Tsis Txhob Nyuaj Siab
Cia li ua siab loj, cov kwv tij thiab cov muam. Peb yeej nyob hauv ib lub caij nyoog uas muaj xwm txheej heev, tiam sis thaum peb ua raws nraim li peb tej kev khi lus, peb tsis tas ntshai.
Kuv koom nrog Thawj Tswj Hwm Russell M. Nelson thiab Txwj Laug Quentin L. Cook ua tim khawv txog nkawd tej lus uas hais tsis ntev tas los txog qhov uas Pawg Sab Laj ntawm Thawj Pawg Thawj Tswj Hwm thiab Pawg Kaum Ob tug Thwj Tim koom siab koom ntsws. Kuv paub tias tej kev tshwm sim no yog tus Tswv lub siab nyiam thiab yuav foom koob hmoov thiab ntxiv dag zog rau tib neeg, tsev neeg, thiab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau ntau tiam neeg mus tom ntej.
Ob peb xyoos tas los, peb ib tug ntxhais thiab nws tus txiv nug Muam Rasband thiab kuv ib qho tseem ceeb: “Puas nyab xeeb thiab zoo muaj me nyuam nyob hauv lub ntiaj teb phem thiab txaus ntshai uas peb nyob no?”
Nov yeej yog ib qho tseem ceeb rau ib tug niam tsev thiab txiv tsev xav txog nrog rau nkawd me nyuam uas tau sib yuav lawm. Wb hnov tau kev ntshai thaum nkawd hais lus thiab hnov tau kev ntshai hauv nkawd lub siab. Wb teb nkawd hais tias “Zoo, yeej zoo kawg,” thaum wb qhia tej lus qhia tseem ceeb ntawm txoj moo zoo thiab qhia nkawd txog wb tej kev tshoov siab thiab lub neej.
Kev ntshai yeej tsis yog ib yam tshiab. Yexus Khetos cov thwj tim, nyob hauv Dej Hiav Txwv Kalilais, twb ntshai “cua daj cua dub hlob heev ntsawj dej ntas” thaum tsaus ntuj lawm. Peb cov uas yog Nws cov thwj tim hnub no, peb kuj ntshai thiab. Peb cov tub hluas ntxhais hluas uas tseem tsis tau sib yuav ntshai kev cog lus xws li kev sib yuav. Cov uas nyuam qhuav sib yuav, zoo li wb ob tug me nyuam, ntshai muaj me nyuam nyob hauv ib lub ntiaj teb uas phem zuj zus tuaj. Cov tub txib ntshai ntau yam, feem ntau yog hais lus rau cov neeg lawv tsis paub. Cov poj ntsuam ntshai nyob ib leeg. Cov tub hluas ntxhais hluas ntshai tsis muaj phooj ywg; cov me nyuam yaus ntshai thawj hnub mus kawm ntawv; cov uas kawm qib siab ntshai tom qab xeem ntawv. Peb ntshai kev poob, kev xyeej, kev poob siab, thiab tej yam uas peb tsis paub. Peb ntshai cua daj cua dub, av qeeg, thiab hluav taws uas ua rau peb thaj av thiab lub neej puas tsuaj. Peb ntshai tias tsis muaj leej twg xaiv peb, thiab qhov fab ntxeev, peb ntshai tias yuav muaj leej twg xaiv peb. Peb ntshai tias peb zoo tsis txaus; peb ntshai tias tus Tswv tsis foom koob hmoov rau peb. Peb ntshai kev hloov, thiab peb txoj kev ntshai loj tuaj. Kuv puas tau hais txog txhua leej txhua tus?
Txij puag thaum ub, kev ntshai ua rau Vajtswv cov me nyuam pom tsis deb. Kuv yeej nyiam zaj uas hais txog Elisas nyob hauv 2 Vaj Ntxwv. Cov Xilias tus vaj ntxwv twb xa ib pawg tub rog uas “mus txog nrad thaum ib tag hmo thiab vij kiag lub nroog.” Lawv xav muab tus yaj saub Elisas ntes thiab tua tuag. Peb nyeem hais tias:
“Thaum kaj ntug, Elisas tawm mus ncig nraum zoov, nws pom cov tub rog Xilias thiab lawv tej nees thiab tsheb nees vij tag nrho lub nroog. [Thiab nws tus tub qhe] hais tias, Tus tswv, zaum no ces peb yuav tsis dim li lauj! Peb yuav ua li cas?”
Nws hais li ntawd vim nws ntshai.
“Elisas teb hais tias, Tsis txhob ntshai: Peb tog muaj coob dua lawv tog.”
Tiam sis nws tsis tau hais li ntawd xwb.
“Elisas thov Vajtswv hais tias, Tus Tswv thov koj qhib nws lub qhov muag kom nws pom! Tus Tswv teb Elisas tej lus thov, ces Elisas tus tub txib thiaj pom tej nees huab cua thiab tsheb nees nplaim taws nyob puv toj roob hauv pes ib ncig Elisas.”
Tej zaum peb yuav tsis muaj tej nees tsheb nees nplaim taws los ua rau peb txoj kev ntshai ploj thiab kov yeej peb cov yeeb ncuab, tiam sis zaj dab neeg no yej qhia meej. Tus Tswv nrog nraim peb, paub txog peb thiab foom koob hmoov rau peb zoo li Nws tib leeg ua tau. Kev thov Vajtswv yuav ua rau peb txais dag zog thiab kev tshwm sim uas peb xav tau kom tsom ntsoov rau Yexus Khetos thiab Nws txoj kev theej txhoj. Tus Tswv paub tias yuav muaj tej lub sij hawm thaum peb ntshai. Peb txhua tus yeej muaj sij hawm thaum peb ntshai, yog li ntawd cov vaj lug kub muaj tus Tswv tej lus ntuas ntau hais tias:
“Cia li zoo siab, thiab tsis txhob ntshai.”
“Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai.”
“Tsis txhob ntshai, pab me nyuam yaj.” Kuv nyiam lo lus “pab me nyuam yaj.” Nyob hauv lub Koom Txoos ntshe peb tsis muaj neeg coob raws li neeg ntiaj teb xav, tiam sis thaum peb qhib peb qhov muag ntawm sab ntsuj plig, “peb tog muaj coob dua lawv tog.” Peb tus Tswv Yug Yaj, Yexus Khetos, hais tias, “Cia lub ntiaj teb thiab ntuj txiag teb tsaus los koom ua ke tawm tsam neb, vim yog neb cog rau saum kuv lub pob zeb, ces lawv yuav kov tsis yeej.”
Yuav ua li cas kom kev ntshai ploj mus? Tus tub hluas sawv rau ntawm Elisas, Vajtswv ib tug yaj saub, ib sab. Peb muaj kev cog lus li no thiab. Thaum peb mloog Thawj Tswj Hwm Russell M. Nelson lus, thaum peb ua raws li nws hais, peb sawv nrog Vajtswv ib tug yaj saub. Cia li nco ntsoov Yauxej Xamiv tej lus: “Thiab nim no, tom qab tej lus tim khawv ntau uas tau hais txog nws lawm, zaj no yog zaj lus tim khawv, zaj kawg nkaus, uas wb hais txog nws: Hais tias nws muaj txoj sia nyob!” Yexus Khetos muaj txoj sia nyob. Peb txoj kev hlub Nws thiab Nws txoj moo zoo ua rau kev ntshai ploj mus.
Peb txoj kev xav “muaj nws tus Ntsuj Plig nrog [peb] nyob tas mus li” yuav ua rau kev ntshai ploj mus thiab ua rau peb saib tau peb lub neej nyob mus ib txhis. Thawj Tswj Hwm Nelson twb ceeb toom hais tias, “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”
Tus Tswv hais txog tej kev rau txim uas yuav raug tag nrho thaj av thiab yuav ua rau tib neeg lub siab tawv hais tias, “Kuv cov thwj tim yuav sawv hauv tej chaw dawb huv, thiab yuav tsis txav.”
Thiab tus Tswv qhia li no tias: “Tsis txhob nyuaj siab, vim, thaum tag nrho tej yam no yuav muaj los, nej yuav paub tias tej kev cog lus uas tau cog rau nej lawm yuav muaj raws li hais.”
Cia li sawv hauv tej qhov chaw dawb huv—tsis txhob nyuaj siab—thiab yuav muaj raws li tau cog lus rau nej lawm. Cia peb xav txog tej yam no thaum peb hais lus txog peb tej kev ntshai.
Qhov thib ib, sawv hauv tej qhov chaw dawb huv. Thaum peb sawv hauv tej qhov chaw dawb huv—peb tsev ncaj ncees, peb tej tsev teev ntuj, peb cov tuam tsev uas tau muab fij tseg—peb hnov tau tus Tswv tus Ntsuj Plig nrog peb nyob. Peb nrhiav tau tej lus teb rau tej yam uas ua rau peb nyuaj siab los sis nrhiav tau kev kaj siab lug kom peb tso lus nug tseg. Tus Ntsuj Plig ua hauj lwm li no. Peb yuav tsum nyob tswm seeb, saib lwm tus rau nqi, ua raws li txoj moo zoo, thiab cia siab kom tso peb tej kev ntshai tseg thiab nrhiav Yexus Khetos lub hwj chim kho peb zoo los ntawm Nws txoj Kev Theej Txhoj nyob hauv tej qhov chaw dawb huv hauv Vajtswv lub nceeg vaj hauv lub ntiaj teb.
Tsis muaj chaw rau kev ntshai nyob hauv Vajtswv tej qhov chaw dawb huv no los sis nyob hauv Nws cov me nyuam lub siab. Vim li cas? Vim muaj kev hlub. Vajtswv hlub peb—txhua lub sij hawm—thiab peb hlub Nws. Peb txoj kev hlub Vajtswv tiv tau txhua txoj kev ntshai, thiab nyob hauv tej chaw dawb huv muaj Nws txoj kev hlub nplua mias. Cia li xav txog qhov no. Thaum peb tsis tshua ua raws li peb tau cog lus rau tus Tswv, thaum peb ua yuam kev tsis taug txoj kev uas mus rau txoj sia nyob mus ib txhis, thaum peb ua xyem xyav txog qhov uas peb tseem ceeb rau Vajtswv txoj hau kev, thaum peb cia txoj kev ntshai qhib qhov rooj rau lwm yam xws li—kev poob siab, kev chim siab, kev npau taws—ces tus Ntsuj Plig ncaim peb mus, thiab peb tsis muaj tus Tswv nrog peb nyob. Yog tias nej paub zoo li cas, ces nej yeej paub tias tsis zoo nyob li ntawd. Tiam sis, thaum peb sawv hauv tej qhov chaw dawb huv, peb hnov tau Vajtswv txoj kev hlub, thiab “txoj kev hlub uas zoo tag nrho yeej ntiab tau txhua txoj kev ntshai tawm.”
Kev cog lus ntxiv yog “Tsis txhob nyuaj siab.” Txawm yog lub ntiaj teb muaj kev phem thiab kev ntxhov hnyo npaum li cas los, tus Tswv cog lus tias thaum peb rau siab ntseeg Yexus Khetos niaj hnub ces peb yuav tau “Vajtswv txoj kev kaj siab lug, uas tsis muaj leej twg to taub.” Thiab thaum Khetos muaj hwj chim thiab yeeb koob los, kev phem, kev ntxeev siab, thiab kev tsis ncaj ncees yuav tu nrho.
Puag thaum ub tus Thwj Tim Povlauj qhia txog peb lub caij nyoog, es nws hais rau Timautes hais tias:
“Koj yuav tsum nco ntsoov hais tias thaum lub sij hawm uas ntiaj teb yuav kawg yuav muaj kev ntxhov siab heev.
“Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khav theeb, yuav muab hlob, yuav tsis mloog niam txiv lus, yuav tsis ris luag txiaj ntsig, thiab yuav saib tsis taus Vajtswv txoj kev cai, …
“… lawv nyiam kev lom zem heev dua nyiam Vajtswv.”
Cia li nco ntsoov tias “peb tog” muaj tib neeg uas nyob ob sab ntawm daim ntaub thaiv, cov uas hlub tus Tswv kawg siab kawg ntsws kawg dag kawg zog, “muaj coob dua lawv tog.” Yog peb tso siab plhuav rau tus Tswv thiab Nws tej kev, yog peb rau siab ua Nws txoj hauj lwm, peb yuav tsis ntshai los sis nyuaj siab txog tej yam ntawm lub ntiaj teb. Kuv thov nej kom tso tej hwj huam hauv lub ntiaj teb tseg thiab nrhiav kom nej sab ntsuj plig loj hlob tuaj niaj hnub hauv nej lub neej. Cia li muab siab npuab tej yam uas tus Tswv muab siab npuab rau—uas yog Nws tej lus txib, Nws tej tsev dawb huv, peb tej kev khi lus nrog Nws, lub cim nco txog txhua Hnub Caiv, peb tej lus thov Vajtswv—ces nej thiaj li yuav tsis nyuaj siab.
Qhov kawg: tso siab rau tus Tswv thiab Nws tej lus cog tseg. Kuv paub tias yuav muaj raws li tag nrho uas Nws tau cog lus lawm. Kuv paub zoo npaum li kuv sawv ntawm nej tam sim no hauv kev sib ntsib dawb ceev.
Tus Tswv tau qhia tias: “Vim lawv cov uas muaj tswv yim thiab tau txais qhov tseeb, thiab tau cia tus Vaj Ntsuj Plig Dawb Huv ua lawv tus coj kev, thiab tsis tau raug dag ntxias—kuv hais tseeb rau nej tias, lawv yuav tsis raug muab ntov kom vau thiab muab pov rau hauv hluav taws, tiam sis yuav tiv taus hnub ntawd.”
Yog vim li no peb thiaj li yuav tsum tsis txhob nyuaj siab los ntawm kev ntxhov hnyo niaj hnub nim no, los ntawm cov nyob hauv lub tsev loj thiab dav, los ntawm cov uas thuam kev rau siab pab raws li kev ncaj ncees ua hauj lwm rau tus Tswv Yexus Khetos. Kev cia siab rau qhov zoo, kev ua siab loj, thiab kev siab hlub yeej yog los ntawm ib lub siab uas tsis nyuaj siab los sis ntxhov siab. Thawj Tswj Hwm Nelson, uas cia siab rau yav tom ntej, tau hais kom peb nco qab tias, “Yog tias peb yuav muaj cuab kav paub tej suab uas hais lus rau peb thiab to taub tib neeg tej tswv yim uas tawm tsam qhov tseeb, peb yuav tsum kawm kom paub txais kev tshwm sim.”
Yog peb xav txais kev tshwm sim, peb yuav tsum tsom ntsoov rau kev ua raws li txoj moo zoo thiab yaum kom peb tus kheej thiab lwm tus rau siab ntseeg thiab mloog tus Ntsuj Plig.
Spencer W. Kimball yog ib tug yaj saub thaum kuv yog ib tug tub hluas. Ob peb xyoos tas los, tom qab uas tau hu kuv ua ib tug Thwj Tim, kuv twb muaj kev kaj siab lug thaum kuv nyeem nws thawj zaj lus hauv lub tuam rooj sab laj thaum lub Kaum Hli Ntuj xyoo 1943. Nws ntxhov siab txog nws txoj hauj lwm; kuv paub tias qhov no zoo li cas. Txwj Laug Kimball hais tias: “Kuv twb xav ntau thiab thov Vajtswv, yoo mov thiab thov Vajtswv ntxiv. Muaj tej yam uas kuv xav mus xav los—tej lub suab uas hais tias: ‘Koj ua tsis tau txoj hauj lwm no. Koj tsis tsim nyog. Koj tsis muaj peev xwm’—thiab thaum kawg kuv twb xav li no hais tias: ‘Koj yuav tsum ua li tau txib koj ua—koj yuav tsum ua kom koj tus kheej muaj peev xwm thiab tsim nyog.’ Ces kev ua tsov ua rog mus ntxiv.”
Tej lus tim khawv no los ntawm tus Thwj Tim siab dawb, tus uas yuav los ua tus Thawj Tswj Hwm thib 12 ntawm lub Koom Txoos no, yeej txhawb kuv lub siab. Nws tau pom hais tias nws yuav tsum tso nws tej kev ntshai tseg kom “ua li tau txib [nws] ua” thiab nws yuav tsum tso siab rau tus Tswv kom muaj zog “ua kom [nws] tus kheej muaj peev xwm thiab tsim nyog.” Peb ua tau li no thiab. Yuav muaj kev tsov kev rog tas li, tiam sis peb yuav muaj tus Tswv tus Ntsuj Plig nrog peb nyob. Peb yuav “tsis txhob nyuaj siab” vim thaum peb sawv nrog tus Tswv thiab Nws cov ntsiab cai thiab Nws txoj hau kev nyob mus ib txhis, peb sawv hauv ib qho chaw dawb huv.
Ces, tus ntxhais thiab tus vauv uas nug wb qhov uas nkawd xav paub tiag tiag los ntawm kev ntshai ntau xyoo tas los nev? Nkawd xav txog peb txoj kev sib tham hmo ntawd; nkawd tau thov Vajtswv thiab yoo mov thiab tau txiav txim siab. Zoo siab heev rau nkawd thiab rau wb, uas yog niam tais thiab yawg, nkawd twb tau koob hmoov vim muaj xya tus me nyuam zoo kawg thaum nkawd mus tom ntej nrog kev ntseeg thiab kev hlub.
Cia li ua siab loj, cov kwv tij thiab cov muam. Peb yeej nyob hauv ib lub caij nyoog uas muaj xwm txheej heev, tiam sis thaum peb ua raws nraim li peb tej kev khi lus, peb tsis tas ntshai. Kuv foom koob hmoov rau nej kom thaum nej ua li ntawd, nej yuav tsis txhob nyuaj siab txog lub caij nyoog uas peb nyob los sis txog tej teeb meem uas nej raug. Kuv foom koob hmoov rau nej kom nej xaiv sawv hauv tej qhov chaw dawb huv thiab tsis txhob txav mus li. Kuv foom koob hmoov rau nej kom nej ntseeg Yexus Khetos cov lus cog tseg, ntseeg tias Nws muaj txoj sia nyob, Nws saib xyuas peb, hlub peb thiab sawv ntawm peb ib sab. Los ntawm peb tus Tswv thiab Cawm Seej, Yexus Khetos, lub npe amees.