Tē ha’api’i ra te Mesia i tāna mau pipi, nā Justin Kunz

2–8 nō Māti

2 Nephi 31–33

« Terā te ’ē’a mau »

Tē hōro’a nei teie arata’i ha’api’ira’a i te tahi mau parau tumu faufa’a rahi ia ’outou i roto i te 2 Nephi 31–33. Terā rā, te mau mea faufa’a roa a’e tā ’outou e ’apo mai i roto i tā ’outou tuatāpapara’a, e tae mai ïa nā roto i te mau muhumuhu o te Vārua. ’A ’imi i te reira arata’ira’a ’e ’a pāpa’i i te mau muhumuhu e tae mai.

Pāpa’i i te mau mana’o e tae mai

I roto i te mau parau hope’a tei pāpa’ihia e Nephi, tē vai nei teie parau : « ’Ua nā reira mai ra te Fatu i te fa’aue mai ā’u ra, ’e ’ia ha’apa’o vau i te reira e ti’a ai » (2 Nephi 33:15). Mai te huru te reira i te hō’ē parau pū’ohura’a nō te orara’a o Nephi. ’Ua ’imi ’oia i te hina’aro o te Fatu ’e ’ua fa’aitoito ’oia ’e ’ua tūtava ho’i i te ha’apa’ora’a i te reira—e ’ōpuara’a ata’ata ānei nō te haere e ti’i i te mau ’api veo ia Labana ra, te patura’a ānei i te hō’ē pahī nō te fano nā ni’a i te moana ’aore rā te ha’api’i-māite-ra’a ānei i te ha’api’ira’a tumu a te Mesia ma te pāpū ’e te mana. E ti’a ia Nephi ’ia parau ’e ’ia fa’atae i te mana’o i ni’a i te tītaura’a « ’ia haere ti’a atu… i mua i te ti’a-māite-ra’a i te Mesia », i te pe’era’a i te « ’ē’a tītī’aifaro ’e te piriha’o ē tae roa atu ai i te ora mure ’ore » (2 Nephi 31:20, 18), nō te mea ’o te ’ē’a tāna i haere. ’Ua ’ite ’oia nā roto i te mau ’ohipa i tupu i ni’a iāna ē, teie ’ē’a, noa atu ā te pa’ari i te tahi taime, e ’ē’a ’oa’oa ato’a, ’e « ’aita atu e ’ē’a, ’e ’aore ho’i e i’oa i hōro’ahia mai i raro a’e i te ra’i, e ti’a ai i te ta’ata ’ia fa’aorahia i te bāsileia o te Atua ra » (2 Nephi 31:21).

Mau mana’o nō tā ’oe iho tuatāpapara’a pāpa’ira’a mo’a

2 Nephi 31–32

’O Iesu Mesia ana’e ’e tāna ha’api’ira’a tumu te ’ē’a nō te ora mure ’ore.

Mai te mea e ha’apoto ’oe i te parau nō te ’ē’a nō te ora mure ’ore, e aha tā ’oe e parau ? Teie tā Nephi ha’apotora’a, mai tei mātauhia te pāpū ’e te ’ōhie nōna : fa’aro’o i te Mesia, tātarahapa, bāpetizo, fāri’i i te hōro’ara’a o te Vārua Maita’i ’e ’ia tāpe’a noa ē tae noa atu i te hope’a. I muri iho tā ’oe tuatāpapara’a i te mau ha’api’ira’a a Nephi i roto i te 2 Nephi 31–32, ’a feruri nāhea i te fa’ata’a i te reira i te tahi atu ta’ata nā roto i tā ’oe iho mau parau. ’A feruri i te te orara’a i te reira mau ha’api’ira’a i te ha’amaita’i ia ’oe. E nehenehe e hi’o i te mau ha’api’ira’a a Nephi i roto i te 2 Nephi 31:18–20 nō te hi’opo’a i tā ’oe iho mau tauto’ora’a nō te « haere ti’a atu i mua » i ni’a i te ’ē’a o te ’evanelia.

Hi’o ato’a 3 Nephi 11:32–39 ; 27:13–22 ; D. Todd Christofferson, « Te ha’api’ira’a tumu a te Mesia », Ensign ’aore rā Liahona, Mē 2012, 86–90 ; Brian K. Ashton, « Te ha’api’ira’a tumu a te Mesia », Ensign ’aore rā Liahona, Nov. 2016, 106–9.

Nā te pe’era’a i te mau ha’api’ira’a a Iesu Mesia e arata’i ia tātou i te ora mure ’ore.

2 Nephi 31:4–13

’Ua hōro’a mai Iesu Mesia i te hi’ora’a maita’i roa a’e o te ha’apa’o i te bāpetizora’ahia ’oia.

’Ua tupu ānei tō ’oe bāpetizora’a inanahi ra ’aore rā ’a 80 matahiti i teieinei, ’ua riro te reira ’ei taime faufa’a roa—’ua tomo ’oe i roto i te hō’ē fafaura’a nō te orara’a tā’āto’a ’ia pe’e ia Iesu Mesia. ’A feruri i tō ’oe bāpetizora’a ’ia tai’o ’oe i te bāpetizora’a o te Fa’aora i roto i te 2 Nephi 31:4–13. Nō te aha i bāpetizohia ai te Fa’aora ? E aha te tū’atira’a i roto i te mau tumu ’oia i bāpetizohia ai ’e te mau tumu ’oe i bāpetizohia ai ? E aha tā ’oe e rave nei i teie mahana nō te tāmau i te pe’e i te hi’ora’a ha’apa’o o te Fa’aora ?

’Ua riro te ’ōro’a nō te pāne ’e te pape ’ei taime i roto i te hepetoma nō te fafau fa’ahou ā ia ’oe ’ia pe’e ia Iesu Mesia. I te taime e rave fa’ahou ai ’oe i te ’ōro’a, e nehenehe tā ’oe e tai’o i te 2 Nephi 31:13 ma te feruri i tā ’oe fa’aotira’a e « pe’e… i te Tamaiti, ma te ’ā’au ato’a », nā reira ato’a i tō ’oe ineine ’ia « rave i ni’a iho ia [’oe] i te i’oa o te Mesia ».

2 Nephi 31:17–20 ; 32

E fa’a’ite mai te Vārua Maita’i iā’u e aha tei tītauhia iā’u ’ia rave.

Mai te mea ra ē, ’o te bāpetizora’a ’e te ha’amaura’a « te ’ūputa e tomohia ai » e ’oe te ’ē’a tītī’aifaro ’e te piriha’o (2 Nephi 31:17), e aha ïa tē rave i te taime tei ni’a ’oe i te ’ē’a ? ’O te reira te māna’ona’ora’a o te mau ta’ata o Nephi (hi’o 2 Nephi 32:1). E aha te mau pāhonora’a tā Nephi i hōro’a i roto i te 2 Nephi 31:19–20 ’e te pene 32 ? E aha te mau pāhonora’a tā ’oe e ’ite ra nō ’oe ?

Hi’o ato’a David A. Bednar, « ’A fāri’i i te Vārua Maita’i », Ensign ’aore rā Liahona, Novema 2010, 94–97.

2 Nephi 33

Tē tāparu nei te Buka a Moromona i te tā’āto’ara’a ’ia ti’aturi i te Mesia.

I roto i te 2 Nephi 33, ’a fa’aoti ai Nephi i tāna pāpa’ira’a, ’ua fa’ata’a ’oia e aha te tumu i pāpa’i mātāmua ai ’oia. E aha te mau tumu tā ’oe e ’ite ra i roto i teie pene ? ’A feruri i tā ’oe i tai’o i roto i te 1 Nephi ē tae roa mai i te 2 Nephi ’e i te mau mea ato’a tā ’oe i pāpa’ipa’i. Nāhea te mau ’ā’amu ’e te mau ha’api’ira’a i rave fa’aoti ai i te fā a Nephi nō ’oe ? ’Ei hi’ora’a, nāhea te reira i te tāparura’a ia ’oe ’ia « fa’aro’o i te [Mesia] ’e ’ia [fa’aitoito] ē tae noa atu i te hope’a » ? (’īrava  4). E nehenehe e pāpa’i i te reira mau ’ohipa ’aore rā e fa’a’ite i te reira i te hō’ē melo o te ’utuāfare ’aore rā te hō’ē hoa.

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

2 Nephi 31:5–13

Tē vai ra ānei te tahi melo o te ’utuāfare e fa’aineine ra nō te bāpetizora’a, ’aore rā nō bāpetizo-noa-hia a’e nei ? Penei a’e e nehenehe tā rātou e fa’a’ite mai nō te aha rātou i fa’aoti ai e bāpetizo. ’Ia au i te mau ha’api’ira’a a Nephi, e aha te tahi mau tumu e tītauhia ai tātou ’ia bāpetizohia ? E aha te tahi mau ha’amaita’ira’a tā tātou e fāri’i ’ia bāpetizohia tātou ?

2 Nephi 31:17–21

Nāhea e ti’a ia ’outou ’ia tauturu i tō ’outou ’utuāfare ’ia māramarama i te fa’ahōho’ara’a a Nephi nō te « ’ē’a tītī’aifaro ’e te piriha’o » ? (2 Nephi 31:18). ’Ei hi’ora’a, e nehenehe tā ’outou e ha’a ’āmui nō te pāpa’i i te hōho’a o te ’ē’a tā Nephi i fa’ahiti i roto i te 2 Nephi 31:17–21, ma te tu’u i te i’oa o te mau mea tītauhia ’ia rave nō te tomo i ni’a i te ’ē’a ’e nō te haere ti’a atu i mua i reira. Nāhea te Fa’aora i te tauturu ia tātou ’ia haere i mua i ni’a i te ’ē’a ?

2 Nephi 31:20

Mai te mea e hina’aro ’outou i te tauturu i tō ’outou ’utuāfare ’ia māramarama maita’i a’e nāhea i te fa’aitoito ē tae noa atu i te hope’a, e tātarara’a maita’i e vai ra i te ’api 6 nō te ’Ia Poro Haere i Ta’u Nei ’Evanelia ; nā reira ato’a i te a’ora’a a Elder Dale G. Renlund « E tāmau noa te Feiā Mo’a i te Mau Mahana Hope’a Nei i te tāmata » (Ensign ’aore rā Liahona, Mē 2015, 56–58).

2 Nephi 32:8–9

’Ei tauturura’a i te mau melo o te ’utuāfare ’ia māramarama ē, e ti’a ia tātou ’ia « pure ma te fa’aea ’ore », e nehenehe e fa’ati’a i te hō’ē tāpura nō te mau ’ohipa tā tātou e nehenehe e pure nō te reira (’aore rā e pāpa’i hōho’a nō te fa’a’ite ia rātou). ’Ei reira, e nehenehe te ’utuāfare e hīmene i te hō’ē hīmene nō ni’a i te pure, mai te hīmene « ’Ua pure ānei ’oe ? » (Te mau hīmene, n° 72), ma te taui i te tahi mau parau i roto i te hīmene i te mau parau i ni’a i te tāpura. Nāhea te Fatu i te ha’amaita’i ia tātou ’ia pure tāmau noa tātou ?

2 Nephi 33:1–2

E aha te mea e nehenehe e tura’i i te ta’ata ’ia fa’a’eta’eta i tō rātou ’ā’au ? Nāhea tātou e nehenehe ai e ha’apāpū ē e « vāhi i roto ia [tātou] » nō te Vārua Maita’i ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i tā tātou ha’api’ira’a

Pe’e i te hi’ora’a o te Fa’aora. E tauturu mau ’ia tuatāpapa nāhea te Fa’aora ’ia ha’api’i—te mau rāve’a tāna i fa’a’ohipa ’e te mau mea tāna i parau. Te mana o Iesu nō te ha’api’i ’e nō te fa’ateitei i te ta’ata, nō roto mai ïa i te ta’ata ’ua riro ’oia ’e i te huru ’ua ora ’oia. Rahi noa atu ’outou i te tūtavara’a ’ia ora mai ia Iesu Mesia te huru ’e ’ia tūru’i i ni’a i tōna mana tāra’ehara, rahi noa ato’a atu tā ’outou huru ha’api’ira’a e au i tāna.

’Ua ’ī i te parau ti’a, nā Liz Lemon Swindle