“Peb Hlis Ntuj 8–14. Lus Qhuab Qhia thiab Kev Khi Lus 23–26: ‘Txhawb cov Ntseeg,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Peb Hlis Ntuj 8–14. Lus Qhuab Qhia thiab Kev Khi Lus 23–26,” Los, Nrog Kuv Mus—Rau Ib Leeg thiab Tsev Neeg: 2021
Peb Hlis Ntuj 8–14
Lus Qhuab Qhia thiab Kev Khi Lus 23–26
“Txhawb cov Ntseeg”
Thaum koj nyeem phau Lus Qhuab Qhia thiab Kev Khi Lus 23–26, sau lus cim txog tej kev tshoov siab uas koj txais los ntawm tus Vaj Ntsuj Plig Dawb Huv. Koj yuav ua li cas siv tej lus qhia hauv tej kev tshwm sim no kom txhawb nqa koj txoj kev ua thwj tim thiab txhawb cov Ntseeg lub zog?
Sau Ntawv txog Koj tej Kev Tshoov Siab
Tom qab uas tau muab lub Koom Txoos txhim tsa, Haiv Neeg Ntseeg tau muaj ib qho teeb meem tshiab—lawv yuav tsum tshaj tawm txoj moo zoo thiab txhawb cov neeg uas twb koom lub Koom Txoos lawm, thaum uas lawv tseem raug kev tsim txom. Emma Smith twb pom kev tawm tsam no nws tus kheej. Thaum lub Rau Hli Ntuj 1830, Emma thiab cov neeg hauv tsev neeg Knight xav ua kev cai raus dej. Tiam sis lub Koom Txoos cov yeeb ncuab tau sim cuam tshuam lub sij hawm dawb ceev no. Thaum xub thawj lawv ua rau chaw tauv dej puas tsuaj, chaw tauv dej uas lawv siv kom dej tob txaus ua kev cai raus dej. Tom qab tau kho chaw tauv dej, cov uas tawm tsam sib sau ua ke qw nrov hais lus hem thiab thuam cov uas ua kev cai raus dej. Ces, thaum Joseph yuav muab cov mej zeej tshiab ua kev pom zoo, nws raug ntes vim lawv hais tias nws ua rau lawv zej zog ntxhov siab vim nws qhia txog Phau Ntawv Maumoos. Zoo li yog qhov chiv keeb uas tsis tshua zoo rau tus Tswv lub Koom Txoos uas nyuam qhuav muab txum tim rov qab los. Tiam sis thaum muaj kev ntxhov siab txhawj xeeb li no, tus Tswv hais tej lus uas muaj nqis qhia thiab txhawb nqa lawv, uas yog Nws “lub suab los mus rau sawv daws” (Lus Qhuab Qhia thiab Kev Khi Lus 25:16).
Kuj saib Saints, 1:89–90, 94–97.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 23–26
Kuv muaj peev xwm pab txhawb nqa tus Tswv cov Ntseeg.
Hnub no, yuav luag 200 xyoo tom qab tau muab lub Koom Txoos txhim tsa, peb tseem yuav tsum “txhawb cov ntseeg” (Lus Qhuab Qhia thiab Kev Khi Lus 23:3–5). Thiab txoj hauj lwm no tsis yog rau Joseph Smith, Oliver Cowdery, los sis peb lub Koom Txoos cov thawj coj xwb—yog ib txoj hauj lwm rau peb txhua tus. Thaum koj kawm phau Lus Qhuab Qhia thiab Kev Khi Lus 23–26, cia li xav txog tej lus qhia uas tus Tswv hais rau cov mej zeej ntawm lub Koom Txoos thaum ntawd kom pab lawv txhawb cov Ntseeg. Koj xav tias tus Tswv xav kom koj ua dab tsi kom koom tes ua li no?
Lus Qhuab Qhia thiab Kev Khi Lus 24
Tus Cawm Seej muaj peev xwm “tshem koj tawm hauv [kuv] tej kev txom nyem.”
Qhov uas Joseph Smith coj lub Koom Txoos thaum raug kev tsim txom loj heev nyaj yog ib qho nyuaj heev rau nws. Nrhiav tus Tswv tej lus txhawb nqa nws nyob hauv phau Lus Qhuab Qhia thiab Kev Khi Lus 24.
Tej nqe vaj lug kub qhia dab tsi rau koj txog qhov uas tus Cawm Seej ua li cas kom tshem koj tawm hauv koj tej kev txom nyem?
Lus Qhuab Qhia thiab Kev Khi Lus 24:1–3
Lus Qhuab Qhia thiab Kev Khi Lus 24:8
Lus Qhuab Qhia thiab Kev Khi Lus 121:7–8
Yexus Khetos tau ua li cas kom txhawb nqa koj thaum muaj kev txom nyem? Koj yuav ua li cas kom nrhiav Nws txoj kev pab thaum muaj sij hawm nyuaj siab?
Nws Kho Neeg Coob cov uas Nyias Ruag Nyias Mob, los ntawm J. Kirk Richards
Lus Qhuab Qhia thiab Kev Khi Lus 25
Emma Smith yog “ib tug poj niam uas tau xaiv tseg.”
Thaum Emma Hale yuav Joseph Smith, nyaj nws paub tias nws yuav tsum tso ntau yam tseg. Nws tsis ua raws li nws txiv lub siab nyiam thiab nws tso nws lub neej xis nyob tseg kom muaj ib lub neej uas paub tsis meej yuav zoo li cas. Tej zaum nws xav paub tias tus Tswv xav kom nws ua dab tsi thaum nws ua hauj lwm pab Muab txoj Moo Zoo Txum Tim Rov Qab Los. Nrhiav tej lus teb uas tus Tswv tau hais nyob hauv Lus Qhuab Qhia thiab Kev Khi Lus 25. Nco txog tus Tswv tej lus nyob hauv nqe 16—koj puas nrhiav tau ib yam dab tsi hauv tshooj no uas koj xav tias yog Nws “lub suab los mus rau [koj]”?
Kuj saib “An Elect Lady” (video, ChurchofJesusChrist.org); “Thou Art an Elect Lady,” Revelations in Context, 33–39; Joy D. Jones, “Ib txoj Hauj Lwm Muaj Hwj Chim Heev,” Ensign los sis Liahona, Tsib Hlis Ntuj 2020, 15–18.
Lus Qhuab Qhia thiab Kev Khi Lus 26:2
Sawv daws pom yeem yog dab tsi?
Thaum cov mej zeej txais kev hu los yog muab lawv tsa rau lub pov thawj hwj hauv lub Koom Txoos, peb muaj cib fim txhawb nqa pom zoo rau lawv thaum peb tsa tes. Lub ntsiab cai ntawm txoj kev txhawb nqa tab meeg sawv daws thiab kev pom zoo hu ua sawv daws pom yeem. Raws li Thawj Tswj Hwm Gordon B. Hinckley qhia tias, “Tus txheej txheem txhawb nqa pom zoo tsis yog kev tsa tes raws li kab ke qhia xwb. Yog kev cog lus tias yus yuav txhawb nqa, thiab pab cov uas Vajtswv tau xaiv tseg” (“This Work Is Concerned with People,” Ensign, Tsib Hlis Ntuj 1995, 51).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 23:6.Vim li cas tus Tswv xav kom peb thov Vajtswv “nyob hauv [peb] tsev neeg, thiab thaum nrog [peb] tej phooj ywg, thiab nyob txhua qhov chaw”? Zaj nkauj “Love Is Spoken Here” (Children’s Songbook, 190)—los sis lwm zaj nkauj txog kev thov Vajtswv—qhia dab tsi rau peb txog lub hwj chim ntawm kev thov Vajtswv?
Kuj saib 2 Nifais 32:8–9; 3 Nifais 18:18–23.
-
Lus Qhuab Qhia thiab Kev Khi Lus 24:8.Puas pab nej tsev neeg yog nej sib tham txog lub ntsiab ntawm kev “ua siab ntev rau tej kev txom nyem.” Yog nej muaj me nyuam yaus, tej zaum yuav lom zem yog nej rov qab ua qhov uas Thawj Tswj Hwm Dieter F. Uchtdorf piav txog nyob hauv “Continue in Patience” (Ensign los sis Liahona, Tsib Hlis Ntuj 2010, 56; kuj saib daim video nyob ntawm ChurchofJesusChrist.org). Phau Lus Qhuab Qhia thiab Kev Khi Lus 24:8 qhia dab tsi rau peb txog kev ua siab ntev? Tus Tswv pab peb li cas kom ua siab ntev thaum muaj kev txom nyem?
-
Lus Qhuab Qhia thiab Kev Khi Lus 25:11–12.Tej zaum nej yuav xav hu zaj nkauj qhuas Vajtswv uas txhua tus hauv nej tsev neeg nyiam thiab sib tham txog qhov uas vim li cas zaj ntawd yog nws “zaj nkauj uas tawm hauv nruab siab los.” Vim li cas tej zaj nkauj no yeej zoo li ib “zaj lus thov rau [Vajtswv]”?
-
Lus Qhuab Qhia thiab Kev Khi Lus 26:2.Tej zaum yuav pab nej yog nej nyeem “Sawv Daws Pom Zoo” nyob hauv Phau Qhia txog Vaj Lug Kub (scriptures.ChurchofJesusChrist.org). Peb ua li cas kom qhia peb cov thawj coj tias peb txhawb nqa lawv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Lift Up Your Voice and Sing,” Children’s Songbook, 252 (saib “Tej lub Tswv Yim rau Tsev Neeg Kev Kawm Vaj Lug Kub”).
Tej lub Suab ntawm Kev Muab txoj Moo Zoo Txum Tim Rov Qab Los
Emma Hale Smith
Tus Tswv tej lus rau Emma Smith uas sau hauv phau Lus Qhuab Qhia thiab Kev Khi Lus 25 qhia tias Nws xav li cas txog Emma thiab tej yam uas Emma yuav ua kom pab Nws txoj hauj lwm. Tiam sis Emma zoo li cas? Peb paub dab tsi txog nws tus xeeb ceem, nws tej kev sib raug zoo, tej yam nws txawj ua? Ib txoj kev uas peb thiaj yuav paub “tus poj niam uas xaiv tseg” no (Lus Qhuab Qhia thiab Kev Khi Lus 25:3) yog kev nyeem tej lus ntawm cov neeg uas paub nws zoo.
Emma Smith, los ntawm Lee Greene Richards
Joseph Smith tus Hluas, nws tus txiv
“Zoo siab kawg, thiab ua rau kuv lub siab xyiv fab kawg nkaus, thaum kuv tuav nws tes, hmo ntawd, kuv tus me Emma—hmo uas nws yog kuv tus poj niam, tus poj niam uas kuv yuav thaum kuv hluas, thiab tus uas kuv lub siab xaiv. Kuv xav mus xav los ntau heev thaum kuv xav ib me pliag txog tej yam nyuaj uas Vajtswv twb tau hu wb kom dhau mus. Tej kev mob kev nkees, kev nyuaj siab thiab kev txom nyem, thiab kev xyiv fab thiab kev nplij siab uas ib lub sij hawm dhau sij hawm uas hla wb kev thiab ua rau peb tau txiaj ntsim. Auj! kuv lub siab xav ub xav no thaum lub sij hawm ntawd, es nws tseem nyob no, txawm yog kuv raug teeb meem thib xya los, nws nyob ruaj khov kho, tsis ua xyem xyav, tsis hloov, tus uas muaj siab hlub tshua Emma.”1
Lucy Mack Smith, nws tus txiv niam
“Thaum ntawd nws hluas heev, thiab vim nws mob siab heev, nws ua tus Tswv tej hauj lwm kawg siab kawg ntsws, thiab nws tsis muaj siab xav txog dab tsi tsuas yog lub koom txoos thiab qhov tseeb. Nws txhais tes ua li cas los, nws yeej siv zog ua thiab tsis tau nug txoj lus qia dub no ‘Kuv puas yuav txais tau txiaj ntsim loj tshaj lwm tus?’ Yog tias tau txib cov txwj laug mus qhia txoj moo zoo, nws yog thawj tus uas tau pub dawb pab ua khaub ncaws rau lawv, tsis hais nws tus kheej tau raug txom nyem los yog.”2
“Kuv yeej ib txwm tsis tau pom ib tug poj niam, uas kam raug txhua yam kev mob kev nkees thiab teeb meem, ib hli dhau ib hli, ib xyoo dhau ib xyoo, uas ua siab loj, rau siab thiab ua siab ntev tsis tu tsis tseg, li nws yeej ib txwm tau ua; vim kuv paub txog tej yam uas nws tau nyiaj lawm; paub tias zoo li nws raug tshoob mus ntawm kev tsis paub yav tom ntej; nws tau nyiaj kom dhau thaum nws raug cua daj cua dub ntawm kev tsim txom, thiab nyob khov kho thaum tib neeg thiab dab phem chim siab, mus txog thaum nws raug kev nyuaj siab ntxhov plawv uas ntshe yuav kov yeej lwm tus poj niam.”3
Joseph Smith tus Laus, nws tus txiv leej txiv
Tus yawg suab txoj koob hmoov rau Emma, Joseph Smith tus Laus yog tus uas hais, thaum ntawd nws yog tus yawg suab ntawm lub Koom Txoos:
“Emma, kuv tus tub tus poj niam, tus Tswv tau foom koob hmoov rau koj, rau koj txoj kev rau siab ntseeg thiab qhov tseeb yog li no: koj yuav tau koob hmoov nrog rau koj tus txiv, thiab xyiv fab vim nws yuav tau yeeb koob: Koj twb raug txom nyem heev vim tias neeg phem xav ua kom koj tus khub ua puas tsuaj, thiab koj twb thov Vajtswv kawg siab kawg ntsws kom nws dim: cia li xyiv fab, vim tus Tswv koj tus Vajtswv tau hnov koj tej lus thov.
“Koj tau raug kev tu siab vim koj txiv tsev neeg ua lub siab tawv, thiab koj xav xav kom lawv txais kev cawm seej. Tus Tswv yuav saib taus koj tej lus thov, thiab los ntawm nws tej kev txiav txim nws yuav ua kom ib txhia pom tias lawv ua txhaum thiab hloov siab lees txim, tiam sis yog los ntawm kev txom nyem lawv thiaj li yuav txais kev cawm seej. Koj yuav nyob mus txog thaum koj laus; muaj tseeb tiag, tus Tswv yuav cia koj nyob mus txog thaum koj txaus siab, vim koj yuav pom koj tus Txhiv Dim. Koj lub siab yuav xyiv fab vim tus Tswv txoj hauj lwm zoo kawg nkaus, thiab yuav tsis muaj leej twg tshem tau koj txoj kev xyiv fab.
“Koj yuav nco ntsoov qhov uas koj tus Vajtswv tau foom koob hmoov rau koj kom koj nyob nrog kuv tus tub thaum tus tim tswv muab cov Neeg Nifais cov ceev xwm txheej rau nws saib xyuas. Koj twb raug kev nyuaj siab ntau vim tus Tswv tau muab koj peb tug me nyuam coj mus: hais txog qhov no los koj tsis raug liam, vim nws paub txog koj txoj kev xav tu ib tse neeg, xwv kom kuv tus tub lub npe yuav tau koob hmoov. Thiab nim no, saib seb, kuv hais rau koj tias, tus Tswv hais li no tias, yog koj yuav ntseeg, koj yuav tau koob hmoov ua li no thiab koj yuav muaj me nyuam ntxiv, xwv kom koj yuav xyiv fab thiab txaus siab, thiab kom koj cov phooj ywg xyiv fab thiab.
“Koj yuav tau koob hmoov kom koj to taub, thiab yuav muaj hwj chim qhia tau lwm tus poj niam. Qhia koj tsev neeg txog kev ncaj ncees, thiab qhia cov me nyuam yaus txog txoj kev ua neej, thiab cov tim tswv dawb huv yuav saib xyuas koj, thiab koj yuav txais kev cawm seej nyob hauv Vajtswv lub nceeg vaj; twb yog li ntawd. Amees.”4
Emma Smith nrog nws cov me nyuam. Sij Hawm Luag, los ntawm Liz Lemon Swindle
Emma cov Nkauj Qhuas Vajtswv, los ntawm Liz Lemon Swindle