Iango ni Kanakoraoa Am Kamatebwai ni Koroboki Aika Tabu

Aikai tabeua kawai aika a bebete ni kawaekoa am kamatebwai n ana taeka te Atua inanon koroboki aika tabu.

Kakaai Koaua ibukin Iesu Kristo

A reireiniira koroboki aika tabu bwa bwaai ni kabane aika a kakoaua Kristo (taraa 2 Nibwaai 11:4; Mote 6:63), ngaia ae Kakaea ni bwaai aika riki, karaki, ao reirei n Ana Boki Moomon. Iangoia n tarai ke ni mwaken kiibu ake a reirei taekan te Tia Kamaiu ao ko na kanga n Iria.

Kakaai Taeka ao Mwakoro Aika a Kaunga

Ko kona ni kunea bwa taeka ao mwakoro inanon booki aika tabu a taraa ni kakawaki nakoim, ae kanga titebo ma a koreaki ti ibukim. A kona n ae a namakinna n ae e kaineti ao ni kaunga ao n anai nano nakoim. Iangoia ni mwaken inanon am boki aika tabu ke koroi inanon am tieno ni kamatebwai.

Taratarai Koaua n te Euangkerio

N tabetai koaua n te euangkerio (n tainako a atongaki bwa reirei ke tuua) a taekinaki ni kaineti, ao n tabetai a katautauaki rinanon te katooto ke te karaki. Titirakiniko, Tera koaua aika akea tokiia aika reireinaki inanon kiibu aikai?”

Kakauongo nakon te Tamnei

Tarai raoi am iango ao am namakin, e ngae ngke aki kaineti nakon te bwai ae ko warekia. A kona iango aikanne n riki bwa bwaai aika e tangiria Tamara are i Karawa bwa ko na reiakinna.

Kabotaui Kanoan Koroboki AikaTabu Nakon Maiura

Iangoia bwa a na kanga karaki ao reirei inanon booki aika tabu ni kaineti nakon maium. Te katooto, ko kona n titirakiniko, “Tera taneiai aika I a tia ni karekei aika ti tebo ma aika I wareki?” ke “N na kanga n ira ana banna ni katooto te aomata aei inanon koroboki aika tabu?”

Tabeka te Titiraki ngkana ko Kamatebwai

Ngkana ko kamatebwai koroboki aika tabu, ko kona n iangoi titiraki. A kona titiraki aikai ni kaineti nakon te bwai ae ko warekia ke nakon maium ni kabuta. Iangoi titiraki aikai ao tarai rekeia ngkana ko reitinako ni kamatebwai koroboki aika tabu.

Kabonganai Ibuobuoki ni Kamatebwaian koroboki Aika Tabu

Ni karekei atatai aika a nano n taian kibu aika ko wareki, kabongana te bwai ae koreaki inano, te Topical Guide, te Bible Dictionary, te Guide to the Scriptures (scriptures.ChurchofJesusChrist.org), ao ibuobuoki ibukin kamatebwai riki tabeua.

Iangoi Kanoan Koroboki Aika Tabu

Ko kona ni karekei atatai aika a nano aika uaana ibukin koroboki aika tabu ngkana ko iangoi taekaia—bwaai aika a riki ke te taboibukin koroboki aika tabu. Te katooto, atakin aron ao ana onimaki te aomata are e taekinna te burabeti e kona ni buokiko n atai nanon ana taeka.

Korei Am Iango ao Am Namakin

A mwaiti kawai aika ko kona ni koroi iai mwiin am namakin aika a roko n am tai ni kamatebwai. Te katooto, ko kona ni mwaakena te taeka ae uaana ke mwakoron taeka ao koroi am iango bwa te bwai ae e na taraaki inanon am boki ni booki aika tabu. Ko kona naba ni kawakina te tieno ibukin atatai aika nano, namakin, ao iango aika ko karekei.

Kamatebwaia aia Taeka Burabeti ao Abotoro ni Boong Aika Kaitira

Wareki bwaai aika a tia n reiakin burabeti ao abotoro ni boong aika kaitira ibukin taian reirei aika ko kunei inanon booki aika tabu (te katooto, taraa conference.ChurchofJesusChrist.org ao ana maekatiin te Ekaretia).

Tibwauai Atatai Aika a Nano

Maroroakinan atatai aika a nano n oin am kamatebwai tiaki ti te kawai ae tamaroa n reireiniia tabeman, ma e ibuobuoki naba ni kakorakora otam n te bwai ae ko a tia ni warekia.

Maiu man te Bwai ae Ko Reiakinna

Kamatebwaian koroboki aika tabu a na aki tii kaungaira ma e na kairiira naba nakon aron maiura. Kakauongo nakon ana kairoro te Tamnei n te bwai ae ko na karaoia ngkana ko wareware, ao ni motinnanoia bwa ko na karaoi kairoro aikanne.

E taku Beretitenti Russell M. Nelson: “Ngkana ti ‘waaki nako, ni kanuaira n ana taeka Kristo, ao n teimatoa ni karokoa te toki, … [ti] na karekea te maiu are akea tokina’ [2 Nibbwaai 31:20].

“N amwarake e nano riki nakon katoonga. N amwarake e nanonaki nakon kakukureiko. Ti katongii booki aika tabu man kamatebwaiana inanon kukurein te tamnei n kunei ao kakaonimaki n ongotaeka. Ngkana ti kanuaira n ana taeka Kristo, a koreaki ‘inanon baaba aika iriko inanomi’ [2 I-Korinto 3:3]. A riki bwa mwakoron kateira aika a kakawaki” (“Living by Scriptural Guidance,” Ensign, Nob. 2000, 17).