Cov Muam Kev Koom Tes Muab Ixayees Sib Sau Ua Ke
Kuv thov nej, cov poj niam ntawm lub Koom Txoos, kom pab yav tom ntej los ntawm nej txoj kev pab muab Ixayees sib sau ua ke.
Kuv zoo siab kawg nyob nrog nej, kuv cov muam uas muaj nqis heev. Tej zaum ib zaj uas muaj tsis ntev tas los yuav ua rau nej paub tias kuv xav li cas txog nej thiab xav li cas txog tej txuj ci uas Vajtswv tau pub rau nej.
Muaj ib hnub thaum kuv hais lus rau ib pawg ntseeg nyob hauv Amelikas Qab Teb, kuv zoo siab kawg hais kuv zaj lus, thiab thaum txog ib lub sij hawm tseem ceeb, kuv hais tias, “Vim kuv yog leej niam rau 10 tus me nyuam, kuv qhia tau nej tias …” Ces kuv tau hais kuv zaj lus ntxiv.
Kuv tsis tau paub hais tias kuv twb hais lo lus leej niam. Tus uas txhais lus rau kuv, xav tias kuv twb hais yuam kev, es hloov lo lus leej niam rau leej txiv, yog li ntawd pawg ntseeg ntawd tsis tau paub tias kuv twb hais tias kuv yog leej niam. Tiam sis kuv tus poj niam Wendy twb hnov, thiab nws zoo siab kawg txog qhov uas kuv tau hais yuam kev.
Tam sim ntawd, kuv lub siab xav xav pab neeg ntiaj teb—zoo li ib leej niam xav ua. Thaum luag nug kuv vim li cas kuv tau xaiv ua ib tug kws kho mob, kuv yeej ib txwm teb zoo ib yam hais tias: “Yog vim kuv xaiv tsis tau ua ib tug niam tsev.”
Thov nej paub hais tias thaum twg kuv siv lo lus leej niam, kuv tsis hais txog cov poj niam uas tau yug me nyuam los sis yuav me nyuam los ua lawv tus hauv lub neej no xwb. Kuv hais txog tag nrho Leej Niam Leej Txiv Saum Ntuj Ceeb Tsheej cov ntxhais uas laus lawm. Txhua tus poj niam yeej yog leej niam vim hais tias lawv los saum ntuj los mus ib txhis li.
Yog li ntawd hmo no, vim kuv yog leej txiv rau 10 tus me nyuam—cuaj tus ntxhais thiab ib tug tub—thiab vim kuv yog tus Thawj Tswj Hwm ntawm lub Koom Txoos, kuv thov kom nej yuav paub hais tias kuv xav li cas txog nej—nej yog leej twg thiab tag nrho tej yam zoo uas nej ua. Tsis muaj leej twg uas ua tau li ib tug poj niam ncaj ncees ua tau. Tsis muaj leej twg uas muaj hwj huam npaum li ib leej niam.
Cov txiv neej txawj qhia lwm tus tias Leej Txiv Saum Ntuj Ceeb Tsheej thiab tus Cawm Seej hlub lawv. Tiam sis cov poj niam muaj ib lub txiaj ntsim tshwj xeeb ua li no—yog ib qho vaj txiaj ntsim uas los ntawm Vajtswv. Nej muaj peev xwm paub tias ib tug neeg xav tau dab tsi—thiab thaum twg lawv xav tau qhov ntawd. Nej txawj ncav tes pab, nplij siab, qhia, thiab ntxiv dag zog rau ib tug neeg thaum lub sij hawm kiag uas nws xav tau.
Cov poj niam xam pom txawv ntawm txiv neej, thiab auj, peb yeej xav tau nej txoj kev xam pom! Nej tus cwj pwm ua rau nej xav txog lwm tus ua ntej, thiab xav txog qhov uas yus ua yam twg ces yuav ua li cas rau lwm tus.
Ib yam li Thawj Tswj Hwm Eyring qhia, yog peb Leej Niam Evas uas pib qhov uas peb hu ua “txoj Kev Poob”—vim nws muaj lub zeem muag txog peb Leej Txiv Saum Ntuj Ceeb Tsheej txoj hau kev saib yav tom ntej. Qhov uas nws muaj kev txawj ntse thiab ua siab loj xaiv thiab Adas txoj kev txiav txim siab txhawb nqa nws twb ua kom muaj raws li Vajtswv txoj hau kev zoo siab. Nkawd twb tau ua kom peb yuav los rau hauv lub ntiaj teb, txais ib lub cev, thiab qhia tias peb yuav xaiv sawv nrog Yexus Khetos tam sim no, ib yam li peb twb tau ua ua ntej peb yug los.
Kuv cov muam uas kuv hlub es, nej muaj tej txiaj ntsim thiab txuj ci los ntawm sab ntsuj plig. Hmo no, kuv yaum nej, kawg siab kawg ntsws, kom nej thov Vajtswv to taub nej tej txiaj ntsim ntawm sab ntsuj plig—xav kom nej txhawb nqa, siv, thiab ua kom tej ntawd loj tuaj, tshaj qhov nej tau siv ua ntej. Nej yuav hloov neeg ntiaj teb lub siab thaum nej ua li ntawd.
Vim nej yog cov poj niam, nej tshoov lwm tus lub siab thiab coj yam ntxwv tsim nyog rau lawv xyaum. Cia kuv qhia nej me ntsis txog qhov uas vim li cas peb tau tshaj tawm ob zaj lus tseem ceeb hauv lub tuam rooj sab laj tas los. Kuv cov muam, nej yeej tseem ceeb rau ob zaj no.
Qhov ib, yog kev txhawb pab. Tus uas coj yam ntxwv zoo tshaj plaws ua kev txhawb pab yog peb tus Cawm Seej, Yexus Khetos. Feem ntau, cov poj niam yeej ib txwm coj raws li tus yam ntxwv ntawd zoo dua li cov txiv neej. Thaum nej txhawb pab tiag tiag, nej ua raws li nej xav kom peb lwm tus muaj tus Cawm Seej txoj kev hlub. Cov poj niam ncaj ncees yeej xav txhawb pab lwm tus. Kuv paub tias muaj ib co poj niam uas thov txhua hnub hais tias, “Koj xav kom kuv pab leej twg hnub no?”
Ua ntej tau tshaj tawm txog txoj kev siab dua thiab dawb huv dua kom saib xyuas lwm tus thaum lub Plaub Hlis Ntuj 2018, ntshe tej tug txiv neej tsuas qhia tias twb tau lam ua kev qhia tom tsev lawm thiab lawv cia li mus ua lwm yam xwb.
Tiam sis thaum nej xav tias ib tug poj niam uas nej twb mus saib xyuas tom tsev xav tau kev pab, ces nej tau cia li mus kiag thiab mus kom txog thaum lub hli ntawd tiav lawm. Yog li ntawd, qhov uas nej tau saib xyuas li cas tau pab tshoov peb lub siab kom ua kev txhawb pab.
Qhov ob, nyob hauv lub tuam rooj sab laj tas los, peb twb kho peb tej pawg Pov Thawj Hwj Mekixedes. Thaum peb xav mus xav los seb peb yuav pab cov txiv neej ntawm lub Koom Txoos li cas kom ua tau lawv tej dej num zoo dua ntxiv, peb twb ua tib zoo xav txog cov nyob hauv lub Koom Haum Niam Tsev tus yam ntxwv.
Nyob hauv Koom Haum Niam Tsev, cov poj niam uas muaj hnub nyoog thiab lub neej sib txawv sib ntsib ua ke. Txhua xyoo hauv lub neej no los muaj tej teeb meem sib txawv, tiam sis, nej yeej nyob ntawd, txhua lub lim tiam, nyob ua ke, kawm thiab qhia txoj moo zoo ua ke, thiab pab lwm tus hauv lub ntiaj teb tiag tiag.
Nim no, raws li nej tus yam ntxwv, cov uas tuav lub Pov Thawj Hwj Mekixedes yog cov mej zeej hauv pawg txwj laug. Cov txiv neej no muaj 18 xyoo txog 98 xyoo (los sis laus dua), es lawv nyias muaj nyias kev kawm txog lub pov thawj hwj thiab lub Koom Txoos sib txawv ib yam li ntawd. Cov kwv tij no yuav tau tsim kev sib raug zoo uas muaj zog ntxiv, kawm ua ke, thiab foom koob hmoov rau lwm tus zoo dua li qub.
Lub Rau Hli Ntuj, Muam Nelson thiab kuv wb hais lus rau cov tub hluas ntxhais hluas ntawm lub Koom Txoos. Wb tau caw lawv los koom tus Tswv pawg tub rog hluas thiab pab muab Ixayees sib sau ua ke nyob ob sab ntawm daim ntaub thaiv. Kev sib sau no yog qhov tseem ceeb tshaj plaws, lub hom phiaj tseem ceeb tshaj plaws, thiab txoj hauj lwm tseem ceeb tshaj plaws hauv lub ntiaj teb hnub no!”
Yog ib lub hom phiaj uas yuav tsum muaj cov poj niam, vim hais tias cov poj niam muaj peev xwm hloov yav tom ntej. Yog li ntawd hmo no kuv thov nej, cov poj niam ntawm lub Koom Txoos, kom pab yav tom ntej los ntawm nej txoj kev pab muab Ixayees sib sau ua ke.
Nej yuav ua li cas?
Kuv caw nej ua plaub qho:
Qhov ib, kuv caw nej kom tsis txhob siv social media thiab lwm hom media uas ua rau nej xav phem thiab xav tsis dawb huv tau 10 hnub. Thov kom paub tias nej yuav tsis txhob siv dab tsi thaum nej ua li no. Tej uas muaj los ntawm kev tsis siv social media tau 10 hnub los tej zaum yuav ua rau nej xav tsis thoob. Nej xav li cas tom qab nej tsum tsis mloog neeg ntiaj teb lus uas ua rau nej sab ntsuj plig raug mob? Puas tau hloov qhov uas nej xav siv sij hawm thiab siv zog ua dab tsi lawm tam sim no? Nej tej lub hom phiaj puas tau hloov—txawm hloov me me los yog? Kuv yaum nej kom sau thiab ua raws li tej kev tshoov siab uas nej txais tau.
Qhov ob, kuv caw nej nyeem Phau Ntawv Maumoos txij no mus txog thaum xyoo kawg. Txawm nej xav tias nej ua tsis tau vim muaj ntau yam nej ua hauv nej lub neej no, yog nej yuav ua raws li kuv caw nej ua no kawg siab kawg ntsws, tus Tswv yuav pab nej nrhiav ib txoj kev ua li no. Thiab, thaum nej thov Vajtswv pab nej kawm, kuv cog lus tias lub ntuj yuav qhib rau nej. Tus Tswv yuav foom koob hmoov rau nej kom muaj kev tshoov siab thiab kev tshwm sim.
Thaum nej nyeem ntawv, kuv xav kom nej khij txhua nqe uas hais txog tus Cawm Seej. Ces, xav kom nej ua tib zoo hais txog Khetos, zoo siab txog Khetos, thiab qhia txog Khetos rau nej tsev neeg thiab phooj ywg. Nej thiab lawv yuav nyob ze dua li tus Cawm Seej los ntawm tus txheej txheem no. Thiab tej yam yuav pib hloov thiab yuav pib muaj tej txuj ci tseem ceeb.
Tag kis no twb tau tshaj tawm txog kev teem sij hawm thaum Hnub Xya thiab tej txheej txheem qhia ntawv uas yog kev qhia hauv tsev uas lub Koom Txoos yuav txhawb nqa. Kuv cov muam uas kuv hlub es, nej yog lub hauv paus ntawm txoj kev tshiab qhia txoj moo zoo li no. Thov qhia cov uas nej hlub hais tias nej kawm dab tsi los ntawm cov vaj lug kub. Qhia lawv kom paub tig mus rau tus Cawm Seej kom txais tau Nws lub hwj chim kho mob thiab dawb huv thaum lawv ua txhaum. Thiab qhia lawv kom pab txais Nws lub hwj chim ntxiv dag zog txhua hnub hauv lawv lub neej.
Qhov peb, cia li teem sij hawm mus rau lub tuam tsev. Tej zaum nej yuav tsum ua kev txi ntau ntxiv kom ua tau li no. Kev siv sij hawm hauv lub tuam tsev yuav cia tus Tswv qhia nej kom paub siv Nws lub hwj chim pov thawj hwj uas nej tau muab ua vaj txiaj ntsim rau nej hauv Nws lub tuam tsev. Rau nej cov uas tsis nyob ze ib lub tuam tsev, kuv caw nej thov Vajtswv thiab kawm txog cov tuam tsev nyob hauv cov vaj lug kub thiab hauv cov yaj saub tej lus. Cia li thov kom paub ntxiv, to taub ntxiv, txais kev tshoov siab ntxiv txog cov tuam tsev ntau dua li yav tas los.
Nyob hauv kev tshaj tawm rau cov neeg hluas thoob ntiaj teb thaum lub Rau Hli Ntuj tas los, kuv tau hais txog ib tug tub hluas uas hloov siab thaum nws niam nws txiv muab nws lub xov tooj qub pauv nws lub xov tooj smartphone. Tus tub hluas niam yog ib tug poj niam uas muaj kev ntseeg thiab tsis ntshai. Nws pom nws tus tub tab tom xaiv tej yam uas yuav ua rau nws ua tsis tau ib tug tub txib. Nws twb mus thov Vajtswv hauv lub tuam tsev kom paub pab nws tus tub. Ces nws ua raws li txhua yam kev tshoov siab uas nws tau txais.
Nws hais tias: “Tus Ntsuj Plig tau qhia kuv kom paub saib kuv tus tub lub xov tooj thaum twg kuv yuav tsum saib tej yam tseem ceeb. Kuv tsis paub siv tej smartphone li no, tiam sis tus Ntsuj Plig tau coj kuv siv tag nrho cov social media uas kuv yeej ib txwm tsis tau siv! Kuv paub tias tus Ntsuj Plig pab cov niam tsev txiv tsev uas nrhiav kev pov hwm lawv cov me nyuam. [Thaum xub thawj] kuv tus tub chim rau kuv. … Tiam sis tom qab peb hnub xwb, nws tau ua kuv tsaug! Nws yeej paub tias nws tau hloov siab.”
Nws tus tub txoj kev coj cwj pwm thiab coj yam ntxwv twb hloov ntau heev. Nws pab ntau hauv tsev, luag nyav ntxiv, thiab tsom ntsoov thaum nws mus rau tsev koom txoos. Nws nyiam ua hauj lwm hauv lub tuam tsev qhov chaw ua kev cai raus dej thiab npaj ua tub txib.
Qhov plaub uas kuv caw nej cov uas muaj kaum yim xyoo rov saud, yog kom koom nrog lwm tus nyob hauv lub Koom Haum Niam Tsev. Kuv yaum kom nej kawm lub Koom Haum Niam Tsev zaj lus qhia hom phiaj. Zaj no tshoov kuv lub siab heev. Tej zaum zaj no yuav ua rau nej xav sau ib zaj lus qhia hom phiaj rau nej lub neej thiab. Kuv kuj thov kom nej muab siab npuab qhov tseeb nyob hauv lub Koom Haum Niam Tsev kev tshaj tawm uas tau muab luam tawm yuav luag 20 xyoo tas los. Ib daim ntawv txog kev tshaj tawm no los tau muab dai nyob hauv Thawj Pawg Thawj Tswj Hwm hoob kas. Kuv zoo siab kawg txhua zaus kuv nyeem zaj no. Zaj no piav tias nej yog leej twg thiab tus Tswv xav kom nej ua li cas thaum tib lub sij hawm uas nej ua nej txoj hauj lwm kom pab muab Ixayees sib sau ua ke.
Kuv cov muam, peb xav tau nej! Peb “xav tau nej lub zog, nej txoj kev hloov siab los ntseeg, nej txoj kev rau siab, nej txoj kev txawj coj lwm tus, nej lub tswv yim, thiab nej tej kev xav.” Peb yeej muab tsis tau Ixayees sib sau ua ke yog tsis muaj nej.
Kuv hlub nej thiab ua nej tsaug thiab foom koob hmoov rau nej kom nej muaj peev xwm tsis ua li neeg ntiaj teb ua thaum nej pab ua txoj hauj lwm tseem ceeb no. Ua ke peb thiaj ua tau txhua yam uas peb Leej Txiv Saum Ntuj Ceeb Tsheej xav kom peb ua kom npaj neeg rau Nws Leej Tub txoj Kev Los Zaum Ob.
Yexus yog tus Khetos. Nov yog Nws lub Koom Txoos. Kuv ua tim khawv txog qhov no los ntawm Yexus Khetos lub npe, amees.