“Plaub Hlis Ntuj 19–25. Lus Qhuab Qhia thiab Kev Khi Lus 41–44: ‘Kuv txoj Kev Cai Kav Kuv lub Koom Txoos,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Plaub Hlis Ntuj 19–25. Lus Qhuab Qhia thiab Kev Khi Lus 41–44,” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus: 2021
Plaub Hlis Ntuj 19–25
Lus Qhuab Qhia thiab Kev Khi Lus 41–44
“Kuv txoj Kev Cai Kav Kuv lub Koom Txoos”
Tus Tswv cog lus tias, “Yog hais tias nej thov, nej yuav tau txais kev tshwm sim ntxiv rau kev tshwm sim, kev txawj ntse ntxiv rau kev txawj ntse” (Lus Qhuab Qhia thiab Kev Khi Lus 42:61). Koj nug tau tej yam twg kom txais tau kev tshwm sim uas koj xav tau?
Sau Ntawv txog Koj tej Kev Tshoov Siab
Qhov uas lub Koom Txoos loj tuaj sai sai thaum xyoo 1830 thiab 1831—qhov tseem ceeb yog cov neeg hloov siab los ntseeg tshiab uas tuaj txog Kirtland, Ohio—twb txhawb Tsoom Haiv Neeg Ntseeg lub siab thiab ua rau lawv zoo siab. Tiam sis kuj ua rau lawv raug teeb meem thiab. Yus yuav ua li cas kom ua ib pawg ntseeg uas loj tuaj sai sai koom siab, qhov tseem ceeb yog thaum lawv nyias muaj nyias cov lus qhuab qhia thiab tej kev ntseeg uas los ntawm lawv txoj kev teev ntuj dhau los? Piv txwv hais tias, thaum Joseph Smith tuaj txog Kirtland thaum lub Ob Hlis Ntuj xyoo 1831, nws nrhiav tau cov mej zeej tshiab uas sawv daws koom siab siv ib vaj tsev vim lawv xav ua raws li cov Neeg Ntseeg Khetos hauv Phau Tshiab ua (saib Tes Hauj Lwm 4:32–37). Hais txog qhov no thiab lwm yam ntxiv, tus Tswv tau kho thiab piav meej txog tej yam tseem ceeb, feem ntau yog los ntawm ib txoj kev tshwm sim nyob hauv phau Lus Qhuab Qhia thiab Kev Khi Lus 42, uas Nws hais tias yog “kuv txoj kev cai kav kuv lub koom txoos” (nqe 59). Nyob hauv kev tshwm sim no, peb kawm tej yam tseeb uas tseem ceeb rau kev txhim tsa tus Tswv lub Koom Txoos hauv hnub nyoog kawg, tsis hais kev cog lus uas qhia meej tias yeej muaj ntxiv uas peb kawm tau: “Yog hais tias nej thov, nej yuav tau txais kev tshwm sim ntxiv rau kev tshwm sim, kev txawj ntse ntxiv rau kev txawj ntse” (Lus Qhuab Qhia thiab Kev Khi Lus 42:61).
Kuj saib Saints, 1:114–19.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 41
“Tus uas txais thiab ua raws li kuv txoj kev cai, tus ntawd yog kuv tus thwj tim.”
Thaum xyoo 1831, Haiv Neeg Ntseeg tab tom sib sau ua kev nyob hauv Ohio, lawv xav txais txoj kev cai uas Vajtswv tau cog lus tias Nws yuav qhia rau lawv nyob ntawd (saib Lus Qhuab Qhia thiab Kev Khi Lus 38:32). Tiam sis ua ntej, tus Tswv qhia tias Nws cov thwj tim yuav tsum npaj li cas kom txais tau Nws txoj kev cai. Koj nrhiav tau tej ntsiab cai twg nyob hauv nqe 1–5 uas yuav pab Haiv Neeg Ntseeg txais tau Vajtswv txoj kev cai? Tej ntsiab cai yuav pab koj li cas kom txais Nws tej lus qhia?
Lus Qhuab Qhia thiab Kev Khi Lus 42
Vajtswv tej kev cai kav Nws lub Koom Txoos thiab kav tau peb lub neej.
Tsoom Haiv Neeg Ntseeg tau xav tias kev tshwm sim uas nyob hauv phau Lus Qhuab Qhia thiab Kev Khi Lus 42:1–72 yog ib zaj tseem ceeb tshaj plaws uas tus Yaj Saub tau txais lawm. Kev tshwm sim no yog ib zaj uas tau muab luam tawm hauv lub xeev Ohio cov ntawv xov xwm, thiab lawv hu kev tshwm sim no ua “txoj kev cai.” Ntau lub ntsiab cai hauv tshooj no los tus Tswv twb tau muab tshwm sim ua ntej. Txawm yog tshooj no tsis tau hais txog txhua txoj lus txib uas tus Tswv xav kom Nws Haiv Neeg Ntseeg ua, yeej zoo rau peb xav txog vim li cas tej ntsiab cai no yog tej yam tseem ceeb hais rau cov ntseeg hauv lub Koom Txoos uas nyuam qhuav tau muab Txum Tim Rov Qab Los.
Tej zaum yuav pab koj yog koj nyeem tshooj 42 ib feem me me xws li sau nram qab no thiab saib seb txhua feem qhia txog tej ntsiab cai twg. Thaum koj ua li cas, cia xav txog qhov uas txoj kev cai uas coj lub Koom Txoos kuj pab tau coj koj lub neej.
Kuj saib 3 Nifais 15:9.
Lus Qhuab Qhia thiab Kev Khi Lus 42:30–42
Tsoom Haiv Neeg Ntseeg tau ua li cas kom “muab [lawv] tej teej tug uas … [lawv] coj mus faib rau cov neeg pluag fij tseg”?
Ib yam tseem ceeb txog txoj kev cai uas tau muab tshwm sim hauv tshooj 42 yog txoj kev cai uas neeg hu ua txoj kev cai fij siab thiab txoj kev cai txog txoj hauj lwm saib xyuas. Txoj kev cai no tau qhia Tsoom Haiv Neeg Ntseeg tias lawv txawj muaj “txhua yam zoo sib xws” (Tes Hauj Lwm 2:44; 4 Nifais 1:3), thiab “tsis muaj cov pluag nyob hauv lawv” (Mauxes 7:18) zoo cov neeg uas coj raws li Khetos puag thaum ub. Cov Neeg Ntseeg tau muab lawv teej tug fij tseg thaum lawv muab rau tus Tswv, los ntawm tus npisov (saib Lus Qhuab Qhia thiab Kev Khi Lus 42:30–31). Tus npisov rov qab muab tej yam uas lawv yuav tsum muaj rau lawv (saib nqe 32)—feem ntau yog tej yam uas lawv twb muab fij tseg thiab ntxiv. Cov mej zeej tau muab tej yam lawv muaj tshaj kom pab cov pluag (saib nqe 33–34). Txoj kev cai no yog ib txoj koob hmoov zoo kawg rau Haiv Neeg Ntseeg, qhov tseem ceeb yog rau cov uas twb tso txhua yam tseg kom tuaj tau rau lub xeev Ohio. Cov Neeg Ntseeg feem coob tau ua siab dawb pub ntau.
Txawm yog peb tsis ua zoo ib yam li ntawd niaj hnub no, Tsoom Haiv Neeg Ntseeg hauv Hnub Nyoog Kawg tseem coj raws li txoj kev cai fij siab. Thaum koj nyeem phau Lus Qhuab Qhia thiab Kev Khi Lus 42:30–42, cia li xav txog qhov uas koj yuav muab tej yam uas Vajtswv tau pub rau koj fij tseg kom txhim tsa Nws lub nceeg vaj thiab foom koob hmoov rau cov uas xav tau.
Kuj saib Linda K. Burton, “Kuv Tuaj Ua Qhua,” Ensign los sis Liahona, Tsib Hlis Ntuj 2016, 13–15; “The Law,” Revelations in Context, 93–95, history.ChurchofJesusChrist.org.
Khetos thiab tus Nom Tswv Hluas, los ntawm Heinrich Hofmann
Lus Qhuab Qhia thiab Kev Khi Lus 42:61, 65–68; 43:1–16
Vajtswv muab kev tshwm sim kom coj tau Nws lub Koom Txoos.
Xav seb yuav zoo li cas yog koj sib tham nrog ib tug mej zeej tshiab ntawm lub Koom Txoos uas zoo siab paub tias tus Tswv coj lub Koom Txoos los ntawm kev tshwm sim. Koj yuav siv phau Lus Qhuab Qhia thiab Kev Khi Lus 43:1–16 li cas kom piav rau nws txog tus Tswv tus txheej txheem coj Nws lub Koom Txoos los ntawm Nws tus yaj saub? Koj yuav siv phau Lus Qhuab Qhia thiab Kev Khi Lus 42:61, 65–68 li cas kom qhia txog kev txais kev tshwm sim yus tus kheej?
Kuj saib “All Things Must Be Done in Order,” Revelations in Context, 50–53, history.ChurchofJesusChrist.org.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 41:1–5.Tej kev cai uas pab cov pej xeem yog dab tsi, thiab tej kev cai ntawd pab peb li cas? Leej Txiv Saum Ntuj Ceeb Tsheej tej kev cai los sis cov lus txib ua li cas ho pab peb txais tau koob hmoov? Tej zaum nej tsev neeg yuav xav kos duab txog lawv tus kheej thaum lawv ua raws li Vajtswv tej kev cai.
-
Lus Qhuab Qhia thiab Kev Khi Lus 42:45, 88.Dab tsi yuav pab nej tsev neeg “nyob ua ke nrog txoj kev sib hlub”? (kuj saib Mauxiyas 4:14–15). Tej zaum nej yuav xav sau ntawv los yog hais tej yam zoo ib leeg rau ib leeg los sis hu ib zaj nkauj qhuas Vajtswv txog kev hlub hauv nej tsev neeg, xws li “Hlub Hauv Tsev” (Cov Nkauj Qhuas Vajtswv, zaj 137).
-
Lus Qhuab Qhia thiab Kev Khi Lus 42:61.Tej zaum nej yuav xav nyeem nqe no thaum nej ua kev muab khoom sib dhos ua ke. Siv kev muab khoom sib dhos ua ke kom qhia tias Vajtswv ua li cas kom qhia Nws tej txuj ci uas neeg tsis paub txog—“kev tshwm sim ntxiv rau kev tshwm sim, kev txawj ntse rau kev txawj ntse.” Tej zaum nej tsev neeg yuav xav qhia hais tias Vajtswv tau ua li cas kom qhia qhov tseeb rau lawv zuj zus tuaj.
-
Lus Qhuab Qhia thiab Kev Khi Lus 43:25.Tej zaum muaj dab tsi uas nej tsev neeg siv tau kom nrov zoo li xob nroo ua ntej nej sib tham txog nqe 25. Ua li cas tus Tswv lub suab ho zoo li “lub suab ntawm xob quaj”? Nyeem nqe no ua ke kom nrhiav tau yog vim li cas tus Tswv yuav hais kom peb hloov siab lees txim. Peb yuav ua li cas kom mloog tau tus Tswv lub suab zoo dua ntxiv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “I Want to Live the Gospel,” Children’s Songbook, 148; saib “Tej lub Tswv Yim rau Tsev Neeg Kev Kawm Vaj Lug Kub.”
Kev Qhia Zoo Dua Ntxiv
Saib xyuas kom muaj kev hlub. Qhov uas nej tsev neeg ib leeg xav li cas thiab ua zoo li cas rau ib leeg yeej hloov tau qhov uas neeg xav li cas hauv nej tsev. Cia li pab txhua tus hauv nej tsev neeg kom ua lawv lub luag hauj lwm kom muaj ib lub tsev uas txhua tus txaus siab qhia txog tej xwm txheej, nug tej yam, thiab hais lus tim khawv. (Saib Teaching in the Savior’s Way, 15.)
Joseph Smith Qhuab Qhia nyob hauv Nauvoo, los ntawm Sam Lawlor