« 10–16 nō Fepuare. 2 Nephi 6–10 : ‘’Auē te rahi o te rāve’a o tō tātou Atua !’ » Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)

« 10–16 nō Fepuare. 2 Nephi 6–10 », Mai, pe’e mai—nō te ta’ata hō’ē ’e te ’utuāfare : 2020

Hōho’a

tē pure ra Iesu i Gesetemane

’Eiaha tō’u hina’aro, tō ’oe rā e ti’a ai, nā Harry Anderson

10–16 nō Fepuare

2 Nephi 6–10

« ’Auē te rahi o te rāve’a o tō tātou Atua ! »

’Ia tai’o ’outou i te 2 Nephi 6–10, ’a feruri i tā te Fatu e tāmata ra i te ha’api’i ia ’outou. ’Ia ’ite mai ’outou i teie mau parau mau, ’a pāpa’i i te reira ’e ’a feruri nā roto i te pure nāhea i te fa’a’ohipa i tā ’outou i ha’api’i mai.

Pāpa’i i te mau mana’o e tae mai

E 40 atura matahiti tō te ’utuāfare o Lehi fa’aru’era’a ia Ierusalema. Tei te hō’ē fenua ’āpī ’e e fenua ’ē rātou, i te ātea ’ē roa ia Ierusalema ’e i te toe’a o te nūna’a fafau nā te Atua. ’Ua pohe ’o Lehi ’e ’ua ha’amata a’ena tōna hua’ai i te hō’ē mārōra’a e vai tau tenetere te maoro i roto i te mau ’āti Nephi—« tei fa’aro’o i te a’o ’e i te mau parau heheu a te Atua »—’e te mau ’āti Lamana, tei ’ore i fa’aro’o (2 Nephi 5:6). I terā vaira’a, ’ua hina’aro ’o Iakoba, te teina o Nephi tei fa’atōro’ahia i teienei ’ei ha’api’i nō te mau ’āti Nephi, i te nūna’a fafau ’ia ’ite ē, e’ita roa te Atua e ha’amo’e ia rātou, nō reira ’ia ’ore roa atu rātou e ha’amo’e iāna e ti’a ai. E poro’i te reira tā tātou i hina’aro pāpū i roto i tō tātou nei ao, i reira ho’i te mau fafaura’a e fa’a’inohia ai ’e te heheura’a e pāto’ihia ai. « ’Ia ha’amana’o tātou iāna… ’aore ho’i tātou e fa’aru’ehia… ’Ua rahi te mau parau a te Fatu » (2 Nephi 10:20–21). I roto i te reira mau parau, ’aita e mea rahi a’e i te « tāra’ehara mure ’ore » tei parauhia nō te upo’oti’a i te pohe ’e ia hade (2 Nephi 9:7). ’Ua fa’aoti Iakoba : « E tēnāna, ’ia ’oa’oa tō ’outou ’ā’au » ! (2 Nephi 10:23).

Hōho’a

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

2 Nephi 6–8

E aroha te Fatu i tōna mau ta’ata ’e e fa’atupu ’oia i tāna i fafau.

’Ei tauturura’a i tōna mau ta’ata ’ia māramarama ē, e tuha’a rātou nō te ’utuāfare o ’Īserā’ela, ’e e ti’a ia rātou ’ia ti’aturi ho’i i te Atua ’e i tāna mau fafau, ’ua fa’ahiti Iakoba i te mau parau tohu a Isaia i pāpa’ihia i roto i te 2 Nephi 6–8. ’Ua fa’ata’a Isaia i te purarara’a o ’Īserā’ela ’e i te ha’aputura’a tā te Fa’aora i parau ’e i te fa’aorara’a o tōna mau ta’ata. ’Ia tai’o ’oe, ’a feruri i te mau uira’a mai teie i muri nei :

E aha tā’u e ha’api’i mai nō ni’a i te here fa’aora o te Fa’aora nō’u nei ?
E aha te tāmāhanahanara’a tā te Fa’aora e pūpū nei ia rātou e ’imi iāna ?
E aha tā’u e nehenehe e rave nō te « tīa’i » i te Fa’aora ’e i te mau ha’amaita’ira’a tāna i fafau mai ?

2 Nephi 9:1–26

Nā roto i tāna tāra’ehara, ’ua fa’aora Iesu Mesia i te mau ta’ata ato’a mai te pohe pae tino ’e pae vārua.

E aha te mau ta’o ’aore rā te mau hōho’a tā ’oe e fa’a’ohipa nō te fa’a’ite i te ta’ata i te tītaura’a rahi roa ’ino nō te hō’ē Tāra’ehara nō te fa’aora ia tātou mai te pohe ’e te hara ? ’Ua fa’a’ohipa Iakoba i nā ta’o « rahi » ’e « ri’ari’a ». E aha tā Iakoba e ha’api’i nei nō ni’a i « taua mea rahi ra, ’o te pohe, ’e ’o hade » ’e te « te rāve’a e ora ai » tā te Atua i fa’aineine nō tātou ? (2 Nephi 9:10). ’Ia tai’o ’oe i te 2 Nephi 9:1–26, e nehenehe e tu’u i te hō’ē ’ū nō te mau ’ohipa e tupu ’āhani ’aita te tāra’ehara a Iesu Mesia. ’E i te tahi atu ’ū, e nehenehe tā ’oe e fa’a’ū i te mau mea tā tātou e nehenehe e fāri’i nā roto i te tāra’ehara a te Fa’aora. E aha te mau parau mau tā ’oe e ’ite ra nō ni’a i te tāra’ehara a Iesu Mesia ’o tē fa’atupu i roto ia ’oe i te ’āruera’a i « te pa’ari o te Atua ē, ’e tōna aroha ’e tōna maita’i » ? (2 Nephi 9:8).

Hi’o ato’a « Atonement of Jesus Christ », Gospel Topics, topics.ChurchofJesusChrist.org.

2 Nephi 9:27–54

E ti’a iā’u ’ia haere mai i te Mesia ’e ’ia fāri’i i te mau ha’amaita’ira’a hanahana o tāna tāra’ehara.

’Ua haere mai Iesu Mesia « i te ao nei ’ia ora te ta’ata ato’a iāna, ’ia ha’apa’o rātou i tōna ra reo » (2 Nephi 9:21 ; ’ua tu’uhia te pāpa’ira’a fa’a’opa). E nehenehe e parau ē, tītauhia ’ia vai ineine tātou nō te fāri’i i te mau ha’amaita’ira’a fa’aora tāna e pūpū mai. I muri iho i tōna fa’ata’ara’a i te fa’anahora’a rahi nō te tāra’ehara, ’ua hōro’a Iakoba i te tahi mau fa’aarara’a ’e te tahi mau anira’a faufa’a rahi, tei ’itehia i roto i te 2 Nephi 9:27–54, nō te tauturu ia tātou ’ia fāri’i i te mau ha’amaita’ira’a o te Tāra’ehara. E nehenehe e pāpa’i i te reira i roto i te hō’ē tāpura mai teie :

Mau fa’aarara’a	Mau anira’a
Mau fa’aarara’a	Mau anira’a
Mau fa’aarara’a	Mau anira’a

E aha tā te Vārua e muhumuhu nei ’ia rave ’ei pāhonora’a i teie mau fa’aarara’a ’e i teie mau anira’a ?

2 Nephi 10:20, 23–25

Maoti te tusia a Iesu Mesia e ti’a tō’u ’ā’au « ’ia ’oa’oa ».

Te poro’i a Iakoba, e poro’i ’oa’oa ïa. ’Ua nā ’ō ’oia : « ’Ua parau atu vau ia ’outou i taua mau mea ra, ’ia ’oa’oa ’e ’ia fa’ateitei ’outou i tō ’outou upo’o ē a muri noa atu » (2 Nephi 9:3). ’Ia tai’o ’oe i te 2 Nephi 10:20, 23–25, e aha te mea e hōro’a nei ia ’oe i te tīa’ira’a ? E aha atu ā tā ’oe i ’ite i roto i te 2 Nephi 9–10 ’o tē hōro’a ia ’oe i te tīa’ira’a ? E aha tā ’oe e rave nō te ha’amana’o i teie mau mea i te taime e tae mai te mana’o paruparu ?

Hi’o ato’a Ioane 16:33.

Hōho’a

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

2 Nephi 8:3–7

’Ia tai’o ’outou i te 2 Nephi 8:3, e nehenehe tā ’outou e fa’a’ite i te tahi mau hōho’a nō te hō’ē medebara ’e nō te hō’ē ’ō. Nāhea te Fatu i te taui i te mau medebara o tō tātou orara’a ’ei ’ō ? I roto i te mau ’īrava 4–7, e aha tā te Fatu e a’o nei ia tātou ’ia rave nō te fāri’i i te ’oa’oa i fa’ahitihia i roto i te ’īrava 3?

2 Nephi 8:24–25

, ?Nāhea te mau parau fa’aitoito a Isaia i te mau ta’ata nō Ziona, i te ha’apūai ia tātou i roto i tā tātou mau tauto’ora’a nō te riro rahi atu ā ’ei pipi ha’apa’o maita’i nō Iesu Mesia ? E aha te tū’atira’a i roto i te ti’ara’a i ni’a ’e te ’ō’omora’a i te ’ahu, ’e te mea tā te Atua e hina’aro ia tātou ’ia rave i te pae vārua ?

2 Nephi 9:1–26

E aha tā tō ’outou ’utuāfare e nehenehe e rave nō te māramarama maita’i a’e i te rahi o te « tāra’ehara [hope’a ’ore] » o te Mesia ? (’īrava 7). Penei a’e e nehenehe tā rātou e hi’o ’aore rā e feruri i te mau mea huru hope’a ’ore—te ’aihere i ni’a i te hō’ē māhora, te one i tahatai, te mau fēti’a i roto i te reva. E mea nāhea te hope’a ’ore o te tāra’ehara a te Fa’aora ? E aha te mau parau i roto i te 2 Nephi 9 e fa’ahōhonu atu ā i tō tātou māuruuru nō te mea tā te Fa’aora i rave nō tātou ?

2 Nephi 9:27–44

Penei a’e hō’ē mahana i roto i teie hepetoma e nehenehe tā tō ’outou ’utuāfare e ’imi i roto i te 2 Nephi 9:27–38, i te mau fa’aarara’a (e ha’amata ma te parau « ’a tae ho’i »). E aha te fa’aarara’a ta’a ’ē e mea faufa’a nō tō ’outou ’utuāfare ’ia paraparau ? I te tahi atu mahana, e nehenehe tā ’outou e ’imi i roto i te 2 Nephi 9:39–44, i te mea tā Iakoba i ani i tōna mau ta’ata ’ia ha’amana’o.

2 Nephi 9:28–29, 50–51

E aha te tahi hi’ora’a nō te « te’ote’o, ’e te hapa ’e te ma’ama’a o te ta’ata nei » ? (’īrava 28). E aha tā tātou e nehenehe e rave nō te ha’afaufa’a rahi atu ā i te mau mea a te Atua ’eiaha rā te mau mea o teie nei ao ?

2 Nephi 9:45

Penei a’e e au tō ’outou ’utuāfare e hāmani i te tahi fifi pāpie e fa’a’ohu atu ai nō te tu’u i te reira i ni’a iāna ’e e ueue i te reira. E aha te tū’atira’a o te mau hara ’e te fifi ? Nāhea te Fa’aora e tauturu ai ia tātou ’ia ueue i te reira ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i tā tātou ha’api’ira’a

Vai vata noa ’e vai matara noa. « E ha’amata te tahi o te mau taime maita’i roa a’e nō te ha’api’i i te hō’ē uira’a ’aore rā te hō’ē māna’ona’ora’a e vai ra i roto i te ’ā’au o te hō’ē [melo o te ’utuāfare]… ’Ia ’ite rātou nā roto i tā ’outou mau parau ’e tā ’outou mau ’ohipa ē, ’ua hina’aro mau ’outou e fa’aro’o ia rātou (Ha’api’ira’a mai tā te Fa’aora, 16).