Peter Whitmer lub tsev

Peter Whitmer lub Tsev, los ntawm Al Rounds

Peb Hlis Ntuj 1–7

Lus Qhuab Qhia thiab Kev Khi Lus 20–22

“Txoj Kev Tsa Khetos lub Koom Txoos”

Thaum koj nyeem phau Lus Qhuab Qhia thiab Kev Khi Lus 20–22, qhib koj lub siab rau tus Vaj Ntsuj Plig Dawb Huv tej kev tshoov siab. Tej zaum koj yuav xav sau ntawv txog tej ntawd koj thiaj li rov qab nyeem tau.

Sau Ntawv txog Koj tej Kev Tshoov Siab

Tus Yaj Saub Joseph Smith txoj hauj lwm txhais Phau Ntawv Maumoos twb ua tiav lawm. Tiam sis txoj hauj lwm Muab txoj Moo Zoo Txum Tim Rov Qab Los nyuam qhuav pib xwb. Tej kev tshwm sim uas tau txais ua ntej qhia tias tus Tswv tau xav muab cov lus qhuab qhia thiab txoj cai pov thawj hwj txum tim rov qab los, tsis tas li ntawd tus Tswv xav muab ib lub koom haum txum tim rov qab los—uas yog Nws lub Koom Txoos (saib Lus Qhuab Qhia thiab Kev Khi Lus 10:53; 18:5). Yog li ntawd thaum lub Plaub Hlis Ntuj 6, 1830, 40 tawm tus neeg ntseeg tau nyob hauv tsev neeg Whitmer lub tsev nyob hauv Fayette, New York kom pom txoj kev tsa Yexus Khetos lub Koom Txoos.

Txawm li ntawd los, muaj neeg uas xav paub vim li cas yuav tsum txhim tsa ib lub Koom Txoos? Tej zaum peb yuav paub vim li cas, ib feem xwb, nyob hauv tej kev tshwm sim uas tau txais hauv lub Koom Txoos thawj txoj kev sib ntsib thaum xyoo 1830. Nyob haud, muaj cov koob hmoov uas tus Tswv piav txog uas yeej yuav tsis muaj yog tias tsis “tau muab [Yexus Khetos lub Koom Txoos tseeb] tsim thiab muab tsa” nyob hauv hnub nyoog kawg no (Lus Qhuab Qhia thiab Kev Khi Lus 20:1).

Kuj saib Saints, 1:84–86, thiab “Build Up My Church,” Revelations in Context, 29–32.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 20:1–36

Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg lub hauv paus yog cov lus qhuab qhia tseeb.

Twb piav txog Tshooj 20 li no hais tias yog “kev tshwm sim txog kev tsim thiab kev tswj lub Koom Txoos” (cov lus piav lub ntsiab). Tiam sis ua ntej kev tshwm sim no hais txog lub Koom Txoos tej tsab cai, tej luag hauj lwm pov thawj hwj, thiab tej txheej txheem ua kab ke, kev tshwm sim no hais txog tej lus qhuab qhia tseem ceeb. Thaum koj nyeem thawj 36 nqe ntawm kev tshwm sim no, nug koj tus kheej tias tej lus qhuab qhia no yog dab tsi. Tej zaum koj yuav xav sau ntawv txog tej yam tseeb ntawm txoj moo zoo uas koj nrhiav tau. Piv txwv hais tias:

• Phau Ntawv Maumoos thiab txoj Kev Muab txoj Moo Zoo Txum Tim Rov Qab Los (nqe 8–12)

• Vajtswv zoo li cas (nqe 17–19)

• Yexus Khetos txoj Kev Theej Txhoj (nqe 20–27)

Vim li cas tej lus tseeb no tseem ceeb qhia thaum tab tom txhim tsa lub Koom Txoos?

Lus Qhuab Qhia thiab Kev Khi Lus 20:37, 75–79

Cov kab ke dawb ceev yeej tseem ceeb rau lub Koom Txoos uas tau muab txum tim rov qab los.

Thaum tab tom txhim tsa lub Koom Txoos, tus Tswv qhia Nws Haiv Neeg Ntseeg txog cov kab ke dawb ceev, tsis hais kev cai raus dej thiab lub cim nco txog los yog. Thaum koj nyeem tej lus qhia “ntsig txog tus txheej txheem ua kev cai raus dej” nyob hauv nqe 37, cia li xav txog thaum koj ua kev cai raus dej. Koj puas tau muaj tej kev xav zoo li hais nyob hauv nqe no? Koj puas muaj tej kev xav zoo li ntawd tam sim no? Cia li xav seb koj yuav ua li cas kom koj “muaj kev txiav txim siab yuav ua hauj lwm rau nws kom txog thaum kawg” txhua lub sij hawm.

Thaum koj nyeem txog lub cim nco txog nyob hauv Lus Qhuab Qhia thiab Kev Khi Lus 20:75–79, sim nyeem tej lus thov Vajtswv foom koob hmoov rau lub cim nco txog zoo li yog thawj zaug uas koj hnov tej lus no. Koj kawm dab tsi txog lub cim nco txog? txog koj tus kheej? Tej yam uas koj kawm no puas hloov koj txoj kev npaj txais lub cim nco txog lub lim tiam no?

ib tug dikas muab lub Cim Nco Txog

Kev txais lub cim nco txog yog ib txoj kab ke dawb ceev.

Lus Qhuab Qhia thiab Kev Khi Lus 20:38–60

Kev siv lub pov thawj hwj pab lwm tus foom koob hmoov rau cov mej zeej ntawm lub Koom Txoos thiab lawv tsev neeg.

Yog leej twg hais kom koj qhia txog tej dej num ntawm ib tug uas tuav lub pov thawj hwj, ces koj yuav hais li cas? Cia li nyeem Lus Qhuab Qhia thiab Kev Khi Lus 20:38–60, uas sau txog tej dej num ntawm lub pov thawj hwj tej luag hauj lwm. Puas muaj dab tsi hauv tej nqe no uas hloov tej yam koj xav txog tej dej num pov thawj hwj thiab tus Cawm Seej txoj kev ua Nws txoj hauj lwm? Koj tau koob hmoov li cas los ntawm tej hauj lwm uas piav txog hauv tej nqe no?

Yog xav kawm txog qhov uas cov poj niam siv txoj cai pov thawj hwj li cas thaum ua hauj lwm hauv lub Koom Txoos, cia li saib Dallin H. Oaks, “Cov Yawm Sij thiab txoj Cai ntawm lub Pov Thawj Hwj,” Ensign los sis Liahona, Tsib Hlis Ntuj 2014, 49–52.

Lus Qhuab Qhia thiab Kev Khi Lus 21

Ib tug yaj saub uas muaj txoj sia nyob coj Yexus Khetos lub Koom Txoos.

Koj kawm dab tsi los ntawm phau Lus Qhuab Qhia thiab Kev Khi Lus 21:4–9 txog tus Tswv cov yaj saub tej lus? Cia li xav txog tej lus cog tseg nyob hauv nqe 6 rau cov uas txais tus Tswv tej lus los ntawm Nws cov yaj saub. Koj xav li cas txog tej lus cog tseg no?

Koj yuav ua li cas kom txais tus yaj saub txoj lus “zoo ib yam li los kiag ntawm [Vajtswv] lub qhov ncauj los”? (nqe 5). Tus yaj saub hauv lub caij nyoog no tau hais kom peb ua dab tsi kom peb txais tau cov koob hmoov uas tus Tswv cog lus nyob hauv nqe 6?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 20.Peb yuav hais li cas yog tias leej twg nug peb seb vim li cas peb yuav tsum muaj lub Koom Txoos? Peb nrhiav tau tej lus teb twg hauv phau Lus Qhuab Qhia thiab Kev Khi Lus 20? Kuj saib D. Todd Christofferson, “Vim Li Cas lub Koom Txoos,” Ensign los sis Liahona, Kaum Ib Hlis Ntuj 2015, 108–11.

Lus Qhuab Qhia thiab Kev Khi Lus 20:69.Lub ntsiab ntawm cov lus “taug kev dawb huv rau tus Tswv pom” yog dab tsi? Tej zaum yuav zoo kom nej tsev neeg kos duab los sis sau ntawv txog tej yam uas yuav pab lawv taug kev dawb huv los yog tej yam uas yuav tab kaum lawv kom tsis txhob ua li ntawd. Ces tej zaum lawv yuav xav siv tej nplooj ntawv ntawd tsim ib txoj kev thiab sim taug txoj kev ntawd, tsuas tsuj tej nplooj ntawv uas sau txog tej yam uas yuav pab lawv mus cuag Khetos xwb.

Lus Qhuab Qhia thiab Kev Khi Lus 20:37, 71–74.Yog muaj neeg hauv nej tsev neeg uas tseem tsis tau ua kev cai raus dej, tej nqe no tej zaum yuav pab nej sib tham txog qhov uas yuav tsum ua li cas kom npaj ua kev cai raus dej (saib nqe 37) yus ua li cas thaum ua kev cai raus dej (saib nqe 71–74). Tej zaum nej tsev neeg ib leeg yuav xav qhia ib leeg txog tej yam lawv nco txog hnub uas lawv ua kev cai raus dej los yog saib daim duab txog hnub ntawd.

Lus Qhuab Qhia thiab Kev Khi Lus 20:75–79.Nej tsev neeg yuav siv tej nqe no li cas kom npaj saib lub cim nco txog rau nqi thiab nyob tswm seeb thaum txais lub cim nco txog? Tej nqe no yuav qhia nej txog tej yam uas zoo rau nej xav txog thaum txais lub cim nco txog, thiab tej zaum nej tsev neeg yuav xav nrhiav daim duab los yog kos duab txog tej yam ntawd. Yog tsim nyog ua, nqe tej daim duab ntawd rau kev sib ntsib txais lub cim nco txog kom nco txog tej yam uas zoo xav txog thaum txais lub cim nco txog.

Lus Qhuab Qhia thiab Kev Khi Lus 21:4–7.Tej zaum nej tsev neeg yuav xav nrhiav tej lus thiab tej kab lus nyob hauv nqe 4–5 uas qhia peb txog kev coj raws li tus Tswv tus yaj saub. Qhov hais tias yus txais tus yaj saub txoj lus nrog tag nrho txoj kev ua siab ntev txhais li cas? nrog kev ntseeg nev? Thaum twg peb tau txais cov koob hmoov uas tus Tswv cog lus tseg hauv nqe 6?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “The Church of Jesus Christ,” Children’s Songbook, 77.

Kev Qhia Zoo Dua Ntxiv

Coj yam ntxwv raws li tus Cawm Seej lub neej. “Tus Cawm Seej lub hwj chim qhia thiab txhawb nqa lwm tus twb los ntawm Nws txoj kev ua neej thiab qhov uas Nws yog ib tug neeg zoo li cas. Yog koj rau siab sim ua neej ib yam li Yexus Khetos, ces koj haj yam yuav txawj qhia zoo li Nws” (Teaching in the Savior’s Way, 13).

Oliver Cowdery muab Joseph Smith tsa

Olivery Cowdery Muab Joseph Smith Tsa, los ntawm Walter Rane