Tē toro nei Iesu i te rima i te hō’ē vahine

E arata’i ’oia ia ’oe nā te rima, nā Sandra Rast

24 nō Fepuare–1 nō Māti.

2 Nephi 26–30

« E ravera’a ’ūmerehia ’e te māerehia »

Hou ’outou ’a ha’amata ai i te fa’aineine i te mau ’ohipara’a ha’api’ira’a nā te mau tamari’i i roto i tā ’outou piha, ’a tuatāpapa i te 2 Nephi 26–30. E ani te reira i te Vārua ’ia arata’i i tā ʼoutou faʼaineineraʼa.

Pāpa’i i te mau mana’o e tae mai

ītona fa’a’itera’a

Fa’a’ite i te mana’o

Fa’a’ite i te hō’ē Buka a Moromona ’e ’a fa’ata’a ē, ’ua ’ite ātea ’o Nephi ē, e riro te Buka a Moromona ’ei mea faufa’a rahi i tō tātou nei ’anotau. Ani i te mau tamari’i ’ia fa’a’ite mai i te hō’ē mea tā rātou i ha’api’i mai nō ni’a i te Buka a Moromona i teie matahiti.

ītona ha’api’ira’a

Ha’api’i i te ha’api’ira’a tumu : Mau tamari’i ’āpī

2 Nephi 26:33

Tē hina’aro nei Iesu Mesia ’ia haere te mau ta’ata ato’a iāna ra.

’Ua fa’a’ite pāpū Nephi ē, tē here nei te Fa’aora i te mau ta’ata ato’a, noa atu ’o vai te ta’ata, ’e tē ani manihini nei ’oia ia rātou pā’āto’a « ’ia rave i tōna ra maita’i ».

Mau ’ohipa e nehenehe e rave

• Fa’a’ite i te mau hōho’a o te mau ta’ata nō te mau fenua rau ’e nō te mau ta’ere rau (e nehenehe e ’itehia ia ’outou te tahi i roto i te mau ve’a a te ’Ēkālesia). Ani i te mau tamari’i ’ia fa’ata’a mai i te tahi mau tātarara’a tā rātou e ’ite ra i roto i te mau hōho’a. ’A ’īriti i te mau pāpa’ira’a mo’a i te 2 Nephi 26:33 ’e e tai’o, « ’ua anihia rātou ato’a e [Iesu Mesia] ’ia haere mai iāna ra ». Fa’ahiti fa’ahou i teie pereota ’e te mau tamari’i ma te fa’atoro ’outou i ni’a i te hōho’a tāta’itahi. I muri iho, e fa’atoro i ni’a i te tamari’i tāta’itahi ’a parau ai : « Tē ani mai nei Iesu Mesia ia ’oe ’ia haere mai iāna ra ». E aha tā tātou e rave nō te haere i te Fa’aora ra ?

• Hīmene i te hō’ē hīmene ’e te mau tamari’i nō ni’a i te herera’a i te mau ta’ata ato’a, mai te « Je viens vers toi » ’e ’aore rā, « Différences » (Chants pour les enfants, 78–79, https://www.ChurchofJesusChrist.org/music/library/church-magazine-music-liahona?lang=fra). Fa’a’ite i te mau ta’o ’e ’aore rā, te mau pereota i roto i te hīmene tā ’outou e mana’o ra ē, e ha’apāpū te reira i te parau poro’i o te 2 Nephi 26:33.

2 Nephi 28:2 ; 30:6

E ha’amaita’ira’a te Buka a Moromona.

Feruri e nāhea ’outou i te tauturu i te mau tamari’i i roto i tā ’outou piha ’ia ’ite ē, te Buka a Moromona, « ’o te ha’amaita’i ïa o te rima o te Atua ia rātou » (2 Nephi 30:6).

Mau ’ohipa e nehenehe e rave

• Fa’a’ite i te mau tamari’i i te hō’ē Buka a Moromona i pū’ohuhia ’ei tao’a hōro’a, ’e e parau ia rātou ē, e ’ohipa faufa’a rahi tō roto. Vaiiho ia rātou ’ia tāpe’ape’a i terā tao’a hōro’a, ’e ’a hōro’a i te tahi mau tāpa’o nō te tauturu ia rātou ’ia ’imi e aha te reira ; ’ei hi’ora’a, hō’ē mea tā te Atua i hōro’a mai ia tātou nei, e tauturu te reira ia tātou ’ia ti’aturi ia Iesu Mesia, ’e tē vai atu ra. Tai’o i te 2 Nephi 30:6 : « ’O te ha’amaita’i ïa o te rima o te Atua ia rātou ». Fa’aue i te mau tamari’i ’ia ’īriti i te tao’a hōro’a, ’a fa’ata’a ai ē, tītauhia ia tātou ’ia ’īriti i te Buka a Moromona ’e ’ia tai’o i te reira nō te fāri’i i te mau ha’amaita’ira’a e vai ra i roto.

• Taiʼo i te 2 Nephi 28:2 i te mau tamariʼi. Fa’ata’a ē, ’ua ’ite ’o Nephi ē e riro te Buka a Moromona « ’ei mea faufa’a rahi » nō tātou, ’oia ho’i, e tauturu ’e e ha’amaita’i te reira ia tātou. Parau i te mau tamari’i nō te aha e mea faufa’a te Buka a Moromona nō ’outou. Fa’a’ite i tā ’outou ’īrava ’e ’aore rā, te ’ā’amu au roa nō roto mai i te Buka a Moromona, ’e e ani i te mau tamari’i ’ia fa’a’ite mai i tā rātou. Fa’a’ite i te tahi mau hōho’a nō roto mai i te Buka hōho’a nō te ’evanelia, nō te hōro’a ia rātou i te tahi mau mana’o.

2 Nephi 28:30

E ha’api’i te Metua i te Ao ra iā’u te tahi vāhi iti i muri iho i te tahi vāhi iti.

E nehenehe paha tā ’outou e feruri i te hō’ē ha’api’ira’a ’e ’aore rā, hō’ē ’ohipara’a e tauturu i te mau tamari’i ’ia ’ite e aha te aura’a te ha’api’ira’a i « te fa’aue… ’e ’ua nā ni’a iho i te fa’aue (hō’ē rēni i muri i te tahi rēni) ». E nehenehe te mau mana’o tauturu i muri nei e hōro’a ato’a i te tahi mau mana’o.

Mau ’ohipa e nehenehe e rave

• Tauturu i te mau tamari’i ’ia fa’a’ī i te hō’ē ha’uti puzzle ’e ’aore rā, ’ia patu i te hō’ē mea i te mau ’āta’a. Hōro’a ia rātou hō’ē tuha’a o te puzzle ’e ’aore rā, hō’ē ’āta’a, i te taime hō’ē, ’e ’a patu noa ai rātou, e fa’ata’a ē, teie te huru ’ia ha’api’i te Fatu ia tātou—hō’ē parau mau i te taime hō’ē. E aha te tupu mai mai te mea ē, e tāmata tātou i te tu’u i te tā’āto’ara’a o te mau tuha’a i te taime hō’ē ?

• ’A ha’api’i i te mau tamari’i i te hō’ē ’aravihi, te hō’ē ta’ahira’a i muri mai i te tahi, mai te tā’amura’a i te hō’ē fana ’e ’aore rā te pāpa’ira’a i te hō’ē hōho’a. Tai’o i te 2 Nephi 28:30 : « E hōro’a vau i te mau fa’aue i te mau tamari’i a te ta’ata, ’e ’ua nā ni’a iho i te fa’aue… Te tahi vāhi iti i’ō nei, ’e mai reira ho’i ’ei ’ō te tahi vāhi iti ». Nō te aha te Atua i ha’api’i ai ia tātou te tahi vāhi iti i muri mai i te tahi vāhi iti ?

ītona ha’api’ira’a

Ha’api’i i te ha’api’ira’a tumu : Mau tamari’i pa’ari

2 Nephi 26:23–28, 33

Tē hina’aro nei Iesu Mesia ’ia haere te mau ta’ata ato’a iāna ra.

Tauturu i te mau tamari’i ’ia ’ite ē, teie anira’a ’ia haere i te Mesia ra, nō rātou iho ïa ’e nō te mau ta’ata ato’a.

Mau ’ohipa e nehenehe e rave

• Ani i te mau tamari’i nō ni’a i te mau taime ’a ani ai rātou i te mau hoa ’e ’aore rā, i tō te ’utuāfare ’ia haere mai i te hō’ē ’ohipara’a ta’a ’ē, mai te ’ōro’a mahana fānaura’a. E aha tā rātou e rave nō te fa’aitoito i te ta’ata ’ia haere mai ? Tai’o ’e te mau tamari’i i te 2 Nephi 26:23–28, 33, ’e e tauturu ia rātou ’ia ’imi e aha tā te Fatu e ani mai nei ia tātou ’ia rave. Ani i te mau tamari’i ’ia hāmani i te hō’ē tāreta ’e ’aore rā, hō’ē rata nō te ani manihini i te hō’ē ta’ata ’ia haere mai ia Iesu Mesia ra. Fa’aitoito ia rātou ’ia fa’a’ohipa i te hō’ē pereota nō roto mai i teie mau ’īrava i roto i tā rātou anira’a (mai te mea e tītauhia, e pāpa’i i te tahi mau pereota i ni’a i te tāpura ’ere’ere nō te tauturu).

• Tai’o i te 2 Nephi 26:33 ’e te mau tamari’i, ’e ’a tauturu ia rātou ’ia hāmani i te hō’ē tāpura nō te ta’ata i anihia ’ia « rave i tō te [Fatu ] ra maita’i », mai te au i teie ’īrava. (E ti’a paha ia ’outou ’ia fa’ata’a ē, « te ’etene » ’o te feiā ïa ’aita e ti’aturi i te Atua.) E ani ia rātou ’ia ’āmui atu i tō rātou i’oa i roto i te tāpura. Nāhea tātou ’ia rave i tō te Fatu maita’i ?

• Paraparau poto noa i te mau tamari’i nō ni’a i te ta’a-’ē-ra’a te mau tamari’i ’ati a’e te ao nei, ’e e fa’a’ite pāpū ē, tē here nei te Fatu ia rātou pā’āto’a (hi’o 2 Nephi 26:24, 33). Ani i te mau tamariʼi ’ia pāpa’i i te hōʼē hōhoʼa nō Iesu ’e te mau tamari’i e rave rahi.

2 Nephi 28:27–30

Tē heheu mai nei te Metua i te Ao ra i te parau mau « hō’ē rēni i muri i te hō’ē rēni ».

’Ua fa’aara ’o Nephi nō ni’a i te peu ē, ’aita tātou e hina’aro fa’ahou i te tahi atu parau mau nō ’ō mai i te Atua ra. Tauturu i te mau tamari’i ’ia hi’o i te ha’api’ira’a ’evanelia mai te hō’ē tauto’ora’a tāmau māite, nō te orara’a tā’āto’a.

Mau ’ohipa e nehenehe e rave

• Mā’iti i te hō’ē pereota nō roto mai i te 2 Nephi 28:30, ’e e ani i te hō’ē tamari’i ’ia pāpa’i i te ta’o mātāmua i ni’a i te tāpura ’ere’ere. I muri iho, e ani i te tahi atu tamari’i ’ia pāpa’i i te ta’o nō muri iho, ’e nā reira noa ē hope roa atu te pereota tā’āto’a i te pāpa’ihia. Nāhea teie ’ohipara’a i te tū’ati i ni’a i te huru o tā te Atua hōro’ara’a mai i te parau mau ia tātou ?

• Tauturu i te mau tamari’i ’ia tai’o ’e ’ia hāro’aro’a i te 2 Nephi 28:27–30, ma te ’imi i te mau pāhonora’a i te hō’ē uira’a mai teie : E aha tā teie mau ’īrava e ha’api’i mai nei nō ni’a i te mau ta’ata ’o tē ti’aturi nei ē, ’ua nava’i tā rātou parau mau ’e ’aita rātou e hina’aro fa’ahou ? Ani ia rātou ’ia fa’a’ite mai i te mau rāve’a e nehenehe ai tātou e fa’a’ite i te Fatu ē, tē hina’aro nei tātou e fāri’i i te parau mau hau atu nō ’ō mai iāna ra.

2 Nephi 29:7–11

E ’ohipa ’āmui te Buka a Moromona ’e te Bibilia.

Nō te mea tei ia tātou nei te Bibilia, tē ti’aturi nei te tahi mau ta’ata ē, ’aita e faufa’a te Buka a Moromona. E nehenehe teie mau ’īrava e tauturu i te mau tamari’i ’ia hāro’aro’a, ’e ’ia fa’ata’a ia vetahi ’ē, nō te aha tātou e māuruuru ai i teie nā buka pāpa’ira’a mo’a to’opiti.

Mau ’ohipa e nehenehe e rave

• Hōro’a i te hō’ē Buka a Moromona i te hō’ē tamari’i ra, ’e i te Bibilia i te tahi atu tamari’i. Ani ia rāua nāhea teie nā buka i te ’aifāito ’e nāhea rāua i te ta’a ’ē. Fa’a’ite i te mau tamari’i i te hō’ē hōho’a fenua, ’e e tauturu ia rātou ’ia fa’atano i te buka tāta’itahi i ni’a i te tuha’a o te fenua nō reira mai te buka. Tai’o ’e e ’āparau 2 Nephi 29:8. Nō te aha te Atua e hōro’a mai ai ia tātou e piti « fa’a’itera’a » ’e ’aore rā, e piti buka pāpa’ira’a mo’a ’o tē ha’api’i mai nei ia tātou nō ni’a iāna ?

• Ani i te mau tamari’i ’ia feruri ē, ’ua parau mai te hō’ē hoa ia rātou, « ’aita e tītauhia iā’u ’ia tai’o i te Buka a Moromona. ’Ua tai’o a’ena vau i te Bibilia ». Tai’o ’āmui i te 2 Nephi 29:7–11, ma te fa’ata’a i te mau pereota ’e te mau tumu parau e hina’arohia ’ia fa’ata’a. I muri iho e ani ia rātou ’ia fa’a’ite mai i te mau mana’o nō ni’a i te mea tā rātou e parau i tō rātou hoa.

ītona ’apora’a ha’api’ira’a

Faʼaitoito i te haʼapiʼiraʼa mai i te fare

Ani i te mau tamari’i ’ia fa’ata’a atu i tō rātou ’utuāfare nāhea te Bibilia ’e te Buka a Moromona i te ’ohipa ’āmui nō te fa’a’ite pāpū ia Iesu Mesia.

Ha’amaita’ira’a i tā tātou ha’api’ira’a

Rōtahi i ni’a i te ta’ata, ’eiaha rā i ni’a te mau ha’api’ira’a. E mau mana’o tauturu noa te mau mana’o i roto i teie faʼanahoraʼa. Fa’aau i te reira i te mau hina’aro ’e i te mau ’aravihi o te mau tamari’i tā ’outou e ha’api’i ra.

’api ’ohipara’a : Tē ha’api’i nei te mau ’ā’amu i roto i te Buka a Moromona nō ni’a i te Mesia.