Kev Saib Xyuas Zoo Li Kev Yug Yaj
Peb ncav tes nrog kev hlub pab lwm tus vim qhov ntawd yog qhov uas tus Cawm Seej twb txib peb ua li ntawd.
Thaum kuv sib tham nrog kuv ib tug phooj ywg, nws qhia kuv tias thaum nws yog ib tug tub hluas uas nyuam qhuav tau ua kev cai raus dej los ua mej zeej hauv lub Koom Txoos, ua ciav nws tsis tau xav tias nws sib haum nrog nws pawg ntseeg. Cov tub txib uas tau qhia nws tsis nyob lawm, thiab nws xav tias tsis muaj leej twg paub nws. Vim nws tsis muaj phooj ywg hauv pawg ntseeg, nws twb nrhiav tau nws cov phooj ywg qub thiab nrog lawv ua tej yam uas ua rau nws tsis xav mus rau lub koom txoos—ua rau nws pib mus deb ntawm pab yaj ntawd. Nws los kua muag thaum nws qhia kuv tias nws zoo siab heev thaum ib tug mej zeej hauv nws pawg ntseeg ncav tes mus txhawb pab nws thiab ua siab dawb caw nws rov qab los. Ob peb hlis tom qab ntawd, nws twb rov los rau pab yaj ntawd, es nws tau txhawb nqa lwm tus nrog rau nws tus kheej. Peb yeej zoo siab uas muaj ib tug neeg yug yaj nyob hauv Brazil uas nrhiav tus tub hluas no, uas yog Txwj Laug Carlos A. Godoy, uas zaum ntawm no ua ib tug hauv Pawg Thawj Tswj Hwm rau Pawg Xya Caum.
Peb xav tsis thoob vim tej yam me me yuav muaj nqis mus ib txhis li. Qhov tseeb no yog lub ntsiab ntawm lub Koom Txoos tej dej num mus txhawb pab lwm tus. Leej Txiv Saum Ntuj Ceeb Tsheej yeej muab peb tej dej num me me txhua hnub hloov kom ua txuj ci tseem ceeb. Twb dhau rau lub hlis xwb txij thaum Thawj Tswj Hwm Russell M. Nelson tau tshaj tawm tias “tus Tswv twb tau hloov tej yam uas tseem ceeb rau peb [txoj kev saib xyuas],” thiab piav tias “Peb yuav siv ib tug txheej txheem tshiab thiab dawb huv ntxiv kom saib xyuas thiab txhawb pab lwm tus. Peb yuav hu tej dej num no ua ‘kev txhawb pab.’”
Thawj Tswj Hwm Nelson kuj tau qhia tias: “Ib qho uas yeej yuav muaj nyob hauv tus Tswv lub Koom Txoos uas tseeb thiab muaj txoj sia yog qhov uas yuav muaj tus txheej txheem kom coj txoj kev txhawb pab Vajtswv cov me nyuam thiab lawv tsev neeg. Vim nov yog Nws lub Koom Txoos, peb cov uas yog Nws cov tub qhe yuav txhawb pab ib tug mus ib tug, ib yam li Nws tau ua. Peb yuav txhawb pab lawv los ntawm Nws lub npe, nrog Nws lub hwj chim thiab txoj cai, thiab nrog Nws txoj kev ua siab zoo.”
Txij thaum tau tshaj tawm qhov no los, nej twb ua hauj lwm zoo kawg! Peb twb tau hnov los ntawm txhua ceg txheem ntseeg thoob plaws lub ntiaj teb tias nej tau hloov tej yam no li peb tus yaj saub tau qhia lawm. Ua piv txwv hais tias, cov kwv tij thiab cov muam uas txhawb pab twb txais kev txib mus rau tej tsev neeg, twb tau tso tej khub ua ke—tsis hais cov tub hluas thiab cov ntxhais hluas los yog—thiab nej pib tau ua tej kev sib tham txog kev txhawb pab.
Kev tshwm sim uas tau tshaj tawm nag hmo hais tias yuav ua—“ib txoj kev tshiab kom muaj kev qhia txoj moo zoo hauv tsev thiab hauv lub Koom Txoos sib npaug” los twb hais rau lub hlis tom qab tau txais kev tshwm sim txog kev txhawb pab. Pib thaum lub Ib Hlis Ntuj, thaum peb pauv ib teev ntawm kev teev tiam Vajtswv hauv lub koom txoos, txhua yam uas peb tau kawm los ntawm kev txhawb pab yuav pab peb thaum peb tsev neeg thiab cov uas peb hlub hwm Hnub Caiv ua ke.
Tom qab uas tau kho tus txheej txheem lawm, tej zaum peb yuav xav paub seb, “Peb puas ua kev txhawb pab raws li tus Tswv txoj kev? Peb puas pab tus Tswv Yug Yaj Zoo raws li Nws xav?”
Thawj Tswj Hwm Henry B. Eyring tau qhuas Haiv Neeg Ntseeg vim lawv tau hloov tej yam no, tiam sis nws kuj hais tias nws cia siab tias cov mej zeej yuav paub tias kev txhawb pab tsis yog “kev ua siab zoo xwb.” Qhov nws hais no tsis hais tias kev ua siab zoo tsis muaj nqis, tiam sis cov uas to taub kev txhawb pab tiag tiag paub tias tsis yog kev ua siab zoo xwb. Yog yuav ua raws li tus Tswv txoj kev, kev txhawb pab yuav ua zoo rau lwm tus mus ib txhis li, xws li Txwj Laug Godoy.
“Tus Cawm Seej tau coj yam ntxwv qhia peb tias kev txhawb pab txhais li cas thaum Nws pab peb vim Nws hlub peb. … Nws … tau qhia, thov Vajtswv, nplij siab, thiab foom koob hmoov rau cov nyob puag ncig Nws, caw txhua tus kom coj raws li Nws. … Thaum cov mej zeej ntawm lub Koom Txoos mus txhawb pab [ua li txoj kev siab thiab dawb huv ntxiv], lawv thov Vajtswv thiab pab lwm tus li Nws yuav pab—kom … ‘saib xyuas cov ntseeg txhua lub sij hawm, thiab nyob nrog lawv thiab txhawb lawv lub zog,’ kom ‘mus xyuas txhua tus mej zeej tom tsev,’ thiab pab txhua tus los ua Yexus Khetos ib tug thwj tim.”
Peb to taub hais tias ib tug neeg yug yaj zoo hlub nws cov yaj, paub txhua tus lub npe, thiab “xav paub txog txhua tus.”
Kuv ib tug phooj ywg yog ib tug zov pab yaj, nws tau khwv ua hauj lwm tu nyuj thiab tu yaj nyob saum cov Roob Rocky tas nws lub neej. Muaj ib zaug nws tau qhia kuv tias kev yug yaj muaj teeb meem thiab tej xwm txheej li cas. Nws piav tias thaum lub caij nplooj ntoo hlav, thaum cov daus saum roob twb yaj yuav luag tas lawm, nws coj pab yaj uas muaj kwv yees li 2,000 tug yaj mus nyob pem roob rau lub caij sov. Nyob ntawd, nws twb saib xyuas cov yaj mus txog thaum lub caij nplooj ntoo zeeg, es nws coj lawv mus rau ib qho chaw zoo rau lub caij no no hauv roob tiaj suab puam. Nws piav tias kev zov ib pab yaj loj nyuaj npaum li cas, nws yuav tsum sawv ntxov thiab nyob kom lig—sawv ua ntej hnub tuaj thiab ua tiav tom qab hnub poob lawm. Nws yeej ua tsis tau nws tus kheej.
Lwm tus tau pab zov pab yaj, tsis hais ib co uas twb tau tu tsiaj tau ntev lawm thiab ib cov hluas uas txais kev pab los ntawm lawv tej khub laus dua lub tswv yim. Nws kuj muaj ob tug nees, ob tug me nyuam nees, ob tug aub laus uas txawj zov yaj, thiab ob peb tug me nyuam aub. Txhua lub caij sov, kuv tus phooj ywg thiab nws pab yaj raug cua hlob thiab los nag hlob hlob, raug mob, dej qhuav, thiab lwm yam uas nyuaj heev. Tej lub sij hawm lawv yuav tsum nqa dej tas lub caij sov los pub rau cov yaj haus kom lawv tsis tuag. Ces txhua xyoo thaum lub caij nplooj ntoo zeeg, thaum huab cua txias tab tom los thiab lawv coj cov yaj tawm cov roob li, thaum lawv suav cov yaj, ntshe feem ntau muaj 200 tawm tus yaj uas ploj lawm.
Pab yaj uas muaj 2,000 tus yaj pem roob thaum lub caij nplooj ntoo hlav los tsuas muaj 1,800 tus yaj lawm xwb. Feem ntau cov yaj uas ploj lawm tsis yog ploj vim lawv mob los sis laus lawm tiam sis cov tsiaj xws li cov tsov pem roob los sis cov hma los tom lawv. Cov tsiaj no nrhiav tau cov me nyuam yaj uas khiav tawm ntawm pab yaj ntawd, lawv thiaj li tsis muaj lawv tus neeg yug yaj pov hwm lawv. Thov nej xav txog qhov uas kuv nyuam qhuav piav rau nej yog hais txog sab ntsuj plig? Leej twg yog tus tswv yug yaj? Leej twg nyob hauv pab yaj? Leej twg yog cov uas pab tus tswv yug yaj?
Tus Tswv Yexus Khetos hais tias, “Kuv yog tus tswv yug yaj uas zoo. Kuv paub kuv pab yaj, … kuv txaus siab tuag theej kuv pab yaj.”
Tus yaj saub Nifais kuj qhia tias Yexus “yuav pub nws pab yaj, thiab lawv yuav nrhiav tau zaub noj los ntawm nws.” Kuv nyob kaj siab lug tas mus li vim kuv paub tias “tus Tswv yog kuv tus tswv yug yaj” thiab Nws paub peb txhua tus thiab saib xyuas peb. Thaum peb raug cua hlob, los nag hlob, raug mob, thiab dej qhuav ntawm lub neej no, tus Tswv—peb tus Tswv Yug yaj—yuav txhawb pab peb. Nws yuav muab peb txum tim rov qab los.
Ib yam li kuv tus phooj ywg twb zov nws pab yaj nrog ib pawg tub hluas thiab laus, cov nees, thiab cov aub txoj kev pab, tus Tswv kuj xav kom peb pab ua hauj lwm saib xyuas cov yaj hauv Nws pab yaj.
Vim peb yog Leej Txiv Saum Ntuj Ceeb Tsheej cov me nyuam thiab yog cov yaj hauv Nws pab yaj uas Nws hlub, peb txais tau txoj koob hmoov uas yog Yexus Khetos txoj kev txhawb pab. Peb kuj muaj kev lav ris mus txhawb pab lwm tus nyob ib puag ncig peb vim peb kuj yog cov neeg yug yaj. Peb ua raws li tus Tswv tej lus kom “[nej] ua hauj lwm rau kuv thiab tawm mus los ntawm kuv lub npe, thiab … sau kuv cov yaj los ua ke”
Leej twg yog ib tug neeg yug yaj? Txhua tus txiv neej, poj niam, thiab me nyuam hauv Vajtswv lub nceeg vaj yog ib tug neeg yug yaj. Tsis tas kom Vajtswv hu nej ua li ntawd. Txij thaum peb ua kev cai raus dej los, Vajtswv twb txib peb ua txoj hauj lwm no. Peb ncav tes nrog kev hlub pab lwm tus vim qhov ntawd yog qhov uas tus Cawm Seej twb txib peb ua li ntawd. Amas hais tias: “Leej twg uas yog tus tswv yug yaj, uas muaj ntau tus yaj yuav tsis saib cov yaj ntawd, xwv kom cov hma txhob nkag tau los thiab tom nws cov yaj? … Nws yuav tsis raws kom tus hma ntawd khiav tawm mus los?” Thaum twg peb cov neeg zej zog muaj kev ntxhov siab ntawm sab nqaij daim tawv los sis sab ntsuj plig, peb khiav mus pab lawv. Peb ib leeg ris ib leeg tej nra, xwv kom tej nra ntawd thiaj li sib. Peb nyuaj siab nrog cov uas nyuaj siab. Peb nplij cov uas xav tau txoj kev nplij siab. Tus Tswv yeej kom peb ua li no. Thiab yuav txog ib hnub thaum Nws yuav hais kom peb qhia Nws tias peb tau ua li cas kom txhawb pab Nws pab yaj.
Kuv tus phooj ywg uas yug yaj kuj qhia ib yam tseem ceeb ntxiv thaum nws saib xyuas cov yaj hauv nws thaj av. Nws piav tias cov yaj uas ploj lawm pheej raug cov tsiaj uas tuaj tom lawv. Muaj tseeb tiag, nws thiab cov uas nws ntiav ua hauj lwm siv sij hawm 15 feem pua kom nrhiav tau cov yaj uas ploj lawm. Yog lawv nrhiav tau cov yaj uas ploj lawm sai heev, ua ntej cov yaj twb mus deb ntawm pab yaj, ces feem ntau cov yaj tsis tau raug mob lawm. Kev nrhiav cov yaj uas ploj lawm los yuav tsum ua siab ntev thiab rau siab.
Ntau xyoo tas los, kuv nrhiav tau ib zaj lus hauv ntawv xov xwm uas ua rau kuv xav tsis thoob kuv thiaj li khaws cia. Kab lus rau thawj daim ntawv hais tias, “Tus Aub Rau Siab Tsis Tso cov Yaj uas Ploj Lawm Tseg.” Zaj lus no piav txog ob peb tug yaj hauv ib pawg uas twb raug tso tseg nyob hauv qhov chaw uas lawv nyob thaum lub caij sov nyob tsis deb ntawm kuv tus phooj ywg thooj av. Ob peb lub hlis tom qab ntawd, cov daus los ua rau lawv tawm tsis taus cov roob li. Thaum twb tseg ob peb tug yaj lawm, tus aub nyob nrog nraim lawv, vim hais tias yog nws tej dej num kom saib xyuas thiab tiv thaiv cov yaj. Nws yeej tsis tau khiav mus! Nws nyob ntawd—mus ib ncig cov yaj uas ploj lawm tau ob peb hlis thaum huab cua no no thiab los daus, nws pov hwm cov yaj kom txhob raug cov hma, cov tsov saum roob, los sis lwm tus tsiaj tom. Nws twb nrog nraim lawv nyob mus txog thaum nws coj tau cov yaj no rov qab mus rau tus yug yaj thiab pab yaj. Daim duab rau zaj lus no nyob ntawm ntawv xov xwm thawj nplooj ntawv qhia yus tias tus aub no coj cwj pwm li cas.
Nyob hauv Phau Tshiab, muaj ib zaj lus piv txwv thiab tej lus qhia los ntawm tus Cawm Seej uas qhia ntxiv txog peb txoj kev lav ris ua cov yug yaj, cov muam thiab cov kwv tij uas txhawb pab, thiab hais txog cov yaj uas ploj lawm.
“Nej cov yog leej twg muaj ib puas tus yaj, yog ib tug ploj lawm, tus tswv yuav ua li cas? Nws yeej yuav tso cuaj caum cuaj tug rau tom hav zaub, thiab mus nrhiav tus yaj uas ploj lawm kom tau.
“Thaum nws nrhiav tau lawm, nws zoo siab heev, nws muab tsaws hlo rau saum xub pwg, thiab kwv los tsev.
“Ces nws hu nws cov kwv tij thiab tej neeg zej zog tuaj thiab hais rau lawv hais tias, Nej cia li nrog kuv zoo siab, rau qhov kuv twb mus nrhiav tau kuv tus yaj uas ploj lawm!”
Thaum peb hais ntsiab lus uas qhia hauv zaj lus piv txwv no, peb kawm tej lus ntuas no:
-
Peb yuav tsum paub cov yaj uas ploj lawm.
-
Peb nrhiav lawv mus txog thaum nrhiav tau.
-
Thaum peb nrhiav tau, tej zaum peb yuav tsum kwv lawv kom coj lawv rov los tsev.
-
Peb hais kom phooj ywg los nrog lawv thaum lawv rov qab los.
Cov kwv tij thiab cov muam, peb tej teeb meem thiab peb tej nqi zog uas loj tshaj plaws yog thaum peb mus txhawb pab cov yaj uas tau ploj lawm. Cov mej zeej ntawm lub Koom Txoos hauv Phau Ntawv Maumoos “tau saib xyuas lawv cov neeg, thiab tau qhia lawv tej yam txog txoj kev ncaj ncees.” Peb muaj peev xwm coj raws li lawv tus yam ntxwv thaum peb nco ntsoov tias peb yuav tsum ua kev txhawb pab li no cia “tus Ntsuj Plig coj kev, … ua kom hloov tau yooj yim, thiab … hloov kom muaj raws li txhua tus mej zeej xav tau.” Yeej yog ib yam tseem ceeb kom peb “pab tib neeg thiab tsev neeg npaj rau txoj kab ke tom ntej, ua raws li [lawv] tej kev khi lus … , thiab vam khom lawv tus kheej.”
Txhua tus neeg muaj nqis rau peb Leej Txiv Saum Ntuj Ceeb Tsheej. Nws txoj kev caw peb mus txhawb pab yeej muaj nqis thiab tseem ceeb rau Nws, vim yog Nws txoj hauj lwm thiab yeeb koob. Yog txoj hauj lwm uas mus ib txhis li tiag tiag. Nws pom tias Nws txhua tus me nyuam muaj peev xwm uas ntsuas tsis taus. Nws hlub nej nrog ib txoj kev hlub uas nej tsis to taub hlo li. Zoo li tus aub uas rau siab, tus Tswv yuav nrog nraim nej nyob saum lub roob kom tiv thaiv nej thaum raug cua hlob, nag xob nag cua, thaum los daus, thiab ntxiv.
Thawj Tswj Hwm Russell M. Nelson tau qhia peb hauv lub tuam rooj sab laj tas los: “Peb zaj lus rau lub ntiaj teb [thiab kuv ntxiv tej lus no, ‘rau peb pab yaj uas mus txhawb pab’] yeej yooj yim thiab ncaj ncees: peb caw tag nrho Vajtswv cov me nyuam nyob ob sab ntawm daim ntaub thaiv kom los cuag lawv tus Cawm Seej, txais cov koob hmoov ntawm lub tuam tsev dawb huv, muaj kev xyiv fab, thiab ua neeg tsim nyog txais txoj sia nyob mus ib txhis.”
Thov kom peb yuav ua raws li tus yaj saub pom, peb thiaj li yuav coj tib neeg mus rau lub tuam tsev thiab thaum kawg mus rau peb tus Cawm Seej, Yexus Khetos. Nws tsis xav tias peb yuav ua txuj ci tseem ceeb. Nws tsuas xav kom peb coj peb cov kwv tij thiab cov muam rau Nws, vim Nws yog tus uas muaj hwj chim txhiv neeg dim. Thaum peb ua li no, peb yuav txais nqi zog uas tau cog lus li no hais tias: “Thaum tus Tswv yug yaj uas yog tus thawj rov qab los, nws yuav muab lub kaus mom kub uas ci ntsa iab mus ib txhis ua nqi zog rau nej.” Kuv ua tim khawv txog qhov no—thiab ua tim khawv txog Yexus peb tus Cawm Seej thiab tus Txhiv Dim—los ntawm Yexus Khetos lub npe, amees.