Berita man te Taetae ni Burabeti

Kamatebwaian Ana Boki Moomon e na bitiko. E na bita am utu. A tia burabeti ni boong aika kaitira ni karaoi berita ibukin mwaakan Ana Boki Moomon man te tai are kaokaki iai Ana Ekaretia Iesu Kristo ibukiia Aika Itiaki ni Boong aika Kaitira. Karaurau n iangoi rongorongo aikai, ao rinanoi n tainako. Tera ae ko tangiria ni karekea mai ibuakon kakabwaia aikai? Ngkana ko wareka Ana Boki Moomon, iangaoia n raweia ao n tibwauaia ma tabeman bwa a kanga berita aikai ni kakoroaki nanoia inanon maium.

Te Burabeti Iotebwa Timiti: “I tuangiia mataniwiin te Ekaretia bwa Ana Boki Moomon bon te kabanea n eti mai ibuakon boki nako i aon te aonaba, ao bon ngaia kingin aan ara ekaretia, ao e na kaniia riki te aomata te Atua, man irirakin nanon reirei ake i nanona, nakon taian boki riki tabeua” (Teachings of Presidents of the Church: Joseph Smith [2007], 64).

Beretitenti Ezra Taft Benson: Tiaki tii ana Boki Moomon ae reireiniira koaua, e ngae ngke ni koauana e karaoa anne. Tiaki tii ana Boki Moomon ae e kakoaua Kristo, ma ni koauana e karaoa, naba anne. Ma e mwaiti riki. Iai te mwaaka inanon te boki are e na waaki n raanga inanon maiura n te tai are ko waaki iai n taua ma nanom ni kamatebwaia te boki. Ko na karekea te mwaaka ae korakora riki n totokoa te kairiiri. Ko na kunea te mwaaka n totokoa te mwamwanaaki. Ko na kunea te mwaaka n tiku iaon te kawai ae eti man irariki. Koroboki aika a tabu a atongaki bwa ‘taekan te maiu’ (RB 84:85), ao akea riki ae koaua nakon ana Boki Moomon. Ngkana ko a moanna ni bwarua te raoiroi ao ma ni kani katoong mwiin taeka aikanne, ko na kunea te maiu n te aro ae riao mwaitina” (Teachings of Presidents of the Church: Ezra Taft Benson [2014], 141).

Beretitenti Gordon B. Hinckley: “Tariu ao mwaneu, n akean te kaotioti ao I berita nakoimi bwa ngkana ko tataromwaaka ni wareka Ana Boki Moomon, n aki tabe bwa iraua te tai ae ko a tia ni warekia, e na kamwaitaki riki Tamnein te Uea inanom. E na reke kakorakorakim n nakonako n te ongotaeka nakon ana tua, ao e na roko te koaua ae korakora riki iaon koauan maiun Natin te Atua” (Teachings of Presidents of the Church: Gordon B. Hinckley [2016], 233).

Beretitenti Russell M. Nelson: “Tariu ao mwaneu, I berita bwa ngkai ko tataromwaaka ni kamatebwaia ana Boki Moomon ni katoa bong, ko na karaoi babaire aika nakoraoi—ni katoa bong. I berita bwa ngkai ko iangoa te bwai ae ko kamatebwaia, a na uki wintoon karawa, ao a na kaekaaki am titiraki ao kaetieti ibukin maium. I berita bwa ngkana ko kamatebwaia ana Boki Moomon, ko na kamanoaki man buakakan te bong, n ikotaki ma kaotakin tamnei aika buakaka ao tabeua anua aika kareke ae kamatuua te iango. (“Ana Boki Moomon: E Na Kanga Aron Maium Ngkana Arona bwa Akea?” Ensign ke Riaona, Nob. 2017, 62-63).