Iesu e ha’api’i ra i tāna mau pipi, nā Justin Kunz

2–8 nō māti.

2 Nephi 31–33

« Terā te ’ē’a mau »

E haʼamata i tā ʼoutou faʼaineineraʼa nā roto i te taiʼoraʼa i te 2 Nephi 31–33. ’Imi i te arata’ira’a a te Vārua nō ni’a i te mea e ha’api’i i te mau tamari’i. E hōro’a mai teie fa’anahora’a ia ’outou i te tahi mau mana’o.

Pāpa’i i te mau mana’o e tae mai

Fa’a’ite i te mana’o

Nō te mea ’ua ha’api’i Nephi nō ni’a i te bāpetizora’a o te Mesia, e ani i te mau tamari’i ’ia fa’a’ite mai i te tahi mea tā rātou i ha’api’i mai nō ni’a i te bāpetizora’a. E nehenehe ato’a tā rātou e fa’a’ite mai i te mau mana’o i tō rātou ferurira’a ’e i tō rātou ’ā’au nō ni’a i tō rātou iho bāpetizora’a ’e ’aore rā, te bāpetizora’a o tō rātou hoa ’e ’aore rā, te mau melo o tō rātou ’utuāfare.

Ha’api’i i te ha’api’ira’a tumu : Mau tamari’i ’āpī

2 Nephi 31

’Ua ha’api’i mai Iesu Mesia iā’u nāhea ’ia ho’i i te Metua i te Ao ra.

’Ua ha’api’i Nephi ē, te pe’era’a i te hi’ora’a ’e te mau ha’api’ira’a a te Fa’aora, ’o te rāve’a ana’e ïa « e fa’aorahia ai i roto i te bāsileia o te Atua » (2 Nephi 31:21).

Mau ’ohipa e nehenehe e rave

• Fa’a’ite i te hōho’a i roto i te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’a ha’apoto ai ’outou i te ’ā’amu o te bāpetizora’a o Iesu (hi’o 2 Nephi 31:4–13). Fa’ata’a ē, te bāpetizora’a ’o te hō’ē ïa ta’ahira’a i ni’a i te ’ē’a nō te ho’i e ora i pīha’i iho i te Metua i te Ao ra. Ani i te hō’ē ta’ata tei bāpetizohia ’aita i māoro a’enei, ’ia fa’ati’a mai i mua i te mau tamari’i e aha tōna mau mana’o nō ni’a i te bāpetizora’a.

• E fa’ata’a ē, ’ua ha’api’i mai Iesu Mesia ia tātou i te mea e tītauhia ia tātou ’ia rave nō te ho’i iāna ra i muri a’e i tō tātou pohera’a. Pāpa’i i te hō’ē ’ē’a i ni’a i te tāpura ’ere’ere, ’e e tu’u i te hō’ē hōho’a o te Mesia i te hōpe’a o te reira ’ē’a. Hōro’a i te mau tamari’i i te mau hōho’a e fa’ahōho’a ra i te mau tuha’a o te ha’api’ira’a tumu a te Mesia (fa’aro’o i te Mesia, tātarahapa, bāpetizora’a, te hōro’a o te Vārua Maita’i, ’e te tāmau-māite-ra’a ē tae noa atu i te hope’a). Tauturu ia rātou ’ia tu’u i te mau hōho’a nā ni’a i te roara’a o te ’ē’a.

• Tauturu i te mau tamari’i ’ia tāmau ’ā’au i te hīro’a fa’aro’o maha. Hīmene ’āmui i te hō’ē hīmene nō ni’a i te hō’ē o te mau parau tumu mātāmua o te ’evanelia, mai te « La foi », « Le jour de mon baptême », ’e ’aore rā, « Choisir le bien » (Chants pour les enfants, 50–51, 53, 82).

2 Nephi 32:3

E nehenehe au e pōpou i te parau a te Mesia.

Nāhea tō ’outou mau ’itera’a nō ni’a i te « pōpou[ra’a] i te parau a te Mesia » (2 Nephi 32:3) i te tauturu i te mau tamari’i ’ia hāro’aro’a i teie parau ?

Mau ’ohipa e nehenehe e rave

• Ani i te mau tamari’i ’ia fa’a’ite mai i te i’oa o te tahi mau mā’a auhia e rātou, ’e e ani ia rātou ’ia ha’uti mai nāhea rātou i te pōpou i te reira. Tai’o i te 2 Nephi 32:3, ’e e ani i te mau tamari’i ’ia fa’aro’o, e aha te mea tā Nephi e parau ra ē, e pōpou tātou. E aha te aura’a o te parau ’ia pōpou i te mau pāpa’ira’a mo’a ? E fa’ata’a ē, te mau pāpa’ira’a mo’a ’o te hō’ē ïa vāhi i reira tātou e ’ite mai ai i te mau parau a te Mesia.

• Pāpaʼi i te mau ta’o Atua ’e Fatu i ni’a i te tāpura ’ere’ere. Ani i te mau tamari’i ’ia ’īriti i te hō’ē ’api o te pāpa’ira’a mo’a ’e ’ia ’imi i teie mau ta’o. Tauturu ia rātou mai te mea e tītauhia. Fa’a’ite pāpū ē, ’ia tai’o ana’e tātou i te mau pāpa’ira’a mo’a, e ha’api’i mai tātou nō ni’a i te Atua.

2 Nephi 32:8–9

Tē hinaʼaro nei te Metua i te Ao ra ’ia pure tāmau noa vau.

E nehenehe teie mau īrava e fa’auru i te mau tamari’i ’ia fa’ariro i te pure ’ei tuha’a nō tō rātou orara’a i te mau mahana ato’a.

Mau ’ohipa e nehenehe e rave

• Ani i te mau tamari’i e aha te taime rātou e pure ai. Tē pure ra ānei rātou i te po’ipo’i ? I te pō ? hou te mau tāmā’ara’a ? Tauturu i te mau tamari’i ’ia feruri i te mau ’ohipa nō te fa’a’ite, e aha te taime e nehenehe tātou e pure, mai te taime e ara mai tātou, e haere tātou e ta’oto, ’e e tāmā’a—’e ’aore rā, i te tahi atu mau huru taime. Tai’o atu ia rātou i te rēni mātāmua ’e ’aore rā, te piti i roto i te 2 Nephi 32:9, ’e ’a ha’apāpū i te pereota « ’a pure tāmau noa ».

• Ani i te mau tamari’i nāhea rātou ’ia pure. E nāhea rātou i tō rātou upo’o, te mau rima ’e te tahi atu ? E aha te mau huru mea tā rātou e parau ? Ani ia rātou ’ia feruri ē, ’aita ’outou i ’ite nāhea ’ia pure, ’e e fa’aue ia rātou ’ia ha’api’i mai ia ’outou. Nō te aha te Metua i te Ao ra e hinaʼaro ai ʼia pure tātou ?

E nehenehe tātou e paraparau i te Atua nā roto i te pure.

Ha’api’i i te ha’api’ira’a tumu : Mau tamari’i pa’ari

2 Nephi 31

’Ua ha’api’i mai Iesu Mesia iā’u nāhea ’ia ho’i i te Metua i te Ao ra.

E nehenehe tātou e ho’i i te Atua ra i muri a’e i teie orara’a nā roto i te pe’era’a i te ha’api’ira’a tumu tā Iesu Mesia i ha’api’i : fa’aro’o i te Mesia, tātarahapa, bāpetizora’a, te hōro’a o te Vārua Maita’i, ’e te tāmau-māite-ra’a ē tae noa atu i te hope’a.

Mau ’ohipa e nehenehe e rave

• Fa’a’ite i te hōho’a nō roto mai i te fa’anahora’a nō teie hepetoma i roto i te Mai, peʼe mai—nō te ta’ata hō’ē ’e te ’utuāfare ’e e ani i te mau tamari’i ’ia fa’a’ite mai e aha tā rātou i ’ite nō ni’a i te bāpetizora’a o Iesu (hi’o Mataio 3:13–17). E tu’u haere noa i teie mau ta’o i ni’a i te tāpura ’ere’ere : ’Ua fa’a’ite Iesu i te Metua ē, e ha’apa’o ’oia i tāna parau. Ani i te mau tamari’i ’ia tai’o i te 2 Nephi 31:7 ’ei piha ha’api’ira’a, ’e e tu’u i te mau ta’o i roto i te ’āna’ira’a tano.

• Ani i te mau tamari’i e aha tā rātou e parau i te hō’ē ta’ata e fa’aineine ra ’ia bāpetizohia, ’e e tauturu ia rātou ’ia tāpa’o i tā rātou parau a’o i ni’a i te mau tāreta na’ina’i tā rātou e nehenehe e hōro’a i te hō’ē ta’ata. Nāhea tātou i te pe’e tāmau noa i te hi’ora’a o Iesu i muri a’e i tō tātou bāpetizora’a ?

• E fa’ata’a ē, tei roto i te ha’api’ira’a tumu a te Mesia te mau mea tā Iesu Mesia i ha’api’i tei tītauhia ia tātou ’ia rave nō te ho’i i te Metua i te Ao ra. Pāpa’i i ni’a i te mau ’api parau ta’a ’ē fa’aro’o i te Mesia, tātarahapa, bāpetizora’a, te hōro’a o te Vārua Maita’i, ’e te tāpe’a-māite-ra’a ē tae noa atu i te hope’a, ’e ’a tu’u ha’ere i te reira nā roto i te piha. Tai’o i te mau tamari’i i te 2 Nephi 31:11–19, ’e e ani i te mau tamari’i te tahi i muri mai i te tahi, ’ia ’ōu’a mai te tahi ’api parau i ni’a i te tahi i te taime e fa’aro’o ai rātou i teie mau parau tumu ’ia fa’ahitihia. Tauturu ia rātou ’ia feruri i te hō’ē ’ohipa i tupu nō rātou nō ni’a i te parau tumu tāta’itahi.

2 Nephi 32:3–5

E nehenehe au e pōpou i te parau a te Mesia.

Nō te aha tītauhia i te mau tamari’i ’ia hāro’aro’a i te faufa’a nō te pōpoura’a i te parau a te Mesia ?

Mau ’ohipa e nehenehe e rave

• Ani i te mau tamari’i ’ia feruri i te hō’ē ’ōro’a tāmā’ara’a. E aha te mā’a tā rātou e hina’aro i reira ? E aha tā rātou e ’amu nā mua ? I muri iho, e ani ia rātou ’ia feruri, e aha te aura’a nō te pōpoura’a i te mau pāpa’ira’a mo’a ’a tai’o ai ’outou i te 2 Nephi 32:3. Nō te aha Nephi i fa’a’ohipa ai i te ta’o ra ’ōro’a tāmā’ara’a nō te ha’api’i mai ia tātou nāhea tātou i te tuatāpapa i te parau a te Atua ? Nō te aha ’aita ’oia i parau noa, tai’o  ? E aha te aura’a o te parau ra ’ia pōpou i te mau pāpa’ira’a mo’a ? Fa’a’ite i te mau tamari’i i te mau ha’amaita’ira’a tā ’outou i fāri’i ’a pōpou ai ’outou i te mau pāpa’ira’a mo’a.

• Fa’a’ī i te ’api ’ohipara’a ’e te mau tamari’i, ’e e ani ia rātou ’ia ha’amau i te hō’ē ’ōpuara’a ’ia rave hō’ē a’e mea nō te pōpou i te mau pāpa’ira’a mo’a i teie hepetoma.

2 Nephi 32:8–9

Tē hinaʼaro nei te Metua i te Ao ra ’ia pure tāmau noa vau.

Tē fa’ahema nei te ’enemi ia tātou ’eiaha e pure. ’A feruri nāhea ’outou i te tauturu i te mau tamari’i ’ia pāto’i i teie fa’ahemara’a ’e ’ia « pure tāmau noa »(2 Nephi 32:9).

Mau ’ohipa e nehenehe e rave

• Mā’iti i te hō’ē pereota nō ni’a i te pure i roto i te 2 Nephi 32:8–9, e pāpa’i i te reira i ni’a i te tāpura ’ere’ere, ’e e tāpo’i i te ta’o tāta’itahi i te hō’ē ’api parau. Ani i te mau tamari’i te tahi i muri mai i te tahi ’ia ’īriti hō’ē ’api parau i te taime hō’ē ē tae roa atu e ’itehia ia rātou te pereota.

• Tai’o ’āmui i te 2 Nephi 32:8–9 ’e e ani i te mau tamari’i ’ia fa’a’ite mai i te mea tā rātou i ha’api’i mai nō ni’a i te pure nā roto mai i teie mau ’īrava. E aha te aura’a « ʼia pure tāmau noa » ? (’īrava 9). Nāhea tātou i te rave i te reira ?

• E aha te mea e nehenehe e tāpe’a i te hō’ē ta’ata ’ia hina’aro e pure ? Fa’a’ite i te hō’ē taime ’ua pure ’outou, noa atu ē, ’aita ’outou i hina’aro roa. E aha tō ’outou mana’o i muri iho ? Ani i te hō’ē tamari’i ’ia tai’o i te ’āfa piti o te 2 Nephi 32:8, ’e e hōro’a i te mau tamari’i i te taime nō te feruri i te reira. Nō te aha ’aita Sātane e hina’aro ’ia pure tātou ? Nāhea tātou ’ia fa’aha’amana’o ia tātou iho ’ia pure noa atu ē, ’aita tātou e hina’aro roa ?

Fa’aitoito i te ha’api’ira’a mai i te fare

Fa’aitoito i te mau tamari’i ’ia ’imi i te hō’ē ta’ata—hō’ē hoa, hō’ē taea’e, ’e ’aore rā, te tahi atu melo o te ’utuāfare—tā rātou e nehenehe e ha’api’i nāhea ’ia pure.

Ha’amaita’iraʼa i tā tātou ha’api’ira’a

E mea ha’uti roa te mau tamari’i. Ani i te mau tamari’i ’ia ha’uti mai i te mau ’ā’amu nō te pāpa’ira’a mo’a ’e te mau hīmene. Fa’a’ohipa i tō rātou huru ha’uti nō te ha’amaita’i i tā rātou ha’api’ira’a. (Hi’o Ha’api’ira’a mai tā te Fa’aora,25–26.)