’Ārētōria nō te tumu ’ōlive, nā Brad Teare

16–22 nō Māti

Iakoba 5–7

Tē ’ohipa nei te Fatu ’e tātou

Nā te tai’ora’a i te mau pāpa’ira’a mo’a e ani i te heheura’a. Nō reira ’ia tai’o ’outou i te Iakoba 5–7, ’a ’imi i te arata’ira’a o te Vārua nō te tauturu ia ’outou ’e i tō ’outou ’utuāfare. E aha te mau poro’i a te Fatu nō ’outou ?

Pāpa’i i te mau mana’o e tae mai

E rave rahi, e rave rahi mau ta’ata ’aita ā i fa’aro’o i te ’evanelia a Iesu Mesia. Mai te peu noa atu ’ua teimaha ’outou i te rahi o te ’ohipa nō te ha’aputuputura’a ia rātou i roto i te ’Ēkālesia a te Fatu, e fa’aha’amana’ora’a tāmarū ’ā’au i roto i te ’ārētōria nō te mau tumu ’ōlive i roto i te Iakoba 5 : nā te Fatu te ’ō vine. E tuha’a iti noa tāna i hōro’a ia tātou ’ia tauturu mai i roto i teie ’ohipa—tō tātou ’utuāfare, tō tātou mau hoa ’e te tuha’a ta’ata ’ati a’e ia tātou. ’E i te tahi taime, te ta’ata mātāmua tā tātou e tauturu ’ia putuputu mai, ’o tātou iho ïa. E ’ere roa atu rā ’o tātou ana’e i roto i teie ’ohipa, tē ’ohipa nei ho’i te Fatu o te ’ō vine ’e tāna mau tāvini (hi’o Iakoba 5:72). ’Ua ’ite ’e ’ua here ho’i te Atua i tāna mau tamari’i, ’e e fa’aineine ’oia i te hō’ē rāve’a nō rātou tāta’itahi nō te fa’aro’o i tāna ’evanelia, nō rātou ato’a tei pāto’i iāna i te mātāmua ra (hi’o Iakoba 4:15–18). ’E ’ia oti te ’ohipa, e riro te feiā ato’a i « itoito… i te tauturura’a [iāna]… e noa’a te ’oa’oa ia [rātou i’ō iāna ra] nō te [hotu o tāna] ’ō vine » (Iakoba 5:75).

Mau mana’o nō tā ’oe iho tuatāpapara’a pāpa’ira’a mo’a

Iakoba 5–6

E aha te ’ārētōria ?

Te ’ārētōria, e ’ā’amu ïa e ha’api’i nei i te mau parau mau pae vārua nā roto i te tahi mau taipe. I roto i te ’ārētōria nō te mau tumu ’ōlive, ’ei hi’ora’a, e fa’ahōho’a te ’ō vine i te ao, te hō’ē tumu ’ōlive rata ia ’Īserā’ela (’o rātou tei rave i te mau fafaura’a ’e te Atua), ’e te tumu ’ōlive ’ōviri, te mau nūna’a ’etene (’o rātou tei ’ore i rave i te mau fafaura’a ’e te Atua)

’Ia tuatāpapa ’oe i te ’ārētōria i roto i te Iakoba 5, ’a hi’o i te tahi atu mau taipe ’e ’a feruri i te aura’a o te reira. ’Ei hi’ora’a, i tō ’oe mana’o, e aha tā te huero maita’i e fa’ahōho’a nei ? E aha ra tā te huero ’ino e fa’ahōho’a nei ?

Iakoba 5 ; 6:3–5

’O Iesu Mesia te Fatu o te ’ō vine.

Hou ’oe ’a ha’amata ai i te tuatāpapara’a o te ’ārētōria nō te mau tumu ’ōlive i roto i te Iakoba 5, e mea au paha ’ia hi’o fa’ahou ā i te Iakoba 4:10–18 nō te ’apo mai i te tumu Iakoba i mana’o ai e fa’a’ite i teie ’ārētōria i tōna mau ta’ata. I roto i te Iakoba 6:3–5, e ti’a ia ’oe ’ia ’ite mai i te tahi atu mau poro’i tā Iakoba i hina’aro e ha’apāpū, ’a ’imi i te reira mau poro’i i roto i te ’ārētōria. E aha te mau poro’i tā ’oe e ’ite ra e tano nō ’oe i roto i te Iakoba 5?

E pene roa te Iakoba 5—te pene roa roa a’e o te Buka a Moromona. Penei a’e e mea au ’ia vāhi i te reira ’ei tuha’a mai teie i muri nei, ’o tē fa’ata’a nei i te mau tau o te tua’ā’ai o te ao nei :

Mau ’īrava 3–14 :Te purarara’a ’Īserā’ela hou te tau o te Mesia

Mau ’īrava 15–28 :Te tau tāvinira’a o te Mesia ’e tāna mau ’āpōsetolo

Mau ’īrava 29–49 :Te tāivara’a rahi

Mau ’īrava 50–76 :Te ha’aputuputura’a ’Īserā’ela i te mau mahana hope’a nei

Mau ’īrava 76–77 :Te Mileniuma ’e te hope’a o te ao nei

Nō te tahi atu mau mea e ’apo mai i roto i te ’ārētōria, ’a hi’o i te nīno’a iti e vai ra i roto i teie arata’i ha’api’ira’a.

E ti’a ia tātou pā’āto’a e tāvini i te Atua nā roto i te tauturura’a iāna ’ia ha’aputuputu i tāna mau tamari’i.

Iakoba 5:61–75

Tē ani nei te Atua iā’u ’ia tauturu iāna ’ia ha’aputuputu i tāna mau tamari’i.

Te « tahi mau tāvini » (Iakoba 5:70) tei pi’ihia i roto i te ’ō vine a te Fatu, ’o ’oe ato’a ïa tō roto—tātou te mau melo o te ’Ēkālesia, e hōpoi’a nā tātou pā’āto’a te tauturura’a i te Atua ’ia ha’aputuputu i tāna mau tamari’i. E aha te mau parau tumu tā ’oe e ’ite ra i roto i te Iakoba 5 nō ni’a i te ’ō vine a te Fatu, te mau ’īrava 61–62 ’e te 70–75 iho ā rā ? Nāhea ’oe i te ’itera’a iāna i te pi’ira’a ia ’oe ’ia tāvini i roto i tāna ’ō vine ? E aha te mau ’ohipa i tupu nō ’oe ’a ’āmui ai ’oe i tāna ’ohipa ?

Hi’o ato’a « Missionary Work », Gospel Topics, topics.ChurchofJesusChrist.org; « Old Testament Olive Vineyard », Help the Church Grow” (videos, ChurchofJesusChrist.org).

Iakoba 7:1–23

E nehenehe tā’u e ti’a pāpū ’ia fa’ati’o ana’e vetahi ’ē i tō’u fa’aro’o.

Te ’ohipa i tupu i rotopū i te mau ’āti Nephi ’e Serema, e tupu pinepine ïa i teie mahana : tē vai nei paha te tahi mau ta’ata ’ite rahi ’e te ’ōrero e tāmata nei i te vāvāhi i tō ’oe fa’aro’o. « I ’ore ai [Iakoba] i fa’a’āueuehia ai » (Iakoba 7:5). E mea nāhea tō Iakoba pāhonora’a atu i te ’arora’ahia tōna fa’aro’o ? E aha tā ’oe e ’apo mai nā roto mai i tāna mau pāhonora’a ? E aha tā ’oe e nehenehe e rave i teienei ’ei fa’aineinera’a i te mau taime e fa’ati’ohia tō ’oe fa’aro’o ?

Hi’o ato’a Jeffrey R. Holland, « Te ho’o, ’e te mau ha’amaita’ira’a, nō te ti’ara’a pipi », Ensign ’aore rā Liahona, Mē 2014, 6–9.

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Iakoba 5

’Ua ’itehia i te tahi mau ’utuāfare ē, e mea au a’e ’ia pāpa’i hōho’a i te mau taipe i roto i te ’ārētōria nō te mau tumu ’ōlive ’a tai’o ai rātou i te reira. E au ato’a paha tō ’outou ’utuāfare i te reira, ’aore rā e rāve’a ’ē atu paha tā ’outou e roa’a ai i te mau melo o te ’utuāfare ’ia hi’o i te mau taipe o te ’ārētōria. Penei a’e e nehenehe e tāpa’o i te hō’ē vāhi i ni’a i te ’aira’amā’a ’aore rā i ni’a i te tahua nō te ’ō vine (’aore rā te ao) ’e e rave i te tahi tao’a nō te fa’ahōho’a i te tumu rā’au rata (te ’utuāfare o ’Īserā’ela), mai te hō’ē puzzle, ’o tē nehenehe e fa’ata’a i te mau tuha’a (’ei fa’ahōho’ara’a i te purarara’a o ’Īserā’ela) ’e e fa’aho’i ’āmui mai ai (’ei fa’ahōho’ara’a i te ha’aputuputu o ’Īserā’ela). E aha tā teie ’ārētōria e ha’api’i nei ia tātou nō ni’a i te Fatu ? nō ni’a i tāna mau tāvini ?

Iakoba 5:70–77

’Ia tai’o ’outou nō ni’a i te « tau hope’a » e ’ohipa te Fatu i roto i tāna ’ō vine, e aha te mea e fa’auru ia ’outou ’e i tō ’outou ’utuāfare ’ia tāvini i te Fatu « ma tō ’outou pūai ato’a » ? (Iakoba 5:71). E nehenehe e ani i te mau melo o te ’utuāfare ’ia fa’atano i ni’a ia rātou i te ’īrava 75 nā roto i te tu’ura’a i tō rātou i’oa i roto i te reira ’īrava—’ei hi’ora’a, « E ao tō [’oe (te i’oa)] ». Penei a’e e nehenehe tā ’outou e fa’a’ite i te tahi mau ’ohipa i tupu ’e ’ua ’oa’oa rātou ’a tāvini ai i te Fatu o te ’ō vine, ’ei hi’ora’a, nā roto i te fa’a’itera’a i te ’evanelia, te tāvinira’a i roto i te hiero ’aore rā te ha’apūaira’a i te mau melo o te ’Ēkālesia. (Hi’o ato’a M. Russell Ballard, « ’A ti’aturi i te Fatu », Ensign ’aore rā Liahona, Nov. 2013, 43–45.)

Iakoba 6:4–7

E aha tā te Fatu i rave nō te fa’atoro i tōna rima aroha ia tātou ? E aha te aura’a o te ta’o « ’ati atu » i roto i teie mau ’īrava ? Nāhea te Fatu e ’ati mai ia tātou ? Nāhea tātou nō te ’ati atu iāna ?

Iakoba 7:1–12

E aha tā tātou i ha’api’i mai i roto i teie mau ’īrava nō ni’a i te huru o te ta’ata e tāmata nei i te arata’i ’ē ia vetahi ’ē ? Nāhea tā tātou e nehenehe ai e pe’e i te hi’ora’a o Iakoba nō te mau pāpū i tō tātou fa’aro’o i roto i te Mesia ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’iraʼa i tā tātou ha’api’ira’a

Tāmau ’ā’au i te hō’ē ’īrava. E mā’iti i te hō’ē tuha’a ’īrava faufa’a ta’a ’ē nō te ’utuāfare, ’e e tāmau-’ā’au-’āmui ’outou i te reira. ’Ua ha’api’i Elder Richard G. Scott : « E riro mai te hō’ē pāpa’ira’a mo’a tāmau-’ā’au-hia ’ei hoa tāmau ’aore e mōrohi i roto i te roara’a o te tau » (« Te mana o te pāpa’ira’a mo’a », Ensign ’aore rā Liahona, Nov. 2011, 6).