Ntseeg, Hlub, Ua
Peb tau lub neej puv npo los ntawm kev ua Yexus Khetos cov thwj tim tseeb—yog los ntawm kev coj raws li Nws tej kev thiab koom tes ua Nws txoj hauj lwm.
Kuv cov kwv tij thiab cov muam, yeej yog ib lub sij hawm zoo kawg nyob nrog nej hauv lub tuam rooj sab laj zoo kawg hnub no: kom mloog tej zaj lus zoo; kom mloog pawg hu nkauj uas muaj cov tub txib coob uas sawv cev rau ntau txhiab tus tub txib ntxhais txib nyob thoob plaws lub ntiaj teb no—peb cov ntxhais, peb cov tub—thiab qhov tseem ceeb zoo siab koom nrog cov ntseeg hnub no, rov qab pom zoo txhawb nqa peb tus Thawj Tswj Hwm thiab tus yaj saub, Thawj Tswj Hwm Russell M. Nelson, Thawj Pawg Thawj Tswj Hwm, thiab cov Nom Tswv ntawm lub Koom Txoos. Yog ib hnub xyiv fab nyob nrog nej sawv daws.
Tus Vaj Ntxwv Xalumoos yog ib tug uas tau vam meej ntau tshaj txij puag thaum ub los. Zoo li nws twb muaj txhua yam—nws muaj nyiaj, muaj hwj chim, muaj neeg qhuas nws, muaj neeg hwm nws. Tiam sis ntau xyoo tom qab uas nws ntshaw khoom thiab muaj ntau nplua mias, Vaj Ntxwv Xalumoos tau piav txog nws lub neej li cas?
Nws hais tias, “Txhua yam yeej tsis muaj qab hau li.”
Tus neeg no, tus uas muaj txhua yam, nws poob siab, xav phem heev, thiab tsis zoo siab, txawm tias nws muaj lub neej zoo.
Muaj ib lo lus Yelemes, Weltschmerz. Lo lus no txhais zoo li no tias, yog kev tu siab uas los ntawm qhov uas yus xav tias lub ntiaj teb yeej tsis zoo npaum li yus nyiam.
Tej zaum muaj Weltschmerz me ntsis nyob hauv peb txhua tus.
Peb muaj thaum kev tu siab ntsiag to los hauv peb lub neej. Thaum muaj kev tu siab tas hnub tas hmo ua rau txhua yam tsaus ntuj. Thaum tej teeb meem thiab tej yam tsis txim lij raug peb lub neej, tsis hais cov uas peb hlub lub neej los yog. Thaum peb kho siab nyob peb ib leeg vim peb raug hmoov phem, thiab kev mob ua rau peb tsis nyob kaj siab lug—tej zaum peb yuav xav pom zoo qhov uas Xalumoos hais tias lub neej no tsis muaj qab hau li thiab tsis muaj lub ntsiab.
Kev Cia Siab Loj Heev
Qhov zoo yog qhov uas muaj kev cia siab. Muaj ib txoj kev kho qhov uas lub neej no tsis muaj qab hau li, muaj kev tu siab, thiab Welschmerz. Muaj ib txoj kev kho kev nyuaj siab thiab kev poob siab uas muaj hauv nej lub siab txawm loj npaum li cas los.
Kev cia siab no yog los ntawm Yexus Khetos txoj moo zoo uas muaj hwj chim hloov peb lub neej thiab yog los ntawm tus Cawm Seej lub hwj chim txhiv dim uas kho peb txoj kev mob ntawm sab ntsuj plig.
Yexus hais tias, “Kuv los kom nej tau txoj sia, thiab kom lawv tau lub neej puv npo.”
Peb tau lub neej puv npo tsis yog los ntawm kev tsom ntsoov rau peb tus kheej los sis tej yam peb tau ua tiam sis yog los ntawm kev ua Yexus Khetos cov thwj tim tseeb—yog los ntawm kev coj raws li Nws tej kev thiab koom tes ua Nws txoj hauj lwm. Peb txais tau lub neej uas muaj ntau nplua mias thaum peb tsis xav txog peb tus kheej thiab ua raws li Khetos lub hom phiaj.
Thiab Khetos lub hom phiaj yog dab tsi? Yog kom peb ntseeg Nws, hlub zoo li Nws hlub lwm tus, thiab ua raws li Nws tau ua.
Yexus “mub thoob plaws qhov txhia qhov chaw ua tej hauj lwm zoo.” Nws tau pab cov neeg pluag, cov neeg uas lwm tus tso tseg, cov neeg mob, thiab cov uas txaj muag. Nws txhawb pab cov uas tsis muaj hwj chim, cov qaug zog, thiab cov uas tsis muaj phooj ywg. Nws tau siv sij hawm nrog lawv; Nws sib tham nrog lawv. “[Thiab nws] kho tej neeg uas muaj mob txhua tus zoo huv tib si.”
Nyob txhua qhov chaw, tus Cawm Seej tau qhia txog Nws “txoj moo zoo.” Nws tau qhia tej yam tseeb nyob mus ib txhis uas pab neeg dim ntawm sab ntsuj plig thiab sab cev nqaij daim tawv.
Cov uas muab lawv lub siab fij rau Khetos lub hom phiaj no kawm tias tus Cawm Seej tej lus cog tseg muaj tseeb: “Tus uas tsis khuv xim nws txoj sia, vim nws ntseeg kuv, tus ntawd yuav tau txoj sia.”
Xalumoos xav tsis yog lawm, kuv cov kwv tij thiab cov muam—lub neej no yeej muaj qab hau. Lub neej no yeej muaj lub ntsiab, thiab kaj siab lug.
Yexus Khetos txhais tes uas txawj kho mob ncav cuag tag nrho cov uas nrhiav Nws. Kuv twb paub lawm kev ntseeg thiab kev hlub Vajtswv thiab kev rau siab coj raws li Khetos yuav hloov peb lub siab, kom peb tsis hnov mob pes tsawg, thiab ua rau peb sab ntsuj plig “muaj kev xyiv fab kawg nkaus.”
Ntseeg, Hlub, Ua
Yog peb xav txais kev kho mob hauv peb lub neej no, peb yuav tsum tsis txhob to taub tej ntsiab cai ntawm txoj moo zoo raws li kev txawj ntse xwb. Peb yuav tsum ua peb lub neej raws li txoj moo zoo—ua kom tej ntawd muaj feem nrog peb tus kheej.
Kev pib ua ib tug thwj tim yeej nyob ntawm peb lo lus yooj yim:
Ntseeg, hlub, thiab ua.
Kev ntseeg Vajtswv ua rau peb tso siab rau Nws txoj lus. Kev ntseeg ua rau peb muaj siab hlub Vajtswv thiab lwm tus. Thaum txoj kev hlub ntawd loj hlob tuaj, peb xav ua raws li tus Cawm Seej tus yam ntxwv thiab taug peb txoj kev ua Nws cov thwj tim.
Nej xav tias, “Qhov koj hais ko yooj yim dhau. Tej teeb meem ntawm lub neej no, tsis hais kuv tej teeb meem los, nyuaj heev ntshe kuv kho tsis taus yog ua ib yam yooj yim li no. Kho tsis taus Welschmerz los ntawm peb lo lus xwb: Ntseeg, hlub, ua.”
Tsis yog tej lus no uas kho tau nej. Yog Vajtswv txoj kev hlub uas cawm, txhawb nqa, thiab kho peb.
Vajtswv paub nej txhua tus. Nej yog Nws cov me nyuam. Nws hlub nej.
Txawm yog nej xav tias nej tsis ntxim hlub, Nws ncav tes los pab nej.
Hnub no—txhua hnub—Nws ncav tes rau nej, xav kho nej, txhawb nqa nej, thiab muab kev xyiv fab ntau nplua mias pauv nej txoj kev kho siab. Nws xav ua kom kev tsaus ntuj hauv nej lub neej ploj mus thiab muab txoj kev kaj ntawm Nws lub yeeb koob uas ci ntsa iab thiab dawb ceev puv nej sab ntsuj plig.
Twb muaj li no rau kuv tus kheej.
Vim kuv yog tus Tswv Yexus Khetos ib tug Thwj Tim kuv ua tim khawv tias txhua tus uas los cuag Vajtswv—txhua tus uas ntseeg, hlub, thiab ua tiag tiag—yeej yuav muaj li ntawd ib yam thiab.
Peb Ntseeg
Cov vaj lug kub qhia peb tias “Tus uas tsis ntseeg yeej ua tsis tau haum Vajtswv siab, rau qhov tus uas xav los cuag Vajtswv, tus ntawd yuav tsum ntseeg hais tias yeej muaj Vajtswv tiag.”
Rau ib txhia, kev ntseeg nyuaj heev. Tej lub sij hawm peb txoj kev muab hlob tab kaum peb. Tej zaum peb xav tias vim peb txawj ntse, tau kawm ntaub kawm ntawv, los sis tau ua neej ntev, peb ntseeg tsis tau tias muaj Vajtswv. Thiab peb pib saib kev teev ntuj zoo li yog kev ruam xwb.
Raws li kuv tau kawm, kev ntseeg tsis yog ib daim duab uas peb saib thiab qhuas thiab peb sib tham thiab xam pom txog. Kev ntseeg yog rab khais uas peb rub mus rau hauv liaj teb, thiab peb khwv kom laij liag nyob hauv cov av kom cog tau noob thiab txi txiv uas yuav kav ntev.
Cia li los nyob ze Vajtswv, thiab Nws yuav txav los nyob ze nej. Txhua uas xav ntseeg txais tau kev cog lus no.
Peb Hlub
Cov vaj lug kub qhia tias peb yim hlub Vajtswv thiab Nws cov me nyuam peb yim zoo siab. Tiam sis kev hlub uas Yexus hais txog tsis zoo li ib yam uas peb siv ces muab tso tseg xwb. Tsis yog ib txoj kev hlub uas peb hais txog ces tsis nco qab lawm. Tsis yog ib txoj kev hlub uas hais tias, “qhia kuv yog tias kuv pab tau koj.”
Txoj kev hlub uas Vajtswv hais txog yog kev hlub uas nkag hauv peb lub siab thaum peb sawv, nyob mus tas ib hnub, thiab nyob hauv peb lub siab thaum hmo ntuj thaum peb thov Vajtswv kom ua Nws tsaug.
Yog kev hlub uas Leej Txiv Saum Ntuj Ceeb Tsheej muaj rau peb.
Yog kev hlub uas kav ib txhis no uas pab peb pom lwm tus tias lawv yog leej twg tiag tiag. Yog peb siv lub tsom iav ntawm kev hlub, peb yuav pom cov neeg uas muaj nqis nyob mus ib txhis thiab pom Vajtswv tus uas Muaj Hwj Chim Tag Nrho cov tub thiab cov ntxhais.
Thaum peb siv lub tsom iav ntawd, peb yeej yuav saib tsis taus los sis ntxub lwm tus.
Peb Ua
Nyob hauv tus Cawm Seej txoj hauj lwm, feem ntau yog “tej yam me thiab yooj yim” thiaj “muaj tej yam tseem ceeb los.”
Peb paub tias peb yuav tsum xyaum tas li kom txawj ua ib yam dab tsi. Txawm peb tshuab raj paj taub, ncaws pob, kho lub tsheb, los sis caij nyab hoom, kev xyaum pab peb ua zoo dua ntxiv zuj zus mus.
Lub koom haum uas peb tus Cawm Seej tsim hauv lub ntiaj teb no—Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg—pab peb ua li ntawd. Yog ib qho chaw rau peb xyaum ua neej zoo li Nws qhia thiab foom koob hmoov rau lwm tus zoo li Nws tau ua.
Vim peb yog cov mej zeej ntawm lub Koom Txoos, peb txais tau tej hauj lwm, tej kev lav ris, thiab cib fim kom ncav tes txhawb pab lwm tus.
Tsis ntev tas los, cov thawj coj ntawm lub Koom Txoos twb rov qab qhia tias kev txhawb pab lwm tus yog ib qho tseem ceeb. Peb twb xav ntau txog qhov uas peb yuav hu qhov tshwj xeeb no li cas.
Ib lub npe uas peb xav txog yog kev yug yaj, uas yog los ntawm qhov uas Khetos caw peb kom: “Yug kuv cov yaj.” Tiam sis, lo lus no ntshe muaj ib qho teeb meem: yog hais lus Akiv ces lawv yuav hais tias kuv yog ib tug German shepherd uas yog ib tug aub loj. Yog li ntawd, kuv txaus siab siv lo lus kev txhawb pab.
Txhua Tus Ua Tau txoj Hauj Lwm
Muaj tseeb tiag, kev qhia no tsis yog ib yam tshiab. Yeej yog ib lub cib fim rau peb kom xyaum ua raws li tus Cawm Seej cov lus txib kom “ib leeg hlub ib leeg,” ib txoj kev dawb huv ntxiv kom ua raws li lub Koom Txoos lub hom phiaj.
Cia li xav txog kev ua tub txib; kev txo hwj chim thiab ua siab loj qhia txoj moo zoo rau lwm tus yeej yog kev txhawb pab lwm tus kom muaj raws li lawv sab ntsuj plig xav tau.
Los sis kev ua hauj lwm hauv lub tuam tsev—uas yog kev nrhiav peb cov poj koob yawm txwv tej npe thiab muab cov koob hmoov uas nyob mus ib txhis rau lawv. Qhov no yog Vajtswv txoj kev txhawb pab.
Xav txog kev nrhiav cov neeg pluag thiab cov neeg xav tau, kev tsa tej txhais tes uas tsaug lawm, los sis foom koob hmoov rau cov neeg mob thiab cov neeg txom nyem. Tej no puas yog tej kev ua siab dawb txhawb pab uas tus Tswv tau ua thaum Nws nyob hauv lub ntiaj teb?
Yog nej tsis yog ib tug mej zeej ntawm lub Koom Txoos, kuv caw nej tuaj koom nrog peb. Los koom nrog peb. Yog nej yog ib tug mej zeej ntawm lub Koom Txoos tiam sis tsis tshua muab siab rau ntseeg, kuv caw nej: thov nej rov qab los. Peb xav tau nej!
Cia li los ntxiv nej dag zog rau peb li.
Vim nej muaj nej tej txuj ci, kev txawj ntse, thiab cwj pwm, uas lwm tus tsis muaj, nej yuav pab peb ua neeg zoo dua thiab neeg zoo siab. Peb kuj yuav pab nej ua neeg zoo dua thiab muaj kev zoo siab ntxiv thiab.
Cia li los pab peb muaj kab lig kev cai uas kho lwm tus, muaj siab zoo, thiab siab hlub rau Vajtswv cov me nyuam. Vim peb sim hloov los ua neeg tshiab kom “lub neej qub dua lawm” thiab “muaj lub neej tshiab.” Tus Cawm Seej qhia kev rau peb kom paub mus qhov twg—tom hauv ntej thiab mus saum ntuj. Nws hais tias, “Yog nej hlub kuv tiag, nej yeej yuav mloog kuv lus.” Thov kom peb txhua tus yuav ua hauj lwm ua ke kom hloov los ua cov neeg uas Vajtswv xav kom peb ua.
Nov yog txoj moo zoo kab lig kev cai uas peb xav muaj nyob thoob plaws Yexus Khetos lub Koom Txoos. Peb xav txhawb nqa lub Koom Txoos kom ua ib qho chaw rau peb ib leeg zam txim rau ib leeg. Xav tiv kev ntxias uas ua rau peb xav liam lwm tus, taug xaiv, thiab ua rau lwm tus poob mus. Tsis xav qhia txog lwm tus tej kev txhaum, tiam sis peb ib leeg xav txhawb nqa thiab pab ib leeg kom ua tau neeg zoo npaum li peb ua tau.
Cia kuv caw nej ib zaug ntxiv. Cia li los thiab saib. Koom nrog peb. Peb xav tau nej.
Neeg Tsis Zoo Tag Nrho
Nej yuav kawm hais tias lub Koom Txoos no muaj tib neeg zoo tshaj plaws hauv lub ntiaj teb no. Lawv yeej ua siab dawb siab zoo hlub tiag tiag. Lawv txaus siab ua kev txi, khwv ua hauj lwm, thiab tej lub sij hawm ua tej yam zoo kawg nkaus.
Lawv kuj yog neeg uas tsis zoo tag nrho.
Lawv ua yuam kev.
Tej lub sij hawm lawv hais tej yam uas tsis tsim nyog hais. Lawv ua tej yam uas kheev lam lawv tsis tau ua.
Tiam sis lawv txhua leej txhua tus zoo li no—lawv xav hloov los ua neeg zoo dua thiab nyob ze dua li tus Tswv, peb tus Cawm Seej, uas yog Yexus Khetos.
Lawv sim ua qhov yog.
Lawv ntseeg. Lawv hlub. Lawv ua.
Lawv xav hloov los ua neeg tsis qia dub, muaj kev khuv leej ntxiv, ua neeg zoo ntxiv, zoo li Yexus ntxiv.
Txoj Hau Kev Zoo Siab
Muaj tseeb tiag, tej lub sij hawm lub neej no nyuaj heev. Peb yeej yuav muaj tej lub sij hawm thaum peb nyuaj siab thiab poob siab.
Tiam sis Yexus Khetos txoj moo zoo ua rau peb muaj kev cia siab. Thiab, nyob hauv Yexus Khetos lub Koom Txoos, peb koom siab nrog lwm tus uas nrhiav ib qhov chaw uas zoo li peb lub tsev—ib qhov chaw rau peb los ntseeg, hlub, thiab ua.
Txawm peb sib txawv li cas, peb ib leeg xav muab siab npuab rau ib leeg vim peb yog peb Leej Txiv Saum Ntuj Ceeb Tsheej cov tub thiab cov ntxhais.
Kuv yeej zoo siab kawg nkaus ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab paub tias Vajtswv hlub Nws cov me nyuam txaus kom muab ib txoj hau kev zoo siab thiab lub ntsiab hauv lub neej no thiab ib txoj kev kom txais tau kev xyiv fab nyob mus ib txhis hauv qhov chaw uas muaj yeeb koob ntawm lub neej tom ntej.
Kuv zoo siab uas Vajtswv tau muab ib txoj kev rau peb kom kho tau qhov mob ntawm peb sab ntsuj plig thiab Wetschmerz ntawm lub neej no.
Kuv ua tim khawv tias thaum peb ntseeg Vajtswv, thaum peb hlub Nws thiab hlub Nws cov me nyuam kawg siab kawg ntsws, thiab sim ua raws li Vajtswv tau hais kom peb ua, peb yuav txais tau kev kho mob thiab kev kaj siab lug, kev zoo siab thiab kev muaj nqis. Los ntawm Yexus Khetos lub npe dawb ceev, amees.