna hi’ora’a maita’i ’a fa’aineine ai ’outou i te ha’api’i i te mau tamari’i i roto i tā ’outou piha.

Pāpa’i i te mau mana’o e tae mai

Fa’a’ite i te mana’o

’Ia oti te fa’ata’ara’a ē, ’ua ha’api’i Lehi i tōna ’utuāfare nō ni’a i te ti’amāra’a ’ia rave i tā tātou iho mau mā’itira’a, e ani i te mau tamari’i ’ia fa’a’ite mai i te mau ’itera’a tei roa’a ia rātou nā roto i te mā’itira’a i te maita’i. E aha tō rātou mana’o i muri a’e i tō rātou ravera’a i taua mā’itira’a ra ? Nāhea e ti’a ai ia rātou ’ia ha’amana’o i te mā’iti i te maita’i a muri a’e ?

Ha’api’i i te ha’api’ira’a tumu : Mau tamari’i ’āpī

2 Nephi 1:20

E ha’amaita’ihia vau ’ia ha’apa’o ana’e au.

Te parau tumu i ha’api’ihia i roto i teie ’īrava—e hōro’a mai te ha’apa’o i te mau ha’amaita’ira’a—’ua fa’ahōho’a-pinepine-hia nā roto i te Buka a Moromona. ’A feruri nāhea e ti’a ai ia ’outou ’ia tāuturu i te mau tamari’i ’ia ’ite i te reira i roto i tō rātou iho orara’a.

Mau ’ohipa e nehenehe e rave

• Ani i te mau tamari’i ’ia tauturu ia ’outou ’ia tātara i te ta’o ra fa’auera’a ’e ’ia hāmani i te hō’ē tāpura nō te mau fa’auera’a. Tai’o i te 2 Nephi 1:20, ’e ’a ha’apāpū ē, e « manuia » tātou, ’e ’aore rā e ha’amaita’ihia, ’ia ha’apa’o ana’e tātou i te mau fa’auera’a. E aha tō tātou huru ’ia ha’apa’o ana’e tātou i teie mau fa’auera’a ?

• Fa’a’ite i te mau tamari’i i te mau mea ’o tē hōro’a mai i te pārurura’a, mai te mau tia’a, te mau tāupo’o ’e te mau rimarima. Vaiiho ia rātou ’ia tāmata i te reira. Nāhea teie mau mea i te pāruru ia tātou ? E parau ia rātou ē, e nehenehe te mau fa’auera’a a te Metua i te Ao ra e pāruru ia tātou i te mau ’ati pae vārua. Fa’a’ite i te hō’ē ’ohipa i tupu ’a pāruruhia ai ’outou nā roto i te pe’era’a i te mau fa’auera’a.

2 Nephi 2:11, 16, 27

’Ua hōro’a mai te Atua iā’u i te ti’amāra’a ’ia mā’iti.

Nō tā rāua mau mā’itira’a, ’ua tītauhia ia Adamu ’e ia Eva ’ia fa’aru’e i te ’ō i Edene. Nāhea e ti’a ai ia ’outou ’ia ha’api’i i te mau tamari’i ē, ’aua’a a’e te mā’itira’a a Adamu ’e a Eva i ti’a ai ia tātou ’ia fa’a’ohipa i tō tātou ti’amāra’a ’ia mā’iti i te Metua i te Ao ra i teie mahana.

Mau ’ohipa e nehenehe e rave

• Pāpa’i i te hōho’a o te hō’ē ta’ata ti’amā ’e nō te hō’ē ta’ata i tītīhia (hō’ē paha ta’ata i roto i te fare ’auri), ’e e ani i te mau tamari’i ’ia fa’atoro i ni’a i te hōho’a tano ’ia tai’o ana’e ’outou i te mau parau ti’amā ’e tītīhia i roto i te 2 Nephi 2:27. Tūra’i i te parau ra « ti’amā nō te mā’iti », ’e e ani i te tamari’i tāta’itahi ’ia fa’ahiti mai i te reira.

• Hi’o fa’ahou ’e te mau tamari’i i te ’ā’amu o Adamu ’e o Eva (hi’o 2 Nephi 2:17–19; hi’o ato’a « Pene 3 : Adamu ’e ’o Eva », mau ’ā’amu nō te Faufa’a Tahito, 15–18, ’e ’aore rā, te video e tano i ni’a i te ChurchofJesusChrist.org) ’e te mā’itira’a tā rāua i rave i roto i te ’ō i Edene. Tauturu i te mau tamari’i ’ia tāpura i te tahi mau mā’itira’a tā rātou e rave i te mau mahana ato’a. Fa’a’ite pāpū ē, ’ua hōro’a mai te Metua i te Ao ra ia tātou i te ti’amāra’a ’ia mā’iti i roto i te maita’i ’e te ’ino, ’e e ani i te mau tamari’i ’ia ’ōu’a i ni’a ’e i raro ’e ’aore rā, ’ia papa’i i tō rātou rima ’ei ha’apōpoura’a i te rirora’a ’ei ta’ata ti’amā nō te mā’iti.

• A ha’uti i te hō’ē ha’uti i reira ’outou e parau ai i te hō’ē ta’o (mai te māramarama) ’e e parau mai te mau tamari’i te tutoe’e (pōiri ). E rave i te reira e rave rahi taime. Tauturu i te mau tamari’i ’ia hāro’aro’a nāhea nā mea e piti e tauturu ai ia tātou ’ia rave i te mau mā’itira’a, e tai’o i te ’āfara’a mātāmua o te 2 Nephi 2:11 ’e te 2 Nephi 2:16. E fa’ati’a i te mau tamari’i i te mau ’ā’amu nō ni’a i te tamari’i tei fa’ahemahia ’ia rave i te hō’ē mā’itira’a ti’a ’ore. Tauturu i te mau tamari’i ’ia feruri e aha tutoe’e nō taua mā’itira’a ra, ’e e ani ia rātou ’ia ha’uti i te reira. E faʼaʼite pāpū ē, e tauturu te Metua i te Ao ra ia tātou mai te mea ē, e māʼiti tātou i te mea tiʼa.

• Hīmene ’āmui i te hō’ē hīmene nō ni’a i te ravera’a i te mau mā’itira’a, mai te « Jésus-Christ est mon modèle » ’e ’aore rā, « Choisir le bien » (Chants pour les enfants, 40–41, 82), ’e e ani i te mau tamari’i e aha tā rātou i ’apo mai nā roto mai i te hīmene nō ni’a i te ravera’a i te mā’itira’a.

Ha’api’i i te ha’api’ira’a tumu : Mau tamari’i pa’ari

2 Nephi 1:20

E ha’amaita’ihia vau ’ia ha’apa’o ana’e au.

’Ia vai ana’e te fa’aro’o i roto i te tamari’i ē, e ha’amaita’i te Atua ia rātou nō tō rātou ha’apa’ora’a i te mau fa’auera’a—noa atu ē, ’aita te reira mau ha’amaita’ira’a e tae ’oi’oi mai—e mea ’ōhie a’e nō rātou ’ia rave i te mau mā’itira’a ti’a.

Mau ’ohipa e nehenehe e rave

• Tauturu i te mau tamari’i ’ia hi’o fa’ahou i te tahi mau mā’itira’a tā Nephi ’e tōna nau taea’e i rave. Nō te tahi mau hi’ora’a, hi’o i te 1 Nephi 2:11–16; 3:5–7; ’e te 18:9–11. Ani ia rātou ’ia tai’o ’āmui i te 2 Nephi 1:20 ’e ’ia fa’a’ite mai nō te aha rātou i mana’o ai, e hōro’a ’o Lehi i teie parau poro’i i tāna mau tamari’i.

• Pāpa’i i te mau pereota nō roto mai i te 2 Nephi 1:20 i ni’a i te mau ’api parau, ’e e ’āparau e aha te aura’a o te mau pereota. E ani i te mau tamari’i ’ia fa’anaho i te mau ’api parau mai te au i te fa’anahora’a ti’a ma te fa’a’ohipa i te ’īrava. ’Ei fa’ahōho’ara’a i te ta’a-’ē-ra’a i rotopū i te manuiara’a ’e te tāpū-’ē-ra’a-hia, ’a fa’a’ite i te mau tamari’i i te hō’ē rā’au tanu maita’i ’e hō’ē rao’ere ’e ’aore rā, hō’ē ’āma’a tei tāpū-’ē-hia i te tumu rā’au. E aha te ta’a-’ē-ra’a i rotopū i te hō’ē rao’ere i ni’a i te rā’au tanu, ’e hō’ē tei tāpū-’ē-hia ? Nāhea tātou i te riro mai te rao’ere i ni’a i te rā’au tanu ’ia ha’apa’o ana’e tātou i te mau fa’auera’a a te Atua ? Ani i te mau tamari’i ’ia pāpa’i i roto i te hō’ē buka ’ā’amu i te mau rāve’a e ha’amaita’i te Atua ia rātou ’ia mā’iti ana’e rātou i te maita’i.

2 Nephi 2:22–28

’Ua hōro’a mai te Atua iā’u i te ti’amāra’a ’ia mā’iti.

’Ua fa’aora Iesu Mesia ia tātou i te pohe tino ’e i te pohe vārua (te ta’a-’ē-ra’a i te Atua nō te hara) nā roto i tāna tāra’ehara ’e te ti’afa’ahoura’a. Nō te ora fa’ahou i pīha’i iho i te Metua i te Ao ra, tītauhia ia tātou ’ia fa’a’ohipa i tō tātou ti’amāra’a nō te tātarahapa tāmau noa ’e nō te fa’aitoito ’ia ora parau ti’a noa.

Mau ’ohipa e nehenehe e rave

• Fa’a’ite i te hō’ē hōho’a nō Adamu ’e ’o Eva (hi’o Buka hōho’a nō te ’evanelia, no. 4), ’e e ani i te mau tamari’i ’ia fa’a’ite mai e aha tā rātou i ’ite nō ni’a i te ’ohipa tei tupu i ni’a ia Adamu ’e ’o Eva i roto i te ’ō i Edene. Tauturu i te mau tamari’i ’ia ’imi i te mau pāhonora’a i roto i te 2 Nephi 2:22–27. Fa’ata’a ē, ’aua’a a’e te mā’itira’a a Adamu ’e a Eva, ’ua ha’amaita’ihia tātou ’ia haere mai i ni’a i te fenua nei ’e ’ia fa’a’ohipa i tō tātou ti’amāra’a nō te rave i te mau mā’itira’a maita’i ’e ’ia tātarahapa nā roto i te tāra’ehara a te Mesia ’ia rave ana’e tātou i te mau mā’itira’a hape.

• Pāpa’i i te mau ta’o o te 2 Nephi 2:27 i ni’a i te tāpura ’ere’ere. Tauturu i te mau tamari’i ’ia tāmau ’ā’au i te ’īrava nā roto i te fa’ahiti-noa-ra’a i te reira ’a haere mai ai hō’ē tamari’i i muri mai i te tahi nō te tūmā i te tahi mau ta’o ē hope noa atu i te tūmāhia. Tauturu i te mau tamari’i ’ia feruri e aha te huru o te orara’a ’āhani ’aore e mā’itira’a. Nō te aha rātou e māuruuru ai i te ti’amāra’a ?

• Ani i te mau tamari’i ’ia fa’a’ite mai i te hō’ē ’ohipa tei tupu ’a rave ai rātou i te hō’ē mā’itira’a maita’i. E aha tō rātou mana’o i muri a’e i tō rātou ravera’a i taua mā’itira’a ra ? E aha te nehenehe ia tātou ’ia rave nō te tauturu ia tātou iho ’ia mā’iti i te maita’i i te taime e fa’ahemahia tātou ’ia rave i te hō’ē ’ohipa ti’a ’ore ? E nehenehe e hīmene i te hō’ē hīmene nō ni’a i te ravera’a i te mau mā’itira’a, mai te « Mā’iti i te maita’i » (Te mau hīmene, no. 144), ’e e ani i te mau tamari’i ’ia fa’a’ite mai e aha tā rātou i ’apo mai i roto i te reira hīmene.

2 Nephi 3:6–24

E « hi’o mā’itihia » ’o Iosepha Semita.

I roto i te 2 Nephi 3 tē parau ra Lehi nō te hō’ē parau tohu nō ni’a i te peropheta Iosepha Semita. E nehenehe tā ’outou e fa’a’ohipa i te reira ’ei rāve’a nō te ha’api’i i te mau tamari’i nō ni’a i tāna misiōni i te mau mahana hōpe’a nei.

Mau ’ohipa e nehenehe e rave

• Ani i te mau tamari’i ’ia ’imi i roto i te 2 Nephi 3:6–24 i te tahi mau tāpa’o nō te ’ite ē, ’o vai teie peropheta e parauhia nei. Pāpa’i i tā rātou pāhonora’a i ni’a i te tāpura ’ere’ere. Nō te aha Iosepha Semita i pi’ihia ai « ’ei hi’o mā’itihia » ? E aha tā Iosepha Semita i rave ’o tei riro « ’ei faufa’a rahi [nō tōna mau taea’e] » ? (’īrava 7).

• Hīmene i te hō’ē hīmene nō ni’a ia Iosepha Semita, mai te « ’Auē te ta’ata i parau ia Iehova » (Te mau hīmene, no. 16), ’e ’aore rā, ’a māta’ita’i i te hō’ē video e fa’a’ite ra i te huru rau o tāna misiōni, mai tei ’itehia i ni’a i te history.ChurchofJesusChrist.org/article/joseph-smith-video-downloads. Ani i te mau tamari’i nō te aha rātou e māuruuru ai nō te peropheta Iosepha Semita.

Fa’aitoito i te ha’api’ira’a i te fare

Fa’aitoito i te mau tamari’i ’ia ’ite i te mau rāve’a nō te rave i te mau mā’itira’a i teie hepetoma. E ani ia rātou ’ia vai ineine nō te fa’a’ite mai i te hepetoma i muri nei e aha te mau mā’itira’a tā rātou i rave ’e e aha te mau hōpe’ara’a o tā rātou mau mā’itira’a.

Ha’amaita’ira’a i tā tātou ha’api’ira’a

E nehenehe te mau tamari’i e ’ite i te fa’aurura’a a te Vārua. Ha’api’i i te mau tamari’i ē, te mau mana’o nō te hau, te here ’e te tāmāhanahana tā rātou e fāri’i, ’ia ’āparau ana’e rātou ’e ’aore rā, ’ia hīmene ana’e rātou nō ni’a ia Iesu Mesia ’e tāna ’evanelia, nō roto mai ïa i te Vārua Maita’i. E nehenehe teie mau mana’o e patu i tō rātou ’itera’a pāpū.