Sau Txhua Yam Los Ua Ib Ke rau Khetos Ua tus Thawj
Tus Cawm Seej txoj moo zoo lub hwj chim kom hloov peb lub siab thiab foom koob hmoov rau peb yog los ntawm qhov uas peb to taub thiab ua raws li tag nrho Nws txoj moo zoo tej lus qhuab qhia, cov kab ke, thiab tej lub ntsiab cai uas koom ua ke.
Ib txoj hlua yog ib yam tseem ceeb uas peb txhua tus paub zoo. Ua tau ib txoj hlua thaum yus muab ntaub, tej txoj hmab, xov, los sis lwm yam ntxias ua ke. Qhov txawv heev yog qhov uas thaum yus muab tej yam uas tsis tshua ruaj los ntxias ua ke ces ua rau tej ntawd ruaj heev. Yog li ntawd, thaum yus muab tej khoom tsis tseem ceeb tso thiab khi ua ke los ces yus thiaj muaj ib lub cuab yeej zoo kawg nkaus.
Zoo ib yam li ib txoj hlua yeej ruaj nrees vim muaj ntau txoj ntxias ua ke, Yexus Khetos txoj moo zoo qhia qhov tseeb thiab foom koob hmoov ntau nplua mias rau peb thaum peb ua raws li Povlauj qhia kom “sau txhua yam los ua ib ke rau Khetos ua tus thawj, tag nrho tej uas nyob saum ntuj, thiab tej uas nyob hauv ntiaj teb; tej uas los ntawm nws.” Qhov tseem ceeb, qhov uas peb muab qhov tseeb sau los ua ib ke yeej tsom ntsoov rau tus Tswv Yexus Khetos vim hais tias Nws yog “txoj kev, qhov tseeb, thiab txoj sia.”
Kuv thov kom tus Vaj Ntsuj Plig Dawb Huv yuav qhia peb txhua tus thaum peb xav txog qhov uas lub ntsiab cai ntawm kev sau txhua yam los ua ib ke rau Khetos ua tus thawj pab peb kawm thiab ua neej niaj hnub raws li Nws txoj moo zoo.
Lub Caij Txais Kev Tshwm Sim
Peb nyob hauv ib lub caij nyoog zoo kawg thaum peb txais kev tshwm sim hauv Yexus Khetos lub Koom Txoos uas tau muab txum tim rov qab los. Tej yam uas twb tau hloov hnub no yeej muaj ib lub hom phiaj xwb: kom tib neeg txoj kev ntseeg Leej Txiv Saum Ntuj Ceeb Tsheej thiab Nws txoj Hau Kev thiab kev ntseeg Nws Leej Tub Yexus Khetos thiab Nws txoj Kev Theej Txhoj muaj zog. Peb tsis tau ua rau peb tej kev sib ntsib luv dua thaum Hnub Xya xwb. Tiam sis, peb twb ua rau tib neeg thiab tsev neeg muaj cib fim thiab kev lav ris ntxiv siv peb lub sij hawm thaum Hnub Caiv kom muaj kev zoo siab hauv tsev thiab hauv lub koom txoos.
Lub Plaub Hlis Ntuj tas los, peb tsis tau hloov tej pawg pov thawj hwj xwb. Tiam sis, peb twb tau qhia thiab ntxiv dag zog rau ib txoj kev dawb huv dua li qub uas yog kev txhawb pab peb cov kwv tij thiab cov muam.
Zoo ib yam li tej txoj ntawm ib txoj hlua uas muab ntxias ua ke ua rau peb muaj ib lub cuab yeej zoo thiab ruaj heev, tag nrho tej yam uas peb ua no los peb koom tes ua kom muab tej yam uas muaj nyob hauv tus Cawm Seej lub Koom Txoos tsom ntsoov rau lub Koom Txoos lub luag hauj lwm tseem ceeb tshaj plaws: kom pab Vajtswv ua Nws txoj hauj lwm ua rau Nws cov me nyuam txais kev cawm seej thiab kev tsa nto. Kuv thov nej tsis txhob tsom ntsoov rau tus txheej txheem uas yuav tsum ua kom ua raws li tej yam uas tau tshaj tawm lawm. Peb yuav tsum tsis txhob cia tej txheej txheem ua rau peb tsis xav txog tej yam ntawm sab ntsuj plig uas qhia yog vim li cas peb tau hloov tej yam no tam sim no.
Peb xav kom tib neeg txoj kev ntseeg Leej Txiv txoj hau kev thiab tus Cawm Seej lub luag hauj lwm txhiv dim yuav loj hlob tuaj hauv lub ntiaj teb thiab xav kom muaj raws li Vajtswv txoj kev khi lus uas kav ib txhis. Peb tib lub hom phiaj yog kom tib neeg hloov siab los ntseeg tus Tswv ntxiv thiab hlub peb cov kwv tij thiab cov muam ntxiv.
Kev Muab Cais
Tej lub sij hawm peb cov mej zeej ntawm lub Koom Txoos muab tej yam ntawm txoj moo zoo hauv peb lub neej sib cais thaum peb sau tej daim ntawv txog ntau yam uas peb yuav tsum kawm thiab ua. Tiam sis ua li no ntshe ua rau peb tsis tshua to taub thiab tsis tshua pom meej. Peb yuav tsum ceev faj vim hais tias kev tsom ntsoov rau tej yam zoo li cov Falixais tej zaum yuav ua rau peb tsis txav mus nyob ze dua rau tus Tswv.
Kev rau siab thiab kev dawb huv, kev zoo siab thiab kev xyiv fab, thiab kev hloov siab los ntseeg ntxiv thiab kev pov hwm uas peb txais thaum peb “ywj [peb] lub siab rau Vajtswv” thiab “[txais] nws tus yam ntxwv rau [peb] lub ntsej muag” los peb txais tsis tau yog peb tsuas ua raws li txhua yam zoo uas peb yuav tsum ua xwb. Tsis yog li ntawd, tus Cawm Seej txoj moo zoo lub hwj chim kom hloov peb lub siab thiab foom koob hmoov rau peb yog los ntawm qhov uas peb to taub thiab ua raws li tag nrho Nws txoj moo zoo tej lus qhuab qhia, cov kab ke, thiab tej lub ntsiab cai uas koom ua ke. Tsuas yog thaum peb sau txhua yam los ua ib ke rau Khetos ua tus thawj, thiab tsom ntsoov rau Nws xwb, qhov tseeb ntawm txoj moo zoo thiaj ua rau peb hloov los ua neeg zoo li Vajtswv xav kom peb ua thiab rau siab nyiaj kom mus txog thaum kawg.
Kev Kawm thiab Kev Muab Qhov Tseeb ntawm Txoj Moo Zoo Txuas Ua Ke
Yexus Khetos txoj moo zoo yeej zoo li ib daim ntaub zoo kawg uas muab qhov tseeb sib txuas thiab ntxias ua ke. Thaum peb kawm thiab muab qhov tseeb ntawm txoj moo zoo txuas ua ke, peb tau koob hmoov kom txawj xam pom thiab txawj hnov tau tej yam ntawm sab ntsuj plig vim peb muaj qhov muag uas pom tau tus Tswv lub hwj huam hauv peb lub neej thiab muaj pob ntseg uas hnov tau Nws lub suab. Thiab lub ntsiab cai txog kev sau txhua yam los ua ib ke rau Nws ua tus thawj yeej pab tau peb hloov peb daim ntawv sau txhua yam peb yuav tsum ua los ua tej yam uas nyob ua ke thiab sib thooj. Cia kuv piav txog ib tug yam ntxwv los ntawm cov lus qhuab qhia thiab ib tug los ntawm lub Koom Txoos txog qhov kuv hais no.
Yam Ntxwv 1. Nqe kev ntseeg thib plaub yeej yog piv txwv zoo tshaj plaws txog kev sau txhua yam los ua ib ke rau Khetos ua tus thawj: “Peb ntseeg tias thawj cov ntsiab cai thiab kab ke ntawm Txoj Moo Zoo yog: qhov thib ib, Kev ntseeg txog tus Tswv Yexus Khetos; qhov thib ob, Kev hloov siab lees txim; qhov thib peb, Kev cai raus dej los ntawm txoj kev raus dej kom dim lub txim; qhov thib plaub, Kev tso tes rau saum taub hau kom tau lub txiaj ntsim ntawm tus Vaj Ntsuj Plig Dawb Huv.”
Kev ntseeg tiag tiag yeej tsom ntsoov rau tus Tswv Yexus Khetos—kev ntseeg Nws yog Leej Txiv Tib Leeg Tub uas los saum ntuj los thiab kev ntseeg Nws lub luag hauj lwm txhiv peb dim. “Vim nws tau ua kom muaj raws li txhua qhov ntsiab lus ntawm txoj kev cai, thiab nws aws tag nrho cov uas ntseeg nws; thiab cov uas ntseeg nws yuav muab siab npuab txhua yam uas zoo; yog li ntawd nws hais daws noob neej zaj.” Kev siv txoj kev ntseeg Khetos yog kev tso siab rau Nws ua peb tus Cawm Seej, tso siab rau Nws lub npe, thiab tso siab rau Nws tej lus cog tseg.
Qhov thib ib uas peb yeej xav ua tom qab peb tso siab rau tus Cawm Seej lawm yog hloov siab lees txim thiab tso kev phem tseg. Thaum peb muab siab rau ntseeg tus Tswv, peb yeej tig mus, los cuag Nws thiab cia siab rau Nws. Yog li ntawd, kev hloov siab lees txim yog kev tso siab thiab kev cia siab rau tus Txhiv Dim hais tias Nws ua tej yam uas peb ua tsis taus rau peb tus kheej. Txawm yog peb txhua tus yuav tsum “[cia siab] tag nrho rau tej hauj lwm zoo ntawm tus uas muaj hwj chim cawm tau” vim “tsuas yog dhau los ntawm tus Mexiyas uas Dawb Huv txoj hauj lwm zoo, txoj kev hlub tshua, thiab txoj kev tshav ntuj” xwb peb thiaj yuav los ua neeg tshiab los ntawm Khetos thiab thaum kawg yuav rov qab mus nyob ntawm Vajtswv xub ntiag.
Peb yuav tsum tso siab rau Nws, cia siab rau Nws, thiab coj raws li Nws kom ua tau kev cai raus dej thiab txais kev zam txim. “Kuv paub tias yog nej yuav coj raws li Leej Tub, kawg siab kawg ntsws, tsis txhob lam ua txuj ua los sis lam dag rau Vajtswv, tiam sis mob siab ntso, hloov siab lees txim rau nej tej kev txhaum, ua pov thawj rau Leej Txiv tias nej yeej txaus siab ris Khetos lub npe, los ntawm kev cai raus dej—muaj tseeb tiag, yog nej coj raws li tus Tswv thiab nej tus Cawm Seej mus rau hauv dej, raws li nws txoj lus, saib seb, tom qab ntawd nej yuav tau txais tus Vaj Ntsuj Plig Dawb Huv; muaj tseeb tiag, tom qab ntawd txoj kev cai raus ntawm hluav taws thiab ntawm tus Vaj Ntsuj Plig Dawb Huv yuav los.”
Ua ntej peb txais tau kab ke tso tes saum taub hau kom muab lub txiaj ntsim Vaj Ntsuj Plig Dawb Huv los peb yuav tsum tso siab rau Nws, cia siab rau Nws, coj raws li Nws, thiab txiv mus tom ntej nrog Nws thiab nrog tus Ntsuj Plig Dawb Huv txoj kev pab. Ib yam li Nifais tau hais tias, “Thiab nim no … kuv paub los ntawm tej no tias tsuas yog ib tug neeg yuav nyiaj mus kom txog thaum kawg, coj raws li Vajtswv tus uas muaj txoj sia nyob Leej Tub tus yam ntxwv xwb, tsis li ntawd ces yuav cawm tsis tau tus ntawd dim.”
Nqe kev ntseeg thib plaub tsis qhia tias tej ntsiab cai thiab kab ke tseem ceeb ntawm txoj moo zoo yog dab tsi xwb. Tiam sis, tej lus uas hais txog peb txoj kev ntseeg no sau txhua yam los ua ib ke rau Khetos ua tus thawj: tso siab rau Nws, cia siab rau Nws, coj raws li Nws, thiab txiv mus tom ntej nrog Nws—yeej yog los ntawm Nws.
Yam Ntxwv 2. Tam sim no kuv xav piav txog qhov uas peb muab tag nrho tej txheej xwm thiab tej hauj lwm hauv lub Koom Txoos sau los ua ib ke rau Khetos ua tus thawj. Muaj ntau yam ntxwv ntxiv uas kuv hais tau; kuv tsuas hais ob peb qho xwb.
Thaum xyoo 1978, Thawj Tswj Hwm Spencer W. Kimball qhia kom cov mej zeej hauv lub Koom Txoos txhawb nqa Xi-oos nyob thoob plaws lub ntiaj teb. Nws ntuas cov Neeg Ntseeg kom lawv nyob hauv lawv tej teb chaws thiab tsa tej ceg txheem ntseeg uas muaj zog los ntawm kev muab Vajtswv tsev neeg sib sau ua ke thiab kev qhia lawv txog tus Tswv tej kev. Nws kuj qhia hais tias tsoom haiv neeg ntseeg yuav muaj tej lub tuam tsev ntxiv thiab tau koob hmoov ntxiv txawm lawv nyob qhov twg los yog.
Vim muaj ceg txheem ntseeg ntau zuj zus tuaj, ces cov mej zeej haj yam yuav tsum muaj tej tsev uas “tsev neeg nyiam nyob, tej tsev uas pab lawv lub neej thiab yuav muaj kev sib hlub, kev ris txiaj, thiab kev txhawb nqa.” Yog li ntawd, thaum xyoo 1980, twb tau muab kev sib ntsib rau Hnub Xya tso ua ke siv peb teev xwb kom “rov qab qhia tias tsev neeg muaj kev lav ris kawm thiab qhia txog txoj moo zoo thiab ua neej raws li txoj moo zoo.” Twb tau rov qab qhia txog tsev neeg ntxiv dua nyob hauv “Tsev Neeg: Ib zaj Lus Tshaj Tawm rau lub Ntiaj Teb” uas Thawj Tswj Hwm Gordon B. Hinckley qhia thaum xyoo 1995.
Lub Plaub Hlis Ntuj xyoo 1998, Thawj Tswj Hwm Hinckley tshaj tawm txog qhov uas yuav ua ntau tej lub tuam tsev me dua ntxiv, thiaj li ua rau tib neeg thiab tsev neeg ntawm Tsoom Haiv Neeg Ntseeg hauv Hnub Nyoog Kawg txais tau cov kab ke dawb huv hauv tus Tswv lub tsev nyob thoob plaws lub ntiaj teb. Thiab tej cib fim kom loj hlob tuaj ntawm sab ntsuj plig no los yeej txuas ua ke nrog tej kev pab vam khom tus kheej ntxiv los ntawm Pob Nyiaj Pab Kawm Ntawv uas Tsis Paub Kawg hauv xyoo 2001.
Thaum nws yog tus thawj, Thawj Tswj Hwm Thomas S. Monson pheej ntuas Tsoom Haiv Neeg Ntseeg mus “cawm lwm tus dim” thiab hais txog qhov uas lub Koom Txoos ib lub luag hauj lwm uas Vajtswv pom zoo yog kev saib xyuas cov neeg pluag thiab cov neeg uas xav tau. Thiab kom pab qhia txog kev npaj ntawm sab cev nqaij daim tawv los twb tau tsim Tej Kev Pab Vam Khom tus Kheej thaum xyoo 2012.
Ob peb xyoos tas los, peb twb tau rov qab qhia txog tej ntsiab cai tseem ceeb kom saib Hnub Caiv ua ib hnub zoo siab nyob hauv tsev thiab hauv lub Koom Txoos, ua rau peb npaj siab hnov txog kev teem sij hawm rau kev sib ntsib thaum Hnub Xya uas tau tshaj tawm hauv lub tuam rooj sab laj no.
Thiab rau lub hlis tas los, twb tau ntxiv dag zog rau tej pawg Pov Thawj Hwj Mekhixedes kom zoo li lwm cov koom haum thiaj ua tau ib tug txheej txheem siab thiab dawb huv dua ntxiv kom txhawb pab lwm tus.
Kuv ntseeg tias qhov uas tau muaj tej no tshwm sim zuj zus yuav pab peb pom tau ib txoj hauj lwm ntxaws ntxaws uas sib thooj thiab tsis yog tej yam uas nyias nyob nyias kom pab peb xwb. “Vajtswv tau qhia ib tug txheej txheem tawm rau tib neeg thiab tsev neeg loj hlob tuaj ntawm sab ntsuj plig dhau los ntawm cov kab ke, kev qhia, tej txheej xwm, thiab tej yam ntxim saib ntxim ua uas tsom ntsoov rau tsev neeg thiab lub Koom Txoos txhawb nqa. Peb muaj tej koom haum thiab tej txheej xwm hauv lub Koom Txoos kom foom koob hmoov rau tib neeg thiab tsev neeg thiab tsis yog kom muaj tej ntawd xwb.”
Kuv thov Vajtswv kom peb yuav to taub hais tias tus Tswv txoj hauj lwm yog ib txoj hauj lwm thoob plaws lub ntiaj teb uas peb ua hauv tsev thiab lub Koom Txoos txhawb nqa. Kuv paub thiab ua tim khawv tias tus Tswv tab tom qhia thiab yeej yuav qhia tej yam zoo kawg nkaus thiab tseem ceeb txog Vajtswv lub Nceeg Vaj.
Kev Cog Lus thiab Zaj Lus Tim Khawv
Kuv twb pib kuv zaj lus thaum kuv hais txog qhov uas yus tsim tau ib qho ruaj nrees thaum yus muab ntau txoj ntxias ua ke los ua ib txoj hlua. Zoo ib yam li ntawd, kuv cog lus hais tias peb yuav txawj xam pom ntxiv, rau siab ntxiv, thiab muaj lub hwj chim ntxiv thaum peb kawm thiab ua raws li Yexus Khetos txoj moo zoo thaum peb siv zog sau txhua yam los ua ib ke rau Khetos ua tus thawj.
Txhua lub cib fim thiab tej koob hmoov uas nyob mus ib txhis yeej muaj taus, muaj keeb kwm thiab muaj nqis vim yog tus Tswv Yexus Khetos. Ib yam li Amas ua tim khawv tias: “Tsis muaj dua lwm txoj kev los sis lwm yam uas tib neeg yuav muaj peev xwm dim tau, tsuas yog los ntawm thiab dhau los ntawm Khetos. Saib seb, nws yog txoj sia thiab txoj kev kaj ntawm neeg ntiaj teb.”
Kuv zoo siab ua tim khawv txog qhov uas Leej Txiv Nyob Mus Ib Txhis thiab Nws Leej Tub uas Nws Hlub muaj txoj sia tiag tiag. Los ntawm peb tus Cawm Seej peb thiaj li muaj kev xyiv fab. Thiab los ntawm Nws peb nrhiav tau “txoj kev kaj siab nyob hauv sim neej no, thiab txoj sia nyob mus ib txhis nyob hauv sim neej uas yuav los.” Kuv ua tim khawv li no los ntawm Yexus Khetos lub npe dawb ceev, amees.