“Ob Hlis Ntuj 1–7. Lus Qhuab Qhia thiab Kev Khi Lus 10–11: ‘Xwv Kom Koj Yuav Yog tus Kov Yeej,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Ob Hlis Ntuj 1–7. Lus Qhuab Qhia thiab Kev Khi Lus 10–11,” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus: 2021
Qhov zoo ib yam li cov ntaub ntawv rau Phau Ntawv Maumoos
Ob Hlis Ntuj 1–7
Lus Qhuab Qhia thiab Kev Khi Lus 10–11
“Xwv Kom Koj Yuav Yog tus Kov Yeej”
Kev sau txog tej kev tshoov siab uas koj txais thaum koj nyeem cov vaj lug kub yeej zoo li kev cog noob; txawm yog koj sau tej kev tshoov siab me me yuav ua rau koj txais tau kev tshwm sim uas muaj nqis.
Sau Ntawv txog Koj tej Kev Tshoov Siab
Thaum tab tom txhais Phau Ntawv Maumoos ntxiv, muaj ib yam uas yooj yim nug: Joseph Smith thiab Oliver Cowdery yuav tsum ua li cas txog qhov uas tej phab txhais lus twb ploj lawm? Tej zaum lub tswv yim zoo yog rov qab txhais feem ntawd, tiam sis tus Tswv txawj pom ib yam uas nkawd pom tsis taus—cov neeg phem tab tom tsim tom txwv kom hloov tej lus ntawm tej phab ntawd xwv kom tib neeg ua xyem xyav txog Joseph txoj hauj lwm. Vajtswv twb npaj ib txoj hau kev kom kov yeej Dab Ntxwg Nyoog thiab pauv qhov uas tau ploj lawm. Txoj kev npaj no los twb pib ob peb txhiab xyoos tas los thaum tus yaj saub Nifais txais kev tshoov siab tsim ib phau ceev xwm txheej thib ob uas hais txog tib lub caij nyoog ntawd. Tom qab ntawd, Maumoos txais kev tshoov siab muab cov ceev xwm txheej no tso hauv Phau Ntawv Maumoos rau “ib lub hom phiaj tseem ceeb” uas tus Tswv paub xwb (saib Maumoos cov Lus 1:3–7).
Tus Tswv hais rau Joseph hais tias, “Kuv laj lim tswv yim loj dua tus dab phem txoj kev ntse” (Lus Qhuab Qhia thiab Kev Khi Lus 10:43). Zaj no nplij peb lub siab hauv peb lub caij nyoog, thaum tus yeeb ncuab haj yam siv zog tas li kom peb txoj kev ntseeg tsis muaj zog. Ib yam li Joseph, peb muaj peev xwm “rau siab thiab ua mus ntxiv” ua txoj hauj lwm uas Vajtswv tau hu peb ua (nqe 3). Ces peb yuav kawm tias Nws twb tau npaj ib txoj kev kom “tej qhov rooj ntawm ntuj txiag teb tsaus yuav kov tsis yeej” peb (nqe 69).
Saib Saints, 1:51–61.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 10:1–33
Dab Ntxwg Nyoog xav ua kom Vajtswv txoj hauj lwm puas tsuaj.
Dab Ntxwg Nyoog xav kom peb tsis nco qab tias muaj nws tiag tiag—los sis xav kom peb tsis paub thaum nws sim haub ntxias peb (saib 2 Nifais 28:22–23). Tiam sis tus Tswv tej lus nyob hauv phau Lus Qhuab Qhia thiab Kev Khi Lus 10 qhia tias Dab Ntxwg Nyoog yeej siv zog tawm tsam Vajtswv txoj hauj lwm tas mus li. Thaum koj nyeem nqe 1–33, cia li kawm seb Dab Ntxwg Nyoog xav ua li cas kom Vajtswv txoj hauj lwm puas tsuaj nyob hauv Joseph Smith lub caij nyoog (kuj saib nqe 62–63). Koj pom Dab Ntxwg Nyoog ua tej yam twg niaj hnub nim no uas nws ua yav tas los ntawd. Tej zaum koj yuav xav thov tus Tswv pab koj pom tias Dab Ntxwg Nyoog dag ntxias koj li cas. Koj kawm dab tsi los ntawm tshooj 10 uas pab tau koj tiv taus tej yam uas Dab Ntxwg Nyoog ua?
Lus Qhuab Qhia thiab Kev Khi Lus 10:34–52
Tus Tswv “laj lim tswv yim loj dua tus dab phem txoj kev ntse.”
2,400 tawm xyoo ua ntej, tus Tswv tau npaj kev rau qhov uas yuav ua tej phab ntawv ntawm Phau Ntawv Maumoos ua poob lawm (saib 1 Nifais 9). Koj kawm dab tsi txog tus Tswv los ntawm phau Lus Qhuab Qhia thiab Kev Khi Lus 10:34–52? Koj tau pom puav pheej dab tsi txog tus Tswv laj lim tswv yim thiab txoj kev paub ua ntej nyob hauv koj lub neej?
Phau ceev xwm txheej uas Vajtswv tau npaj kom pauv cov ntaub ntawv uas ua poob lawm los muaj nyob hauv 1 Nifais mus txog Oonis. Tej zaj dab neeg thiab tej lus qhia hauv phau ceev xwm txheej no tau ua li cas kom “qhia tau tej ntsiab zoo dua txog … txoj moo zoo” rau koj? Lus Qhuab Qhia thiab Kev Khi Lus 10:45).
Maumoos Sau Ntsiab Lus txog cov Phiaj, los ntawm Tom Lovell
Lus Qhuab Qhia thiab Kev Khi Lus 11
Yog kuv thov Vajtswv, kuv yuav txais tau.
Ob peb tug ntawm Joseph Smith tsev neeg thiab phooj ywg tau thov kom nws thov tus Tswv pab lawv. Joseph zoo siab ua li ntawd, tiam sis tus Tswv kuj txaus siab qhia kev tshwm sim rau lawv ib yam thiab. Nyob hauv phau Lus Qhuab Qhia thiab Kev Khi Lus 11, uas yog kev tshwm sim uas Joseph txais rau nws tus tij laug Hyrum, tus Tswv hais tias, “Kuv yuav cia kuv tus Ntsuj Plig los rau koj, … thiab thaum ntawd koj yuav paub … txhua tsav txhua yam uas koj xav tau los ntawm kuv” (Lus Qhuab Qhia thiab Kev Khi Lus 11:13–14).
Tus Tswv hais tias Nws tej lus yog hais rau “tag nrho cov uas muaj tej kev xav tau uas zoo, thiab tau muab lawv rab liag cev mus sau los” (nqe 27). Nyob hauv phau Lus Qhuab Qhia thiab Kev Khi Lus 11, tus Tswv qhia dab tsi rau koj txog kev tshwm sim? txog kev koom tes ua Vajtswv txoj hauj lwm? Nws xav qhia dab tsi ntxiv rau koj?
Lus Qhuab Qhia thiab Kev Khi Lus 11:15–26
Thaum kuv nrhiav kev kom “tau [Vajtswv] txoj lus,” kuv yuav txais tau Nws tus Ntsuj Plig thiab lub hwj chim.
Ua ntej tau muab Phau Ntawv Maumoos txhais lus, Hyrum Smith xav xav mus tshaj tawm txog txoj moo zoo. Thaum koj nyeem tias tus Tswv tau hais li cas txog nws txoj kev xav, cia li xav tias txoj kev “tau [Vajtswv] txoj lus” txhais tau li cas rau koj (nqe 21). Qhov uas koj tau Vajtswv txoj lus los qhov ntawd tau pab koj ua hauj lwm hauv lub Koom Txoos li cas? Ua li cas qhov no ua rau koj coj tau Vajtswv lub hwj chim los rau hauv koj lub neej?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 10:5.Peb kawm dab tsi los ntawm nqe no txog lub hwj chim ntawm kev thov Vajtswv? Peb yuav tsum ua li cas kom “thov Vajtswv tas mus li”? (Yog xav tau tswv yim pab, saib David A. Bednar, “Pray Always,” Ensign los sis Liahona, Kaum Ib Hlis Ntuj 2008, 41–44.)
-
Lus Qhuab Qhia thiab Kev Khi Lus 10:38–46.Kom pab nej tsev neeg sib tham txog qhov uas tus Tswv tau npaj rau thaum muab tej phab ntawv ntawm kev txhais Phau Ntawv Maumoos ploj lawm, tej zaum nej tsev neeg yuav xav sib tham txog ib yam dab tsi uas lawv ua ploj lawm tsis ntev tas los. Lawv xav li cas thaum lawv paub tias yam ntawd ploj lawm? Lawv xav li cas thaum nrhiav tau lawm? Txawm yog nrhiav tsis taus tej phab ntawv ntawm Phau Ntawv Maumoos uas ploj lawm, tus Tswv tau ua li cas kom pab, raws li sau hauv phau Lus Qhuab Qhia thiab Kev Khi Lus 10:38–46?
-
Lus Qhuab Qhia thiab Kev Khi Lus 10:55–70.Hais kom nej tsev neeg nrhiav tau los yog ua cim rau tej kab lus uas pib li no “kuv yog” los sis “kuv yuav”. Peb kawm dab tsi txog Yexus Khetos thiab txog qhov uas Yexus Khetos zoo li cas los ntawm tej kab lus uas pib li no “kuv yog?” Peb kawm dab tsi txog tej yam uas Nws ua los ntawm tej kab lus uas pib li no “kuv yuav?” Hais kom nej tsev neeg sib tham txog qhov uas tej lus tseeb no ua rau lawv txoj kev ntseeg Yexus Khetos muaj zog.
-
Lus Qhuab Qhia thiab Kev Khi Lus 11:12–14.Qhov uas nej nyeem tej nqe no pab tau nej tsev neeg paub thaum twg tus Ntsuj Plig sib txuas lus nrog lawv. Tej zaum nej yuav xav muab ib lub teeb ci rau ntawm kev thiab caw ib tug hauv nej tsev neeg txav mus rau qhov chaw uas lub teeb ci. Qhov uas nej ua li no ua li cas ho zoo li kev ua raws li tus Vaj Ntsuj Plig Dawb Huv txoj kev coj? Nej qhia tau tej zaj twg los ntawm nej lub neej?
-
Lus Qhuab Qhia thiab Kev Khi Lus 11:15–30.Saib seb puas xav sau tej yam uas tus Tswv hais kom Hyrum Smith ua nws thiaj li yuav npaj siab qhia lwm tus txog txoj moo zoo. Peb tsev neeg yuav tsum ua dab tsi zoo dua ntxiv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Search, Ponder, and Pray,” Children’s Songbook, 109; saib “Tej lub Tswv Yim rau Tsev Neeg Kev Kawm Vaj Lug Kub.”
Kev Qhia Zoo Dua Ntxiv
Ua neej raws li cov vaj lug kub qhia. Tom qab nej nyeem ib nqe vaj lug kub, hais kom nej tsev neeg qhia tias lawv yuav ua neej li cas raws li tej yam uas vaj lug kub qhia. Piv txwv hais tias, tej zaum lawv yuav xav qhia tias tus Ntsuj Plig tau tshoov lawv lub siab li cas raws li piav txog nyob hauv Lus Qhuab Qhia thiab Kev Khi Lus 11:12–13.
Joseph thiab Hyrum Smith, los ntawm Ken Corbett