Tam Sim No Yog lub Sij Hawm Yog
Yog muaj ib yam dab tsi hauv nej lub neej uas nej yuav tsum xav txog, tam sim no yog lub sij hawm ua li ntawd.
Ob peb xyoos tas los, thaum kuv npaj mus ua lag ua luam, kuv pib mob hauv siab. Kuv tus poj niam txhawj heev, es nws txiav txim siab nrog kuv mus. Thaum wb tab tom ya mus txog qhov chaw nrab, kuv mob mob heev thiaj nyuaj rau kuv ua pa. Thaum lub nyab hoom tsaws, wb tau tawm tshav nyab hoom mus rau lub tsev kho mob, es tom qab tau tshuaj ntsuam ntau zaus, tus kws kho mob hais tias wb caij nyab hoom tau ntxiv.
Wb tau rov qab los rau tshav nyab hoom thiab nce nyab hoom mus rau wb qhov chaw kawg. Thaum nyab hoom tab tom nqis los, tus kws tsav nyab hoom siv xov tooj cua hais kom kuv qhia tias kuv yog tus twg. Ib tug kws saib xyuas tuaj, thiab hais tias luag hu tuaj qhia tias muaj xwm txheej ceev, thiab qhia kuv tias muaj ib lub tsheb thauj neeg mob uas tos kuv nyob rau ntawm tshav nyab hoom kom thauj kuv mus rau tsev kho mob.
Wb tau nce tsheb thauj neeg mob thiab lawv tsav ceev mus rau chav pab kam ceev. Nyob ntawd muaj ob tug kws kho mob uas txhawj xeeb heev es nkawd piav tias twb tau tshuaj ntsuam tsis yog lawm thiab kuv muaj ntshav khov daig kuv txoj hlab ntshav, nyob hauv kuv nplooj ntsws, es yuav tsum kho qhov mob no tam sim ntawd. Ob tug kws kho mob qhia wb tias muaj ntau tus neeg uas tiv tsis dhau qhov mob no. Nkawd paub tias wb nyob deb ntawm wb tsev thiab vim nkawd tsis paub tias wb puas npaj siab rau xwm txheej zoo li no, ob tug kws kho mob hais tias yog muaj dab tsi hauv wb lub neej uas wb yuav tsum xav txog, ces tam sim ntawd yog lub sij hawm yog.
Kuv nco ntsoov txog lub sij hawm txhawj xeeb heev ntawd thaum kuv lub zeem muag twb tau hloov kiag. Tej yam uas kuv saib tseem ceeb ob peb me pliag ua ntej los tej ntawd tsis tshua tseem ceeb lawm. Kuv tsis xav txog tej kev kaj siab thiab kev txhawj los ntawm lub neej no es kuv tsuas xav txog tej yam uas nyob mus ib txhis—xav txog kuv tsev neeg, cov me nyuam, kuv tus poj niam, thiab thaum kawg xav txog qhov uas kuv tau ua neej zoo li cas.
Kuv thiab kuv tsev neeg ua zoo li cas? Peb puas ua peb lub neej raws li peb tej kev khi lus thiab tej uas tus Tswv xav kom peb ua, los sis peb puas tau cia tej kev txhawj ntawm lub ntiaj teb ua rau peb tsis nco txog tej yam uas tseem ceeb tshaj plaws?
Kuv caw nej xav txog ib yam tseem ceeb uas kawm los ntawm lub sij hawm ntawd: txhob xav li neeg ntiaj teb xav thiab cia li tshuaj ntsuam nej lub neej. Los yog zoo li tus kws kho mob hais tias, yog muaj ib yam dab tsi hauv nej lub neej uas nej yuav tsum xav txog, tam sim no yog lub sij hawm ua li ntawd.
Tshuaj Ntsuam Peb lub Neej
Peb nyob hauv ib lub ntiaj teb uas muaj xov xwm ntau dhau, tej yam uas ua kom peb tsis nco qab zuj zus tuaj, tej yam uas ua nyuaj rau peb tawm ntawm kev ntxhov hnyo ntawm lub neej no thiab tsom ntsoov rau tej yam uas muaj nqis nyob mus ib txhis. Niaj hnub muaj tej lus xov xwm uas muaj ceem heev ua yooj yim rau peb tsom ntsoov, thiab tej txuj ci technology uas hloov sai heev xa cov xov xwm no rau peb.
Tsuas yog peb siv sij hawm xav ntsoov xwb, ntshe peb yuav tsis pom hais tias tej yam uas hloov sai heev no ua li cas rau peb lub neej niaj hnub thiab tej yam uas peb xaiv. Tej zaum tej xov xwm me me pheej nkag hauv peb lub neej tsis tu tsis tseg xws li cov ntsiab lus memes, tej videos, thiab tej kab lus uas ua rau yus xav saib. Txawm yog tej no ntxim nyiam thiab lom zem heev, tej no feem ntau tsis pab peb txoj kev vam meej mus ib txhis, tiam sis tej no yuav hloov peb txoj kev xav txog lub neej hauv lub ntiaj teb no.
Tej yam no piv txog tej yam nyob hauv Lihais txoj kev ua npau suav. Thaum peb taug txoj kev ntawm kev khi lus thiab peb tuav nkaus tus nqaj hlau, peb hnov kev “luag thuam thiab [pom kev] taw tes ntshis” los ntawm cov nyob hauv lub tsev loj thiab dav (1 Nifais 8:27). Tej zaum peb tsis txhob txwm ua li no, tiam sis ntshe peb nres thiab saib vim li cas lawv nrov nrov. Tej zaum peb ib txhia tso tus nqaj hlau tseg thiab txav ze ze kom pom tau zoo dua. Tej zaum lwm tus tso tseg tag nrho “vim cov neeg ntawd tab tom luag thuam lawv” (1 Nifais 8:28).
Tus Cawm Seej ceeb toom peb kom “ceev faj … tsis txhob txhawj rau [peb] lub neej” (Lukas 21:34). Kev tshwm sim hauv lub caij nyoog no qhia peb tias cov uas tus Tswv hu los muaj coob, tiam sis cov uas nws xaiv los muaj tsawg. Nws tsis xaiv lawv “vim lawv tso siab … rau tej yam ntawm lub ntiaj teb no, thiab xav muaj koob nto npe es lawv thiaj tsis kawm zaj lus qhia no” (Lus Qhuab Qhia thiab Kev Khi Lus 121:35; kuj saib nqe 34). Kev tshuaj ntsuam peb lub neej ua rau peb muaj cib fim kom txhob xav li neeg ntiaj teb xav, thiab xav ntsoov tias peb nyob qhov twg hauv txoj kev ntawm kev khi lus, thiab, hloov tej yam kom ua tib zoo tuav nkaus thiab saib ntsoov tom ntej, yog yuav tsum ua li ntawd.
Tsis ntev tas los, nyob hauv cov tub hluas ntxhais hluas kev hawm Vajtswv thoob ntiaj teb, Thawj Tswj Hwm Russell M. Nelson caw cov tub hluas ntxhais hluas tsis txhob xav li neeg ntiaj teb xav, thiab tsis txhob siv social media tau xya hnub. Thiab nag hmo, nws twb caw cov muam ua ib yam li ntawd nyob hauv koom haum poj niam kev sib ntsib ntawm lub rooj sab laj no. Ces nws hais kom cov tub hluas ntxhais hluas xav tias lawv tej kev xav puas txawv tej uas lawv xav ua ntej. Ces nws caw lawv “nrog tus Tswv tshuaj ntsuam nej lub neej … kom nej txhais ko taw nyob nraim txoj kev ntawm kev khi lus.” Nws yaum lawv hais tias yog muaj tej yam uas yuav tsum hloov hauv lawv lub neej, “hnub no yog lub sij hawm zoo tshaj plaws hloov siab.”
Thaum peb tshuaj ntsuam tej yam hauv peb lub neej uas yuav tsum hloov, tej zaum peb yuav xav nug peb tus kheej hais tias: Peb yuav ua li cas kom txhob raug tej yam ntawm lub ntiaj teb uas tab kaum peb thiab tsom ntsoov rau lub zeem muag ntawm txoj sia nyob mus ib txhis?
Nyob hauv nws zaj lus hauv lub rooj sab laj xyoo 2007 hu ua “Zoo, Zoo Dua, Zoo Tshaj,” Thawj Tswj Hwm Dallin H. Oaks tau qhia peb kom saib tej yam ntau uas peb yuav tsum ua seb tej ntawd tseem ceeb npaum li cas. Nws hais tias, “Peb yuav tsum tso tej yam zoo tseg xwv kom xaiv tau lwm yam uas zoo dua los yog zoo tshaj plaws, vim tej ntawd ua rau peb muaj kev ntseeg ntawm tus Tswv Yexus Khetos thiab ua rau peb tsev neeg muaj zog.”
Kuv xav hais rau nej tias tej yam zoo tshaj plaws hauv lub neej no yog kev tsom ntsoov rau Yexus Khetos thiab kev to taub tias Nws yog leej twg thiab peb txheeb ze Nws li cas.
Nrhiav Qhov Tseeb
Thaum peb nrhiav kev kom paub tus Cawm Seej, peb yuav tsum nco ntsoov qhov tseeb tseem ceeb uas qhia tias peb yog leej twg thiab vim li cas peb nyob no. Amulej hais kom peb nco ntsoov tias “lub neej no yog lub caij … npaj mus ntsib Vajtswv,” lub sij hawm “uas tau muab rau peb npaj rau txoj kev nyob mus ib txhis” (Amas 34:32–33). Ib yam li nqe paj lug qhia peb tias, “Peb tsis yog neeg ntawm sab cev nqaij daim tawv uas muaj lub neej ntawm sab ntsuj plig. Peb yog neeg ntawm sab ntsuj plig uas muaj lub neej ntawm sab cev nqaij daim tawv.”
Qhov uas peb to taub tias peb los saum ntuj los yeej tseem ceeb rau peb txoj kev vam meej nyob mus ib txhis thiab yuav pab peb dim tej yam uas tab kaum peb hauv lub neej no. Tus Cawm Seej qhia hais tias:
“Yog nej ua raws li tej lus uas kuv qhia, nej thiaj yog kuv cov thwj tim tiag:
“Nej yuav paub qhov tseeb, thiab qhov tseeb ntawd yuav tso nej dim” (Yauhas 8:31–32).
Thawj Tswj Hwm Joseph F. Smith tshaj hais tias, “Qhov zoo tshaj plaws uas tib neeg ua tau hauv lub ntiaj teb no yog kom paub zoo txog qhov tseeb uas los ntawm Vajtswv, kom paub zoo tag nrho, thiaj li tsis muaj leej twg nyob hauv lub ntiaj teb no yuav ua rau lawv ntxeev siab rau tej kev txawj ntse uas lawv tau kawm lawm.”
Niaj hnub nim no, tib neeg kub siab lug sib cav txog qhov tseeb, txhua tus hais tias lawv qhia yog lawm, zoo li lawv xav tias qhov tseeb yeej nyob ntawm seb lawv xav li cas xwb. Tus tub hluas Yauxej Xamiv xav tias “txoj kev tsis nkag siab thiab kev sib cav sib ceg muaj ceem heev” nyob hauv nws lub neej “ua rau ib tug neeg … tsis muaj peev xwm paub txiav txim hais tias leej twg yog thiab leej twg tsis yog” (Yauxej Xamiv—Keeb Kwm 1:8). “Nyob hauv txoj kev sib cav sib ceg thiab tej kev xav nrov nroo ntws no” nws thiaj li xav thov Vajtswv qhia qhov tseeb rau nws (Yauxej Xami—Keeb Kwm 1:10).
Nyob hauv lub rooj sab laj thaum lub Plaub Hlis Ntuj, Thawj Tswj Hwm Nelson qhia tias, “Yog tias peb yuav muaj cuab kav paub tej suab uas hais lus rau peb thiab to taub tib neeg tej tswv yim uas tawm tsam qhov tseeb, peb yuav tsum kawm kom paub txais kev tshwm sim.” Peb yuav tsum kawm tso siab rau tus Ntsuj Plig ntawm Qhov Tseeb, uas “neeg ntiaj teb tsis lees yuav nws, rau qhov lawv tsis pom nws los sis tsis paub nws” (Yauhas 14:17).
Thaum neeg ntiaj teb ntseeg tej yam uas tsis yog lawm sai sai, peb yuav tsum nco ntsoov Yakhauj tej lus hais tias,“tus Ntsuj Plig hais qhov tseeb thiab tsis dag.” Yog li ntawd, nws hais txog tej uas yeej muaj tiag, thiab txog tej uas yeej yuav muaj tiag; yog li ntawd, tau muab tej yam no ua tshwm sim los rau peb paub tseeb, rau peb tej ntsuj plig txoj kev cawm seej” (Yakhauj 4:13).
Thaum peb tsis xav li neeg ntiaj teb xav thiab peb tshuaj ntsuam peb lub neej, tam sim no yog lub sij hawm kom xav txog tej yam uas peb yuav tsum hloov. Peb yeej muaj kev cia siab heev vim peb paub tias tus uas Coj Yam Ntxwv rau peb, Yexus Khetos, twb tau mus ua peb ntej lawm. Ua ntej Nws tuag thiab Sawv Rov Los, thaum Nws ua hauj lwm kom pab cov nyob puag ncig Nws to taub tias Nws los saum ntuj los, Nws hais rau lawv tias “nej cov uas nrog kuv yuav muaj kev kaj siab lug. Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm” (Yauhas 16:33). Kuv hais lus tim khawv txog Nws los ntawm Yexus Khetos lub npe, amees.