“Ob Hlis Ntuj 22–28. Lus Qhuab Qhia thiab Kev Khi Lus 18–19: ‘Tib Neeg Muaj Nqis Heev,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)

“Ob Hlis Ntuj 22–28. Lus Qhuab Qhia thiab Kev Khi Lus 18–19,” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus: 2021

Daim Duab

Martin Harris thaj teb

Martin Harris thaj teb, los ntawm Al Rounds

Ob Hlis Ntuj 22–28

Lus Qhuab Qhia thiab Kev Khi Lus 18–19

“Tib Neeg Muaj Nqis Heev”

Twb tau muab tej kev tshwm sim nyob hauv phau Lus Qhuab Qhia thiab Kev Khi Lus kom hais txog tej xwm txheej uas muaj yuav luag 200 tawm xyoo tas los, tiam sis tej lub ntsiab cai uas muaj haud los yeej muaj nqis hauv txhua lub caij nyoog. Cia li nrhiav tej ntsiab cai no thaum koj nyeem, thiab xav seb tej no pab tau koj li cas.

Sau Ntawv txog Koj tej Kev Tshoov Siab

Martin thiab Lucy Harris twb muaj ib thaj teb zoo tshaj plaws nyob hauv lub zos Palmyra, New York. Nkawd twb siv ntau xyoo kom yuav tau thaj teb no, thiab thaj teb no tau pab nkawd tu ib tsev neeg, thiab ua rau lwm tus saib taus nkawd nyob hauv lub zej zog. Tiam sis thaum xyoo 1829 Martin paub zoo hais tias yuav luam tau Phau Ntawv Maumoos tsuas yog nws tiv nqi rau nws thaj teb kom them tus kws luam ntawv xwb. Martin paub tias Phau Ntawv Maumoos muaj tseeb, tiam sis Lucy tsis paub. Yog tias Martin yuav tiv nqi rau nws thaj teb thiab muag tsis tau Phau Ntawv Maumoos ntau, ces nws thaj teb yuav raug txeeb mus thiab nws txoj kev sib yuav yeej yuav muaj teeb meem. Yeej muaj ib lub sij hawm thaum peb txhua tus muaj tej lus nug zoo ib yam li Martin muaj: Yexus Khetos txoj moo zoo muaj nqis npaum li cas rau kuv? Kuv txaus siab muab dab tsi txi kom pab txhim tsa Vajtswv lub nceeg vaj? Tej zaum yuav pab peb yog peb nco txog qhov uas tsis muaj leej twg uas tau them tus nqi loj tshaj Yexus Khetos kom foom koob hmoov rau Vajtswv cov me nyuam, tus uas yog “tus zoo tshaj plaws ntawm tag nrho sawv daws” (Lus Qhuab Qhia thiab Kev Khi Lus 19:18).

Martin txiav txim siab nws yuav tiv nqi rau nws thaj teb. Nws txoj kev txi twb them rau kev luam thawj 5,000 Phau Ntawv Maumoos. Thiab niaj hnub nim no, tom qab uas twb luam 190 plhom phau tawm lawm, neeg coob nyob thoob plaws lub ntiaj teb twb tau koob hmoov.

Yog xav kawm ntxiv txog kev muab Phau Ntawv Maumoos luam, saib Saints, 1:76–84.

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 18:10–16

Tus Tswv xyiv fab thaum peb hloov siab lees txim.

Cia li saib hais tias tau siv cov lus hloov siab lees txim thiab kev hloov siab lees txim pes tsawg zaus nyob hauv phau Lus Qhuab Qhia thiab Kev Khi Lus 18 thiab 19, thiab xav txog qhov uas koj kawm dab tsi los ntawm cov lus no txhua zaus uas hais. Ua tib zoo xav txog phau Lus Qhuab Qhia thiab Kev Khi Lus 18:10–16; tej nqe no ua rau koj xav li cas txog kev hloov siab lees txim—koj txoj kev hloov siab lees txim thiab koj lub luag hauj lwm kom caw lwm tus hloov siab lees txim?

Kuj saib Amas 36:18–21; Dale G. Renlund, “Kev Hloov Siab Lees Txim: Kev Xaiv Kev Xyiv Fab,” Ensign los sis Liahona, Kaum Ib Hlis Ntuj 2016, 121–24.

Lus Qhuab Qhia thiab Kev Khi Lus 18:34–36

Kuv txawj hnov tus Tswv lub suab nyob hauv phau Lus Qhuab Qhia thiab Kev Khi Lus.

Yog ib tug neeg nug koj seb tus Tswv lub suab zoo li cas, ces koj yuav hais dab tsi? Cia li xav txog txoj lus nug no thaum koj nyeem phau Lus Qhuab Qhia thiab Kev Khi Lus 18:34–36. Koj tau kawm dab tsi txog tus Tswv lub suab los ntawm kev nyeem phau Lus Qhuab Qhia thiab Kev Khi Lus? Koj ua tau dab tsi kom hnov tau Nws lub suab meej dua ntxiv?

Lus Qhuab Qhia thiab Kev Khi Lus 19:15–20

Yexus Khetos raug txom nyem kom kuv thiaj li yuav hloov siab lees txim thiab los cuag Nws.

Phau Tshiab piav txog tus Cawm Seej txoj kev raug txom nyem nyob hauv lub vaj Khexemanes raws li cov neeg uas twb saib Nws ua li ntawd hais. Nyob hauv phau Lus Qhuab Qhia thiab Kev Khi Lus 19:15–20, Yexus Khetos yog tus uas qhia txog Nws txoj kev raug txom nyem. Thaum koj nyeem zaj dawb ceev no, cia li nrhiav tej lus thiab tej kab lus uas piav txog tus Cawm Seej txoj kev raug txom nyem. Cia li xav seb txhua lo lus los sis kab lus qhia dab tsi rau koj. Vim li cas tus Cawm Seej txaus siab raug txom nyem? Cia li xav seb koj puas sau ntawv txog koj tej kev xav txog Yexus Khetos thiab Nws txoj kev txi rau koj.

Saib Yauhas 15:13; Mauxiyas 3:7; Amas 7:11–12; Lus Qhuab Qhia thiab Kev Khi Lus 18:10–13.

Ib tug Neeg Muaj Nqis, los ntawm Liz Lemon Swindle

Lus Qhuab Qhia thiab Kev Khi Lus 19:26–27, 34–41

Vajtswv cov koob hmoov yeej zoo tshaj cov nyiaj txiag ntawm lub ntiaj teb.

Tsis tau muag ntau Phau Ntawv Maumoos nyob hauv Palmyra, thiab yog li ntawd, Martin Harris yuav tsum muag ib feem loj ntawm nws thaj teb kom them tus nqi (saib “The Contributions of Martin Harris,” Revelations in Context, 7–8). Cia li xav txog txoj kev txi ntawd—thiab cov koob hmoov uas koj txais vim nws ua li ntawd— thaum koj nyeem tej nqe no. Tej zaum tsim nyog uas koj xav txog tej yam uas tus Tswv tau hais kom koj muab txi thiab. Koj nrhiav dab tsi hauv tej nqe no uas tshoov koj lub siab kom ua tej kev txi no nrog “kev xyiv fab” thiab “lub siab luag nyav”? (kuj saib nqe 15–20)

Lus Qhuab Qhia thiab Kev Khi Lus 19:23

Kev kaj siab lug yeej los ntawm kev kawm txog Yexus Khetos thiab kev coj raws li Nws.

Cia li xav txog tus Cawm Seej txoj kev caw “Kawm los ntawm kuv.” Koj kawm dab tsi txog Yexus Khetos nyob hauv phau Lus Qhuab Qhia thiab Kev Khi Lus 19? Sau ntawv txog koj tej kev xav, thiab xav txog qhov uas tej yam tseeb txog tus Cawm Seej ua li cas kom pab koj nrhiav tau kev kaj siab lug. Qhov uas hais tias “taug kev raws [Nws] tus Ntsuj Plig txoj kev siab mos siab muag” los koj xav tias lub ntsiab yog dab tsi?

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 18:1–5.Tej zaum nej tsev neeg yuav xav qhia txog “ntau zaus” (nqe 2) uas tus Ntsuj Plig tau qhia rau lawv tias cov vaj lug kub muaj tseeb, ib yam li Nws tau qhia Oliver Cowdery. Nej tsev neeg yuav ua li cas kom “vam khom rau tej yam uas twb tau muab sau cia” (nqe 3) nyob hauv cov vaj lug kub? Nej yuav ua li cas kom muab “lub pob zeb” (nqe 4) ntawm txoj moo zoo ua lub hauv paus rau nej tsev neeg?

Lus Qhuab Qhia thiab Kev Khi Lus 18:10–13; 19:16–19.Tej zaum txhua tus hauv nej tsev neeg nyeem tau phau Lus Qhuab Qhia thiab Kev Khi Lus 18:10–13 thiab muab nws lub npe pauv tej lus “tib neeg” thiab “tag nrho tib neeg.” Ces nej sib tham txog qhov uas tej nqe no pab peb to taub tias peb muaj nqiss npaum li cas rau Leej Txiv thiab Leej Tub (saib Lus Qhuab Qhia thiab Kev Khi Lus 19:16–19).

Lus Qhuab Qhia thiab Kev Khi Lus 18:21–25.Nej tsev neeg puas muaj lub npe uas muaj lub ntsiab tshwj xeeb? Tej zaum nej yuav xav hais txog vim li cas tej npe yeej tseem ceeb thiab lub ntsiab ntawm qhov uas peb ris Yexus Khetos lub npe yog dab tsi (saib Mauxiyas 5:7). Tej zaum nov yog ib lub cib fim zoo pab cov hauv nej tsev neeg npaj ris Khetos lub npe thaum lawv ua kev cai raus dej.

Lus Qhuab Qhia thiab Kev Khi Lus 19:15–20.Xwv kom pab nej tsev neeg muaj ib lub sij hawm zoo thaum lawv nyeem tej nqe no, tej zaum nej yuav xav nyeem thaum nej saib ib daim duab txog Yexus Khetos (muaj ib daim nyob hauv tus txheej txheem qhia no). Ces nej tsev neeg qhia tau hais tias lawv xav li cas txog tus Cawm Seej. Ib zaj nkauj txog tus Cawm Seej uas lawv nyiam tej zaum yuav caw tus Ntsuj Plig los thiab.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Kuv Zoo Siab Yexus Hlub Kuv,” Cov Nkauj Qhuas Vajtswv, zaj 82.

Kev Kawm Zoo Dua Ntxiv ntawm Yus Ib Leeg

Cia li hais koj tej lus nug. Phau Lus Qhuab Qhia thiab Kev Khi Lus qhia tseeb hais tias tej lus nug ua rau yus txais tau kev tshwm sim. Thaum koj kawm cov vaj lug kub, cia li sau tej lus nug uas koj xav txog. Ces xav thiab thov Vajtswv kom txais tau tej lus teb.