Yexus sawv thaum cov neeg txhos caug

Txhua lub Hauv Caug Yuav Txhos, los ntawm J. Kirk Richards

Peb Hlis Ntuj 22–28

Lus Qhuab Qhia thiab Kev Khi Lus 29

Yexus Khetos Yuav Muab Nws Haiv Neeg Sau Los Ua Ke

Ib lub hom phiaj ntawm kev kawm vaj lug kub yog kom kawm cov lus qhuab qhia, los sis tej yam tseeb ntawm txoj moo zoo uas tseem ceeb rau peb txoj kev cawm seej. Thaum koj kawm txog phau Lus Qhuab Qhia thiab Kev Khi Lus 29 lub lim tiam no, cia li nrhiav tej lus qhuab qhia uas muaj nqis rau koj.

Sau Ntawv txog Koj tej Kev Tshoov Siab

Txawm yog tau muab Yexus Khetos lub Koom Txoos txhim tsa thaum xyoo 1830, muaj ntau yam tseeb ntawm txoj moo zoo uas tsis tau muab tshwm sim, thiab ib txhia cov mej zeej hauv lub Koom Txoos muaj tej lus nug. Lawv twb nyeem tej lus qhia tej uas yuav muaj los yav tom ntej hauv Phau Ntawv Maumoos txog kev muab Ixayees sib sau ua ke thiab kev muab Xi-oos tsa (saib 3 Nifais 21). Yuav ua li cas kom muaj li ntawd? Tej kev tshwm sim uas Hiram Page hais tias nws tau txais twb hais txog qhov no, uas ua rau cov mej zeej xav paub ntxiv (saib Lus Qhuab Qhia thiab Kev Khi Lus 28). Lwm tus neeg xav paub txog Adas thiab Evas txoj Kev Poob thiab kev tuag ntawm sab ntsuj plig. Tus Tswv zoo siab txais tej lus nug no thaum xyoo 1830: Nws tau hais rau Haiv Neeg Ntseeg tias, “Txhua yam uas nej yuav thov nrog txoj kev ntseeg, koom siab thov Vajtswv raws li kuv txoj kev txib, ces nej yuav tau txais.” (Lus Qhuab Qhia thiab Kev Khi Lus 29:6). Thiab nws zoo siab txais peb tej lus nug niaj hnub no; Nws tsuas tos kom peb thov Nws xwb. Muaj tseeb tiag, ib yam li kev tshwm sim uas muaj cov lus qhuab qhia zoo hais nyob hauv phau Lus Qhuab Qhia thiab Kev Khi Lus 29, tej lub sij hawm Nws teb thaum Nws qhia qhov tseeb thiab kev txawj ntse uas ntau dua li tej yam uas tau nug ua ntej.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 29

Leej Txiv Saum Ntuj Ceeb Tsheej tau npaj ib txoj hau kev zoo tag nrho kom peb txais tau kev tsa nto.

Lus Qhuab Qhia thiab Kev Khi Lus 29 qhia ntau yam tseeb txog Vajtswv txoj hau kev rau Nws cov me nyuam. Thaum koj nyeem, cia li nrhiav tej yam tseeb uas koj kawm txog tej yam ntawm txoj hau kev no:

• Lub neej ua ntej yug los hauv ntiaj teb (saib nqe 36–37)

• Kev tsim ntuj tsim teb (saib nqe 31–33)

• Adas thiab Evas txoj Kev Poob (saib nqe 40–41)

• Lub neej hauv ntiaj teb (saib nqe 39, 42–45)

• Yexus Khetos txoj Kev Theej Txhoj (saib nqe 1, 42–43, 46–50)

• Kev Sawv Rov Los (saib nqe 13, 26)

• Kev Txiv Txim Zaum Kawg (saib nqe 12–13, 27–30)

Koj tau kawm tej yam tshiab twg? Koj lub neej yuav txawv li cas yog tias koj tsis tau paub txog tej yam tseeb no?

Koj kawm tau ntxiv txog Leej Txiv Saum Ntuj Ceeb Tsheej txoj hau kev nyob hauv “Txoj Kev Cawm Seej” (Qhia Kuv txoj Moo Zoo: Phau Ntawv Qhia Kev Ua Tub Txib Qhia txoj Moo Zoo, phau uas kho [2018], ChurchofJesusChrist.org/manual/missionary).

Lus Qhuab Qhia thiab Kev Khi Lus 29:1–8

Yexus Khetos yuav muab Nws haiv neeg sau los ua ke ua ntej Nws txoj Kev Los Zaum Ob.

Yexus Khetos hais txog qhov uas Nws yuav muab Nws haiv neeg sau los ua ke “zoo ib yam li ib tug poj qaib sau nws cov me nyuam los rau hauv nws ob sab tis” (Lus Qhuab Qhia thiab Kev Khi Lus 29:2). Kev xav li no qhia dab tsi rau koj txog tus Cawm Seej txoj kev xav muab nej sau los ua ke? Thaum koj nyeem phau Lus Qhuab Qhia thiab Kev Khi Lus 29:1–8, nrhiav tej lub tswv yim txog vim li cas peb sib sau ua ke, leej twg yuav sib sau, thiab peb yuav ua li cas kom pab cov uas “Vajtswv xaiv tseg” sau los ua ke (nqe 7).

Nyob hauv peb lub caij nyoog, kev sib sau hauv Xi-oos txhais tias peb koom ua ke hauv tej ceg txheem ntseeg ntawm Xi-oos nyob thoob plaws lub ntiaj teb. Qhov uas peb Haiv Neeg Ntseeg sib sau ua ke pab peb li cas kom “npaj txhua yam” rau tej kev tsim txom uas yuav los ua ntej tus Cawm Seej txoj Kev Los Zaum Ob? (nqe 8; kuj saib nqe 14–28).

Kuj saib Tej Nqe Kev Ntseeg 1:10; Russell M. Nelson thiab Wendy W. Nelson, “Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018, ChurchofJesusChrist.org).

tus poj qaib thiab cov me nyuam qaib

Pes Tsawg Zaus, los ntawm Liz Lemon Swindle

Lus Qhuab Qhia thiab Kev Khi Lus 29:31–35

“Kuv pom tias txhua yam yog ntawm sab ntsuj plig.”

Yog vim li cas txhua txoj lus txib yog ntawm sab ntsuj plig? Qhov uas koj paub tias txhua txoj lus txib yog ntawm sab ntsuj plig qhia dab tsi rau koj txog vim li cas muaj cov lus txib? Tej zaum koj yuav xav sau ob peb txoj lus txib thiab xav txog tej ntsiab cai ntawm sab ntsuj plig uas muaj feem nrog tej lus txib ntawd.

Tej yam twg huav hloov yog tias koj xav txog lub ntsiab ntawm sab ntsuj plig nyob hauv tej yam uas koj ua txhua hnub, tsis hais tej yam uas yog ntawm sab cev nqaij daim tawv los yog tej yam tsis tshua tseem ceeb?

Kuj saib Loos 8:6; 1 Nifais 15:30–32.

Lus Qhuab Qhia thiab Kev Khi Lus 29:36–50

Yexus Khetos txhiv peb dim txoj Kev Poob.

Kev tshwm sim no pib thaum tus Tswv qhia tias Nws yog peb tus Txhiv Dim, tus uas tau “theej txhoj rau [peb] tej kev txhaum” (nqe 1). Kev tshwm sim no piav ntxiv txog qhov uas vim li cas peb yuav tsum muaj ib tug Txhiv Dim. Cia li xav seb koj yuav siv nqe 46–50 li cas kom piav tias vim li cas peb yuav tsum muaj kev txhiv dim uas los ntawm peb tus Cawm Seej Yexus Khetos. Nyob hauv ntau txoj kev teev ntuj, txoj Kev Poob yog ib yam tu siab kawg; koj nrhiav tau dab tsi hauv tej nqe no uas qhia txog tej yam zoo uas tau los ntawm txoj Kev Poob? (Kuj saib 1 Kauleethaus 15:22; 2 Nifais 2:6–8, 15–29; Mauxiyas 3:1–19; Mauxes 5:9–12.)

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 29.Tej zaum nej yuav xav siv cov duab ntawm qhov xaus tus txheej txheem qhia no nrog rau phau Lus Qhuab Qhia thiab Kev Khi Lus 29 kom qhia nej tsev neeg txog txoj hau kev cawm seej. Piv txwv hais tias, nej tsev neeg kawm tau txog tej feem ntawm txoj hau kev thaum lawv nyeem thiab sib tham txog tej nqe uas tau hais no. Lawv nrhiav tau tej yam tseeb ntxiv nyob hauv Gospel Topics (topics.ChurchofJesusChrist.org) los sis Phau Qhia txog Vaj Lug Kub (scriptures.ChurchofJesusChrist.org). Sau tej yam uas koj kawm tau. Vim li cas peb ris Vajtswv txiaj vim peb paub txog txoj hau kev cawm seej? Qhov uas peb paub txog qhov no ua rau peb hloov peb lub neeej li cas?

Lus Qhuab Qhia thiab Kev Khi Lus 29:2, 7–8.Qhov uas tus Cawm Seej muab peb sau los ua ke txhais tau li cas? Peb yuav ua li cas kom pab Nws muab cov uas Vajtswv xaiv tseg sau los ua ke?

Lus Qhuab Qhia thiab Kev Khi Lus 29:3–5.Peb kawm dab tsi txog tus Cawm Seej hauv tej nqe no uas pab peb “zoo siab thiab xyiv fab”? (nqe 5). Daim video hu ua “We Can Find Happiness” (ChurchofJesusChrist.org) tej zaum yuav pab nej sib tham txog qhov uas vim nej tsev neeg paub txog txoj hau kev cawm seej ces ua rau nej tsev neeg zoo siab.

Lus Qhuab Qhia thiab Kev Khi Lus 29:34–35.Tej zaum qhov uas nej tsev neeg nyeem tej nqe no yuav ua rau nej muaj cib fim sib tham txog vim li cas tej lus txib thiab cov yaj saub tej lus qhia pab nej sab ntsuj plig. Piv txwv hais tias, vim li cas tus Tswv xav kom peb tsev neeg nyeem vaj lug kub ua ke? Peb tau txiaj ntsim twg ntawm sab ntsuj plig vim peb tau ua raws li cov lus txib?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Ixayees, Vajtswv Hu Nej,” Cov Nkauj Qhuas Vajtswv, zaj 6.

Kev Qhia Zoo Dua Ntxiv

Nrhiav Yexus Khetos Cov vaj lug kub qhia peb tias tag nrho tej yam uas Vajtswv tsim ua tim khawv txog Yexus Khetos (saib Mauxes 6:62–63), yog li ntawd nrhiav Nws thaum koj nyeem vaj lug kub. Xav seb koj puas sau lub cim rau tej nqe uas qhia txog Nws.

txoj hau kev cawm seej