“Iango ni Kanakoraoa Am Kamatebwai ni Utu ni Koroboki Aika Tabu,” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Iango ni Kanakoraoa Am Kamatebwai ni Utu ni Koroboki Aika Tabu,” Nakomai, Iriirai—Ibukiia Aomata n Tatabemaniia ao Utu: 2020
Iango ni Kanakoraoa Am Kamatebwai ni Utu ni Koroboki Aika Tabu
Kamatebwaian koroboki aika tabu n te utu n tainako bon te kawai ae korakora ae e na buokiko n reiakina te euangkerio. Mwaitira ao maanra ae ko warekia ni bootaki ma am utu e aki kakawaki riki nakon ae ko na teimatoa n am kekeiaki. Ngkana ko karaoa te kamatebwai ni booki aika tabu bwa te bwai ae kakawaki n am utu, ko na buokiia kaain am utu ni kaniia riki nakon Iesu Kristo ao ni katea aia koaua iaon aan Ana taeka.
Iangoi titiraki aikai:
-
Ko na kanga ni kaungaia kaain am utu bwa a na kamatebwai booki aika tabu i bon irouia?
-
Tera ae ko kona ni karaoia ni kaungaia am utu bwa a a tibwaua te bwai ae a reiakinna?
-
Ko na kanga ni kamatatai reirei aika ko a tia n reiakin inanon Ana Boki Moomon ni kawai n n anga reirei ni katoabong?
Uringnga bwa te mweenga bon te tabo ae katauaki ibukin reiakinan te euangkerio. Ko kona n reiakinna ao n anga reirei iaon te euangkerio n te mweenga ni kawai ake a kona ni karaoaki inanon te kiraati n te Ekaretia. Ko na rangi ni kakauiango ngkana ko iangoi kawai ni buokiia am utu n reirei man booki aika tabu. Iangoi tabeua iango aikai ni kawaekoa am kamatebwai ni booki aika tabu.
Kabongana te Katangitang
Anenei anene aika a na kakorakorai reirei aika reiakinaki n koroboki aika tabu. Abentekiti D inanon te bwai n ibuobuoki aei iai inanona katangitang aika irekereke ma reirei ni katoai kamataata n te wiiki.
Tibwauai Koroboki Aika Tabu aika Uaana
Anganiia kaain te utu aia tai n tibwauai mwakoron koroboki aika tabu ake a tia ni kunei aika uaana n tain aia kamatebwai.
Kabonganai Oin Am Taeka
Kaoia kaain te utu bwa a na taekinna ni kakimototoa n oin aia taeka te bwai ae a tia n reiakinna man koroboki aika tabu.
Kabonganai Koroboki Aika Tabu nakon Maium
Imwiin warekan te mwakoro man koroboki aika tabu, tuangiia kaain te utu bwa a na tibwauai kawai bwa e kanga te mwakoro anne ni kaineti nakon maiuia.
Taekina te Titiraki
Kaoiia kaain te utu bwa a na tabeka te titiraki iaon te euangkerio, ao kabanea te tai ni kakaai kiibu are e na kona ni buokia ni kaekaa te titiraki.
Kaota te Koroboki ae Tabu
Rinea te kibu ae ko kunea bwa e uaana, ao kateia n te tabo are a na kona n nooria iai kaain te utu. Kaoia kaain te utu ake tabeman bwa a na rinea te kibu are a na kaotia.
Karaoa Karinanin Kiibu
Ni kabane kaain te utu, rinei tabeua kiibu ake ko tangiria ni maroroakinna n te wiiki ae e na roko.
Kamatenanoi Kiibu
Rinea te mwakoro man te kibu are e uaana nakon am utu, ao kaoiia kaain te utu bwa a na kamatenanoa man kaokiokia ni katoabong ke n takakaro n te keim ni kauring.
Tibwauai Reirei man Bwaai ni Kabootau
Kakaai bwaai aika irekereke nakon mwakoro ao kiibu ake ko wareki n te utu. Kaoia kaain te utu bwa ana taekinna bwa a kanga bwaai n tatabeua nako n irekereke ma reirei inanon koroboki aika tabu.
Bairea Atuun te Reirei
Tuangiia kaain te utu bwa ana karekea aia tai n rinei atuun reirei are ana bane ni kamatebwaia kaain te utu. Kabongana te Topical Guide, te Bible Dictionary, ke te Guide to the Scriptures (scriptures.ChurchofJesusChrist.org) ni kakai kiibu man koroboki aika tabu iaon atuun te rongorongo.
Korea te Tamnei
Wareki tabeua kiibu n te utu, ao imwiina karekea aia tai kaain te utu bwa a na korea te bwai teuana are e irekereke ma te bwai ae ko warekia. Kabanea te tai ni maroroakin aia tamnei temanna imwiin temanna.
Karaoa te Kaotioti n te Karaki
Imwiin warekan te karaki, kaoia kaain te utu bwa ana karaoa kaina. Imwiina, taekinna bwa e kanga te karaki n irekereke ma bwaai aika ko a tia n taneiai ni karaoi n tatabemaniia ao n te utu.
E reirei Unimwaane David A. Bednar: “Tataro n utu ni kabane, ni katoa tai n te kamatebwai n kamatebwaian koroboki aika tabu n te utu, ao bootakin te utu n te tairiki e kaotia bwa antai ngaira. Akea te tai teuana ae na tara n rangin ni katekenano ke n ururungaki. Ma n aron taian been n aia kara aika babobo ao ni koora ao ni buraun a kanakoraoia imarenaia ao ni karekea te mwakuri ae moan te anainano, ngaia are teimatoara ni karaoi bwaai aika uarereke a kona ni karekei mwiia n tamnei aika kakawaki” (“More Diligent and Concerned at Home,” Ensign ke Riaona, Nob. 2009, 19–20).