« 9–15 nō Māti. Iakoba 1–4 : ‘’Ia au ’outou i te Atua nā roto i te tāra’ehara a te Mesia’ », Mai, pe’e mai—nō te Paraimere : Buka a Moromona 2020 (2020)
« 9–15 nō Māti. Iakoba 1:4 », Mai, pe’e mai—nō te Paraimere : 2020
Fa’a’orera’a hara, nā Greg K. Olsen
9–15 nō Māti
Jacob 1–4
’Ia au ’outou i te Atua nā roto i te tāra’ehara a te Mesia
’A tai’o ai ’outou i te Iakobo 1–4, ’a feruri māite e aha te mau parau tumu i roto i teie mau pene e mea faufa’a roa a’e nō te mau tamari’i ’ia ha’api’i mai. ’Imi i te arata’ira’a a te Vārua nō te ’ite ē nāhea ’ia ha’api’i maita’i a’e i teie mau parau tumu, ’e e pāpa’i i tō ’outou mau mana’o.
Pāpa’i i te mau mana’o e tae mai
Fa’a’ite i te mana’o
Ani i te mau tamari’i ’ia fa’a’ite mai i te hō’ē mea tā rātou ’e ’aore rā, tā tō rātou ’utuāfare i rave i teie hepetoma nō te ha’api’i mai nā roto i te Iakoba 1–4. E nehenehe ato’a tā ’outou e ani ia rātou ’ia fa’a’ite mai i te hō’ē mea tā rātou e ha’amana’o ra nō ni’a i te ha’api’ira’a o te hepetoma i ma’iri a’enei. E aha te mau uira’a tā ’outou e nehenehe e ui nō te tauturu ia rātou ’ia ha’amana’o ?
Ha’api’i i te ha’api’ira’a tumu : Mau tamari’i ’āpī
’Ua pi’i te Atua i te feiā fa’atere o te ’Ēkālesia nō te tauturu iā’u ’ia pe’e ia Iesu Mesia
Tauturu i te mau tamari’i ’ia hāro’aro’a ē, e ha’amaita’ihia rātou nā roto i te pe’era’a i te a’o a te feiā fa’atere o te ’Ēkālesia.
Mau ’ohipa e nehenehe e rave
-
Hāmani i te mau pēpe hūrio nō te fa’ahōho’a ia Iakoba ’e ia Iosepha, nā teina o Nephi, tei riro ’ei feiā fa’atere i roto i te ’Ēkālesia. Fa’a’ite i te tahi mau ’īrava i roto i te Iakoba 1 ’e te 2 nō te fa’ata’a ē, nō te aha i pi’ihia ai te feiā fa’atere o te Ekālesia. ’Ei hi’ora’a, e tāparu te feiā fa’atere ia tātou ’ia « fa’aro’o i te Mesia » (Iakoba 1:8), e ani ia tātou ’ia tātarahapa (hi’o Iakoba 2:5–6, 9–10), ’e e « fa’a’ite i te parau a te Atua » (Iakoba 2:2, 11). Fa’aue i te mau tamari’i ’ia fa’a’ohipa i te mau pēpe hūrio nō te fa’ahōho’a i teie mau mea.
-
Ani i te mau tamari’i ’ia fa’a’ite mai i te i’oa o te tahi mau ti’a fa’atere tā rātou i ’ite, mai te mau ti’a fa’atere o te Paraimere, te mau melo o te ’episekōpora’a, ’e te mau peropheta ’e te mau ’āpōsetolo. Tauturu i te mau tamariʼi ʼia feruri i te mau rāveʼa e ha’amaita’i ai te feiā fa’atere ia tātou.
E tauturu tō tātou feiā fa’atere o te ’Ēkālesia ia tātou ’ia pe’e ia Iesu Mesia.
E nehenehe au e tauturu i te feiā nava’i ’ore ’ia hōro’a atu vau i tā’u nei nā rātou.
Tē māramarama ra ānei te mau tamari’i tā ’outou e ha’api’i nei i te mau ha’amaita’ira’a e tae mai ’ia hōro’a atu rātou i tā rātou ra nā te feiā nava’i ’ore ? Nāhea ’outou i te tauturu ia rātou ’ia ’ite ē, tē hina’aro nei te Metua i te Ao ra ’e ’o Iesu ’ia tauturu rātou ia vetahi ’ē ?
Mau ’ohipa e nehenehe e rave
-
E fa’ata’a ē, te tahi mau ta’ata i te ’anotau o Iakoba, e mau ta’ata moni roa, ’aita rā rātou i hina’aro e hōro’a i tā rātou nā te mau ta’ata veve. Tai’o i te Iakoba 2:17–19 nō te tauturu i te mau tamari’i ’ia hāro’aro’a i te mau ha’api’ira’a a Iakoba nō teie mau ta’ata. ’A nā reira ai ’outou, ’a hōro’a i te hōho’a ’e ’aore rā, i te mau tauiha’a i te mau tamari’i ’ia tāpe’a, ’o te tū’ati i ni’a i te mau ta’o ’e ’aore rā, i te mau pereota i roto i teie mau ’īrava.
-
Ani i te mau tamari’i ’ia ha’uti mai i te mau rāve’a e nehenehe ai rātou e hōro’a i tā rātou nā te hō’ē ta’ata nava’i ’ore. E fa’a’ite pāpū ē, e ha’amaita’ihia tātou ’ia hōro’a ana’e tātou i tā tātou nā vetahi ’ē.
-
Hōpoi mai i roto i te piha ha’api’ira’a i te hō’ē mea tā ’outou e nehenehe e hōro’a i te mau tamari’i. Hōro’a i te reira i te tamari’i tāta’itahi, ’e e fa’ata’a ē, tē hōro’a nei ’outou. Ani ia rātou e aha tō rātou mana’o ’a hōro’a ai ’outou i te reira ia rātou ra. E aha tō rātou mana’o ’ia hōro’a ana’e rātou i tā rātou nā vetahi ’ē ? Tauturu ia rātou ’ia feruri i te hō’ē mea tā rātou e nehenehe e hōro’a nō te tauturu i te hō’ē ta’ata ’ia ’oa’oa.
E nehenehe tā’u e ha’apūai i tō’u fa’aro’o ia Iesu Mesia.
Mai ia Iakoba i ora ma te parau ti’a noa atu te mau ’ino e hā’ati ra iāna, ’ua pa’ari maita’i tōna fa’aro’o ’aita i ’āueue. Feruri nāhea ’outou i te tauturu i te mau tamari’i ’ia hāro’aro’a e aha te aura’a ’ia roa’a te fa’aro’o ’aita i ’āueue.
Mau ’ohipa e nehenehe e rave
-
Tauturu i te mau tamari’i ’ia feruri i te mau mea tā rātou e rave nō te ha’apūai a’e i tō rātou tino. E aha tā tātou e rave nō te ha’apūai a’e i tō tātou fa’aro’o ? ’A ’īriti i te mau pāpa’ira’a mo’a i te Iakoba 4:6, ’e ’a tauturu i te mau tamari’i ’ia ’ite e aha tā Iakoba ’e tā tōna mau ta’ata i rave nō te fa’ariro i tō rātou fa’aro’o ’ei mea « ’āueue ’ore ».
-
’A hīmene « Le sage et le fou » (Chants pour les enfants, 132) ’e te mau tamari’i. I ni’a i te hō’ē pae o te tāpura ’ere’ere, e pāpa’i i te hōho’a o te hō’ē fare i patuhia i ni’a i te one. I ni’a i te tahi atu pae o te tāpura ’ere’ere, e pāpa’i i te hōho’a o te hō’ē fare i patuhia i ni’a i te papa. Mai te mea e nehenehe, ’a hōpoi mai i te one ’e te hō’ē papa i roto i te piha ha’api’ira’a. E aha te mea ’ōhie a’e ’ia fa’a’āueue ’e ’aore rā, ’ia fa’aha’uti ? Mai te aha tā tātou e hina’aro ’ia riro tō tātou fa’aro’o, mai te one ’e ’aore rā, mai te papa ?
Ha’api’i i te ha’api’ira’a tumu : Mau tamari’i pa’ari
E pi’i te Atua i te feiā fa’atere o te ’Ēkālesia nō te tauturu iā’u ’ia pe’e ia Iesu Mesia.
E ha’amaita’ihia te mau tamari’i tā ’outou e ha’api’i nei mai te mea ē, e ti’aturi ’e e pe’e rātou i te a’o a te feiā fa’atere o te ’Ēkālesia.
Mau ’ohipa e nehenehe e rave
-
Tai’o ’e te mau tamari’i i te Iakoba 1:6–8 ’e te 2:1–6, 11, ma te tauturu ia rātou ’ia ’imi i te mau pereota ’o tē fa’ata’a ra ē, nāhea te mau tāvini o te Atua ’ia arata’i i te ’Ēkālesia. Ani ia rātou ’ia pāpa’i i teie mau pereota i ni’a i te mau tuha’a ’api parau ’e i muri iho ’ia tāpiri i te mau ’api parau i ni’a i te tāpura ’ere’ere. Nō te aha te Atua i pi’i ai i te feiā fa’atere o te ’Ēkālesia nō te arata’i ia tātou ? Ani i te mau tamari’i ’ia fa’a’ite mai i te mau mea i tupu i ni’a iho ia rātou nā roto i te ha’api’ira’a mai ’e ’aore rā, te fāri’ira’a i te arata’ira’a nō ’ō mai i te feiā fa’atere o te ’Ēkālesia ’e ’aore rā te ’orometua ha’api’i, ’e te mau ha’amaita’ira’a tā rātou i fāri’i.
-
Ani i te mau tamari’i ’ia pāpa’i i te hōho’a o te hō’ē ti’a fa’atere o te ’Ēkālesia tā rātou i ’ite, ’e e fa’aue i te toe’a o te piha ha’api’ira’a ’ia ’imi ’o vai tā rātou i pāpa’i i te hōho’a. E aha tā te feiā fa’atere o te Ēkālesia e rave nō te tauturu iā’u ’ia pe’e ia Iesu Mesia ? Ani i te mau tamari’i ’ia pāpa’i i te feiā fa’atere o te ’Ēkālesia, ma te ha’amāuruuru ia rātou nō tā rātou tāvinira’a.
-
Ani i te hō’ē ti’a fa’atere o te ’Ēkālesia ’ia parau i te mau tamari’i e aha tāna e rave nei nō tē rave i tōna pi’ira’a. Ani i te mau tamari’i ’ia fa’ahiti mai i te tahi mau mea tā rātou e nehenehe e rave nō te pāturu i tō rātou feiā fa’atere.
E nehenehe tā’u e tauturu ia vetahi ’ia ’oa’oa nā roto i te hōro’ara’a i tā’u nā rātou.
E hina’aro te mau pipi mau a Iesu Mesia e hōro’a i tā rātou nā vetahi ’ē. Fa’aitoito i te mau tamari’i ’ia hōpoi i te ’oa’oa i te feiā nava’i ’ore nā roto i te hōro’ara’a.
Mau ’ohipa e nehenehe e rave
-
Parau i te mau tamari’i ē, e rave rahi ta’ata i te ’anotau nō Iakoba tei riro ’ei feiā ’ā’au te’ote’o ’e te ’ino nō te mea e mea au nā rātou te tao’a rahi (hi’o Iakoba 2:12–14, 17–21). Ani i te tahi mau tamari’i ’ia tai’o ha’apūai i te Iakoba 2:17–19 ’e e tauturu ia rātou ’ia hāro’aro’a i te mau ta’o fifi. E aha tā tātou e ’imi hou ’a ’imi ai i te mau tao’a rahi ? E aha tā tātou e ’imi ’ia rave i te mau faufa’a ato’a te roa’a ia tātou ?
-
Tai’o i te Iakoba 2:17 i te mau tamari’i. E aha te mau ha’amaita’ira’a tā te Metua i te Ao ra i hōro’a mai nā tātou ? Nō te aha ’oia e hina’aro ai ’ia hōro’a tātou i tā tātou nā te tahi ’e te tahi ? Ani i te mau tamari’i ’ia fa’a’ite mai i te mau taime ’a hōro’a ai rātou i te hō’ē mea nā te tahi atu ta’ata, ’e tae noa atu i te mana’o i tupu nō rātou ’e nō terā ta’ata.
E nehenehe tā’u e ha’apūai i tō’u fa’aro’o ia Iesu Mesia.
’Ua riro te fa’aro’o o Iakoba ’ei mea ’āueue ’ore nō te mea ’ua ’imi ’oia i te mau parau a te mau peropheta ’e ’ua fāri’i i tōna iho ’itera’a pāpū (hi’o Iakoba 4:6). Nāhea e ti’a ai ia ’outou ’ia tauturu i te mau tamari’i ’ia fa’atupu i te hina’aro ’ia patu i te fa’aro’o ’āueue ’ore ?
Mau ’ohipa e nehenehe e rave
-
Ani i te mau tamari’i ’ia feruri i te mau mea e tupu mai i te pa’ari ’e i te pāpū i te roara’a o te tau, mai te hō’ē tumu rā’au rahi. Nāhea te fa’aro’o i te tū’ati i ni’a i te mau mea tā rātou i feruri? E aha te mau pereota i roto i te Iakoba 4:6, 10–11 ’o tē fa’ata’a nei i te mea tā tātou e nehenehe e rave nō te fa’ariro i tō tātou fa’aro’o ’ei mea ’āueue ’ore ? Ani i te mau tamari’i ’ia hāmani i te hō’ē tāpura i ni’a i te tāpura ’ere’ere nō te mau rāve’a tā rātou e nehenehe e rave nō te ha’apūai i tō rātou fa’aro’o ia Iesu Mesia.
-
Fa’a’ite i te fa’ahōho’ara’a a Elder Neil L. Andersen nō te tumu rā’au e tupu ra i roto i te hō’ē vāhi mata’i, ’o tē ’itehia i roto i tāna parau poro’i « Te mau pūāhiohio pae vārua » (Ensign ’e ’aore rā, Liahona, Mē 2014, 18–21), ’e ’aore rā, e fa’a’ite i te video « Te mau mata’i pūāhiohio pae vārua » (ChurchofJesusChrist.org). Nō te aha e mea faufa’a nō tō tātou fa’aro’o ’ia riro ’ei mea ’āueue ’ore ’e te pa’ari mai te tumu o te rā’au ? E aha te fa’ahōho’ara’a o te mau mata’i pūāhiohio ? E aha tā tātou e nehenehe e rave nō te patu i te fa’aro’o ’āueue ’ore ? Tauturu i te mau tamari’i ’ia feruri i te tahi atu mau fa’ahōho’ara’a ’o tē ha’api’i ra nō ni’a i te fāri’ira’a i te fa’aro’o ’o ’āueue ’ore.
Fa’aitoito i te ha’api’ira’a i te fare
Ani i te mau tamari’i ’ia feruri i te hō’ē mea tā rātou e nehenehe e fa’a’ite i tō rātou ’utuāfare—mai te fa’a’itera’a i te hō’ē mea tā rātou i ha’api’i mai i roto i te piha ha’api’ira’a i teie mahana. Hōro’a ia rātou i te taime i roto i te hō’ē ha’api’ira’a o te mau mahana i muri nei ’ia paraparau mai nō ni’a i te mea tā rātou i fa’a’ite.
Ha’amaita’iraʼa i tā tātou ha’api’ira’a
Fa’aitoito i te fa’aturara’a. Tauturu i te mau tamari’i ’ia hāro’aro’a ē, te hō’ē fāito faufa’a roa o te fa’aturara’a, ’o te ferurira’a ïa i ni’a i te Metua i te Ao ra ’e ia Iesu Mesia. E ti’a paha ia ’outou ’ia fa’aha’amana’o ia rātou ’ia vai fa’atura noa nā roto i te hīmene-marū-ra’a ’e ’aore rā, te hīmenemenera’a i te hō’ē hīmene, ’e ’aore rā, te fa’a’itera’a i te hō’ē hōho’a nō Iesu.