“Kabonganakin Nakomai, Iriirai—Ibukiia Aomata n Tatabemaniia ao Utu,” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Kabonganakin Nakomai, Iriirai—Ibukiia Aomata n Tatabemaniia ao Utu,” Nakomai, Iriirai—Ibukiia Aomata n Tatabemaniia ao Utu: 2020
Kabonganakin Nakomai, Iriirai—Ibukiia Aomata n Tatabemaniia ao Utu 2020
Antai Ibukina te Bwai n Ibuobuoki Aei?
Te bwai n ibuobuoki aei bon ibukiia n tatabemaniia ao utu n te Ekaretia. E karaoaki bwa e na buokiko n reiakina te euangkerio—tao i bon iroum ke ma am utu. Ngkana ko tuai ni kamatebwaia te euangkerio n taai aika nako, e kona ni buokiko te bwai n ibuobuoki aei ni waakina am kamatebwai. Ngkana e a kaman tia n reke kateim ae raoiroi iaon reiakinan te euangkerio, e kona te bwai n ibuobuoki aei ni buokiko ni karekei am atatai aika a na rangi ni uaana riki.
N na Kanga ni Kabongana te Bwai n Ibuobuoki Aei?
Kabongana te bwai n ibuobuoki aei ni kawai aika e na ibuobuoki nakoim. Ko kona ni kunea bwa e rangin n ibuobuoki bwa te kairi ke te buoka ibukin kamatebwaiakan booki aika tabu i bon iroum ao am utu. Ko kona naba ni kabongana ibukin bootakin te utu n te tairiki. Te kabwarabwara e kamatatai kakawakin reirei aika kuneaki n Ana Boki Moomon, iangoi iango ni kamatebwai ao waaki ni kakukurei ibukiia aomata n tatabemaniia ao utu, ao katauraoi taabo aika ko na koroi am namakin iai.
Kam na kaman tia ngkoe ma am utu ni kamatebwaia te euangkerio. Te katooto, tao ko wareki koroboki aika tabu irarikin Ana Boki Moomon ibukin te tieminari ka te kiraati n te Intitute. Nakomai, Iriirai—Ibukiia Aomata n Tatabemaniia ao Utu e aki nanonaki n ae ko na onea mwiina ke ni kaiangatoa ma bwaai aika raoiroi aika ko karaoi. E na iai kawai n reirei n tainako man Ana Boki Moomon ao n teimatoa ni kakoroi nanon am kouru ake tabeua ibukin kamatebwaian koroboki aika tabu. Te katooto, ko na bae ni wareka teuana te boki man koroboki aika tabu ao ni wareka Ana Boki Moomon ma am utu (ke n te kawai are teuana). Irii ana kairiiri te Tamnei ni baireia bwa ko na kanga ni kamatebwaia ana taeka te Atua.
E na Kanga te Bwai n Ibuobuoki aei ni Kaineti ma Tera ae Riki n te Ekaretia?
Te kamataata n te bwai n ibuobuoki aei a baireaki nakon bairean tain te wareware n te wiiki. Nakomai, Iriirai—Ibukin te Moanrinan ao Nakomai, Iriirai—Ibukin te Reirei n Tabati ira te babaire naba anne. Ni boutoka am kekeiaki n reirei ao ni maiuakina te euangkerio ni mweengam, a na anganiko am tia reirei n te aro am tai n tibwauai am atatai, am iango, ao am titiraki iaon koroboki aika tabu aika ko a tia ni kamatebwaia ni mweengami.
Bukina bwa te Reirei n Tabati e karaoaki tii uoua te tai n te namwakaina, taan reirei n te Reirei n Tabati a na rinea ke n taonna ke ni ikotii babaire n teimatoa ni karaoi babaire ni katoa wiiki. E kona naba ni karaoaki aei iaon wiiki ngkana a aki karaoaki bootakin te Ekaretia ibukin te maungatabu n te titeiki ke bukina riki tabeua. Inanon wiiki aikai ko kaoaki bwa ko na teimatoa ni kamatebwaia Ana Boki Moomon ni mweengam.
I Kainnanoia Bwa N na Ira te Babaire Anne?
Te babaire anne e na buokiko ni kabanea warekan Ana Boki Moomon n tokin te ririki aei. Irarikin anne, irakin te aeka ni babaire anne n aroia tabeman n am uoote e kona ni kairiia nakon atatai aika uaana n te ekaretia. Ma tai iangoia bwa ko na riai n ira te babaire; bon tii te kairi ae e na buokiko ni kararoaki mai irouia. Te bwai ae kakawaki bwa kam reiakina te euangkerio n tatabemani ngkami ao n ami utu.