« 24 nō Fepuare–1 nō Māti. 2 Nephi 26–30 : ‘E ravera’a ’ūmerehia ’e te māerehia’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 24 nō Fepuare–1 nō Māti. 2 Nephi 26–30 », Mai, pe’e mai—nō te ta’ata hō’ē ’e te ’utuāfare : 2020
E arata’i ’oia ia ’oe nā te rima, nā Sandra Rast
24 nō Fepuare–1 nō Māti
2 Nephi 26–30
« E ravera’a ’ūmerehia ’e te māerehia »
’Ua parau te Fatu : « Tē fa’aue ra ho’i au i te ta’ata ato’a… ’ia pāpa’i rātou i te mau parau tā’u e parau atu ia rātou » (2 Nephi 29:11). Nā roto i te Vārua, e paraparau mai te Fatu ia ’outou ’a tuatāpapa ai ’outou i tāna parau. Pāpa’i i te mea tā ’outou i fārii.
Pāpa’i i te mau mana’o e tae mai
« Tē tohu nei au ia ’outou i te parau nō te mau mahana hope’a » (2 Nephi 26:14). E nehenehe e parau ē, tē pāpa’i ra ’oia nō ni’a i tō tātou nei tau. ’E e mea ra ē, e pe’ape’a tātou i tāna i ’ite : te ta’ata e pāto’i nei i te mana ’e te mau temeio a te Atua, te pohehae ’e te mārō parare, te diabolo e ru’uru’u nei i te ta’ata i te taura pa’ari. Hau atu i teie mau « ’ohipa a te pōiri » i te mau mahana hope’a nei (2 Nephi 26:10, 22) fa’aterehia e te ’enemi, ’ua paraparau ato’a Nephi nō « te tahi ’ohipa māere ’e te ’ūmere » fa’aterehia e te Fatu iho (2 Nephi 27:26). ’E i te tumu o te reira ’ohipa, e buka ïa—e buka e paraparau mai te repo mai ra, nō te hōhora i te mau ha’avare a Sātane ’e nō te putuputu i te feiā parau ti’a ’ei tāpa’o i ni’a ’ē. Terā buka, ’o te Buka a Moromona ïa, te ’ohipa māere, ’o te ’ohipa ïa a te ’Ēkālesia a te Fatu i te mau mahana hope’a nei ’e te mea ’ūmere, ’oia ho’i ïa tē ani nei ’oia ia tātou pā’āto’a, noa atu ā tō tātou mau paruparu, ’ia ’āmui mai.
Mau mana’o nō tā ’oe iho tuatāpapara’a pāpa’ira’a mo’a
Tē ani nei Iesu Mesia i te mau ta’ata ato’a ’ia haere mai iāna ra.
’Ua ha’api’i te peropheta Iosepha Semita nō ni’a i te Metua i te Ao ra ē, « ’aita e ’ōtia i tōna aroha ’e i tāna mau ha’amaita’ira’a, hau atu i te mea ’ua ineine tātou e ti’aturi ’e e fāri’i » (The Joseph Smith Papers, « History, 1838–1856, volume D-1 », ’api 4 [addenda], josephsmithpapers.org). Tai’o i tā Nephi i ’ite ātea i roto i te 2 Nephi 26:20–22 ’e tāna i ha’api’i nō ni’a i te Fa’aora i roto i te mau ’īrava 23–33, ’e ’a fa’aau te reira i te fa’ahitira’a a Iosepha Semita. E aha tā ’oe i ha’api’i mai nō ni’a i te aroha ’ōti’a ’ore o te Fatu ? E aha tā ’oe e nehenehe e rave ’ei melo nō te ’Ēkālesia a Iesu Mesia, nō te riro rahi atu ā mai te Mesia i roto i tā ’oe ravera’a i te mau tamari’i a te Atua ?
Hi’o ato’a 3 Nephi 18:30–32.
E aha te buka i fa’ahitihia i roto i teie mau pene ?
Tē parau ātea nei te parau tohu a Nephi i roto i te 2 Nephi 26–27 nō te taera’a mai o te Buka a Moromona, e parau ho’i e turu’i rahi nei i ni’a i te parau tohu a Isaia i nā mua atu (hi’o Isaiah 29). Tē fa’ata’a nei teie parau tohu i te mau mea i muri nei :
-
Te mau parau a te hua’ai o Lehi e paraparau « mai raro mai i te repo ra » « ma te vārua au maita’i ra » ’e ’o tei « hunahia i roto i te hō’ē buka » (2 Nephi 26:14–17 ; hi’o ato’a Isaia 29:4).
-
E tuha’a nō te buka i hōro’ahia i te hō’ē ta’ata ’ite ’o tē parau mai : « ’Aore e ti’a iā’u ’ia tai’o » (2 Nephi 27:15–20 ; Iosepha Semita—’Ā’amu 1:64–65 ; hi’o ato’a Isaia 29:11).
Ta’a ’ē noa atu ia Isaia, ’ua fa’ahiti i te tahi atu mau peropheta o te Bibilia i te parau nō te Buka a Moromona, noa atu ā ’aita i fa’ahitihia te i’oa. ’Ei hi’ora’a, tē parau nei te Ezekiela 37:15–20 nō te « rā’au nā Iosepha », ’o tē nehenehe e fa’atū’ati i te mau pāpa’a parau a te ’āti Nephi, e hua’ai ho’i rātou nō Iosepha. E riro te reira pāpa’a parau ’ei hō’ē ’e te « rā’au nā Iuda », ’oia ho’i te Bibilia.
E nehenehe te tahi mau hi’ora’a e ’itehia i roto i te Arata’i nō te mau pāpa’ira’a mo’a, « Buka a Moromona » (scriptures.ChurchofJesusChrist.org).
Tē ’imi nei Sātane ’ia ha’avare i te ta’ata.
E rave rahi ha’avare ’e te rāve’a a Sātane tei vauvauhia i roto i te mau fa’a’itera’a a Nephi nō te mau mahana hope’a nei i roto i te 2 Nephi 28. Hi’o ē, tē ’ite ra ānei ’oe ia rātou (’ei hi’ora’a, hi’o mau ’īrava 6, 8, 21–23, 29). Nō te aha tītauhia ia ’oe ’ia ’ite i te mau ha’avare a Sātane ? E aha tā ’oe e rave i te taime e tāmata te ’enemi i te ha’avare ia ’oe ?
Tē tāmau nei te Atua i te hōro’a i te heheura’a nō te arata’i i tāna mau tamarii.
Tātou te feiā Mo’a i te Mau Mahana Hope’a Nei, ’ua ha’amaita’ihia tātou, ’ua pu’e noa te parau a te Atua, nō reira e tano te mau fa’aarara’a a Nephi nō tātou : ’eiaha roa atu tātou e mana’o ē, « ’ua nava’i ho’i te reira ra ia mātou ! » ’Ia tai’o ’oe i te mau fa’aarara’a i roto i te 2 Nephi 28 ’e te 29, ’a feruri i te mau uira’a mai teie i muri nei :
-
E aha tā te Fatu i hina’aro iā’u ’ia mana’o ’e ’ia pāhono i tāna parau ?
-
Nō te aha i te tahi taime e « riri » te mau ta’ata i te fārii rahi atu ā i te parau mau a te Atua ? (2 Nephi 28:28). I tupu a’ena ānei tō’u mana’o mai te reira ? Mai te peu e ’ē, nāhea ïa e nehenehe iā’u ’ia fāri’i atu ā i te parau mau ?
-
E aha te aura’a o te fāri’ira’a i te parau a te Atua ? E aha tā’u e nehenehe e rave ’ei fa’a’itera’a iāna ē, ’ua hina’aro vau ’ia fāri’i rahi atu ā i tāna parau ?
Hi’o ato’a Alama 12:10–11 ; 3 Nephi 26:6–10.
’Ua fa’aineine te Atua i te Buka a Moromona nō tō tātou nei tau.
Nā mu’a a’e te otira’a te Buka a Moromona i te pāpa’ihia, ’ua ’ite ’o Nephi nā roto i te heheura’a ē, e riro mai te reira « ’ei mea faufa’a rahi i te mau tamari’i a te ta’ata nei » (2 Nephi 28:2). Nō te aha e mea faufa’a rahi te Buka a Moromona nō ’oe ? E feruri i teie uira’a ’a tai’o ai i te 2 Nephi 29–30. E aha te tahi o te mau ’ohipa « māere » tā te Atua i rave i roto i te ao nei ’e i roto i tō ’oe orara’a nā roto i te Buka a Moromona ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
2 Nephi 26:12–13
’Ua ha’api’i Nephi ē, e fa’a’ite Iesu Mesia iāna nā roto i te Vārua Maita’i. E aha te tahi mau ’ohipa tā te mau melo o te ’utuāfare e nehenehe e fa’a’ite i te tahi ’e te tahi, nō te ha’apūaira’a i tō rātou ’itera’a pāpū nō te Fa’aora nā roto i te Vārua Maita’i ?
2 Nephi 26:22 ; 28:19–22
Penei a’e e au mai tō ’outou ’utuāfare i te hō’ē ha’api’ira’a tao’a nō te fa’ahōho’a i tā te 2 Nephi 26:22 e ha’api’i nei nō ni’a i te diabolo. ’Ia tai’o ’outou nō ni’a i te mau rāve’a a Sātane i roto i te 2 Nephi 28:19–22, e nehenehe e fa’a’ohu i te tahi taura iti i ni’a i nā fatira’a rima o te hō’ē ta’ata nō te fa’ahōho’a i te « taura vavai ». E aha te tū’atira’a i roto i te taura vavai ’e te mau fa’ahemara’a a Sātane ? Nāhea te reira e nehenehe e riro mai ’ei taura ’eta’eta ? Nāhea tātou ’ia ’ite mai i te mau ha’avare a Sātane ?
’Ua fa’aau Nephi i te mau fa’ahemara’a a te diabolo i te hō’ē « taura vavai ».
2 Nephi 27:20–21
E aha te aura’a te parau a te Fatu ’a nā ’ō ai ’oia ē : « E ti’a ho’i iā’u ’ia rave i tā’u ihora ’ohipa » ? E aha tā teie parau mau e fa’atupu i ni’a i te huru tātou e tāvini ai i roto i te ’Ēkālesia ?
2 Nephi 28:30–31
E ti’a ānei i tō ’outou ’utuāfare ’ia feruri i te hō’ē mea, mai te heheura’a nō ’ō mai i te Atua ra, e mea maita’i a’e ’ia tae mai te tahi noa tuha’a i te taime hō’ē ? Nō te aha te Atua e heheu mai ai i te parau mau ia tātou « te fa’aue nā ni’a iho i te fa’aue, te a’o nā ni’a iho i te a’o, te tahi vāhi iti i’ō nei, e mai reira ho’i ’ei ’ō te tahi vāhi iti » ’eiaha rā te tā’āto’ara’a i te hō’ē noa taime ?
2 Nephi 29:7–9
E aha tā te Fatu e ’ōpua nei ’ia fa’a’ite pāpū ’aore rā ’ia fa’a’ite maoti te Buka a Moromona ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’ira’a i te tuatāpapara’a pāpa’ira’a mo’a a te ta’ata iho
Fa’a’ite i te mau hi’ora’a. E nehenehe te paraparaura’a ia vetahi ’ē i te mea tā ’outou i ’apo mai e ha’apūai i tō ’outou iho māramaramara’a i te reira. I muri iho i te tai’ora’a i te 2 Nephi 29:6–14, penei a’e e tae mai te fa’aurura’a e fa’ata’a atu i te hō’ē hoa nō te aha e tītauhia te Buka a Moromona nō tātou.
’Ua tohu ātea te mau pāpa’ira’a a Nephi i te hō’ē « ’ohipa māere ’e te ’ūmere » ’o te tupu i te mau mahana hope’a nei (2 Nephi 27:26).