Joseph Smith

Peb Hlis Ntuj 15–21

Lus Qhuab Qhia thiab Kev Khi Lus 27–28

“Yuav Tsum Ua Txhua Yam Kom Raws Txheej Txheem”

Txwj Laug D. Todd Christofferson hais tias thaum koj kawm cov vaj lug kub thiab sau ntawv txog tej kev tshoov siab “koj yuav kho ib qho chaw rau hauv koj lub siab rau Vajtswv txoj lus, thiab nws yuav hais lus” (“When Thou Art Converted,” Ensign los sis Liahona, Tsib Hlis Ntuj 2004, 11).

Sau Ntawv txog Koj tej Kev Tshoov Siab

Kev tshwm sim tseem yog ib yam tshiab rau Haiv Neeg Ntseeg thaum tseem Muab txoj Moo Zoo Txum Tim Rov Qab Los. Cov mej zeej ntawm lub Koom Txoos thaum xub thawj paub tias tus Yaj Saub Joseph Smith txais tau kev tshwm sim rau lub Koom Txoos, tiam sis lwm tus txais puas tau? Tej lus nug zoo li no yeej tseem ceeb heev vim Hiram Page, ib tug ntawm Yim tus Tim Khawv uas pom cov phiaj kub, ntseeg tias nws tau txais kev tshwm sim rau lub Koom Txoos. Haiv Neeg Ntseeg uas rau siab ntseeg twb ntseeg tias tej kev tshwm sim no yog los ntawm Vajtswv. Tus Tswv teb thaum Nws qhia tias nyob hauv Nws lub Koom Txoos “yuav tsum ua txhua yam kom raws txheej txheem” (Lus Qhuab Qhia thiab Kev Khi Lus 28:13), uas txhais hais tias tsuas muaj ib tug uas tus Tswv tsa “los txais tej lus txib thiab tej kev tshwm sim” rau lub Koom Txoos tag nrho (Lus Qhuab Qhia thiab Kev Khi Lus 28:2). Txawm li ntawd los, lwm tus txais tau kev tshwm sim lawv tus kheej rau lawv txoj kev ua tus Tswv txoj hauj lwm. Muaj tseeb tiag, tus Tswv tej lus rau Oliver Cowdery ua rau peb txhua tus nco ntsoov tias: “Mam li qhia rau koj … saib koj yuav tsum ua dab tsi.” (Lus Qhuab Qhia thiab Kev Khi Lus 28:15).

Kuj saib “All Things Must Be Done in Order,” Revelations in Context, 50–53.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 27:1–4

Kuv yuav tau txais lub cim nco txog thaum kuv ntsia ntsoov rau Vajtswv lub yeeb koob.

Sally Knight thiab Emma Smith tau ua kev cai raus dej thaum lub Rau Hli Ntuj xyoo 1830, tiam sis ib pawg neeg phem tau meem txom thaum nkawd yuav txais kev pom zoo. Ob lub hlis tom qab ntawd, Sally thiab nws tus txiv, Newel, tau tuaj xyuas Emma thiab Joseph, thiab txiav txim siab tias yuav ua kev pom zoo thiab lawv sawv daws yuav txais lub cim nco txog ua ke. Thaum nws tab tom mus yuav cov cawv txiv hmab rau lub cim nco txog, ib tug tim tswv hais kom Joseph tsum. Tus tim tswv tau qhia dab tsi rau nws txog lub cim nco txog? (saib Lus Qhuab Qhia thiab Kev Khi Lus 27:1–4).

Tej nqe no qhia dab tsi rau koj txog qhov uas tus Cawm Seej xav kom koj ua li cas thaum koj txais lub cim nco txog? Koj txais kev tshoov siab ua dab tsi vim yog tej yam uas koj kawm?

cov mov mog thiab lub khob rau lub cim nco txog

Lub cim nco txog ua rau peb nco txog tus Cawm Seej txoj kev theej txhoj.

Lus Qhuab Qhia thiab Kev Khi Lus 27:15–18

Vajtswv tej cuab yeej tiv rog yuav pab kuv tawm tsam kev phem.

Thawj Tswj Hwm M. Russell Ballard hais tias: “Tsis muaj ib yam loj thiab tseem ceeb uas peb ua tau kom tiv thaiv peb tus kheej sab ntsuj plig. Lub hwj chim tseeb ntawm sab ntsuj plig yeej los ntawm tej yam me me uas xaws ua ke ua cov ntaub ntawm sab ntsuj plig uas tiv thaiv thiab pov hwm peb kom txhob raug kev phem” (“Be Strong in the Lord,” Ensign, Xya Hli Ntuj 2004, 8).

Thaum koj nyeem phau Lus Qhuab Qhia thiab Kev Khi Lus 27:15–18, tej zaum koj yuav xav tsim ib daim zoo li nram qab no. Koj ua li cas kom rau Vajtswv txhua lub cuab yeej tiv rog?

Cuab yeej tiv rog	Pov hwm lub cev	Lub cev piv txog dab tsi
Daim phiaj hauv siab ntawm kev ncaj ncees	Lub siab	Peb tej kev xav thiab cov uas peb hlub
Lub kaus mom ntawm txoj kev cawm seej	Lub taub hau los yog lub hlwb

Kuj saib Efexus 6:11–18; 2 Nifais 1:23.

Lus Qhuab Qhia thiab Kev Khi Lus 28

Tus yaj saub uas muaj txoj sia nyob yog tus uas hais Vajtswv txoj lus rau Nws lub Koom Txoos.

Cia li xav seb yuav zoo li cas yog tias leej twg txais tau tej lus txib thiab kev tshwm sim rau lub Koom Txoos tag nrho. Thaum Hiram Page hais tias nws tau txais kev tshwm sim li no, cov mej zeej hauv lub Koom Txoos tsis paub ua li cas. Nyob hauv phau Lus Qhuab Qhia thiab Kev Khi Lus 28, tus Tswv tau qhia txog ib tug txheej txheem rau kev tshwm sim nyob hauv lub Koom Txoos. Koj kawm dab tsi los ntawm tshooj no txog tus Thawj Tswj Hwm ntawm lub Koom Txoos lub luag hauj lwm? Koj kawm dab tsi los ntawm tus Tswv tej lus rau Olivery Cowdery nyob hauv nqe 3? Koj kawm dab tsi los ntawm tshooj no txog qhov uas Vajtswv coj tau koj li cas?

Kuj saib Dallin H. Oaks, “Two Lines of Communication,” Ensign los sis Liahona, Kaum Ib Hlis Ntuj 2010, 83–86.

Lus Qhuab Qhia thiab Kev Khi Lus 28:8–9

Vim li cas Oliver Cowdery ntiag tug hauj lwm mus qhia cov Neeg Lamas yog ib qho tseem ceeb?

Ib lub hom phiaj ntawm Phau Ntawv Maumoos yog “xwv kom cov Neeg Lamas yuav los mus paub txog lawv cov yawg koob, thiab xwv kom lawv yuav paub tus Tswv tej lus cog tseg” (Lus Qhuab Qhia thiab Kev Khi Lus 3:20). Lub hom phiaj no yeej sib haum nrog cov lus cog tseg uas tus Tswv hais rau cov yaj saub coob hauv Phau Ntawv Maumoos (saib, ua piv txwv, 1 Nifais 13:34–41; Enos 1:11–18; Hilamas 15:12–13). Cov mej zeej ntawm lub Koom Txoos thaum ntawd xav tias cov Neeg Qhab Amelikas yog co neeg hauv Phau Ntawv Maumoos cov xeeb leej xeeb ntxwv. (Lub Koom Txoos niaj hnub no hais tias cov Neeg Lamas ib co “yog cov neeg Qhab Amelikas cov poj koob yawm txwv” [zaj lus piav txog Phau Ntawv Maumoos].)

Yog xav nyeem ntxiv txog Oliver ntiag tug hauj lwm mus qhia tej pawg Neeg Qhab Amelikas uas nyob ze, saib “A Mission to the Lamanites” (Revelations in Context, 45–49). Ntiag tug hauj lwm no qhia dab tsi rau koj txog tus Tswv thiab Nws txoj hauj lwm?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 27:1–2.Peb yuav ua li cas kom nco ntsoov txog tus Cawm Seej txoj kev theej txhoj thaum peb txais lub cim nco txog?

Lus Qhuab Qhia thiab Kev Khi Lus 27:5–14.Peb paub dab tsi txog cov yaj saub nyob hauv tej nqe no? Tej zaum nej yuav xav nrhiav xov xwm txog lawv nyob hauv Phau Qhia txog Vaj Lug Kub (scriptures.ChurchofJesusChrist.org). Peb tau cov koob hmoov twg los ntawm tej yawm sij uas lawv tuav? Yog xav paub ntxiv txog tej yawm sij no ib txhia, cia li saib Mathais 16:16–19; Lus Qhuab Qhia thiab Kev Khi Lus 110:11–16.

Lus Qhuab Qhia thiab Kev Khi Lus 27:15–18.Tej zaum nej tsev neeg yuav nyiam ua txuj sib tua thaum hnav khaub ncaws ntxiv kom piv txog Vajtswv tej cuab yeej tiv rog, xws li kaus mom, tsho khuam, ntaub npua ua hauj lwm, los yog khau. Tej cuab yeej tiv rog pab pov hwm peb li cas thaum ntaus rog? Sib tham txog tej yam phem uas nej tsev neeg raug thiab tej yam uas nej ua tau kom rau tej cuab yeej tiv rog ntawm sab ntsuj plig. Xav seb koj puas qhib video “Put on the Whole Armor of God” rau lawv saib (ChurchofJesusChrist.org).

Lus Qhuab Qhia thiab Kev Khi Lus 28:2–7.Peb kawm dab tsi los ntawm tej nqe no txog qhov uas Vajtswv hu ib tug yaj saub? Tej zaum nej tsev neeg yuav xav nyeem tej zaj dhau los uas yog los ntawm peb tus yaj saub uas muaj txoj sia nyob thiab qhia tias nws tej lus ntuas pab peb coj raws li Yexus Khetos li cas.

Lus Qhuab Qhia thiab Kev Khi Lus 28:11.Thaum peb xav hais lus ntuas lwm tus, vim li cas yuav tsum ua thaum muaj “tsuas yog nws thiab koj xwb”?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Los, Mloog Ib tug Yaj Saub lub Suab,” Hymns, no. 9.

Kev Kawm Zoo Dua Ntxiv ntawm Yus Ib Leeg

Kawm cov yaj saub thiab cov tim thawj tej lus hauv hnub nyoog kawg no. Cia li nyeem txog tej yam uas cov yaj saub thiab cov tim thawj hauv hnub nyoog kawg tau qhia txog tej ntsiab cai uas koj nrhiav tau hauv cov vaj lug kub. Tej zaum koj yuav xav rov qab nyeem tej ntsiab lus hauv lub tuam rooj sab laj nyob ntawm conference.ChurchofJesusChrist.org los sis hauv qhov app Txoj Moo Zoo cov Ntawv.

Vajtswv tej cuab yeej tiv rog