“Plaub Hlis Ntuj 12–18. Lus Qhuab Qhia thiab Kev Khi Lus 37–40: ‘Yog Nej Tsis Ua Ib lub Siab Nej Tsis Yog Kuv Li,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Plaub Hlis Ntuj 12–18. Lus Qhuab Qhia thiab Kev Khi Lus 37–40,” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus: 2021
Haiv Neeg Ntseeg Mus rau Kirtland, los ntawm Sam Lawlor
Plaub Hlis Ntuj 12–18
Lus Qhuab Qhia thiab Kev Khi Lus 37–40
“Yog Nej Tsis Ua Ib lub Siab Nej Tsis Yog Kuv Li”
Kev sau ntawv txog tej kev tshoov siab thaum koj kawm vaj lug kub yog ib txoj kev uas koj ua raws li Vajtswv cov lus ntuas kom “khaws laj lim tswv yim cia” (Lus Qhuab Qhia thiab Kev Khi Lus 38:30).
Sau Ntawv txog Koj tej Kev Tshoov Siab
Tej Haiv Neeg Ntseeg thaum ub xav tias lub Koom Txoos tsis yog ib qho chaw rau kev mloog lus qhuab qhia xwb. Nyob thoob plaws tus Tswv tej kev tshwm sim rau Joseph Smith, tus Tswv twb siv tej lus xws li hom phiaj, lub nceeg vaj, Xi-oos, thiab, ntau zaus, ua hauj lwm thaum piav txog lub Koom Txoos. Tej zaum yog vim li no cov mej zeej thaum ub thiaj nyiam lub Koom Txoos. Lawv nyiam lub Koom Txoos cov lus qhuab qhia uas tau muab txum tim rov qab los npaum li cas los, lawv feem coob kuj xav tau ib yam uas lawv muab lawv lub siab cob rau. Txawm li ntawd los, tus Tswv cov lus txib thaum xyoo 1830 kom Haiv Neeg Ntseeg sib sau hauv lub xeev Ohio yeej tsis yooj yim rau ib txhia. Rau cov neeg zoo li Phebe Carter, lawv yuav tsum tawm lawv tej tsev xis nyob mus rau ib qho chaw uas lawv tsis paub (saib “Voices of the Restoration” nyob ntawm tus txheej txheem qhia no qhov kawg) Niaj hnub no peb pom meej tias Haiv Neeg Ntseeg ntawd tau pom los ntawm lawv txoj kev ntseeg xwb: tus Tswv tau muaj cov koob hmoov loj heev rau lawv uas mus rau Ohio.
Kev txib mus rau Ohio los twb tsis muaj lawm, tiam sis Haiv Neeg Ntseeg niaj hnub no tseem koom siab ua raws li tib lub hom phiaj, ua tib txoj hauj lwm ntawd: kom “mus tsim Xi-oos” (Lus Qhuab Qhia thiab Kev Khi Lus 39:13). Zoo li Haiv Neeg Ntseeg thaum ub, peb tso tej “kev txhawj xeeb txog tej yam ntawm lub ntiaj teb” tseg (Lus Qhuab Qhia thiab Kev Khi Lus 40:2) vim peb tso siab rau tus Tswv cov lus cog tseg: “Koj yuav tau txais … ib txoj koob hmoov tseem ceeb heev uas koj tsis tau paub dua” (Lus Qhuab Qhia thiab Kev Khi Lus 39:10).
Kuj saib Saints, 1:109–11.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 37:1
Joseph Smith muab dab tsi txhais lus thaum xyoo 1830?
Nyob hauv nqe n, tus Tswv hais txog Joseph Smith txoj hauj lwm muab phau Npaivnpaum kho raws li kev tshoov siab, uas nws hais tias yog “kev txhais lus.” Thaum Joseph txais kev tshwm sim nyob hauv tshooj 37, nws twb tau sau ob peb tshooj ntawm phau Chiv Keeb tiav lawm thiab nws nyuam qhuav kawm txog Enauj thiab nws lub nroog Xi-oos (saib Chiv Keeb 5:18–24; Mauxes 7). Tej lub ntsiab cai uas tus Tswv qhia Enauj yeej zoo li tej uas Nws muab tshwm sim nyob hauv tshooj 38.
Kuj saib Church History Topics, “Joseph Smith Translation of the Bible,” ChurchofJesusChrist.org/study/topics.
Joseph Smith nrog Sidney Rigdon sau ib txoj kev kho phau Npaivnpaum raws li kev tshoov siab. Kev kos duab los ntawm Annie Henrie Nader
Lus Qhuab Qhia thiab Kev Khi Lus 38
Vajtswv muab peb sib sau ua ke kom foom koob hmoov rau peb.
Tus Tswv xaus Nws cov lus txib kom sib sau ua ke nyob hauv Ohio thaum Nws hais tias, “Saib seb, qhov no yog laj lim tswv yim” (Lus Qhuab Qhia thiab Kev Khi Lus 37:4). Tiam sis tsis yog txhua tus uas pom tias yog laj lim tswv yim thaum xub thawj. Nyob hauv tshooj 38, tus Tswv qhia txog Nws laj lim tswv yim ntxiv. Koj kawm dab tsi los ntawm nqe 11–33 txog cov koob hmoov uas los ntawm kev sib sau ua ke? Tus Tswv tsis txib lub Koom Txoos cov mej zeej sib sau ua ke los ntawm kev tsiv tsev mus rau ib qho chaw; tiam sis niaj hnub no peb ua li cas ho sib sau ua ke? Peb txais tau cov koob hmoov no li cas? (saib Russell M. Nelson, “The Gathering of Scattered Israel,” Ensign los sis Liahona, Kaum Ib Hlis Ntuj 2006, 79–81).
Thaum koj nyeem tshooj no kom tas, cia li nrhiav tej lus uas tej zaum tau pab Haiv Neeg Ntseeg muaj kev ntseeg txaus kom ua raws li Vajtswv tej lus txib mus sib sau ua ke hauv Ohio. Thiab xav txog tej lus txib uas Nws tau muab rau koj thiab kev ntseeg uas koj yuav tsum muaj kom ua raws li tej lus txib ntawd. Tej zaum tej lus nug nram qab no yuav coj koj txoj kev kawm vaj lug kub:
-
Koj nrhiav tau dab tsi nyob hauv nqe 1–4 uas ua rau koj tso siab rau tus Tswv thiab Nws tej lus txib?
-
Nqe 39 yuav pab koj li cas kom ua raws li Vajtswv cov lus txib thaum yuav tsum muab lwm yam tso tseg?
Koj nrhiav tau dab tsi ntxiv?
Lus Qhuab Qhia thiab Kev Khi Lus 38:11–13, 22–32, 41–42
Yog kuv npaj txhij, kuv tsis tas ntshai.
Haiv Neeg Ntseeg twb raug kev tawm tsam ntau, thiab tus Tswv paub tias yuav muaj ntxiv (saib Lus Qhuab Qhia thiab Kev Khi Lus 38:11–13, 28–29). Xwv kom pab lawv tsis txhob ntshai, Nws qhia ib lub ntsiab cai uas muaj nqis rau lawv: “Yog hais tias nej npaj txhij nej yuav tsis ntshai” (Lus Qhuab Qhia thiab Kev Khi Lus 38:30). Cia li xav ib me pliag txog tej teeb meem uas koj raug tam sim no. Ces thaum koj kawm tshooj 38, cia li mloog tus Ntsuj Plig tej kev tshoov siab txog tej yam uas koj npaj tau kom kov yeej tej teeb meem ntawd koj thiaj tsis tas ntshai.
Kuj saib Ronald A. Rasband, “Tsis Txhob Nyuaj Siab,” Ensign los sis Liahona, Kaum Ib Hlis Ntuj 2018, 18–21.
Lus Qhuab Qhia thiab Kev Khi Lus 39–40
Tej kev txhawj txog tej yam ntawm lub ntiaj teb yuav tsum tsis txhob tab kaum kuv kom kuv tsis txhob ua raws li Vajtswv txoj lus.
Cia li nyeem tshooj 39–40, tsis hais tej zaj keeb kwm hauv zaj lus piav txog tshooj, thiab xav txog tej yam uas koj kawm tau los ntawm James Covel zaj. Piv txwv hais tias, xav txog tej lub sij hawm thaum Vajtswv pom koj “lub siab ncaj ncees” (Lus Qhuab Qhia thiab Kev Khi Lus 40:1). Koj tau cov koob hmoov twg vim koj rau siab ntseeg? Thiab cia li xav txog “tej kev txhawj txog tej yam ntawm lub ntiaj teb” uas koj muaj (Lus Qhuab Qhia thiab Kev Khi Lus 39:9; 40:2). Koj nrhiav tau dab tsi hauv ob tshooj no uas tshoov koj lub siab kom mloog lus tsis tu tsis tseg.
Kuj saib Mathais 13:3–23.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 37:3.Xwv kom pab nej tsev neeg to taub kev txi uas Haiv Neeg Ntseeg ua kom thiaj li sib sau ua ke hauv Ohio, tej zaum nej yuav xav saib daim qhia kev uas txuas rau tus txheej txheem qhia no.
-
Lus Qhuab Qhia thiab Kev Khi Lus 38:22.Peb yuav ua li cas kom cia Yexus Khetos ua “tus uas muab kev cai” rau peb tsev neeg? Qhov uas peb ua raws li Nws tej kev cai ho ua li cas ua rau peb nyob li “ib co neeg ywj pheej”?
-
Lus Qhuab Qhia thiab Kev Khi Lus 38:24–27.Kom pab qhia cov me nyuam tias “ua ib lub siab” txhais li cas, tej zaum nej pab tau lawv suav cov neeg hauv nej tsev neeg thiab sib tham txog qhov uas vim li cas txhua tus neeg tseem ceeb rau nej tsev neeg. Qhia zoo zoo tias nyob ua ke nej yog ib tse neeg. Tej zaum nej pab tau cov me nyuam kos duab txog tus zauv 1 uas loj loj rau ib daim ntawv ntev thiab sau npe thiab kos duab los yog tso daim duab ntawm txhua tus hauv nej tsev neeg. Tej zaum nej yuav xav sau tej yam uas yuav pab nej tsev neeg ua ib lub siab rau daim ntawv ntev. Tej zaum nej yuav xav saib daim video “Love in Our Hearts” (ChurchofJesusChrist.org) los sis nyeem Mauxes 7:18.
-
Lus Qhuab Qhia thiab Kev Khi Lus 38:29–30.Tej zaum nej xav sib tham txog tej yam uas nej tsev neeg los yog ib leeg yuav tsum ua kom npaj txhij. Qhov uas nej tau npaj txhij tau pab nej li cas? Tus Tswv xav kom peb npaj rau dab tsi? Qhov uas peb npaj txhij ua li cas ho pab peb tsis ntshai? Peb yuav ua li cas kom npaj txhij?
-
Lus Qhuab Qhia thiab Kev Khi Lus 40.Cov lus “tej kev txhawj txog tej yam ntawm lub ntiaj teb” (nqe 2) txhais li cas? Puas muaj tej kev txhawj txog tej yam ntawm lub ntiaj teb uas tab kaum peb kom tsis txhob txais Vajtswv txoj lus “nrog kev zoo siab”? Peb yuav ua li cas kom kov yeej tej ntawd?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Jesus Said Love Everyone,” Children’s Songbook, 61.
Tej lub Suab ntawm Kev Muab txoj Moo Zoo Txum Tim Rov Qab Los
Kev Sib Sau Ua Ke hauv Ohio
Lub Zos Kirtland, los ntawm Al Rounds
Nrog cov Neeg Ntseeg coob uas sib sau ua ke hauv Ohio thaum tej xyoo 1830 muaj ib tug poj niam hu ua Phebe Carter. Nws tau koom lub Koom Txoos hauv lub Teb Chaws Amelikas sab hnub tuaj ntawm qaum teb thaum nws muaj nees nkaum xyoo tawm, txawm yog nws niam nws txiv tsis xav ua li ntawd. Nws tau sau ntawv txog nws txoj kev txiav txim kom tsiv mus rau Ohio kom nrog cov Neeg Ntseeg koom ua ke.
“Kuv cov phooj ywg xav tsis thoob txog qhov uas kuv ua li no, ua rau kuv xav tsis thoob thiab, tiam sis muaj ib yam dab tsi hauv kuv lub siab uas yaum kom kuv mus tom ntej. Kuv niam txoj kev tu siab vim kuv yuav ncaim kuv tsev neeg mus yeej ua rau kuv yuav luag nyiaj tsis taus; thiab yog tias tsis muaj tus ntsuj plig hauv kuv lub siab ntshe thaum kawg kuv yeej ua tsis taus. Kuv niam qhia kuv tias ntshe nws xav saib kuv raug faus cia ua ntej nws xav saib kuv mus kuv ib leeg koom nrog cov neeg uas tsis muaj siab.
“Nws hais tias, ‘[Phebe], koj puas kam rov qab los rau kuv yog tias koj kawm tias kev ntseeg Maumoos tsis muaj tseeb?’
“Kuv teb hais tias, ‘Kam os, niam; kuv yuav ua li ntawd.’ … Kuv teb li ntawd twb nplij nws lub siab; tiam sis ua rau peb txhua tus tu siab heev thaum peb tau sib ncaim. Thaum txog sij hawm rau kuv mus kuv tsis muaj cuab kav hais sib ntsib dua; yog li ntawd kuv thiaj li sau ntawv hais nyob zoo rau txhua tus, thiab kuv tau muab tso rau kuv lub rooj, khiav tawm lub tsev thiab dhia nce lub tsheeb nees. Yog li ntawd kuv tau ncaim kuv lub tsev uas kuv tau loj hlob tuaj haud kom ua neej nrog Vajtswv haiv neeg ntseeg.”1
Nyob hauv ib tsab ntawv ntawd, Phebe sau hais tias:
“Kuv Niam Kuv Txiv uas Kuv Hlub—kuv yuav ncaim neb lub tsev tau ib ntus … kuv tsis paub kuv yuav mus ntev li cas—tiam sis kuv yeej ris nej txiaj rau kev ua siab zoo uas kuv tau txais txij thaum kuv yog ib tug me nyuam yaus txog lub sij hawm no—tiam sis zoo li kuv txoj hmoov ua rau kuv lub neej txawv yav tas los. Thov kom peb tso txhua yam no rau Vajtswv txhais tes thiab ua Nws tsaug vim peb muaj sij hawm nyob ua ke tau ntev thiab muaj xwm txheej zoo npaum li peb muaj, vim peb ntseeg tias txhua yam yuav zoo rau peb yog peb hlub Vajtswv kawg siab kawg ntsws. Thov kom peb paub zoo tias peb thov tau Vajtswv tus uas yuav hnov nws cov me nyuam tej lus thov Vajtswv thiab muab yam uas zoo tshaj plaws rau peb. …
“Niam, kuv ntseeg tias yog Vajtswv lub siab nyiam rau kuv mus rau sab hnub poob thiab tau ntev kuv yeej xav li ntawd. Nim no twb qhib kev ua li no … ; Kuv ntseeg tias yog tus Tswv tus ntsuj plig uas ua li no thiab yog li ntawd nws txaus ua txhua yam. Auj thov tsis txhob txhawj txog koj tus me nyuam; tus Tswv yuav nplij kuv lub siab. Kuv ntseeg tias tus Tswv yuav saib xyuas kuv thiab muab yam uas zoo tshaj plaws rau kuv. … Kuv mus vim kuv tus Xib Hwb hu kuv—nws twb qhia meej txog kuv tej dej num.”2
