tus mlom Khetos

Peb Hlis Ntuj 29–Plaub Hlis Ntuj 4

Easter

“Kuv Yog tus uas Muaj Sia Nyob, Kuv Yog tus uas Raug Tua Tuag”

Thaum koj npaj ua koob tsheej txog tus Cawm Seej txoj Kev Sawv Rov Los thaum hnub Easter Sunday, cia li xav txog qhov uas kev tshwm sim hauv hnub nyoog no tau pab koj ntseeg tias Yexus Khetos yog Vajtswv Tib Leeg Tub thiab tus Txhiv Dim ntawm lub ntiaj teb.

Sau Ntawv txog Koj tej Kev Tshoov Siab

Plaub Hlis Ntuj 3, 1836, yog hnub Xya Easter. Tom qab tau muab lub cim nco txog rau Haiv Neeg Ntseeg uas sib sau ua ke hauv lub Tuam Tsev Kirtland, uas nyuam qhuav muab fij tseg lawm, Joseph Smith thiab Oliver Cowdery nrhiav tau ib qho chaw ntsiag to nyob daim ntaub thaiv sab nraud hauv lub tuam tsev thiab txhos caug thov Vajtswv. Ces, txog hnub dawb huv thaum cov Ntseeg Khetos nyob thoob plaws ua koob tsheej txog Yexus Khetos txoj Kev Sawv Rov Los, tus Cawm Seej uas sawv rov los tau tshwm sim rau hauv Nws lub tuam tsev, hais tias, “Kuv yog tus uas muaj sia nyob, kuv yog tus uas raug tua tuag” (Lus Qhuab Qhia thiab Kev Khi Lus 110:4).

Qhov uas peb hais tias Yexus Khetos yog “tus uas muaj sia nyob” txhais li cas? Qhov no tsis txhais tias Nws tau sawv los tawm lub ntxa thaum hnub peb thiab tshwm sim rau Nws cov thwj tim hauv Kalilais pom xwb. Qhov no txhais tias Nws muaj sia nyob niaj hnub no. Nws hais lus los ntawm cov yaj saub niaj hnub no. Nws coj Nws lub Koom Txoos niaj hnub no. Nws kho neeg mob thiab lub siab uas puas tas niaj hnub no. Yog li ntawd peb thiaj li hais tau zoo li Joseph Smith zaj lus tim khawv hais tias: “Tom qab tej lus tim khawv ntau uas tau hais txog nws lawm, zaj no yog zaj lus tim khawv … uas wb hais txog nws: Hais tias nws muaj txoj sia nyob!” (Lus Qhuab Qhia thiab Kev Khi Lus 76:22). Peb hnov tau Nws lub suab nyob hauv tej kev tshwm sim no. Peb pom tau Nws txoj kev pab nyob hauv peb lub neej. Thiab peb hnov tau kev “zoo siab [uas] cov lus no hais tias: ‘Kuv paub Yexus tseem muaj txoj sia!’” (Cov Nkauj Qhuas Vajtswv, zaj 53).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 29:5; 38:7; 62:1; 76:11–14, 20–24; 110:1–10

Yexus Khetos muaj txoj sia nyob.

Muaj ob peb zaug uas tus Yaj Saub Joseph Smith tau pom tus Cawm Seej uas sawv rov los, thiab ob zaug los twb sau cia rau hauv phau Lus Qhuab Qhia thiab Kev Khi Lus. Thaum koj nyeem tshooj 76:11–14, 20–24; 110:1–10, muaj dab tsi uas tshoov koj lub siab txog Joseph Smith zaj lus tim khawv? Vim li cas nws zaj lus tim khawv muaj nqis rau koj?

Nyob thoob plaws phau Lus Qhuab Qhia thiab Kev Khi Lus, tus Cawm Seej tau ua tim khawv txog nws ntiag tug hauj lwm thiab qhov uas Nws los saum ntuj los. Koj kawm dab tsi txog tus Khetos uas muaj sia nyob los ntawm Nws cov lus nyob hauv phau Lus Qhuab Qhia thiab Kev Khi Lus 29:5; 38:7; 62:1? Tej zaum koj yuav xav sau ntawv txog tej lus zoo li no uas koj nrhiav tau thaum koj kawm phau Lus Qhuab Qhia thiab Kev Khi Lus.

Kuj saib Joseph Smith—Keeb Kwm 1:17.

Lus Qhuab Qhia thiab Kev Khi Lus 29:26–27; 42:45–46; 63:49; 88:14–17, 27–31; 93:33–34

Vim muaj Yexus Khetos, kuv yuav sawv rov los.

Joseph Smith paub kev tu siab thaum cov uas nws hlub tso lub ntiaj teb no tseg. Nws tus tij laug, Alvin thiab nws tus kwv, Don Carols, tuag thaum lawv yog tub hluas. Joseph thiab Emma tau muab rau tus me nyuam faus, txhua tus tsis tau muaj ob xyoos. Tiam sis los ntawm tej kev tshwm sim uas nws txais, Joseph tau txais lub zeem muag pom mus ib txhis txog kev tuag thiab Vajtswv txoj hau kev nyob mus ib txhis. Cia li xav txog tej yam tseeb uas tau muab tshwm sim nyob hauv Lus Qhuab Qhia thiab Kev Khi Lus 29:26–27; 42:45–46; 63:49; 88:14–17, 27–31; 93:33–34. Tej kev tshwm sim no ua rau koj xav li cas txog kev tuag? Tej kev tshwm sim no ua rau koj ua neej li cas?

Kuj saib 1 Kauleethaus 15; M. Russell Ballard, “Kev Ua Yog Toog Pom txoj Kev Txhiv cov Neeg Tuag Kom Dim,” Ensign los sis Liahona, Kaum Ib Hlis Ntuj 2018, 71–74; Teachings of Presidents of the Church: Joseph Smith (2007), 174–76.

Lus Qhuab Qhia thiab Kev Khi Lus 18:10–13; 19:16–19; 45:3–5; 76:69–70

Yexus Khetos twb ua tau ib “txoj kev theej txhoj zoo tag nrho.”

Ib txoj kev kom tsom ntsoov rau tus Cawm Seej hauv lub caij Easter yog kev kawm tej kev tshwm sim hauv phau Lus Qhuab Qhia thiab Kev Khi Lus uas qhia txog Nws txoj kev theej txhoj. Muaj ib txhia uas koj nrhiav tau nyob hauv Lus Qhuab Qhia thiab Kev Khi Lus 18:10–13; 19:16–19; 45:3–5; 76:69–70. Tej zaum koj yuav xav sau tej yam tseeb txog tus Cawm Seej txoj Kev Theej Txhoj uas koj nrhiav tau hauv tej nqe vaj lug kub no. Yog xav kawm ntxiv, tej zaum koj sau ntawv tau ntxiv thaum koj kawm tej nqe vaj lug kub uas nyob hauv “Theej Txhoj” (Phau Qhia txog Vaj Lug Kub, scriptures.ChurchofJesusChrist.org).

Nyob no los muaj tej lus nug uas tej zaum pab tau koj kawm:

• Vim li cas Yexus Khetos xaiv kom raug kev txom nyem?

• Kuv yuav tsum ua li cas kom txais tau cov koob hmoov los ntawm Nws txoj kev tsheej txhoj?

• Kuv yuav ua li cas kom paub tseeb tias Nws txoj Kev Theej Txhoj pab kuv lub neej?

Yexus Thov Vajtswv

Tus Tswv uas Thov Vajtswv, los ntawm Yongsung Kim

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lub tuam rooj sab laj.Vim lub tuam rooj sab laj yog thaum Hnub Xya Easter xyoo no, tej zaum nej yuav xav seb tej zaj hauv rooj sab laj (tsis hais cov nkauj los yog) yuav pab nej tsev neeg zaj lus tim khawv txog Yexus Khetos. Piv txwv hais tias, tej zaum cov me nyuam yaus yuav xav kos duab txog tus Cawm Seej, los sis nqa ib daim duab txog Nws, thaum lawv hnov ib zaj lus hais los yog hnov ib zaj nkauj txog Yexus Khetos. Tej zaum lwm tus hauv nej tsev neeg yuav xav sau ntawv txog tej yam tseeb uas lawv hnov txog tus Cawm Seej. Tom qab ntawd, nej tsev neeg lawv muab tau tej duab los yog kev sau ntawv rau txhua tus saib thiab hais lawv zaj lus tim khawv txog Yexus Khetos.

Lus Qhuab Qhia thiab Kev Khi Lus 88:14–17; 138:17, 50.Tej zaum nej tsev neeg yuav nyiam xav txog ib zaj lus piv txwv kom piav tias kev tuag thiab kev sawv rov los zoo li cas—ib zaj lus piv txwv uas qhia tias yus lub cev thiab tus ntsuj plig sib ncaim ces rov qab los nyob ua ke, xws li thaum siv ib txhais tes thiab hnab looj tes. Tej nqe no pab peb li cas kom zoo siab ntxiv txog tej yam uas tus Cawm Seej ua rau peb?

“Tus Khetos uas Muaj txoj Sia Nyob: Cov Thwj Tim tej Lus Tim Khawv.”Kom yaum lawv sib tham txog cov yaj saub niaj hnub nim no zaj lus tim khawv txog tus Cawm Seej, tej zaum nej txib tau txhua tus hauv tsev neeg nyeem ib feem ntawm “Tus Khetos uas Muaj txoj Sia Nyob: Cov Thwj Tim tej Lus Tim Khawv” (Ensign los sis Liahona, Tsib Hlis Ntuj 2017, nyob sab haud) thiab qhia tias lawv tau kawm dab tsi txog Yexus Khetos. Tej zaum koj qhib tau daim video “Apostle Testimony Montage” (ChurchofJesusChrist.org). Peb kawm tej yam tseeb twg uas tshoov peb lub siab?

“Kuv Paub Yexus Tseem Muaj txoj Sia.”Xwv kom pab nej tsev neeg xav txog ntau yam uas tus Cawm Seej uas sawv rov los twb foom koob hmoov rau peb niaj hnub no, tej zaum nej xav hu nkauj ua ke “Kuv Paub Yexus Tseem Muaj txoj Sia” (Cov Nkauj Qhuas Vajtswv, zaj 53) thiab muab tej yam tseeb hauv zaj nkauj no sib txuas rau tej yam tseeb uas qhia hauv tej nqe vaj lug kub no: Lus Qhuab Qhia thiab Kev Khi Lus 6:34; 45:3–5; 84:77; 98:18; 138:23. Tej zaum nej tsev neeg kuj yuav nyiam sau tej nqe ntxiv rau ib zaj nkauj uas qhia tias lawv paub lawv tus Txhiv Dim muaj sia nyob.

Yog xav pom ib daim video Easter thiab lwm yam uas pab tau, cia li saib Easter.ComeUntoChrist.org.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Jesus Has Risen,” Children’s Songbook, 70.

Kev Qhia Zoo Dua Ntxiv

Nrhiav tej yam uas nej kawm tau los ntawm tej yam uas pom tau txhua hnub. Cia li xav txog tej xwm uas nej tsev neeg muaj txhua hnub yuav ua rau lawv xav sib tham txog ib yam tseeb ntawm txoj moo zoo (saib Teaching in the Savior’s Way, 4). Piv txwv hais tias, thaum los nag hlob hlob tej zaum ua rau nej muaj cib fim sib tham txog qhov uas Vajtswv foom koob hmoov nplua mias rau Nws cov me nyuam.

Yexus tshwm sim rau Joseph Smith thiab Oliver Cowdery pom

Yexus Khetos Tshwm Sim rau tus Yaj Saub Joseph Smith thiab Oliver Cowdery Pom, los ntawm Walter Rane