Ruaj Nrees thiab Khov Kho Ntseeg Khetos
Xwv kom nyob ruaj nrees thiab khov kho ntseeg Khetos ces Yexus Khetos txoj moo zoo yuav tsum nkag hauv yus lub siab lub ntsws.
Nyob hauv Phau Qub, peb nyeem txog tej lub caij nyoog thaum tsev neeg Ixayees tau ua raws li lawv txoj kev khi lus nrog Yehauvas thiab tau teev tiam Nws es muaj lwm lub sij hawm thaum lawv tso lawv tej kev khi lus tseg thiab teev tiam cov mlom los yog Npa-as.
Tus vaj ntxwv Ahaj txoj kev kav yog ib lub caij nyoog uas lawv tso qhov tseeb tseg nyob hauv Ixayees lub nceeg vaj qaum teb. Muaj ib zaug tus yaj saub Eliyas tau hais kom Vaj Ntxwv Ahaj muab cov neeg Ixayees sib sau ua ke nrog Npa-as cov yaj saub los yog cov pov thawj nyob ntawm lub Roob Kalemees. Thaum cov neeg twb los sib sau ua ke, Eliyas hais rau lawv tias, “Nej tseem yuav ua neeg muaj ob lub siab mus txog thaum twg? [los yog hais tias, “Thaum twg yog zaum kawg uas nej yuav txiav txim siab?”] yog hais tias tus Tswv yog Vajtswv tiag, sawv daws cia li pe hawm nws; tiam sis yog hais tias Npa-as yog Vajtswv, ces sawv daws cia li pe Npa-as los mas. Tiam sis cov pej xeem tsis teb ib los li.” Ces Eliyas hais kom nws thiab Npa-as cov yaj saub nyias ua nyias muab ib tug heev nyuj txiav ua tej thooj thiab coj mus tso rau saum pawg taws tiam sis “tsis txhob zes taws rau li.” Ces nws hais tias, “Cia li thov [nej] tus vaj tswv, thiab kuv yuav thov kuv tus Tswv: thiab yog leej twg tso hluav taws los kub, tus ntawd thiaj yog Vajtswv tiag. Cov pej xeem thiaj qw hais tias, Peb pom zoo ua li koj hais ko ntag.
Nej nco qab hais tias Npa-as cov pov thawj tau thov lawv tus vaj tswv uas tsis muaj tiag tau ntev kom zes taws, tiam sis “tiam sis tsis muaj leej twg teb thiab tsis hnov suab dab tsi li.” Thaum txog Eliyas thib, nws txawm muab tus Tswv lub thaj uas twb vau tas lawm kho rov rau, ces nws muab taws mus tso rau saum lub thaj, muab tus heev nyuj tua txiav ua tej thooj, ces nws txib kom muab dej los hliv rau saud, tsis ua ib zaug xwb, tiam sis ua peb zaug diam. Tsis muaj leej twg xav tias nws los yog lwm tus neeg yuav muaj peev xwm zes taws.
“Ces thaum hnub qaij uas txog lub caij fij khoom, Eliyas thiaj txav zog los rau ntawm lub thaj thiab thov Vajtswv hais tias, Tus Tswv uas yog Anplaham, Ixaj thiab Yakhauj tus Vajtswv, hnub no thov koj cia li ua kom sawv daws pom hais tias, koj yog cov Yixayees tus Vajtswv thiab kuv yog koj tus tub qhe thiab tej uas kuv ua no yog koj kom kuv ua. …
“Tus Tswv txawm tso hluav taws los kub cov khoom fij, cov taws, cov pob zeb, cov av thiab cov dej hauv tus kwj tas huv tib si lawm.
“Thaum cov pej xeem pom li ntawd, lawv txawm qhau cev hlo rau hauv av thiab qw nrov nrov hais tias, Tus Tswv thiaj yog Vajtswv; tus Tswv tib leeg xwb thiaj yog Vajtswv tiag.”
Hnub no tej zaum Eliyas yuav hais tias:
-
Vajtswv, peb Leej Txiv Saum Ntuj Ceeb Tsheej muaj txoj sia nyob, los sis tsis muaj Nws, tiam sis yog muaj Nws, ces cia li teev tiam Nws.
-
Yexus Khetos yog Vajtswv Leej Tub, tib neeg tus Txhiv Dim uas sawv rov los, los sis Nws tsis yog, tiam sis yog tias Nws yog, ces cia li coj raws li Nws.
-
Phau Ntawv Maumoos yog Vajtswv txoj lus, los sis tsis yog Vajtswv txoj lus, tiam sis yog tias yog Vajtswv txoj lus, ces cia li “[kawm thiab] ua raws li phau ntawv no tej lus qhuab qhia [kom] txav tau los ze rau Vajtswv.”
-
Yauxej Xamiv twb pom thiab sib tham nrog Leej Txiv thiab Leej Tub hnub hauv lub caij nplooj ntoo hlav ntawm xyoo 1820, los sis nws tsis tau pom, tiam sis yog nws twb pom, ces cia li mloog tus yaj saub lus, uas muaj tej yuam sij ntawm kev cai sib khi uas kuv, Eliyas, tau muab rau nws.
Nyob hauv lub tuam rooj sab laj, Thawj Tswj Hwm Russell M. Nelson hais tias: “Nej tsis tas xav seb yam twg muaj tseeb [saib Maulaunais 10:5]. Nej tsis tas xav seb nej yuav tso siab taus rau leej twg. Los ntawm kev tshwm sim, nej txais tau nej zaj lus tim khawv hais tias Phau Ntawv Maumoos yeej yog Vajtswv txoj lus, tias Yauxej Xamiv yog ib tug yaj saub, thiab tias nov yog tus Tswv lub Koom Txoos. Txawm hais tias luag lwm tus yuav hais los sis ua li cas los, tsis muaj leej twg uas tshem tau ib qho lus tim khawv thaum twg twb nkag mus hauv nej lub siab lub ntsws txog qhov tseeb lawm.”
Thaum Yakaunpaus cog lus tias Vajtswv “tus ua muaj siab dawb siab zoo pub ib puas tsav yam” rau cov uas nrhiav Nws lub tswv yim, nws ceeb toom hais tias:
“Tiam sis thaum nej thov Vajtswv nej yuav tsum ntseeg tsis txhob ua xyem xyav. Tus uas ua xyem xyav, tus ntawd zoo ib yam li tej dej Hiav Txwv uas cua ntsawj ntas mus ntas los.
“Tus uas zoo li ntawd, nws tsis txhob xav hais tias nws yuav tau ib yam dab tsi ntawm Vajtswv li.
“Rau qhov ib tug neeg zoo li ntawd lub siab ywj fab ywj fwj, nws yuav ua yam twg los nws ua tsis tsheej.”
Tiam sis, peb tus Cawm Seej yeej yog tus uas coj yam ntxwv zoo kawg nkaus txog kev ruaj khov. Nws hais tias, “[Leej Txiv] tsis tso kuv tseg ib zaug li; rau qhov kuv ua txhua yam raws li nws lub siab nyiam xwb.” Cia li xav txog tej nqe vaj lug kub no uas piav txog cov txiv neej thiab cov poj niam uas ruaj khov thiab rau siab ntseeg, zoo li tus Cawm Seej:
Lawv “tau hloov siab los ntseeg rau txoj kev ntseeg tseeb xwb; thiab lawv twb tsis kam muab txoj kev ntseeg tseeb ntawd tso tseg, vim lawv khov kho, thiab ruaj nrees, thiab tsis txav li, txaus siab nrog tag nrho kev rau siab ntso ua raws li tus Tswv tej lus txib.”
“Lawv lub siab yeej khov kho, thiab lawv yeej tso siab rau Vajtswv tsis tu ncua.”
“Thiab saib seb, nej yeej paub ntawm nej tus kheej, vim nej twb pom lawm tias, tag nrho cov uas lawv cov kwv tij ua rau lawv paub txog qhov tseeb … lawv yeej nyob ruaj nrees thiab khov kho coj raws li txoj kev ntseeg, thiab kev cawm seej uas tau ua rau lawv dim.”
“Lawv niaj hnub tuaj kawm tej uas cov [thwj tim] qhia, lawv sib hlub sib pab, lawv koom noj Yexus rooj mov thiab thov Vajtswv ua ke.”
Xwv kom nyob ruaj nrees thiab khov kho ntseeg Khetos ces Yexus Khetos txoj moo zoo yuav tsum nkag hauv yus lub siab lub ntsws, uas txhais hais tias txoj moo zoo tsis yog ib yam tseem ceeb hauv ib tug neeg lub neej xwb, tiam sis yog qhov uas tus ntawd tsom ntsoov rau kom coj cwj pwm thiab ua neej. Tus Tswv hais tias:
“Kuv yuav muab lub siab tshiab thiab txoj kev xav tshiab rau nej. Kuv yuav muab nej lub siab uas tawv li pob zeb pov tseg thiab muab lub siab uas mloog lus rau nej.
“Kuv yuav pub kuv tus ntsuj plig rau nej, kom nej coj tau raws li kuv txoj kev cai thiab ceev kuv tej lus sam hwm.
“Thiab … nej yuav yog kuv haiv neeg thiab kuv yuav yog nej tus Vajtswv.”
Nov yog kev khi lus uas peb ua thaum peb ua kev cai raus dej thiab ua kab ke hauv lub tuam tsev. Tiam sis ib txhia tseem tsis tau txais Yexus Khetos txoj moo zoo tag nrho hauv lawv lub neej. Ib yam li Povlauj hais tias, txawm twb muab lawv faus nrog Yexus thaum ua kev cai raus dej, lawv tseem tsis tau ua lub neej tshiab zoo li Yexus Khetos twb tau sawv hauv qhov tuag rov qab los. Txoj moo zoo tseem tsis yog lub ntsiab rau lawv lub neej. Lawv tsis tsom ntsoov rau Khetos. Lawv xaiv tias lawv yuav coj raws li tej lus qhuab qhia thiab tej lus txib twg thiab xaiv thaum twg thiab qhov twg lawv yuav ua hauj lwm hauv lub Koom Txoos. Yog vim “cov uas tau xaiv tseg raws li txoj kev khi lus” ua raws nraim li lawv tej kev khi lus lawv thiaj li tsis raug ntxias thiab nyob khov kho ntseeg Khetos.
Tam sim no peb feem coob nyob nruab nrab ntawm qhov uas peb ua raws li txoj moo zoo vim peb xav nrog lwm tus koom ua ke thiab qhov uas peb twb tso siab plhuav rau Vajtswv thiab xav ua raws li Nws lub siab nyiam zoo li Yexus Khetos. Nyob nruab nrab ob qho no, muaj ib lub sij hawm thaum Yexus Khetos txoj moo zoo nkag hauv peb lub siab thiab loj tuaj puv peb lub siab tag nrho. Tej zaum yuav tsis muaj li no tom qab ib me pliag xwb, tiam sis tsim nyog uas peb txhua tus ua tej yam kom tau txoj koob hmoov ntawd.
Yeej nyuaj kom nyob ruaj nrees thiab khov kho thaum peb hloov los ua neeg dawb huv nyob hauv “lub cub tawg ntawm kev txom nyem los,” yog ib yam uas peb txhua tus raug hauv lub neej no. Yog tsis muaj Vajtswv nrog peb, tej kev tsaus ntuj no ua rau peb nyuaj siab, poob siab, thiab npau taws. Yog muaj Vajtswv nrog peb, kev nplij siab pauv kev mob, kev kaj siab lug pauv kev ntxhov siab, thiab kev cia siab pauv kev tu siab. Kev nyob khov kho ntseeg Khetos yuav ua rau peb txais tau Nws txoj kev tshav ntuj uas txhawb nqa peb. Nws yuav muab kev sim siab hloov los ua ib txoj koob hmoov rau peb thiab zoo li Yaxayas hais, “muab … kev kaj siab pauj kev lwj siab.”
Cia kuv hais peb tus yam ntxwv uas kuv paub txog:
Muaj ib tug poj niam uas muaj mob uas ua rau nws tsis muaj zog thiab txawm muaj kev kho mob, pov thawj hwj cov koob hmoov, thiab kev yoo mov thiab thov Vajtswv, qhov mob no tseem kav ntev. Txawm li ntawd los, nws txoj kev ntseeg lub hwj chim los ntawm kev thov Vajtswv thiab qhov uas Vajtswv hlub nws yeej tsis ploj hlo li. Nws tseem ua neej txhua hnub (thiab tej lub sij hawm txhua teev) ua hauj lwm li Vajtswv hu nws ua hauv lub Koom Txoos, thiab ua kev nrog rau nws tus txiv, nws tseem saib xyuas nws tsev neeg, luag ntxhi rau lawv npaum li nws ua tau. Nws txoj kev khuv leej rau lwm tus yeej loj heev, vim nws txoj kev txom nyem twb ua kom nws dawb huv, thiab ntau zaus nws yeej txhawb pab lwm tus. Nws tseem nyob ruaj nrees, thiab tib neeg nyiam nrog nws nyob.
Muaj ib tug txiv neej uas loj hlob tuaj hauv lub Koom Txoos, twb mus ua tub txib, thiab yuav ib tug poj niam uas xav tsis thoob thaum tus txiv neej cov kwv tij pib hais lus thuam lub Koom Txoos thiab tus Yaj Saub Yauxej Xamiv. Tom qab ib ntu lawv twb tawm lub Koom Txoos thiab sim hais kom nws nrog lawv tawm mus. Zoo li lwm lub sij hawm thaum tib neeg ua li no, lawv twb xa tej zaj, tej podcast, thiab video uas cov neeg thuam ua, lawv feem coob yog cov mej zeej ntawm lub Koom Txoos uas tsis zoo siab lawm. Nws cov kwv tij thuam nws txoj kev ntseeg, qhia nws tias nws ntseeg kev dag kev ntxias. Nws tsis tau muaj lus teb tag nrho tej yam lawv hais, es nws txoj kev ntseeg twb raug lawv txoj kev tawm tsam tas li. Nws xav seb puas tsim nyog nws tsum tsis txhob mus rau lub koom txoos. Nws tau sib tham nrog nws tus poj niam. Nws tau sib tham nrog cov neeg uas nws tso siab rau. Nws tau thov Vajtswv. Thaum nws ntxhov siab xav txog tej yam no, nws nco txog tej lub sij hawm thaum nws twb hnov tus Ntsuj Plig Dawb Huv thiab tus Ntsuj Plig twb ua tim khawv txog qhov tseeb rau nws. Nws xav tias, “Yog kuv siab ncaj, kuv yuav tsum lees hais tias tus Ntsuj Plig twb tshoov kuv lub siab tshaj dua li ib zaug thiab tus Ntsuj Plig tej lus tim khawv muaj tseeb tiag.” Nws rov qab zoo siab thiab nyob kaj siab lug nrog nws tus poj niam thiab cov me nyuam.
Ib tug txiv tsev thiab niam tsev uas yeej ib txwm muaj kev zoo siab ua raws li cov Thawj Coj tau hais nkawd nyuaj siab vim nyuaj rau nkawd muaj me nyuam. Nkawd twb siv nyiaj ntau kom cov kwv kho mob pab, thiab tom qab ntau xyoo, nkawd muaj ib tug tub. Tiam sis tu siab heev, ib xyoos tom qab ntawd, tus me nyuam mos liab raug xwm txheej ua rau nws lub hlwb raug mob heev thiab feeb tsis meej. Nws twb tau txias kev kho mob zoo tshaj plaws, tiam sis cov kws kho mob tsis paub yav tom ntej yuav zoo li cas. Tus me nyuam uas khub niam txiv no twb khwv heev thiab thov Vajtswv kom los rau hauv lub ntiaj teb no, zoo li nws twb raug txeeb mus thiab nkawd tsis paub yog tias nws yuav rov qab los. Nyuaj rau nkawd tu nkawd tus me nyuam thiab tseem ua txhua yam uas nkawd lav ris. Nyob hauv lub sij hawm nyuaj tshaj plaws, nkawd twb thov tus Tswv. Nkawd tso siab rau “cov mov uas niaj hnub noj” uas tus Tswv pub rau nkawd. Nkawd muaj phooj ywg thiab tsev neeg zoo uas pab thiab siv lub pov thawj hwj foom koob hmoov rau nkawd. Nkawd twb sib koom siab ntxiv, ntshe nkawd haj yam sib koom siab tshaj dua li yuav muaj yog tias tsis tau raug xwm txheej li no.
Thaum lub Xya Hli Ntuj 23, 1837, tus Tswv tau qhia kev tshwm sim txog tus Thawj Tswj Hwm ntawm Pawg Kaum Ob tug Thwj Tim, Thomas B. Marsh. Tau hais li no hais tias:
“Thiab thov Vajtswv rau koj cov kwv tij uas yog cov Kaum Ob tug Thwj Tim. Qhuab ntuas lawv tawv qhawv rau kuv lub npe, thiab cia lawv raug qhuab ntuas rau tag nrho lawv tej kev txhaum, thiab koj yuav tsum rau siab ntseeg kuv lub npe rau kuv pom.
“Thiab tom qab lawv tej kev ntxias, thiab kev txom nyem ntau, saib seb, kuv, tus Tswv, kuv yuav nrhiav lawv, thiab yog hais tias lawv tsis ua lawv lub siab tawv qhawv, thiab tsis ua lawv caj dab tawv qhawv rau kuv, lawv yuav hloov siab los ntseeg, thiab kuv yuav kho lawv kom zoo.”
Kuv ntseeg tias cov ntsiab cai hauv tej nqe no yog hais rau peb txhua tus. Tej kev ntxias thiab kev txom nyem uas peb raug, thiab tej kev sim siab uas tus Tswv pom zoo kom peb raug, yuav ua rau peb hloov siab los ntseeg thiab txais kev kho mob tag nrho. Tiam sis yuav muaj li no tsuas yog peb tsis ua peb lub siab tawv thiab peb lub caj dab tawv qhawv tawm tsam Nws. Yog peb nyob ruaj nrees thiab khov kho, txawm muaj li cas los xij, ces peb yuav hloov siab los ntseeg raws li tus Cawm Seej xav kom peb muaj thaum Nws hais rau Petus hais tias, “Thaum koj los cuag kuv, koj yuav tsum txhawb koj cov kwv tij zog,” uas yog kev hloov siab los ntseeg uas yeej yuav tsis ploj mus. Kev kho mob uas cog lus tias peb yuav txais yog kev ua rau peb tus ntsuj plig uas muaj kev txhaum hloov los ua dawb huv.
Ua rau kuv nco txog peb niam cov lus ntuas: “Noj zaub; yuav zoo rau nej lub cev.” Peb niam yeej hais yog lawm, thiab hais txog kev nyob khov kho rau ntawm kev ntseeg, “noj zaub” txhais tias thov Vajtswv tsis tu tsis tseg, nyeem vaj lug kub txhua hnub, ua hauj lwm thiab teev tiam hauv lub Koom Txoos, txais lub cim nco txog txhua lub lim tiam, hlub nej tus neeg zej zog, thiab kwv nej tus ntoo khaub lig kom mloog Vajtswv lus txhua hnub.
Cia li nco ntsoov tias Vajtswv cog lus txog tej yam zoo uas yuav los, tam sim no thiab yav tom ntej, rau cov uas ruaj nrees thiab khov kho ntseeg Khetos. Cia li nco ntsoov “txoj sia nyob mus ib txhis, thiab txoj kev xyiv fab ntawm cov ntseeg.” “Auj tag nrho nej cov uas muaj lub siab dawb, cia li tsa nej lub taub hau thiab txais yuav Vajtswv txoj lus uas zoo, thiab nco ntsoov khaws nws txoj kev hlub; vim nej yuav ua tau li ntawd, yog nej lub siab nyob ruaj khov kho, mus ib txhis.” Los ntawm Yexus Khetos lub npe, amees.