“Ob Hlis Ntuj 8–14. Lus Qhuab Qhia thiab Kev Khi Lus 12–13; Joseph Smith—Keeb Kwm 1:66-75: ‘Rau Neb Kuv Ob tug Kwv Luag Tub Qhe’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus: 2021 (2020)

“Ob Hlis Ntuj 8–14. Lus Qhuab Qhia thiab Kev Khi Lus 12–13; Joseph Smith—Keeb Kwm 1:66-75,” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus: 2021

Daim Duab

Tus Dej Susquehanna

Ob Hlis Ntuj 8–14

Lus Qhuab Qhia thiab Kev Khi Lus 12–13; Joseph Smith—Keeb Kwm 1:66-75

“Rau Neb Kuv Ob tug Kwv Luag Tub Qhe”

Joseph Smith thiab Oliver Cowdery tau txais kev txawj ntse ntxiv thaum nkawd thov Vajtswv txog tej yam tseeb uas nkawd kawm los ntawm cov vaj lug kub (saib Joseph Smith—Keeb Kwm 1:68) Koj yuav ua li cas kom coj raws li nkawd tus yam ntxwv?

Sau Ntawv txog Koj tej Kev Tshoov Siab

Neeg coob nyob thoob plaws lub ntiaj teb twb tsis tau hnov txog ib qho chaw hu ua Harmony, Pennsylvania. Tiam sis tus Tswv yeej ib txwm xaiv tej qhov chaw uas neeg tsis tshua paub txog kom ua tej yam tseem ceeb tshaj plaws hauv Nws lub nceeg vaj. Nyob hauv ib koog ntoo nyob ze Harmony thaum lub Tsib Hlis Ntuj hnub tim 15, 1829, Yauhas tus uas Muab Neeg Ua Kev Cai Raus Dej uas yog ib tug uas sawv rov los lawm tau tshwm sim rau Joseph Smith thiab Olivery Cowdery pom. Nws tau tso tes saum nkawd taub hau thiab muab lub Pov Thawj Hwj Aloos rau nkawd, nws hu nkawd ua “kuv ob tug kwv luag tub qhe” (Lus Qhuab Qhia thiab Kev Khi Lus 13:1).

Qhov uas Yauhas tus uas Muab Neeg Ua Kev Cai Raus Dej, tus uas tau muab tus Cawm Seej ua kev cai raus dej thiab npaj txoj kev rau Nws los (saib Mathais 3:1–6, 13–17), xav tias nkawd yog ob tug kwv luag tub qhe, ntshe ua rau nkawd txo hwj chim, tej zaum ua rau nkawd ob tug tub hluas uas muaj nees nkaum tawm xyoos xwb xav tsis thoob. Thaum lub sij hawm ntawd, tsis tshua muaj neeg paub Joseph thiab Oliver, ib yam li tsis tshua muaj neeg paub lub zos Harmony. Tiam sis kev ua Vajtswv txoj hauj lwm yeej nyob ntawm qhov uas peb ua hauj lwm zoo li cas, tsis yog nyob ntawm qhov uas lwm tus pom peb ua. Txawm koj xav tias koj ua hauj lwm me me xwb los sis tsis muaj leej twg pom, koj kuj yog ib tug kwv luag tub qhe uas ua tus Tswv txoj hauj lwm tseem ceeb no.

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 12

Tus Tswv xav kom kuv pab txhim tsa Xi-oos.

Joseph Knight tus Laus thiab nws tus poj niam, Polly, tau ntsib Joseph Smith thaum, nws muaj 20 xyoos, es nws pib ua hauj lwm rau nkawd daim teb hauv Colesville, New York. Joseph Knight piav txog nws hais tias nws yog tus tub ua hauj lwm zoo tshaj plaws. Nws ntseeg Joseph Smith zaj lus tim khawv txog cov phiaj kub thiab coj Polly mus xyuas Joseph Smith thaum nws tseem txhais Phau Ntawv Maumoos hauv nws tsev nyob hauv lub zos Harmony, Pennsylvania. Polly ntseeg tam sim ntawd. Tas nkawd ib sim neej, Joseph thiab Polly twb rau siab ntseeg txoj moo zoo. Thaum kawg muaj 60 tawm tus neeg hauv tsev neeg Knight uas koom lub Koom Txoos thiab pab txhim tsa lub Koom Txoos nyob hauv New York, Ohio, Missouri, Nauvoo, thiab tom qab ntawd Salt Lake City.

Joseph Knight xav paub nws yuav ua li cas kom pab ua tus Tswv txoj hauj lwm. Tus Tswv tej lus teb (tam sim no nyob hauv Lus Qhuab Qhia thiab Kev Khi Lus 12) los muaj nqis rau “tag nrho cov uas muaj tej kev xav pab tsa thiab coj txoj hauj lwm no los” (nqe 7)—tsis hais koj los yog. Koj xav li cas txog cov lus no “pab coj thiab tsa lub hom phiaj ntawm Xi-oos”? (nqe 6). Tej ntsiab cai thiab tej cwj pwm nyob hauv nqe 7–9 ua li cas pab koj?

Kuj saib “The Knight and Whitmer Families,” Revelations in Context, 20–24.

Lus Qhuab Qhia thiab Kev Khi Lus 13

Yauhas tus uas Muab Neeg Ua Kev Cai Raus Dej tau muab lub Pov Thawj Hwj Aloos txum tim rov qab los.

Nws hais ib kab lus xwb, es Yauhas tus uas Muab Neeg Ua Kev Cai Raus Dej tau qhia ntau yam tseeb txog lub Pov Thawj Hwj Aloos. Xav seb koj puas sau txhua yam uas koj kawm los ntawm tshooj no (tsis hais zaj lus piav txog tshooj no los yog). Tej zaum yuav pab koj yog koj kawm txog tej kab lus uas koj nyeem. Nov yog ob peb yam piv txwv kom pab koj pib ua li ntawd:

“Cov yawm sij ntawm cov tim tswv tej kev los txhawb pab”: 2 Nifais 32:2–3; Maulaunais 7:29–32; Jeffrey R. Holland, “The Ministry of Angels,” Ensign los sis Liahona, Kaum Ib Hlis Ntuj 2008, 29–31; Phau Qhia txog Vaj Lug Kub, “Tim Tswv,” scriptures.ChurchofJesusChrist.org
“Cov yawm sij … ntawm txoj moo zoo ntawm kev hloov siab lees txim”: 3 Nifais 27:16–22; Lus Qhuab Qhia thiab Kev Khi Lus 84:26–27; Dale G. Renlund, “Lub Pov Thawj Hwj thiab tus Cawm Seej lub Hwj Chim Theej Txhoj,” Ensign los sis Liahona, Kaum Ib Hlis Ntuj 2017, 64–67
“Levis cov tub”: Teev Npe 3:5–13; Lus Qhuab Qhia thiab Kev Khi Lus 84:31–34; Phau Qhia txog Vaj Lug Kub, “Pov Thawj Hwj Aloos,” “Levis,” scriptures.ChurchofJesusChrist.org

Koj twb tau tej koob hmoov twg los ntawm cov kab ke ntawm lub Pov Thawj Hwj Aloos?

Joseph Smith Baptizes Oliver Cowdery, los ntawm Del Parson

Joseph Smith—Keeb Kwm 1:66–75

Cov kab ke ua rau kuv txais tau Vajtswv lub hwj chim.

Muam Carole M. Stephens, ib tug pab cuam hauv Koom Haum Niam Tsev Tuam Pawg Thawj Tswj Hwm dhau los tau qhia hais tias: “Tej kab ke pov thawj hwj thiab kev khi lus yuav ua rau peb txais tau tej koob hmoov uas Vajtswv cog lus tseg rau peb lawm, uas muaj los ntawm tus Cawm Seej txoj Kev Theej Txhoj. Tej kab ke pov thawj hwj no pab Vajtswv cov tub thiab cov ntxhais kom muaj Vajtswv lub hwj chim, thiab yuav muab cib fim rau peb los txais tau txoj sia nyob mus ib txhis” (“Peb Puas Paub tias Peb Muaj Dab Tsi?” Ensign los sis Liahona, Kaum Ib Hlis Ntuj 2013, 12).

Thaum koj nyeem Joseph Smith—Keeb Kwm 1:66–75, tsis hais lus cim ntawm nqe 71 qhov kawg, cia li xav txog tej yam uas tshoov Joseph thiab Oliver lub siab kom thov txog kev cai raus dej, thiab kawm txog cov koob hmoov uas los rau nkawd thaum nkawd ua tej kab ke pov thawj hwj. Cia li xav seb koj puas xav nyeem koj phau ceev xwm txheej uas koj twb sau tom qab koj txais kab ke los sis thaum koj sau tej yam uas koj nco txog tej lub sij hawm ntawd. Koj tau cov koob hmoov twg los ntawm cov kab ke pov thawj hwj?

Kuj saib Lus Qhuab Qhia thiab Kev Khi Lus 84:20–22; Saints, 1:65–68.

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 12:8.Vim li cas yuav tsum muaj tej cwj pwm uas sau hauv nqe no thaum peb ua tus Tswv txoj hauj lwm?

Lus Qhuab Qhia thiab Kev Khi Lus 13.Dab tsi yuav pab txhawb nqa nej tsev neeg txoj kev ntseeg tias tau muab lub Pov Thawj Hwj Aloos txum tim rov qab los? Daim video “Restoration of the Aaronic Priesthood” (ChurchofJesusChrist.org) los sis cov duab uas txuas rau kev sau lub ntsiab no tej zaum yuav pab nej tsev neeg xam pom txog qhov uas tau muab lub Pov Thawj Hwj Aloos txum tim rov qab los. Lawv puas nyiam kos duab txog lub sij hawm no, raws li lawv nyeem nyob hauv Joseph Smith—Keeb Kwm 1:68–74? Tej zaum lawv kuj yuav xav hais lawv zaj lus tim khawv txog lub hwj chim pov thawj hwj nyob hauv lawv lub neej.

Kuj saib “Priesthood Restoration Site” nyob ntawm history.ChurchofJesusChrist.org.

Joseph Smith—Keeb Kwm 1:68.Peb yuav ua li cas kom coj raws li Joseph Smith thiab Oliver Cowdery tus yam ntxwv kom nrhiav tau tej lus teb rau peb tej lus nug? Tej zaum thaum nej nyeem ua ke, nej yuav xav nres ntau zaus thiab nug seb puas muaj leej twg xav nug tej yam txog qhov uas lawv nyeem.

Joseph Smith—Keeb Kwm 1:71, lus cim.Muaj dab tsi los ntawm Oliver Cowdery tej lus uas tshoov nej tsev neeg lub siab? Nej tsev neeg puas muaj “tej hnub [uas] yog tej uas yuav tsis hnov qab hlo li”?

Joseph Smith—Keeb Kwm 1:73–74.Tus Vaj Ntsuj Plig Dawb Huv tau ua li cas rau Joseph thiab Oliver? Thaum twg tus Ntsuj Plig tau pab nej tsev neeg to taub cov vaj lug kub thiab xyiv fab rau tus Tswv?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “The Priesthood Is Restored,” Children’s Songbook, 89.

Kev Qhia Zoo Dua Ntxiv

Kawm txog ib lub ntsiab lus. Nrog nej tsev neeg ua ke, xaiv ib lub ntsiab lus uas nej xav kawm ntxiv. Piv txwv hais tias, tej zaum lub lim tiam no nej yuav xav siv Topical Guide los sis Phau Qhia txog Vaj Lug Kub (scriptures.ChurchofJesusChrist.org) kom nrhiav tau cov vaj lug kub uas hais txog lub Pov Thawj Hwj Aloos.